Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Wastaua  |  Oktoba 2015

Yu Ting Yumi Inap Save Gut Long God?

Yu Ting Yumi Inap Save Gut Long God?

“Yumi no inap long kliagut long God.”—Filo Bilong Aleksandria, em wanpela saveman long taim bilong ol aposel.

“[God] i no stap longwe long yumi olgeta wan wan.”—Sol bilong Tarsus i toktok wantaim ol saveman bilong Atens long taim bilong ol aposel.

TAIM yu ritim dispela tupela tok, wanem tok i wankain long tingting bilong yu? Dispela tok bilong Sol bilong Tarsus, narapela nem bilong en aposel Pol i mekim gut bel bilong planti man. (Aposel 17:26, 27) Baibel i kamapim planti gutpela tok olsem bilong mekim isi bel bilong ol man. Olsem, Jisas i mekim wanpela beten we i kamapim ol gutpela tok i soim ol disaipel bilong em olsem ol inap kisim save long God na kisim ol blesing.—Jon 17:3.

Tasol ol saveman olsem Filo i gat narapela tingting. Ol i tok yumi no inap long save gut long God. Yu ting i stret long holim kain tingting olsem?

Baibel i kamapim klia olsem yumi no inap long kliagut long sampela samting long God. Olsem, yumi no inap long save long hamas haptaim stret Krieta bilong yumi i bin stap, na tu, yumi no inap long skelim savetingting bilong em wantaim ol narapela man, na kliagut long bikpela save bilong em. Maski i olsem, yumi inap long save gut long God. Sapos yumi wok long tingim tingim ol dispela samting, dispela bai helpim yumi long “i go klostu long God.” (Jems 4:8) Yumi ken skelim sampela samting long God em yumi no inap kliagut long en. Na bihain bai yumi stori long ol pasin na tingting bilong God em yumi inap save gut long en.

 Ol Samting Yumi No Inap Kliagut Long En

GOD I SAVE STAP OLTAIM OLTAIM: Baibel i skulim yumi olsem God bai stap “oltaim oltaim.” (Song 90:2) God i no gat kirap bilong em na pinis bilong em. Baibel i tok yumi ol man i “no inap painimaut hamas krismas bilong en.”—Jop 36:26.

Hau dispela i helpim yu: God i tok promis olsem sapos yu kisim save long em bai yu kisim laip oltaim. (Jon 17:3) Yumi inap bilipim dispela tok promis, long wanem, Baibel i tok God em i “King bilong oltaim oltaim.”—1 Timoti 1:17.

TINGTING BILONG GOD: Baibel i tok yumi no “inap long save long olgeta tingting” bilong God, long wanem, tingting bilong em i winim tru bilong yumi. (Aisaia 40:28; 55:9) Olsem na Baibel i tok: “Husat i save long tingting bilong Jehova na bai em inap skulim em?”—1 Korin 2:16.

Hau dispela i helpim yu: God inap long harim planti milion beten long wankain taim. (Song 65:2) Olsem wanem? Yu ting God i tingim planti samting na em i no inap harim ol beten bilong yu? Nogat tru, bikos tingting bilong God i gutpela tru. Na tu, Baibel i tok God i save long taim wanpela pisin i dai, tasol ol man i “winim tru ol dispela liklik pisin.”—Matyu 10:29, 31.

OL PASIN BILONG GOD: Baibel i tok yumi no inap long “save tru long olgeta samting [God] yet i mekim long bipo yet i go inap long bihain tru.” (Saveman 3:11). Yumi “no inap tru long kliagut” long olgeta pasin bilong God na savetingting bilong em. (Rom 11:33) Maski i olsem, God i amamas long kamapim pasin bilong en long ol man i bihainim laik bilong em.—Amos 3:7.

Yumi no inap save long hamas haptaim stret Krieta bilong yumi i stap, na tu, yumi no inap skelim savetingting bilong em, na kliagut long bikpela save bilong em

Hau dispela i helpim yu: Taim yu ritim Baibel na stadi long ol tok bilong en, bai yu kisim save long ol pasin bilong God na olsem wanem em i save helpim yumi. Na taim yumi mekim olsem, bai yumi go klostu moa long Papa bilong yumi long heven na pas gut wantaim em inap oltaim.

Ol Samting Yu Inap Kisim Save Long En

Tru yumi no inap kliagut long sampela samting long God, tasol dispela i no makim olsem yumi no inap save gut long em. Baibel inap helpim yumi long kisim save long God. Yumi ken stori long sampela eksampel:

NEM BILONG GOD: Baibel i skulim yumi olsem God i gat nem. God i tok: “Mi Jehova. Em nem bilong mi.” Nem bilong God i stap long Baibel inap olsem 7,000 taim winim olgeta narapela nem.—Aisaia 42:8NW.

Hau dispela i helpim yu: Long beten bilong Bikpela, Jisas i tok: “Papa bilong mipela long heven, nem bilong yu i mas i stap holi.” (Matyu 6:9) Olsem wanem? Yu save kolim nem bilong God taim yu beten long en? Jehova i redi long kisim bek olgeta manmeri i soim rispek long nem bilong em.—Rom 10:13.

PLES GOD I STAP LONG EN: Baibel i stori olsem i gat 2-pela “ples,” em heven na graun. (Jon 8:23; 1 Korin 15:44) Planti taim Baibel i kolim dispela tok “heven” long makim ples ol spirit i stap long en. Krieta bilong yumi i stap long “ples bilong [en] long heven.”—1 King 8:43.

Hau dispela i helpim yu: Bai yu kliagut long God i husat tru. Krieta bilong yumi i no wanpela strong i stap long olgeta hap, nogat. Jehova em wanpela Man i stap tru long ples antap. Maski i olsem, “i no gat wanpela samting God i wokim i stap hait na em i no inap lukim, nogat.”—Hibru 4:13.

 PASIN BILONG GOD: Jehova i gat ol gutpela pasin. Baibel i tok: “God em i pasin laikim.” (1 Jon 4:8) Na em i no save giaman. (Taitus 1:2) God i save mekim wankain pasin long olgeta man, em i gat pasin sori, na em i no save belhat kwik. (Kisim Bek 34:6; Aposel 10:34) Planti man bai kirap nogut long save olsem Krieta bilong yumi i laik stap “pren tru” bilong ol man i soim rispek long em.—Song 25:14.

Hau dispela i helpim yu: Yu inap long i stap pren bilong Jehova. (Jems 2:23) Taim yu save gut long ol pasin bilong em, yu inap kliagut long ol stori bilong Baibel.

‘WOK STRONG LONG KISIM SAVE LONG EM’

Baibel i helpim yumi long kisim stretpela save long God Jehova. Krieta bilong yumi i laik bai yumi mas kisim save long en. Baibel i tok promis olsem: “Sapos yu wok strong long kisim save long . . . em, orait bai em i larim yu i save gut long em.” (1 Stori 28:9) Yu inap kisim save long God long rot bilong ritim ol stori bilong Baibel na tingim tingim ol dispela tok. Taim yu mekim olsem, Baibel i tok promis olsem God “bai kam klostu long yupela.”—Jems 4:8.

Taim yu stadi long Baibel, bai yu kisim save long God na ol pasin bilong em

Ating bai yu gat askim olsem, ‘Hau mi inap stap pren bilong Krieta sapos mi no kliagut long olgeta tingting na pasin bilong em?’ Tingim dispela: Sapos bes pren bilong yu em dokta bilong katim man, dispela i no makim olsem yu tu i mas i gat wankain save olsem em, nogat. Ating yu bin kisim skul long mekim narapela wok. Maski i olsem, yupela inap long i stap olsem ol gutpela pren. Bikpela samting em olsem, yutupela i save gut long pasin bilong narapela narapela, ol samting yupela i laikim, na ol samting yupela i no amamas long en. Olsem tasol, long rot bilong Baibel yu inap save long tingting na pasin bilong Jehova, na dispela bai strongim pasin pren bilong yu wantaim Em.

Ol tok bilong Baibel i helpim yumi long kisim save long God i husat tru. Yu laik kisim sampela save moa long God Jehova? Ol Witnes Bilong Jehova i save mekim ol fri Baibel stadi kos wantaim ol man. Mipela i laik singautim yu long toktok wantaim ol Witnes long hap yu stap long en, o yu ken go long Web-sait bilong mipela em www.jw.org/tpi.