Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Wastaua  |  Oktoba 2015

 FRAN PES STORI | YU TING BETEN INAP HELPIM YU?

Bilong Wanem Ol Man i Save Beten?

Bilong Wanem Ol Man i Save Beten?

“Mi man bilong pilai laki long olgeta taim. Mi save beten na bai mi ken winim bikpela mani tru, tasol i no gat wanpela taim mi win.”—Samuel, * Kenya.

“Taim mi stap long skul, ol i lainim mipela long kolim kolim ol beten em mipela i save long en.”—Teresa, Filipins.

“Mi save beten taim mi gat hevi. Mi beten long God i ken fogivim mi na helpim mi long kamap gutpela Kristen.”—Magdalene, Gana.

Ol tok em Samuel, Teresa, na Magdalene i kamapim i soim olsem i gat planti risen na ol man i save beten. Sampela man i beten long ol bikpela samting, sampela i pilim tru ol tok ol i kolim, na ol narapela i save kolim nating ol tok long beten. Na planti handret milion man i ting olsem i stret ol i beten long God i helpim ol long mekim gut eksem bilong ol, helpim feiveret spots tim bilong ol long win, famili bilong ol i ken stap gut, na planti arapela samting. Ol wok painimaut i soim olsem maski ol man i no bilong wanpela lotu, ol i save beten oltaim.

Olsem wanem? Yu save beten? Bilong wanem yu beten? Maski yu gat pasin bilong beten o yu beten wan wan taim tasol, ating bai yu gat askim olsem: ‘Pasin bilong beten inap helpim mi? I gat wanpela i harim beten bilong mi?’ Wanpela man bilong raitim ol buk i tok pasin bilong beten em “wanpela rot bilong kisim bel isi.” Sampela dokta i gat wankain tingting, na ol i tok pasin bilong beten “i olsem marasin.” Olsem wanem? Ol man i beten bilong kolim nating ol tok o em rot bilong mekim isi bel bilong ol?

Baibel i tok pasin bilong beten em rot bilong kisim bel isi. Na tu, em i kamapim klia olsem i gat Man i harim ol beten bilong yumi taim yumi bihainim stretpela pasin na beten long ol gutpela samting. Yu ting dispela tok i tru? Yumi ken skelim tok Baibel i mekim.

^ par. 3 Mipela i senisim sampela nem.