Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Wastaua  |  Septemba 2015

Baibel Bilong Bedell—Helpim Ol Man Long Kliagut Long Tok Bilong Baibel

Baibel Bilong Bedell—Helpim Ol Man Long Kliagut Long Tok Bilong Baibel

LONG yia 1627, William Bedell em wanpela pris bilong Inglan i go long Aialan. Em i luksave olsem planti man long Aialan i bilong lotu Katolik, tasol lotu Protestan bilong Inglan i bosim dispela kantri. Na ol i trensletim Baibel i go long tokples bilong ol asples lain long planti kantri bilong Yurop. Tasol ol i no trensletim Baibel i go long tok Aialan.

Bedell i bilip olsem “lain bilong Aialan i mas i gat Baibel long tokples bilong ol, maski ol i no save long tok Inglis.” Olsem na em i tingting long trensletim Baibel i go long tok Aialan. Tasol ol man i birua long em, moa yet em lain bilong lotu Protestan. Bilong wanem ol i birua long Bedell?

OL MAN I BIRUA LONG BAIBEL LONG TOK AIALAN

Bedell i kirap long lainim tok Aialan. Taim em i kamap prinsipol bilong Trinity College long Dublin na bihain em i stap bisop long Kilmore, em i kirapim ol sumatin long mekim tok Aialan. Taim Kwin Elizabeth Namba 1 bilong Inglan i kamapim Trinity College, em i laik bai ol pasto i skulim ol sumatin long Baibel long tokples bilong ol yet. Olsem na Bedell i laik bihainim dispela tingting bilong kwin.

Klostu olgeta man long ol sios long Kilmore i save mekim tok Aialan. Olsem na Bedell i strong long ol i mas kisim ol pasto i mekim tok Aialan. Em i bihainim stiatok bilong aposel Pol long Baibel long 1 Korin 14:19, olsem: “Insait long kongrigesen mi laik kolim 5-pela tok ol man inap kliagut long en, na bai mi ken skulim ol, na maski long mekim 10,000 tok long narapela tokples ol man i no kliagut long en.”

Tasol ol bikman i traim long pasim Bedell long mekim olsem. Ol saveman i tok, sampela man i ting sapos ol man i mekim tok Aialan, dispela inap “bagarapim ol lo bilong kantri,” na ol arapela i tok “dispela i no tingting bilong gavman.” Sampela man i ting gavman bilong Inglan i mekim olsem bilong daunim lain bilong Aialan. Bilong mekim olsem, Inglan i kamapim ol lo i tokaut olsem lain bilong Aialan i mas lusim kastam na tokples bilong ol, na ol i mas lainim tok Inglis na bihainim pasin na tingting bilong lain Inglan.

BEDELL I TRENSLETIM BAIBEL

Bedell i no larim tingting na lo bilong Inglan long pasim wok bilong trensletim Baibel. Long yia 1635 samting, Bedell i trensletim Baibel (King James Version bilong 1611) long tok Inglis i go long tok Aialan. Em i laik trensletim Baibel em planti man inap long ritim na kliagut long tok bilong en. Em i luksave olsem sapos Baibel i no stap long tokples bilong ol, orait ol man i no inap long ritim na kisim save long tok i tru bilong laip oltaim.—Jon 17:3.

 I gat narapela man tu i luksave long dispela hevi. Klostu 30 yia paslain long Bedell i trensletim Baibel, William Daniel em narapela bisop i bin luksave olsem i hatwok tru long ol man long kisim save long Baibel sapos i “no stap long tokples bilong ol.” Daniel i trensletim Ol Kristen Grik Skripsa i go long tok Aialan. Olsem na Bedell i mas trensletim Ol Hibru Skripsa i go long tok Aialan. Dispela i makim olsem William Daniel na Bedell i bin trensletim Baibel em ol i kolim Baibel bilong Bedell. Baibel bilong Bedell em fes Baibel we ol i tanim olgeta tok bilong en long tok Aialan. Bihain ol man i no trensletim Baibel long tok Aialan inap olsem 300 yia samting.

Bedell em wanpela saveman bilong Hibru i askim 2-pela asples man i save mekim tok Aialan long helpim em long trensletim Baibel long tok Inglis i go long tok Aialan. Em i wok wantaim 1-pela o 2-pela man long sekim gut na skelim gen olgeta wan wan ves ol i trensletim na bai ol tok bilong en i stret. Bilong helpim ol long mekim dispela wok, ol i yusim wanpela manuskrip bilong Baibel long tok Hibru, ol i ritim Baibel Grik Septuagint, na tu, ol i skelim ol rait long tok Itali em Giovanni Diodati em tisa bilong lotu long Swiselan i bin raitim.

Dispela lain i bihainim pasin bilong ol man bilong trensletim Baibel King James Version na ol i putim nem bilong God long planti hap we i bin i gat dispela nem long en. Ating Bedell i save long planti bilong ol dispela man. Olsem, long Kisim Bek 6:3, ol i raitim nem bilong God olsem“Iehovah.” Ol olpela rait bilong Bedell i stap long laibreri bilong Marsh long Dublin, Aialan.—Lukim blok “Tingim Wok Bilong Bedell Long Trensletim Baibel.”

 OL I PRINIM BAIBEL BILONG BEDELL

Long yia 1640 samting, Bedell i pinisim wok bilong trensletim Baibel. Tasol em i no inap long prinim dispela Baibel. Bilong wanem? Wanpela risen em ol man i birua long em. Ol birua bilong Bedell i mekim ol tok giaman long bagarapim gutnem bilong man i go pas long helpim em long trensletim Baibel, na bai ol man i no ken ritim Baibel ol i trensletim. Na tu, ol i arestim Bedell na putim em long kalabus. Na long yia 1641, ol man bilong Aialan i protes na pait long lain Inglan. Maski Bedell i man bilong Inglan, ol man long Aialan i tingim na lukautim em, long wanem, ol i save olsem em i laik helpim ol. I no longtaim na ol soldia bilong Inglan i putim em long wanpela kalabus nogut. Olsem na long yia 1642 Bedell i dai, na em i no bin stap long lukim ol i prinim Baibel.

Fran pes bilong olpela rait bilong Bedell, long 1640 samting, na Baibel ol i prinim long 1685

Ol man i bin bagarapim haus bilong Bedell, na klostu olgeta wok bilong em i lus nating. Tasol i gutpela tru olsem wanpela pren bilong en i bin kisim ol dispela pepa ol i bin trensletim. I no longtaim na Narcissus Marsh husat i kamap asbisop bilong Armagh na bisop bilong Sios Bilong Aialan i kisim ol dispela pepa na lukautim. Na em i kisim helpim long saientis Robert Boyle long sait bilong mani, na long dispela rot em i prinim Baibel bilong Bedell long yia 1685.

OL MAN I KISIM BIKPELA HELPIM

Planti man i no save long Baibel bilong Bedell. Maski i olsem, ol man husat i mekim tok Aialan i kisim bikpela helpim. Nau ol inap kliagut long tok bilong Baibel taim ol i ritim long tokples bilong ol. Dispela i helpim tu ol man bilong Skotlan na ol man i stap long planti arapela ples. Taim ol i ritim Baibel long tokples bilong ol, ol inap kliagut long Tok Bilong God.—Matyu 5:3, 6.

“Taim mipela i ritim Baibel Bedell i trensletim long tokples bilong mipela stret, dispela i helpim mi na famili bilong mi long kliagut long tok i tru bilong Baibel”

Long nau, Baibel bilong Bedell i helpim planti man i mekim tok Aialan long kisim save long tok i tru bilong Baibel. Wanpela man Aialan husat i kisim save long tok bilong Baibel i tok: “Taim mipela i ritim Baibel Bedell i trensletim long tokples bilong mipela stret, dispela i helpim mi na famili bilong mi long kliagut long tok i tru bilong Baibel.”