Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Wastaua  |  Septemba 2015

 FRAN PES STORI | OL WITNES BILONG JEHOVA I HUSAT?

Hau Mipela i Kisim Mani Long Mekim Wok Autim Tok?

Hau Mipela i Kisim Mani Long Mekim Wok Autim Tok?

Long olgeta yia, mipela i save prinim na tilim planti handret milion Baibel, na ol buk na nius bilong Baibel. Long olgeta hap bilong graun, mipela i wokim ol brens ofis na ol faktori bilong prinim ol buk na nius. Planti tausen kongrigesen i bung long ol naispela ples bilong mekim lotu em mipela i save kolim Haus Kingdom. Hau mipela i kisim mani bilong mekim olgeta dispela wok?

Mipela i mekim olgeta dispela wok long rot bilong ol kontribusen ol man i givim long laik bilong ol yet. (2 Korin 9:7) Long 1879, namba 2 Wastaua mipela i wokim i tok: “Mipela i bilip olsem JEHOVA i sambai long ‘Zion’s Watch Tower,’ [pastaim ol i kolim dispela nius long dispela nem] na taim em i wok yet long helpim wok bilong en, orait [dispela nius] i no ken krai o singaut long ol man na askim ol long givim mani long en.” Mipela i bihainim yet dispela pasin.

Ol man i save salim ol kontribusen bilong ol i go long wanpela bilong ol brens ofis bilong mipela, o ol i save putim mani long ol kontribusen boks long ol Haus Kingdom. Mipela i no save salim plet, makim hamas mani stret man i mas givim long ol buk na nius bilong mipela, na makim pe long ol wok mipela i mekim. Na tu, mipela i no save kisim pe long mekim wok autim tok, skulim ol man long kongrigesen, na long wokim ol ples bung bilong mekim lotu. Na dispela i stret wantaim tok bilong Jisas olsem: “Yupela i kisim fri, olsem na yupela i mas givim fri.” (Matyu 10:8) Olgeta man i wok long ol brens ofis na wol hetkota bilong mipela i no save kisim pe long ol wok ol i mekim. Na dispela i makim tu lain Gavening Bodi Bilong Ol Witnes Bilong Jehova.

“Ol man i givim donesen long laik bilong ol yet na dispela i helpim wok lotu bilong ol Witnes Bilong Jehova. Ol man yet i makim hamas mani ol i laik givim long taim ol inap long mekim olsem.”—Yuropian Kot ov Human Raits, 2011

Mipela i yusim tu ol kontribusen ol man i givim bilong helpim ol man long taim bilong disasta. Ol Kristen long taim bilong ol aposel i bin amamas long helpim ol man i bungim hevi. (Rom 15:26) Olsem tasol, mipela i helpim ol man i bungim hevi long rot bilong wokim na stretim ol haus bilong ol, givim klos na kaikai na marasin samting long ol.