Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Wastaua  |  Julai 2015

Yu Save Long Dispela?

Yu Save Long Dispela?

Hau ol man bilong bipo i yusim ol ston bilong wilwilim wit?

Long bipo, ol man i save yusim ol ston bilong wilwilim wit i kamap plaua bilong wokim bret. Ol meri na ol wokman i save yusim ol ston bilong wilwilim wit long olgeta de, olsem na ol man i save long krai bilong en.—Kisim Bek 11:5; Jeremaia 25:10.

Ol piksa na ol ston samting bilong lain Isip bilong bipo i soim pasin bilong wilwilim wit. Ol i save yusim bikpela ston na liklik ston long brukim wit. Pastaim, ol i sapim namel bilong bikpela ston i go daun liklik. Na taim ol i laik wilwilim wit, ol i mas putim wit antap long dispela ston na yusim liklik ston long brukim wit. Bilong mekim olsem, ol i nildaun na yusim tupela han long muvim liklik ston i go i kam bilong brukim wit. Wanpela buk i tok hevi bilong ol dispela liklik ston i namel long 2 na 4 kilogram samting. Sapos ol man i yusim dispela ston long paitim narapela, ol inap long kilim ol i dai.—Hetman 9:50-54.

Long bipo, ol famili i save yusim ol ston bilong wilwilim wit long wokim plaua na bret samting, olsem na Baibel i putim lo olsem man i no ken kisim ston bilong wilwilim wit bilong narapela. Long Lo 24:6, Baibel i tok: ‘Sapos man i dinau long yupela, na yupela i laik bai em i mas bekim dinau, orait yupela i no ken kisim ol ston bilong wilwilim rais samting bilong en. Nogut yupela i kisim na em i no inap redim ol kaikai bilong en.’

Dispela tok “stap klostu long bros” i makim wanem samting?

Baibel i tok, Jisas “i stap klostu long bros bilong Papa.” (Jon 1:18) Na dispela i makim olsem Jisas i pas gut wantaim Papa bilong em na Em i laikim em tru. Dispela tok i helpim yumi long kliagut long pasin bilong ol Juda long taim ol i sindaun na kaikai wantaim.

Long taim bilong Jisas, ol Juda i save sindaun long ol sia i luk olsem bet long taim ol i laik kaikai. Ol i save slip na putim left elbo long sia bilong sapotim ol, na rait han i stap fri long kaikai na dring samting. Wanpela buk i tok, ol man i kaikai i slip long left sait bilong narapela narapela, olsem na “het bilong wanpela bai stap klostu long bros bilong man i slip klostu long em, na dispela i makim olsem em ‘i slip klostu long bros bilong narapela man.’”

Ol Juda i ting em i gutpela pasin tru sapos wanpela i slip na putim het bilong en klostu long bros bilong papa bilong haus o man i singautim ol long kaikai. Olsem na long laspela Pasova bilong Jisas, aposel Jon em “dispela disaipel Jisas i laikim tru,” em i bin “putim het bilong en long bros bilong Jisas” taim em i givim askim long em.—Jon 13:23-25; 21:20.