De Bilong Kot em i wanem samting?

Bilong wanem de bilong kot em taim bilong amamas?

Long taim bilong ol man i bin raitim Baibel, God i makim ol hetman long lukautim lain bilong em na bai ol birua i no ken mekim nogut long ol. (Hetman 2:18) Baibel i tok long De Bilong Kot bai kamap bihain olsem em i taim bilong amamas, long wanem, Jehova em Jas bilong graun olgeta, em bai lukautim olgeta manmeri na kisim bek ol long pasin i no stret.—Ritim Song 96:12, 13; Aisaia 26:9.

God i makim Jisas long stap olsem jas bilong ol man i stap laip na bilong ol man i dai pinis. (Aposel 10:42; 17:31) Planti man i dai paslain long ol i kisim save long God. Tasol long De Bilong Kot, Jisas bai kirapim bek ol dispela man na ol tu inap kisim save long God na laikim em tru.—Ritim Aposel 24:15.

Bilong wanem De Bilong Kot bai stap inap wan tausen yia?

Ol man i dai pinis bai kirap bek insait long wan tausen yia. (Revelesen 20:4, 12) Olsem na sampela haptaim i mas lus na bai ol dispela man i ken kisim save long God na bihainim tok bilong Em. Baibel i tok God bai skelim pasin ol dispela man i mekim insait long dispela haptaim bihain long ol i bin kirap bek.—Ritim Rom 6:7.

Baibel i stori tu long narapela de bilong kot we bai kamap paslain long wan tausen yia i kirap. Dispela de bilong kot em taim bilong pinis, em yumi bin stori long en long ol atikol paslain long dispela. Insait long dispela haptaim, God bai bagarapim ol man i sakim tok bilong em. (2 Pita 3:7) Olsem na yumi mas wok strong long kamapim olsem yumi laikim tru God.—Ritim 2 Pita 3:9, 13.