Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Wastaua  |  Mas 2015

 OL MAN I ASKIM . . .

Yu Ting i Stret Ol Kristen i Selebretim Ista?

Yu Ting i Stret Ol Kristen i Selebretim Ista?

Buk Encyclopædia Britannica i tok Ista i “nambawan bikpela de bilong lotu Kristen, ol i save mekim dispela bung bilong tingim Kirap Bek bilong Jisas Krais.” Tasol yu ting i stret long ol Kristen i selebretim Ista?

Taim ol saveman i painim wanpela tul samting bilong bipo, ol i save mekim ol arapela wok painimaut bilong save olsem tru tru ol man i yusim ol dispela samting long bipo. Olsem tasol i gutpela long kisim sampela save moa long Ista, na bai yumi ken save olsem em wanpela bung Kristen o nogat.

Tingim, Jisas i bin tokim ol disaipel bilong em long mekim bung bilong tingim dai bilong em, na i no kirap bek bilong em. Aposel Pol i kolim dispela bung olsem “kaikai bilong Bikpela.”—1 Korin 11:20; Luk 22:19, 20.

Na tu, dispela buk Britannica i tok, kirap bek bilong Jisas “i no insait long ol samting ol man i mekim long Ista, nogat. Ol pasin na stori nating bilong ol tumbuna i as bilong en.” Buk The Encyclopedia of Religion i stori long ol samting ol man i yusim bilong selebretim Ista olsem kiau na ol rabit na i tok: “Nupela laip i kamap taim kiau i bruk. Na rabit i makim pasin bilong kamapim planti pikinini, na dispela i makim taim bilong san i kamap na ol kaikai i redi long gaden.”

Philippe Walter em saveman bilong ol buk ol i bin raitim long bipo i stori long olsem wanem ol pasin na stori nating bilong ol tumbuna i kamapim bung bilong Ista. Em i tok, “taim ol man i bungim ol bilip bilong lotu haiden wantaim lotu Kristen,” nau rot i op long ol Kristen i selebretim bung bilong ol haiden. Olsem na ol man i mekim bung bilong selebretim “taim bilong kol i pinis, na taim bilong san i kamap” wantaim kirap bek bilong Jisas. Saveman Walter i tok moa olsem dispela i mekim na ol man i putim “ol bikpela de bilong ol Kristen” long kalenda bilong ol haiden, na long dispela rot ol i pulim planti haiden long kam insait long lotu Kristen.

Long taim bilong ol aposel, ol aposel i bin “pasim rot” bilong ol lotu haiden na ol bilip bilong ol i no kam insait long lotu Kristen. (2 Tesalonaika 2:7) Aposel Pol i bin givim tok lukaut olsem, taim em i ‘lusim ol pinis,’ sampela man bai “kirap na mekim ol tok kranki bilong pulim ol disaipel i go bihainim ol.” (Aposel 20:29, 30) Na klostu long pinis bilong taim bilong ol aposel, aposel Jon i tok sampela man i kirap pinis long giamanim ol Kristen na pulim ol long lusim lotu i tru. (1 Jon 2:18, 26) Dispela i opim rot long lotu Kristen i kisim ol pasin na bilip haiden.

“Yupela i no ken pas wantaim ol man i no bilip.”—2 Korin 6:14

Tasol sampela man bai ting, i no gat rong long larim ol pasin bilong Ista i kam insait long lotu Kristen, long wanem, dispela i helpim ol haiden long kliagut long kirap bek bilong Jisas. Tasol yumi save, Pol i no inap wanbel long dispela tingting. Maski em i raun long planti hap em Gavman Rom i bosim, em i no kisim ol pasin na bilip bilong ol dispela lain bambai em i ken stori gut long ol man long Jisas, nogat. Em i bin givim tok lukaut long ol Kristen olsem: “Yupela i no ken pas wantaim ol man i no bilip. Olsem wanem? Stretpela pasin na pasin bilong sakim lo, tupela i ken poroman wantaim? O olsem wanem, lait i ken bung wantaim tudak? Jehova i tok: ‘Yupela i mas lusim ol, na stap longwe long ol,’ ‘na no ken tatsim samting i no klin.’”—2 Korin 6:14, 17.

Yumi bin skelim ol stori bilong Ista na dispela i givim wanem skul long yumi? I klia tru olsem ol Kristen i no save selebretim bung bilong Ista.