Skip to content

Skip to table of contents

Ol Witnes Bilong Jehova

Makim tokples Tok Pisin

“Yupela i No Ken Seksek Nating”

“Yupela i No Ken Seksek Nating”

“Yupela i no ken seksek nating.”—SEF. 3:16.

OL SINGSING: 81 [54], 32

1, 2. (a) Planti manmeri long nau i bungim wanem ol hevi, na dispela i mekim wanem long ol? (b) Aisaia 41:10, 13 i mekim wanem gutpela tok bilong strongim bel bilong yumi?

WANPELA sista i mekim wok painia oltaim na man bilong em i mekim wok elda. Dispela sista i tok: “Maski mi mekim gut olgeta samting long wok lotu, inap planti yia mi karim hevi bilong tingting planti. Dispela i mekim na mi no save slip gut, na helt bilong mi i bagarap, na mi hatwok long mekim gut long ol arapela. Sampela taim mi pilim olsem mi laik givap tasol.”

2 Olsem wanem? Yu pilim hevi bilong dispela sista? Satan i bosim graun na dispela i putim bikpela presa long ol man na ol i pilim olsem hevi i daunim ol. Dispela i kain olsem anka i stopim sip long muv. (Snd. 12:25) Wanem ol samting inap putim kain presa olsem long yu? Ating wanpela yu laikim tru i dai, bikpela sik i painim yu, ol narapela i birua long yu, o yu hatwok long lukautim famili long dispela taim i gat hevi bilong mani. Taim yu bel hevi na tingting planti, dispela inap pinisim strong bilong yu. Na tu, dispela pasin inap pinisim amamas bilong yu. Tasol yu ken bilip tru olsem God i redi long helpim yu.—Ritim Aisaia 41:10, 13.

3, 4. (a) Baibel i kolim “han” long mekim tok piksa long wanem samting? (b) Wanem ol samting inap mekim na yumi pilim olsem yumi laik givap?

 3 Baibel i kolim ol hap bilong bodi olsem tok piksa bilong makim sampela pasin o ol samting ol man i mekim. Taim ol i raitim Baibel long namba 1 taim, inap planti handret taim Baibel i kolim han long ol tok piksa. Baibel i kolim pasin bilong strongim han bilong narapela, na dispela i makim pasin bilong kirapim na strongim narapela long mekim wanpela wok. (1 Sml. 23:16, NW; Esr. 1:6) Na tu, dispela hap tok i makim olsem man i holim stretpela tingting na em i bilip olsem gutpela samting bai kamap.

4 Taim Baibel i tok man i larim han i hangamap nating, dispela i makim olsem man i bel hevi na pilim olsem em i no gat hop. (2 Sto. 15:7, NW; Hib. 12:12) Kain samting olsem i save mekim man i givap. Sapos sampela samting i putim presa long yu o mekim yu bel hevi na yu no amamas long mekim wok lotu, orait olsem wanem yu inap kisim bek strong? Wanem ol samting inap helpim yu long sanap strong yet na karim hevi, na kisim amamas?

“NO KEN TING, BIKPELA I NO GAT STRONG BILONG KISIM BEK YUPELA”

5. (a) Ol hevi inap mekim wanem long yumi? (b) Yumi mas tingim gut wanem tok promis bilong God? (c) Yumi bai stori long wanem samting?

5 Ritim Sefanaia 3:16, 17. Sapos yumi pret na bel hevi na yumi larim dispela i daunim yumi, i olsem yumi larim han bilong yumi i hangamap nating. Papa bilong yumi Jehova i wari long yumi, na em i laik bai ‘yumi mas putim olgeta hevi bilong yumi long han bilong em.’ (1 Pita 5:7) Yumi mas tingim gut tok em God i mekim long lain Israel. Em i tok: “Yupela i no ken ting, [mi] no gat strong bilong kisim bek yupela.” (Ais. 59:1) Yumi bai skelim 3-pela stori bilong Baibel we i kamapim klia olsem Jehova i redi tru long strongim ol manmeri bilong em long mekim laik bilong em maski sampela samting i putim hevi long ol. Orait yumi bai kisim save nau long olsem wanem ol dispela stori inap strongim yumi.

6, 7. Yumi kisim wanem ol skul long stori bilong ol Israel i winim ol Amalek?

6 Bihain tasol long God i wokim mirakel na kisim bek lain Israel long wok kalabus long Isip, lain Amalek i pait long ol. Josua i strongim bel na em i bihainim tok bilong Moses na lidim ol soldia bilong Israel na ol i go bilong pait long ol Amalek. Moses i kisim Aron na Hur, na ol i go antap long wanpela liklik maunten i stap klostu bambai ol inap lukluk i go daun long ples bilong pait. Yu ting dispela 3-pela man i pret long pait na ol i ranawe? Nogat tru!

7 Moses i bihainim plen we i helpim ol Israel long winim pait. Moses i holim stik bilong God na em i apim i go antap. Taim Moses i mekim olsem, Jehova i strongim han bilong ol soldia bilong Israel na ol i wok long winim ol Amalek. Tasol taim han bilong Moses i taiet na em i slekim han i kam daun, ol Amalek i kirap gen long winim ol Israel. Aron na Hur i luksave long dispela samting, olsem na tupela “i kisim wanpela ston na putim long graun na Moses i sindaun long en. Na tupela i sanap klostu long Moses long hap na long hap na holim han bilong en antap. Tupela i holim i stap inap san i go daun.” Tru tumas, God i strongim lain Israel na ol i winim pait.—Kis. 17:8-13.

8. (a) Taim lain Itiopia i laik pait long lain Juda, Asa i mekim wanem? (b) Olsem wanem yumi inap bihainim pasin bilong Asa long kisim helpim long God?

8 Long taim bilong King Asa, Jehova i kamapim klia olsem em i gat bikpela strong. Baibel i stori long planti pait i bin kamap. Long wanpela pait, lain ami bilong Itiopia i kam bung, na Sera em man i stap lida bilong ol. Dispela lain ami i bikpela lain tru, inap olsem 1 milion soldia husat i save gut long pait, na namba bilong ol i winim namba bilong olgeta narapela ami.  Asa i no gat planti soldia, olsem na 1-pela soldia bilong em bai pait long 2-pela soldia bilong Sera. Tingim: Asa inap tingting planti na pret na pilim olsem ol Itiopia bai daunim ol, i olsem em i slekim han bilong em. Tasol Asa i no mekim olsem, nogat. Kwiktaim em i askim Jehova long helpim em. Long tingting bilong ol man bilong pait, ol soldia bilong Asa i no gat rot long winim ol Itiopia. “Tasol God inap mekim olgeta samting.” (Mat. 19:26) God i soim bikpela strong bilong em na em “i daunim ol Sudan,” em lain Itiopia. God i helpim Asa bikos “oltaim [Asa] i save laikim tumas Bikpela na i aninit tru long em.”—2 Sto. 14:8-13; 1 Kin. 15:14.

9. (a) Wanem hevi i kamap, tasol Nehemia i no larim dispela i pasim em long sanapim gen banis bilong Jerusalem? (b) Olsem wanem God i bekim beten bilong Nehemia?

9 Tingim Nehemia: Em i pilim olsem wanem taim em i go bek na lukim ol samting i kamap long Jerusalem? I no gat wanpela samting i banisim taun long han bilong ol birua, na ol Juda i stap bel hevi tru. Ol birua i pretim ol Juda na ol i lusim wok bilong sanapim gen banis bilong Jerusalem, i olsem ol i slekim han bilong ol. Yu ting dispela i mekim na Nehemia tu i givap, na i olsem em i slekim han bilong em? Nogat! Em i bihainim pasin bilong Moses, Asa, na ol narapela wokman bilong Jehova, em ol i save beten askim Jehova long helpim ol. Olsem na taim Nehemia i lukim hevi long Jerusalem, em i beten askim God long helpim ol. Ating ol Juda i pilim olsem ol birua i pasim olgeta rot bilong ol long mekim wok, tasol Jehova i harim beten bilong Nehemia. God i gat “bikpela strong,” olsem na em i strongim ol Juda, i olsem em i strongim han bilong ol. (Ritim Nehemia 1:10; 2:17-20; 6:9.) Yu ting long nau Jehova i save yusim “bikpela strong” bilong em long helpim ol wokman bilong em?

JEHOVA BAI STRONGIM HAN BILONG YU

10, 11. (a) Satan i yusim wanem ol samting long mekim yumi givap na slekim han? (b) Jehova i yusim wanem samting long strongim yumi? (c) Yu yet i kisim wanem helpim long skul tiokratik, ol miting, na ol kibung?

10 Yumi save olsem Satan i no inap slekim han bilong em long mekim ol samting bilong stopim wok lotu bilong yumi. Em i save yusim ol gavman, ol bikman bilong lotu, na ol apostet, long mekim ol tok giaman na pretim yumi. Wai na Satan i mekim olsem? Em i laik mekim yumi slek long autim gutnius bilong Kingdom, i olsem em i laik bai yumi pilim taiet na slekim han bilong yumi. Tasol Jehova i redi long yusim holi spirit long strongim yumi. (1 Sto. 29:12) Yumi mas larim spirit bilong God i stiaim yumi bambai yumi inap sanap strong taim Satan na pasin nogut bilong dispela graun i putim hevi long yumi. (Sng. 18:39; 1 Kor. 10:13) Na tu, yumi amamas olsem yumi gat Baibel, em buk we holi spirit i kamapim ol tok bilong en. Long olgeta mun, yumi save kisim skul long ol tok bilong Baibel na dispela i save strongim bilip bilong yumi. Taim ol i wok long sanapim gen banis bilong Jerusalem, God i mekim tok promis i stap long Sekaraia 8:9, 13 (ritim), na dispela tok i stret long yumi long nau.

11 Yumi save kisim skul bilong God long rot bilong ol miting, ol kibung, na ol skul tiokratik, na dispela i save strongim yumi. Dispela skul inap helpim yumi long holim stretpela tingting, putim ol mak yumi laik winim long sait bilong wok lotu, na inapim wok Kristen bilong yumi. (Sng. 119:32) Olsem wanem? Yu save mekim olgeta samting yu inap mekim bilong kisim strong long kain skul olsem?

12. Yumi mas mekim wanem bambai yumi inap stap strong long bilip?

12 Jehova i bin helpim ol Israel long winim ol Amalek na ol Itiopia, na em i strongim Nehemia na ol wanwok bilong em long pinisim wok bilong sanapim gen banis bilong taun. Olsem  tasol, God bai strongim yumi bambai yumi inap mekim yet wok autim tok maski ol man i birua long yumi, ol i les long putim yau, na ol narapela samting i mekim yumi tingting planti. (1 Pita 5:10) Yumi no ken ting olsem Jehova bai wokim mirakel bilong helpim yumi, nogat. Yumi yet i mas mekim sampela samting. Yumi mas ritim Baibel long olgeta de, redim ol miting na i go long ol miting long olgeta wik. Na tu, yumi mas mekim ol samting bilong strongim bel na tingting bilong yumi, olsem pesenel stadi, famili lotu, na oltaim yumi mas beten askim Jehova long helpim yumi. Yumi no ken larim ol narapela samting i pasim yumi long kisim helpim long rot bilong ol samting em Jehova i yusim long strongim yumi. Sapos yu luksave olsem han bilong yu i slek long mekim wanpela bilong ol dispela samting, orait yu mas askim God long helpim yu. Luksave long olsem wanem spirit bilong ‘em i kirapim laik bilong yu na i strongim yu long mekim ol samting em yet i laikim.’ (Fili. 2:13) Tasol olsem wanem yu inap strongim han bilong ol arapela?

STRONGIM HAN I SLEK

13, 14. (a) Wanem ol samting i strongim wanpela brata bihain long meri bilong em i dai? (b) Yumi inap strongim ol narapela long wanem ol rot?

13 Jehova i opim rot na yumi gat ol bratasista long olgeta hap bilong graun em ol i tingim tru yumi na ol inap strongim yumi. Aposel Pol i tok: “Sapos han bilong man i hangamap i stap, orait mekim i kamap strong. Na sapos lek bilong man i no gat strong, orait mekim i kamap strong. Na wokabaut yet long stretpela rot.” (Hib. 12:12, 13) Planti Kristen long taim bilong ol aposel i bin kisim kain helpim olsem long sait bilong bilip. Wankain samting olsem i kamap long nau. Bihain long meri bilong wanpela brata i dai, hevi i painim dispela brata na em i tok: “Mi luksave olsem yumi no inap makim wanem kain hevi bai painim yumi, o wanem taim, o hamas taim dispela hevi i mas kamap. Ol hevi i kamap olsem wara i laik daunim mi, tasol pasin bilong beten na mekim pesenel stadi i kamap olsem laip saket we i helpim mi long trip na wara i no daunim mi. Ol bratasista i sambai long mi na dispela i bin mekim gut bel bilong mi. Mi luksave olsem em i bikpela samting long yumi mas kisim pasin bilong pas gut wantaim Jehova paslain long ol hevi i kamap.”

Olgeta wan wan long kongrigesen inap strongim narapela narapela (Lukim paragraf 14)

14 Aron na Hur i bin holim han bilong Moses long taim bilong pait. Long nau, yumi ken painim rot bilong sambai long ol arapela husat i karim hevi bilong kamap lapun, bikpela sik, pasin birua insait long famili, stap wanpis, o wanpela ol i laikim tumas i dai. Yumi ken strongim tu ol yangpela em ol narapela i putim presa long ol long mekim pasin i no stret o kisim biknem long dispela haptaim bilong nau long sait bilong skul na wok mani. (1 Tes. 3:1-3; 5:11, 14) Painim rot bilong soim olsem yu tingim tru ol narapela taim yu stap long Haus Kingdom, mekim wok autim tok, kaikai wantaim ol narapela, o toktok wantaim ol narapela long fon.

15. Taim yu mekim ol gutpela tok, dispela inap mekim wanem long ol arapela Kristen?

15 Bihain long Asa i winim pait, profet Asaria i strongim em na ol manmeri bilong em na i tok: “Yupela i mas wok strong long mekim ol gutpela wok. Yupela i mas sanap strong na bai Bikpela i lukim wok bilong yupela na mekim gut long yupela.” (2 Sto. 15:7) Dispela tok i kirapim Asa long mekim planti senis na strongim gen lotu i tru. Olsem tasol, ol gutpela tok bilong yu inap strongim ol arapela na kirapim ol long mekim ol gutpela wok. Yu inap helpim ol long givim bel olgeta long mekim wok bilong Jehova. (Snd. 15:23) Taim yu bekim gut ol tok long miting, dispela inap strongim tru ol narapela.

16. (a) Olsem wanem ol elda inap bihainim pasin bilong Nehemia na strongim ol arapela long kongrigesen? (b) Stori long olsem wanem ol bratasista i bin helpim yu.

16 Jehova i strongim Nehemia na ol wanwok  bilong em long sanapim banis. Ol i pinisim banis bilong Jerusalem insait long 52 de tasol! (Neh. 2:18; 6:15, 16) Nehemia i no bosim tasol ol man i mekim wok, nogat. Em yet i insait tu long wok bilong sanapim banis bilong Jerusalem. (Neh. 5:16) Olsem tasol, planti elda i soim pasin laikim na ol i bihainim pasin bilong Nehemia na ol yet i mekim wok bilong klinim na mekim meintenens long Haus Kingdom. Taim ol i autim tok wantaim ol narapela pablisa, na mekim sepeding visit, dispela tu bai strongim ol arapela husat i stap bel hevi.—Ritim Aisaia 35:3, 4.

“YUPELA I NO KEN SEKSEK NATING”

17, 18. Taim hevi i kamap, yumi ken bilip long wanem samting?

17 Taim yumi wok bung wantaim ol arapela bratasista, dispela bai strongim pasin wanbel na pasin pren namel long yumi. Na tu, dispela bai strongim bilip bilong yumi long ol blesing em Kingdom Bilong God bai kamapim. Taim yumi strongim han bilong ol arapela, yumi helpim ol long stap strong na no ken larim ol hevi i daunim ol, na ol inap tingim tingim ol blesing bai kamap bihain. Na tu, taim yumi strongim ol arapela, dispela i helpim yumi yet long putim tingting i go long ol blesing em God i laik givim long yumi. Tru tumas, i olsem ol dispela samting i strongim han bilong yumi tu.

18 Yumi kisim save nau long ol samting Jehova i mekim long sambai na lukautim ol wokman bilong em long bipo, na dispela i ken strongim bilip bilong yumi. Olsem na taim hevi i kamap, ‘yu no ken seksek nating’! Yu mas beten askim Jehova long strongim yu na stiaim yu i go long kisim ol blesing bilong Kingdom.—Sng. 73:23, 24.