Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Wastaua—Stadi Edisen  |  Oktoba 2017

Tok i Tru i ‘No Kamapim Bel Isi, Em i Bringim Bainat i Kam’

Tok i Tru i ‘No Kamapim Bel Isi, Em i Bringim Bainat i Kam’

Yupela i no ken ting mi kam bilong kamapim bel isi long graun, nogat. Mi no kam bilong kamapim bel isi, mi bringim bainat i kam.”MAT. 10:34.

OL SINGSING: 125 [43], 135 [24]

1, 2. (a) Olsem wanem yumi inap i stap bel isi long nau? (b) Wanem samting inap putim hevi long yumi na yumi no stap bel isi? (Lukim piksa long kirap bilong stadi.)

YUMI olgeta i laik stap bel isi. Yumi tenkyu long Jehova bikos em i givim “bel isi” long yumi bambai yumi no tingting planti na bel hevi! (Fili. 4:6, 7) Yumi dediketim laip bilong yumi long Jehova, olsem na yumi “stap wanbel yet wantaim God” na pas gut wantaim em.—Rom 5:1.

2 Tasol taim bilong God long bringim bel isi i no kamap yet. Yumi stap long taim bilong las de, olsem na planti manmeri i kros pait na ol i no stap wanbel wantaim. (2 Tim. 3:1-4) Na tu, yumi ol Kristen i mas wok strong long sakim Satan na ol bilip giaman bilong em. (2 Kor. 10:4, 5) Taim ol wanfamili i no stap insait long tok i tru, dispela inap putim bikpela hevi long yumi na yumi no stap bel isi. Sampela long famili inap tok bilas long bilip bilong yumi, sutim tok olsem yumi brukim famili, o ol inap rausim yumi long famili sapos yumi no lusim bilip. Yumi mas holim wanem tingting sapos kain hevi i bungim yumi? Olsem wanem yumi inap karim ol dispela hevi?

 WANFAMILI I BIRUA LONG YU

3, 4. (a) Tok Jisas i autim inap mekim wanem long ol manmeri? (b) Wanem samting inap givim hatwok long ol Kristen?

3 Jisas i save olsem tok em i autim bai brukim lain, olsem na ol lain i bihainim em i mas strongim bel taim ol narapela i birua long ol. Pasin birua inap kamap insait long famili na bagarapim bel isi bilong ol. Jisas i tok: “Yupela i no ken ting mi kam bilong kamapim bel isi long graun, nogat. Mi no kam bilong kamapim bel isi, mi bringim bainat i kam. Mi kam bilong brukim lain, man bai birua long papa bilong en na pikinini meri bai birua long mama bilong en na maritmeri bai birua long tambu mama bilong en. Tru tumas, ol wanhaus bilong man bai kamap birua bilong en.”—Mat. 10:34-36.

4 Jisas i tok, “Yupela i no ken ting mi kam bilong kamapim bel isi.” Tok bilong em i makim olsem ol manmeri husat i laik bihainim em i mas tingim ol hevi inap painim ol. Maski Jisas i autim tok i tru bilong God, tok bilong em inap brukim lain. (Jon 18:37) Dispela inap givim hatwok long ol Kristen husat i wok strong long holimpas tok i tru sapos ol pren na ol wanfamili i birua long ol.

5. Ol disaipel bilong Jisas bai karim wanem hevi?

5 Jisas i tok ol disaipel i mas redi long karim pen na hevi, dispela i makim tu hevi bilong famili i birua long ol. (Mat. 10:38) Sapos ol disaipel i laik i stap gut long Krais, ol i mas redi long karim hevi taim wanfamili i tok bilas long ol o rausim ol long haus. Maski i olsem, ol disaipel bilong Jisas bai kisim planti samting moa winim ol samting ol i lusim.—Ritim Mak 10:29, 30.

6. Yumi mas tingim wanem samting sapos ol wanfamili i birua long yumi?

6 Maski ol wanfamili i birua long yumi, yumi mas wok yet long soim pasin laikim long ol. Tasol tingim olsem pasin bilong yumi long laikim God na Krais i mas i stap namba 1. (Mat. 10:37) Satan i laik bai pasin bilong yumi long laikim famili i stap namba 1 winim pasin bilong yumi long i stap gut long God. Yumi bai stori long sampela samting we inap kamap insait long famili na putim hevi long yumi, na tu, yumi bai stori long olsem wanem yumi inap karim ol dispela hevi na stap gut long God.

POROMAN MARIT I NO WANBILIP

7. Sapos poroman marit bilong yumi i no wanbilip, yumi mas holim wanem tingting?

7 Baibel i tok lukaut olsem ol marit “bai karim pen na hevi long bodi bilong ol.” (1 Kor. 7:28) Sapos poroman marit i no wanbilip, dispela inap putim bikpela hevi long yumi. Maski i olsem, em i bikpela samting long yumi mas holim wankain tingting olsem bilong Jehova long ol hevi yumi karim. Sapos poroman marit i no laik bihainim Krais, dispela i no makim olsem yutupela i mas seperet o divos. (1 Kor. 7:12-16) Na tu, maski man marit i no wanbilip na em i no go pas long ol wok lotu, meri Kristen i mas rispektim em olsem het bilong famili. Olsem tasol, man Kristen i mas laikim tru meri bilong em husat i no wanbilip.—Efe. 5:22, 23, 28, 29.

8. Yu ken givim wanem ol askim long yu yet sapos poroman marit i no laik bai yu lusim bikpela haptaim long mekim ol wok lotu?

8 Olsem wanem sapos poroman marit i no laik bai yu lusim bikpela haptaim long mekim ol wok lotu? Man bilong wanpela sista i makim sampela de tasol long sista i ken i go autim tok insait long wanpela wik. Sapos kain samting i kamap long yu, askim yu yet: ‘Poroman marit bilong mi i laik stopim mi long mekim ol wok lotu? Sapos nogat, i stret mi bihainim tingting bilong em?’ Sapos yu bihainim gutpela tingting, yu bai rispektim tingting bilong poroman marit na abrusim pasin bilong tok pait.—Fili. 4:5.

9. Olsem wanem ol Kristen inap skulim ol pikinini long onarim papa o mama husat i no wanbilip?

 9 Sapos poroman marit bilong yu i no wanbilip, dispela inap givim hatwok long yu long skulim ol pikinini. Olsem, yu mas skulim pikinini long bihainim tok bilong Baibel olsem: “Onarim papa bilong yu na mama bilong yu.” (Efe. 6:1-3) Tasol olsem wanem sapos poroman marit i no save bihainim ol stretpela lo bilong Baibel? Yu yet i mas i stap gutpela eksampel na onarim poroman marit. Tingim ol gutpela pasin bilong em na tok amamas long em. No ken mekim ol tok bilong daunim em taim ol pikinini i stap. Yu ken kamapim klia long pikinini olsem yumi olgeta wan wan bai mekim disisen olsem yumi bai lotuim Jehova o nogat. Gutpela pasin bilong ol pikinini inap kirapim papa o mama husat i no wanbilip long kam insait long lotu i tru.

Taim rot i op, yu inap skulim ol pikinini long tok i tru bilong Baibel (Lukim paragraf 10)

10. Olsem wanem ol papamama Kristen inap skulim ol pikinini long tok bilong Baibel sapos poroman marit i no wanbilip?

10 Sampela poroman marit husat i no wanbilip i strong long ol pikinini i mas insait long ol bikpela de bilong amamas, o ol i skulim ol pikinini long ol bilip bilong lotu bilong ol. Sampela man marit i save stopim meri Kristen long skulim ol pikinini long tok bilong Baibel. Maski i olsem, ol meri Kristen i ken painim rot bilong skulim ol pikinini long tok i tru bilong Baibel. (Apo. 16:1; 2 Tim. 3:14, 15) Olsem, ating man marit bai pasim meri bilong em husat i Witnes long stadi long Baibel wantaim ol pikinini o kisim ol i go long ol miting Kristen. Meri Kristen i mas rispektim disisen bilong man bilong em, tasol taim rot i op em i ken stori long bilip bilong  em wantaim ol pikinini. Long dispela rot, em i skulim ol pikinini long bihainim stretpela pasin na kisim save long Jehova. (Apo. 4:19, 20) Ol pikinini yet bai mekim disisen long lotuim God.—Lo 30:19, 20. *

OL WANBLUT I BIRUA LONG TOK I TRU

11. Wanem samting inap mekim na ol wanblut husat i no Witnes i birua long yumi?

11 Ating yumi no tokim famili olsem yumi save bung wantaim ol Witnes Bilong Jehova. Tasol yumi wok long kisim stretpela save long Baibel na kamap strong long bilip, na dispela i kirapim yumi long tokaut long bilip bilong yumi. (Mak 8:38) Dispela inap mekim na ol wanblut husat i no Witnes bai birua long yu. Maski i olsem, yu ken mekim sampela samting bilong i stap bel isi wantaim ol na stap gut long God.

12. (a) Bilong wanem ol wanblut husat i no wanbilip inap birua long yumi? (b) Olsem wanem yumi inap soim olsem yumi tingim tru ol?

12 Soim olsem yu tingim tru ol wanblut husat i no wanbilip. Yumi amamas tru long kisim save long tok i tru bilong Baibel, tasol ol wanblut inap kisim tingting kranki olsem bilip bilong yumi i no stret wantaim tok bilong Baibel, o yumi insait long wanpela kalt grup. Ating ol i pilim olsem yumi no laikim ol bikos yumi no bung wantaim ol long ol bikpela de, olsem Ista na Krismas samting. Na tu, ol i tingting planti long laip bilong yumi long bihain bai olsem wanem. Taim ol i kamapim tingting bilong ol, i gutpela long putim gut yau bambai yumi inap kliagut long tingting i stap long bel bilong ol. (Snd. 20:5) Aposel Pol i wok strong long save gut long “olgeta kain man” bambai em inap autim gutnius long ol. Yumi tu inap bihainim pasin bilong em.—1 Kor. 9:19-23.

13. Yumi inap bihainim wanem pasin taim yumi toktok wantaim ol wanblut i no wanbilip?

13 Toktok long pasin isi. Baibel i tok: “Oltaim tok bilong yupela i mas gutpela.” (Kol. 4:6) Yumi ken askim Jehova long givim yumi holi spirit bambai yumi inap bihainim pasin isi taim yumi toktok wantaim ol wanblut. Yumi no ken sutim tok long ol bilip bilong ol. Sapos toktok na pasin bilong ol i mekim yumi bel hevi, orait yumi ken bihainim eksampel bilong ol aposel. Pol i tok: “Taim ol i tok nogut long mipela, mipela i mekim gut long ol. Taim ol i birua long mipela, mipela i no les kwik na mipela i sanap strong. Taim ol i bagarapim nem bilong mipela, mipela i bekim tok long gutpela pasin.”—1 Kor. 4:12, 13.

14. Wanem gutpela samting inap kamap taim yumi mekim gutpela pasin?

14 Mekim gutpela pasin. Pasin isi i save helpim yumi long toktok gut wantaim ol wanblut husat i no wanbilip. Gutpela pasin bilong yumi inap helpim ol. (Ritim 1 Pita 3:1, 2, 16.) Sapos yu mekim gutpela pasin, ol wanblut bilong yu bai luksave olsem ol Witnes Bilong Jehova i save stap gut wantaim poroman marit, lukautim gut ol pikinini, na bihainim ol klinpela na stretpela pasin. Dispela bai helpim ol long i stap amamas. Maski ol wanblut i no kisim tok i tru, yumi bai stap amamas sapos yumi stap gut long Jehova.

15. Olsem wanem yumi inap redim tingting long ol hevi inap kamap?

15 Redim tingting long ol hevi inap kamap. Tingim ol hevi inap kamap na olsem wanem yu inap abrusim ol dispela hevi. (Snd. 12:16, 23) Wanpela sista long Australia i tok: “Tambu papa bilong mi i save birua long tok i tru. Paslain long mi na man bilong mi i ringim em, mipela i save beten long Jehova i ken helpim mipela long toktok gut wantaim em. Mipela i save redim ol tok mipela bai mekim bambai tok bilong mipela i no sutim bel bilong em. Taim mipela i visitim em, mipela i no stap longpela taim bikos mipela i no laik bai kros i kamap taim mipela i stori long ol samting bilong lotu.”

16. Yu ken mekim wanem sapos maus bilong bel i kotim yu taim famili i no amamas long yu?

 16 Sampela taim hevi inap kamap namel long yu na ol wanblut husat i no insait long tok i tru. Dispela inap kotim maus bilong bel bilong yu bikos yu laikim ol tru na yu laik bai ol i amamas. Sapos bel i kotim yu, yu mas wok strong long putim pasin bilong pas gut wantaim Jehova i stap namba 1 winim pasin bilong laikim famili. Dispela bai helpim famili long luksave olsem pasin bilong bihainim tok bilong Baibel em i bikpela samting. Tingim tu olsem yumi no inap fosim ol narapela long kisim tok i tru. Ol yet bai luksave olsem gutpela samting inap kamap taim yumi bihainim tok bilong Jehova. God i larim yumi wan wan long makim rot yumi laik bihainim. Olsem na ol wanblut husat i no wanbilip, ol yet i mas makim rot ol i laik bihainim.—Ais. 48:17, 18.

WANPELA LONG FAMILI I LUSIM JEHOVA

17, 18. Wanem samting inap helpim yu taim wanpela long famili i lusim Jehova?

17 Taim wanpela long famili i raus long kongrigesen o em i tokaut olsem em i no laik stap moa olsem wanpela Witnes, dispela bai mekim yu bel hevi tru. Olsem wanem yu inap karim dispela hevi?

18 Mekim yet ol samting bilong strongim bilip.  Yu mas ritim Baibel long olgeta de, redi na go long ol miting Kristen, autim tok, na beten askim God long strongim yu. Dispela bai helpim yu long kamap strong long bilip. (Jut 20, 21) Olsem wanem sapos yu no givim bel olgeta long mekim ol dispela samting? No ken givap! Bihainim gutpela sediul bilong mekim ol wok lotu na dispela bai helpim yu long holim stretpela tingting na stap bel isi. Tingim man i raitim Buk Song 73. Em i kisim tingting kranki na bel hevi tru, tasol taim em i go long haus bilong God, dispela i helpim em long holim stretpela tingting. (Sng. 73:16, 17) Sapos yu stap gut long Jehova na lotuim em, yu tu inap stap strong long bilip.

19. Olsem wanem yu inap larim Jehova i stretim yu?

19 Larim Jehova i stretim yu. Taim God i stretim yumi, ating pastaim yumi bai bel hevi tru, tasol skul yumi kisim bai helpim yumi long stap gut long nau na long bihain. (Ritim Hibru 12:11.) Olsem, Jehova i tokim yumi long “lusim pasin bilong poroman wantaim” ol lain husat i mekim rong na ol i no laik tanim bel. (1 Kor. 5:11-13) Maski yumi bel hevi tru taim wanpela long famili i raus, yumi mas abrusim pasin bilong toktok wantaim em long fon, salim teks mesis, raitim pas, salim e-mail, o toktok wantaim em long rot bilong sosel netwok.

20. Yumi ken bilip tru long wanem samting?

20 Bilip olsem gutpela samting bai kamap. Ol man i gat pasin laikim i save “wetim ol gutpela samting i kamap.” Olsem na yumi ken bilip tru olsem ol lain i lusim Jehova bai kam bek long em. (1 Kor. 13:7) Sapos yu luksave olsem wanpela long famili i wok long lusim God, yu ken beten askim Jehova long strongim em na em i ken bihainim tok bilong God i stap long Baibel. God i tok: “Kam bek long mi.”—Ais. 44:22.

21. Sapos famili i birua long yu, yu ken bilip tru long wanem samting?

21 Jisas i tok sapos yumi laikim tumas ol manmeri bilong graun, em i no inap orait long yumi. Em i bilip tru olsem ol disaipel bai strongim bel na stap gut long em maski ol wanfamili i birua long ol. Sapos yu bihainim Jisas na famili i birua long yu, yu mas askim Jehova long helpim yu long karim dispela hevi. (Ais. 41:10, 13) Yu ken bilip tru olsem Jehova na Jisas i amamas long yu na ol bai blesim yu long pasin bilong yu long i stap gut long ol.

^ par. 10 Sapos yu laik kisim sampela save moa long rot bilong skulim ol pikinini sapos poroman marit i no wanbilip, lukim atikol “Askim” long Wastaua bilong Ogas 15, 2002.