Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Wastaua—Stadi Edisen  |  Oktoba 2017

Ol Visen Bilong Sekaraia Inap Helpim Yumi

Ol Visen Bilong Sekaraia Inap Helpim Yumi

Yupela i mas kam bek long mi, na bai mi kam helpim yupela.”SEK. 1:3.

OL SINGSING: 120 [6], 117 [20]

1-3. (a) Lain Israel i stap olsem wanem taim Sekaraia i mekim ol tok profet? (b) Bilong wanem Jehova i tokim ol manmeri bilong em long i ‘go bek long em’?

BUK SEKARAIA i stori long ol narakain visen—wanpela skrol i flai i go, wanpela meri i sindaun insait long basket, na 2-pela meri i gat wing olsem bilong ol pisin i flai antap. (Sek. 5:1, 7-9) Bilong wanem Jehova i kamapim ol dispela narakain visen long profet bilong em? Ol Israel i stap olsem wanem long dispela taim? Olsem wanem ol visen bilong Sekaraia inap helpim yumi long nau?

2 Long yia 537 B.C.E., em taim bilong lain bilong Jehova long amamas tru. Ol i bin kalabus long Babilon inap 70 yia na nau ol bai go bek long asples bilong ol long Jerusalem, na kirapim gen lotu i tru. Long yia 536 B.C.E., ol i kirapim wok bilong sanapim tempel. Long dispela taim, “singaut na krai i kamap bikpela moa na ol man i stap longwe ol inap harim.” (Esr. 3:10-13) Tasol pasin birua i kamap na lain Israel i lusim wok bilong sanapim  tempel, na ol i bisi long lukautim haus bilong ol yet na wok long gaden. Inap 16 yia olgeta ol i no mekim wok bilong sanapim tempel. Ol manmeri bilong God i mas go bek long Jehova na putim laik bilong em i stap namba 1. Jehova i laik bai lain Israel i go bek long em na ol i mas strongim bel na lotuim em.

3 Long yia 520 B.C.E., God i salim profet Sekaraia i go long lain Israel bikos em i laik bai ol i tingim olsem em i bin helpim ol long lusim kalabus long Babilon. Mining bilong nem Sekaraia em “Jehova i Tingim.” Dispela inap helpim lain Israel long tingim ol samting God i mekim bilong helpim ol. Maski lain Israel i lusim tingting long Jehova, God i tingim ol yet. (Ritim Sekaraia 1:3, 4.) God i tokim ol olsem em bai helpim ol long kirapim gen lotu i tru, tasol em i givim tok lukaut long ol olsem ol i no ken givim hap bel tasol long lotuim em. Yumi bai stori long olsem wanem namba 6 na namba 7 visen bilong Sekaraia i kirapim lain Israel long mekim gen lotu i tru. Yumi inap kisim wanem skul long ol dispela visen?

GOD BAI GIVIM STRAFE LONG STILMAN

4. (a) Sekaraia i lukim wanem samting long namba 6 visen? (b) Ol rait i stap long 2-pela sait bilong skrol na dispela i kamapim klia wanem samting? (Lukim namba 1 piksa long kirap bilong stadi.)

4 Sapta 5 bilong Buk Sekaraia i stori long wanpela visen i narapela kain tru. (Ritim Sekaraia 5:1, 2.) Sekaraia i lukim wanpela buk o skrol i flai i go, longpela bilong en inap 10 mita na braitpela bilong en inap 5 mita! Dispela skrol i op pinis na man inap ritim. Em i gat tok bilong kotim ol manmeri, na olgeta hap bilong en i gat ol rait long en. (Sek. 5:3) Long bipo, ol man i save yusim wanpela sait tasol bilong skrol long raitim ol tok. Tasol skrol em Sekaraia i lukim i gat ol rait long 2-pela sait wantaim, na dispela i soim olsem em i kamapim wanpela bikpela tok.

Ol Kristen i no ken stil (Lukim paragraf 5-7)

5, 6. Jehova i gat wanem tingting long pasin bilong stil?

5 Ritim Sekaraia 5:3, 4. Jehova bai skelim pasin bilong olgeta manmeri, na moa yet em bai skelim pasin bilong ol manmeri bilong em. Ol manmeri husat i laikim God, ol i luksave olsem pasin bilong stil bai ‘daunim nem bilong God bilong ol.’ (Snd. 30:8, 9) Maski i gat wanem risen na man i stil, pasin bilong em i soim olsem em i putim laik bilong em long kisim mani kago i stap namba 1. Em i tingim lo bilong God olsem samting nating, na em i no tingim Jehova na nem bilong Em olsem namba 1 samting.

6 Long Sekaraia 5:3, 4, Baibel i tok: “Dispela tok bilong en i stap insait long dispela buk. . . . Em bai i salim tok i go insait long haus bilong olgeta man i save stil na giaman. Na dispela tok bai i stap insait long ol haus bilong ol na bagarapim olgeta dispela man.” I no gat wanpela samting bai pasim Jehova long kotim ol manmeri. Kot bilong God bai kamapim long ples klia pasin nogut man i mekim. Maski man i hait long gavman, kampani, ol elda, na ol papamama na em i stil, em i no inap hait long God bikos olgeta samting i stap ples klia long ai bilong Em. (Hib. 4:13) Yumi amamas tru long bung wantaim ol manmeri husat i bihainim onest pasin “long olgeta samting” ol i mekim!—Hib. 13:18.

7. Olsem wanem yumi inap abrusim kot bilong God?

7 Jehova i heitim tru pasin bilong stil. Yumi mas bihainim ol stretpela lo bilong Jehova na sakim ol pasin we inap bagarapim nem bilong God. Jehova bai kotim ol manmeri husat i brukim ol lo bilong em, olsem na yumi laik bihainim ol lo bilong God na bai yumi ken i stap gut.

 BIHAINIM OL TOK PROMIS “LONG OLGETA DE”

8-10. (a) Taim man i mekim tok promis, em i save mekim wanem? (b) King Sedekaia i no bin truim wanem tok promis?

8 Tok i stap long skrol i givim strongpela tok lukaut long ol “man i save stil na giaman.” (Sek. 5:4) Taim man i mekim tok promis, em i save tokaut olsem em bai mekim samting em i bin tok long mekim.

9 Man i mekim tok promis long nem bilong Jehova i mas truim tok bilong em. Sedekaia em laspela king long bosim Jerusalem, na em i bin mekim tok promis long Jehova olsem em bai stap gut long king bilong Babilon. Tasol Sedekaia i no truim tok promis em i mekim. Olsem na Jehova i tok: “Mi save stap oltaim, mi tok stret olsem, dispela king [Sedekaia] bilong Juda bai i go kalabus long kantri Babilon na em bai i dai. As bilong dispela i olsem. King bilong Babilon i bin makim em i kamap king, tasol em i sakim tok bilong kontrak na em i brukim strongpela promis em i bin mekim long king bilong Babilon.”—Ese. 17:16.

10 King Sedekaia i bin mekim tok promis long nem bilong Jehova, olsem na em i mas truim tok promis bilong em. (2 Sto. 36:13) Tasol Sedekaia i no bin mekim olsem, nogat. Em i askim king bilong Isip long helpim ol bambai ol i no inap stap aninit long wok bos bilong Babilon.—Ese. 17:11-15, 17, 18.

11, 12. (a) Wanem nambawan tok promis yumi bin mekim? (b) Yumi mas mekim wanem bilong truim dediket bilong yumi?

11 Jehova i tingim ol tok promis yumi mekim olsem bikpela samting, olsem na yumi mas truim ol tok promis bilong yumi. (Sng. 76:11) Dediket bilong yumi long Jehova em wanpela bikpela tok promis yumi mekim. Taim yumi dediket, yumi tok promis olsem yumi bai mekim wok bilong Jehova long laip olgeta bilong yumi.

12 Olsem wanem yumi inap truim  dediket bilong yumi? Taim ol hevi i kamap na yumi sanap strong, yumi kamapim klia olsem yumi truim tok promis bilong yumi long givim biknem long Jehova “long olgeta de.” (Sng. 61:8) Sapos wanpela long ples wok o skul i mekim ol tok gris long yumi, yumi mas bihainim “tok bilong [God]” na sakim em. (Snd. 23:26) Sapos sampela long famili i no wanbilip, yumi ken askim Jehova long helpim yumi long kamapim ol pasin Kristen maski ol wanfamili i no bihainim ol dispela pasin. Olsem wanem? Long olgeta de yumi save beten long Papa bilong yumi long heven na tok tenkyu long em i stiaim yumi na soim pasin laikim long yumi? Yumi save ritim Baibel long olgeta de? Yumi mas tingim olsem yumi bin tok promis long mekim ol wok lotu. Yumi mas i gat pasin bilong bihainim tok. Taim yumi givim bel long lotuim Jehova, dispela i soim olsem yumi laikim em na yumi truim dediket bilong yumi. Taim yumi truim tok promis bilong yumi long God, yumi bai kisim ol blesing long bihain.—Lo 10:12, 13.

13. Yumi inap kisim wanem skul long namba 6 visen bilong Sekaraia?

13 Namba 6 visen bilong Sekaraia i helpim yumi long save olsem ol lain i laikim Jehova, ol i no inap stil o giaman long mekim ol tok promis. Yumi luksave tu olsem maski ol Israel i mekim planti popaia, Jehova i no givap long ol. Em i save olsem ol birua i putim presa long ol. God i stap gutpela eksampel long yumi taim em i inapim ol tok promis bilong em, na em bai helpim yumi tu long inapim ol tok promis bilong yumi. Em i tok long pinisim pasin nogut long olgeta hap bilong graun, na dispela tok i mekim gut bel bilong yumi. Namba 7 visen bilong Sekaraia i strongim dispela tok promis.

GOD BAI PINISIM PASIN NOGUT

14, 15. (a) Long namba 7 visen, Sekaraia i lukim wanem samting? (Lukim namba 2 piksa long kirap bilong stadi.) (b) Meri insait long basket i makim wanem samting? (c) Bilong wanem ol i putim meri insait long basket na pasim maus bilong basket?

14 Bihain long Sekaraia i lukim skrol i flai, ensel i tok, “Lukim. Narapela samting i kam nau.” Sekaraia i lukim wanem samting long namba 7 visen? Em i lukim wanpela basket. (Ritim Sekaraia 5:5-8.) “Maus bilong dispela basket ol i wokim long ain.” Taim ol i opim maus bilong basket, Sekaraia i lukim “wanpela meri i sindaun insait.” Ensel i tok olsem meri i stap insait long dispela basket i makim “olgeta kain pasin nogut.” Sekaraia i pret tru taim em i lukim dispela meri i laik kam ausait long basket! Wantu ensel i pusim em i go bek insait na pasim maus bilong basket. Dispela i makim wanem samting?

15 Dispela visen i kamapim klia olsem Jehova i no inap larim pasin nogut i stap namel long ol manmeri bilong em. Kwiktaim em bai rausim ol man i mekim pasin nogut. (1 Kor. 5:13) Taim ensel i pasim bek maus bilong basket, dispela i soim olsem God bai pinisim tru pasin nogut.

Jehova i wok strong long mekim lotu i tru i stap klin (Lukim paragraf 16-18)

16. (a) Long narapela visen, Sekaraia i lukim wanem samting? (Lukim namba 3 piksa long kirap bilong stadi.) (b) Ol dispela meri i kisim basket i go long we?

16 Long narapela hap bilong visen, Sekaraia i lukim 2-pela meri i gat strongpela wing olsem bilong ol bikpela pisin. (Ritim Sekaraia 5:9-11.) Ol dispela meri i no wankain long meri i stap insait long basket! Dispela 2-pela meri i flai i kam daun na kisim basket na karim i go. Ol i kisim dispela meri i go we? Ol i kisim em i go long “kantri Babilonia,” narapela nem bilong en Babilon. Bilong wanem ol i kisim dispela meri i go long dispela kantri?

17, 18. (a) Bilong wanem i stret long ol i karim basket i go long Babilon? (b) Yumi mas wok strong long mekim wanem?

 17 Sekaraia na lain Juda i save olsem pasin nogut i pulap tru long Babilon. Olsem na i stret dispela 2-pela meri i bringim basket i go long hap. Lain Juda i stap namel long ol man i save lotuim ol god giaman na mekim kain kain pasin nogut, olsem na ol i mas wok strong long sakim ol dispela pasin long olgeta de. Visen bilong Sekaraia i mekim isi bilong bel bilong lain Juda bikos Jehova i tok promis long kirapim gen lotu i tru!

18 Dispela visen i kirapim tu lain Juda long tingim olsem ol i mas wok yet long bihainim klinpela pasin na mekim ol wok lotu. Pasin nogut i no ken stap namel long ol manmeri bilong Jehova. Taim yumi kam insait long oganaisesen bilong God, em i lukautim yumi bambai yumi abrusim ol pasin nogut, olsem na yumi mas wok yet long sakim ol pasin nogut na stap klin. Olsem wanem? Yumi wok strong long stap gut long God? Yumi mas sakim olgeta kain pasin nogut we inap bagarapim pasin bilong yumi long pas gut wantaim God.

BIHAINIM KLINPELA PASIN NA ONARIM JEHOVA

19. Olsem wanem ol narakain visen bilong Sekaraia inap helpim yumi long nau?

19 Namba 6 na namba 7 visen bilong Sekaraia i stap olsem tok lukaut long ol man husat i save mekim pasin giaman. Ol i mas save olsem Jehova i no orait long kain pasin olsem. God i laik bai ol manmeri bilong em i mas heitim tru olgeta pasin nogut. Ol dispela visen i kamapim klia olsem Papa bilong yumi long heven i tingim yumi. Sapos yumi wok strong long mekim ol samting em God i orait long en, em bai lukautim yumi na yumi inap abrusim ol hevi. Pasin bilong yumi long wok strong long sakim ol pasin nogut i no inap lus nating, nogat. Yumi ken bilip tru olsem Jehova bai blesim yumi! Olsem wanem? Yu ting lotu i tru bai i stap yet long dispela graun we i pulap long pasin nogut? Bilong wanem yumi ken bilip tru olsem Jehova bai lukautim oganaisesen bilong em long nau? Yumi bai skelim ol dispela askim long neks stadi.