Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Wastaua—Stadi Edisen  |  Oktoba 2017

 LAIP STORI

Kisim Blesing Long Mekim Laik Bilong Jehova

Kisim Blesing Long Mekim Laik Bilong Jehova

“Mipela bai mekim olsem!” Dispela em bekim bilong mi na man bilong mi na brata bilong mi na meri bilong em taim ol i invaitim mipela long mekim nupela asainmen. Bilong wanem mipela i orait long mekim dispela asainmen? Mipela i kisim wanem ol blesing? Pastaim mi laik stori long laip bilong mi.

MI BON long 1923 long Hemsworth, em wanpela taun long Yorkshire, Inglan. Bob em bikpela brata bilong mi. Papa i no amamas long ol lotu i save mekim pasin giaman. Taim mi gat 9-pela krismas, em i kisim sampela buk i tokaut long ol bilip bilong lotu giaman. Em i amamas tru long ol tok em i ritim. Sampela yia bihain, Bob Atkinson i kam long haus na pilaim rekoding bilong wanpela tok bilong Brata Rutherford long masin pikap na mipela i harim. Mipela i luksave olsem tok mipela i harim i wankain long ol tok i stap long ol buk em Papa i save ritim! Papamama i askim Brata Atkinson long kaikai wantaim mipela long olgeta apinun bambai em inap bekim ol askim mipela i gat long Baibel. Brata Atkinson i singautim mipela long i go long ol miting long haus bilong wanpela brata husat i stap sampela kilomita longwe long hap mipela i stap long en. Mipela i amamas long bung wantaim ol, na i no longtaim wanpela kongrigesen i kamap long Hemsworth. Papamama i save singautim ol wasman sekit long i kam stap wantaim mipela, na tu, ol i save singautim ol painia i stap klostu long kaikai wantaim mipela. Mi save amamas tru long bung wantaim ol.

Famili i statim wanpela bisnis, tasol Papa i tokim brata bilong mi Bob olsem, “Sapos yu laik mekim wok painia, yumi bai salim dispela bisnis.” Bob i lusim haus taim em i gat 21 krismas na em i go mekim wok painia. Tupela yia bihain taim mi gat 16 krismas, mi kamap painia oltaim. Planti taim namel long wik, mi wanpela i save yusim ol testimoni kat na masin pikap long autim tok. Jehova i blesim mi na mi gat wanpela Baibel stadi husat i kamap strong long bilip na kisim baptais. Bihain, planti wanfamili bilong dispela Baibel stadi i kam insait long tok i tru. Long yia bihain, ol i makim mi long mekim wok olsem spesel painia wantaim Mary Henshall. Ol i salim mipela i go long wanpela teritori long hap ol i kolim Cheshire.

Long taim bilong Wol Woa 2, gavman i tok long ol meri i mas mekim ol wok bilong sapotim woa. Tasol ol i no orait long ol lain i mekim wok lotu long insait long dispela wok. Kot i no orait long mi stap nating, olsem na ol i kalabusim mi inap 31 de. Long yia bihain, taim mi gat 19 krismas, mi  rejistaim nem bilong mi bambai mi no mekim wok bilong sapotim woa. Tupela taim mi sanap long kot, tasol kot i larim mi i go fri. Mi luksave olsem holi spirit i lukautim mi na i olsem Jehova i holim han bilong mi na strongim mi.—Ais. 41:10, 13.

NUPELA POROMAN

Mi bungim Arthur Matthews long 1946. Em i no laik insait long woa, olsem na em i kalabus inap 3-pela mun. Bihain, em i joinim brata bilong em Dennis, em wanpela spesel painia long Hemsworth. Taim ol i liklik yet, papa bilong ol i skulim ol long Jehova na ol i kisim baptais taim ol i tineja. I no longtaim, Dennis i kisim nupela asainmen long Aialan, olsem na Arthur i no gat poroman long wok wantaim em. Papamama bilong mi i amamas long pasin bilong Arthur long givim bel long mekim wok painia, olsem na ol i invaitim em long stap wantaim ol. Taim mi visitim papamama, mitupela Arthur i save wasim ol plet na kap wantaim. Bihain, mitupela i kirap raitim pas long narapela narapela. Long 1948, Arthur i kalabus gen inap 3-pela mun. Mitupela i marit long Janueri 1949, na mipela i putim mak long mekim wok fultaim sevis long laip olgeta. Jehova i blesim mipela na mipela i mekim wok bilong pikim ol prut long taim bilong holide. Long dispela rot, mipela inap kisim mani bilong sapotim wok painia bilong mipela.

Long Hemsworth, bihain liklik long weding bilong mipela long 1949

Winim 1-pela yia bihain, ol i salim mipela i go long Noten Aialan. Pastaim mipela i go long Armagh na bihain mipela i go long Newry. Klostu olgeta man long ol dispela taun i bilong lotu Katolik. Ol i no amamas long wok bilong ol Witnes, olsem na mipela i mas skelim gut ol tok mipela i mekim long ol manmeri. Mipela i save mekim ol miting long haus bilong tupela marit, ol tu i Witnes. Haus bilong ol i stap 16 kilomita longwe long hap mipela i stap long en. Inap 8-pela manmeri i kam long miting. Taim mipela i slip long haus bilong ol, mipela i save slip long plua na long neks de mipela i save kaikai wantaim long moning. Mipela i amamas tru olsem long nau i gat planti Witnes long dispela hap.

“MIPELA BAI MEKIM OLSEM!”

Brata bilong mi na meri bilong em, Lottie, i go mekim wok olsem spesel painia long Noten Aialan. Long 1952, mipela 4-pela i go long kibung i kamap long Belfast. Wanpela brata i kisim mipela i go long haus bilong em, na em i singautim tu Pryce Hughes husat i wok long brens ofis long Briten. Wanpela nait mipela i stori long nupela buklet God’s Way Is Love. Ol i wokim dispela buklet bilong helpim ol manmeri long Aialan. Brata Hughes i stori long hatwok bilong autim tok long ol lain i bihainim lotu Katolik long Ripablik Bilong Aialan. Ol pris i kirapim ol manmeri long bung na pait long ol brata, na tu, ol i rausim ol brata long ples slip bilong ol. Brata Pryce i tok: “Mipela i nidim ol marit husat i gat kar bambai ol inap tilim ol buklet long olgeta hap bilong kantri.” * Kwiktaim mipela i tok, “Mipela bai mekim olsem!” Dispela tok i stap long kirap bilong dispela stori.

Mi na ol narapela painia i kalap long motobaik na liklik kar long sait

 Taim ol painia i go long Dublin, ol i save stap long haus bilong Ma Rutland, em wanpela sista husat i stap long tok i tru inap longpela taim. Mipela i go lukim em na salim sampela samting bilong mipela. Bihain mipela fopela i kalap long motobaik bilong Bob we i gat liklik kar long sait na mipela i go bilong painim wanpela kar. Mipela i baim wanpela kar em ol i yusim pinis, na mipela i askim man i salim kar long draivim i go long hap mipela i stap long en bikos mipela i no save long draiv. Long apinun, Arthur i sindaun long bet na em i wok long piksaim olsem wanem em inap senisim gia bilong kar. Long neks moning, taim Arthur i laik draivim kar, Mildred Willett i kam, em wanpela misineri sista. Bihain, Mildred Willett i bin maritim John Bar. Mildred i save long draiv, olsem na em i skulim Arthur long draiv! Nau mipela i redi long go!

Kar bilong mipela na haus kar

Mipela i mas painim ples slip. Ol i tokim mipela long no ken slip insait long kar nogut ol birua i kukim kar. Tasol i no gat hap we mipela inap stap long en. Olsem na mipela 4-pela i slip long kar. Long neks de, mipela i painim wanpela liklik haus kar i gat 2-pela bet. Mipela i amamas olsem ol fama i no save kros taim mipela i putim dispela haus kar long fam bilong ol. Mipela i autim tok long ol teritori i stap longwe inap 16 i go 24 kilomita. Bihain taim mipela i kam bek, mipela i save mekim gobek long ol lain i stap long fam em mipela i lusim haus kar long en.

Mipela i visitim olgeta haus long hap saut-is bilong Ripablik Bilong Aialan, tasol ol man i no birua long mipela. Mipela i tilim winim 20 tausen buklet na salim nem bilong ol lain i gat intres long stadi long Baibel i go long brens ofis long Briten. Long nau, i gat planti handret Witnes long Ripablik Bilong Aialan. Dispela em wanpela gutpela blesing tru!

GO LONG INGLAN, NA GO LONG SKOTLAN

Mipela i kisim narapela asainmen bilong i go long hap saut bilong London. Insait long sampela wik, ol brata long brens ofis long Briten i ringim Arthur na tokim em olsem em bai kirap mekim wok sekit long neks de! Bihain long mipela i kisim trening inap wanpela wik, mipela i go mekim wok sekit long Skotlan. Arthur i no gat taim bilong redim ol tok, tasol em i redi long mekim ol wok bilong Jehova na dispela i strongim tru bilip bilong mi. Mipela i amamas tru long wok sekit mipela i mekim. Inap sampela yia, mipela i autim tok long ol teritori i no gat ol Witnes long en, tasol nau mipela i amamas long wok wantaim planti bratasista.

Long 1962, Arthur i kisim invatesen bilong i go long skul Gileat inap 10-pela mun, olsem na mipela i mas mekim wanpela bikpela disisen. Maski mi no inap i go long dispela skul, Arthur i mas i go. Mi no gat poroman long raun wantaim, olsem na ol i salim mi i go bek long Hemsworth olsem spesel painia. Wanpela yia bihain, Arthur i kam bek na em i kisim asainmen long mekim wok olsem wasman distrik na raun long Skotlan, hap not bilong Inglan, na Noten Aialan.

 NUPELA ASAINMEN LONG AIALAN

Long 1964, Arthur i kisim asainmen olsem brens sevan long Ripablik Bilong Aialan. Mipela i amamas long mekim wok sekit, olsem na mipela i tingting planti long dispela nupela senis. Taim mi tingting i go bek, mi amamas tru olsem mi inap mekim wok long Betel. Mi bilip olsem sapos yu mekim wanpela asainmen maski yu pilim hatwok long mekim, oltaim Jehova bai blesim yu. Mi save mekim wok long ofis, pekim ol litresa, kukim kaikai, na klinim ol samting. Sampela taim Arthur i mekim wok olsem wasman distrik, olsem na mipela i bungim ol bratasista long olgeta hap bilong kantri. Na tu, taim ol Baibel stadi i kamap strong long bilip, dispela i strongim pasin pren bilong mipela wantaim ol bratasista long Aialan. Dispela em wanpela gutpela blesing tru!

SENIS I KAMAP LONG WOK TIOKRATIK LONG AIALAN

Long 1965, namba 1 intenesenel kibung long Aialan i kamap long Dublin. * Maski i gat pasin birua i stap, mipela i mekim yet kibung. Inap 3,948 manmeri i go long kibung, na 65 manmeri i kisim baptais. Ol bratasista long Aialan i bin helpim 3,500 bratasista bilong ol narapela kantri long sait bilong ples slip. Olsem na brens ofis long Aialan i salim pas bilong tok tenkyu long ol. Ol bratasista i givim ples slip i tok amamas long gutpela pasin bilong ol bratasista i stap wantaim ol. Dispela i mekim na bikpela senis i kamap long Aialan.

Arthur i bungim Nathan Knorr taim em i kam long kibung long 1965

Arthur i tokaut long nupela buk Baibel Stori Buk Bilong Mi long tokples Gaelic long 1983

Long 1966, brens ofis long Dublin i lukautim hap not na hap saut bilong Aialan maski pasin birua i stap namel long dispela 2-pela ples long sait bilong wok politik na wok lotu. Mipela i amamas tru long lukim olsem planti lain bilong lotu Katolik i kisim tok i tru na wok bung wantaim ol bratasista em bipo ol i bilong lotu Protestan.

SENIS I KAMAP LONG ASAINMEN

Long 2011, senis i kamap long laip bilong mipela. Pastaim i gat brens ofis long Briten na Aialan, tasol nau ol i pasim wok bilong ol dispela brens na muvim i go long Betel long London, olsem na mipela i kisim asainmen long i go wok long hap. Taim mipela i kisim dispela toksave, mi tingting planti long helt bilong Arthur bikos em i gat sik pakinson. Mitupela Arthur i marit inap 66 yia, tasol em i dai long Me 20, 2015.

Insait long ol yia i go pinis, mi bel hevi na krai sori. Arthur i save helpim mi, tasol nau em i no stap na mi misim em tru! Taim yu karim ol kain hevi olsem, dispela bai kirapim yu long i go klostu moa long Jehova. Na tu, mi kisim bel isi taim mi harim olsem planti bratasista i laikim Arthur. Mi kisim ol pas i kam long ol pren bilong mipela long Aialan, Briten, na Amerika, na dispela i strongim mi tru. Na tu, mi kisim helpim long ol gutpela tok i kam long brata bilong Arthur, em Dennis, na meri bilong em Mavis, na 2-pela pikinini meri bilong ol, em Ruth na Judy.

Tok bilong Aisaia 30:18 i strongim mi tru. Dispela skripsa i tok: “Bikpela em i God bilong mekim stretpela pasin tasol. Olsem na em i sori long yupela na em i wet long soim marimari bilong em long yupela. Ol manmeri i bilip long Bikpela na i wetim em i helpim ol, ol i ken amamas.” Mi amamas tru long save olsem Jehova bai stretim gen ol samting na givim yumi ol nupela asainmen long bihain.

Taim mi tingim bek ol samting i kamap long laip bilong mipela, mi luksave olsem Jehova i stiaim na blesim wok i kamap long Aialan! Mi amamas tru olsem mi bin helpim dispela wok. Tru tumas, taim yumi mekim wok bilong Jehova, yumi bai kisim ol blesing.

^ par. 12 Lukim Yearbook of Jehovah’s Witnesses bilong 1988, p. 101-102.

^ par. 22 Lukim Yearbook bilong 1988, p. 109-112.