Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Wastaua—Stadi Edisen  |  Oktoba 2017

Josep Bilong Arimatea i Strongim Bel

Josep Bilong Arimatea i Strongim Bel

JOSEP BILONG ARIMATEA i no ting olsem em bai strongim bel na i go lukim Pontius Pailat, em gavana bilong Rom. Pontius Pailat i gat hatpela pasin. Sapos ol i laik planim gut bodi bilong Jisas, orait wanpela man i mas i go kisim tok orait long Pailat na kisim bodi bilong Jisas. Taim Josep i go lukim Pailat, em i luksave olsem em inap toktok wantaim em. Pailat i askim wanpela ofisa sapos Jisas i dai pinis o nogat, na bihain Pailat i tok orait long ol i kisim bodi bilong Jisas. Olsem na maski Josep i bel hevi, em i go long hap em ol birua i kilim Jisas long en.—Mak 15:42-45.

  • Husat dispela Josep bilong Arimatea?

  • Olsem wanem em i save long Jisas?

  • Bilong wanem yumi laik save long stori bilong em?

 MEMBA BILONG SANHEDRIN

Gutnius Bilong Mak i tok olsem Josep “em i wanpela memba bilong Kaunsil.” Dispela i makim olsem em i memba bilong Sanhedrin, em suprim kot bilong ol Juda. Sanhedrin i gat namba insait long komiuniti, gavman, na lotu. (Mak 15:1, 43) Dispela i soim olsem Josep em wanpela lida namel long ol manmeri, olsem na em i gat namba long toktok wantaim gavana bilong Rom. Ating dispela em risen na Josep em i wanpela maniman.—Mat. 27:57.

Yu gat strongpela bel long tokaut olsem yu wanpela Kristen?

Lain Sanhedrin i bin mekim nogut long Jisas na ol i mekim plen long kilim em i dai. Tasol Josep “em i wanpela gutpela na stretpela man.” (Luk 23:50) Josep i no olsem ol wanwok bilong em, nogat. Em i gat onest pasin, em i save bihainim stretpela pasin, na em i mekim olgeta samting em inap mekim bambai em inap bihainim olgeta lo bilong God. Na tu, em i “wetim Kingdom bilong God,” ating dispela i mekim na em i kamap wanpela disaipel bilong Jisas. (Mak 15:43; Mat. 27:57) Josep i laikim tru tok Jisas i autim bikos em i tingim olsem em i bikpela samting long bihainim onest pasin na mekim pasin fea.

WANPELA DISAIPEL I STAP HAIT

Long Jon 19:38, dispela ves i tok olsem “Josep i wanpela disaipel bilong Jisas, tasol em i haitim dispela, long wanem, em i pret long ol Juda.” Josep i pret long wanem samting? Josep i save olsem ol Juda i heitim Jisas, na em i save olsem ol inap rausim wanpela man long sinagog sapos em i tok olsem em i bilip long Jisas. (Jon 7:45-49; 9:22) Taim ol i rausim wanpela man long sinagog, ol bai tok bilas long em na mekim olsem em i wanpela rabisman bilong Juda. Olsem na Josep i no laik tokaut olsem em i bilip long Jisas. Sapos em i mekim olsem, em bai lusim wok bilong em na namba em i gat.

Ol narapela hetman tu i karim wankain hevi. Long Jon 12:42, Baibel i tok: “Planti hetman i bilip long em, tasol ol i no tokaut olsem ol i bilip. Ol i pret long ol Farisi, nogut ol i rausim ol long sinagog.” Nikodemus em memba bilong Sanhedrin, na em tu i bilip long Jisas.—Jon 3:1-10; 7:50-52.

Josep em wanpela disaipel, tasol em i no bin tokaut long dispela samting. Dispela em i bikpela rong bikos Jisas i tok: “Man i tokaut long ai bilong ol man olsem em i pas wantaim mi, mi tu bai mi tokaut long ai bilong Papa bilong mi long heven olsem mi pas wantaim dispela man. Tasol man i givim baksait long mi long ai bilong ol man, mi tu bai mi givim baksait long em long ai bilong Papa bilong mi long heven.” (Mat. 10:32, 33) I no olsem Josep i givim baksait long Jisas, nogat. Tasol em yet i no gat strongpela bel long tokaut olsem em i bilip long Jisas. Olsem wanem? Yu gat pasin bilong strongim bel?

Josep i bin mekim sampela samting bilong helpim Jisas. Baibel i tok taim lain  Sanhedrin i painim rot bilong kilim Jisas, Josep i no bin sapotim dispela samting. (Luk 23:51) Ating Josep i no bin stap taim ol i kotim Jisas. Maski i olsem, Josep i no amamas long pasin i no fea em lain Sanhedrin i mekim—tasol em yet i no inap mekim wanpela samting bilong stopim ol!

JOSEP I WOKIM DISISEN

Taim Jisas i dai, Josep i no pret moa long soim olsem em i wanpela disaipel bilong Jisas. Mak 15:43 i stori long disisen bilong Josep olsem: “Em i strongim bel na i go long Pailat na askim long kisim bodi bilong Jisas.”

I luk olsem Josep i stap taim Jisas i dai, tasol “Pailat i no save Jisas i dai pinis.” (Mak 15:44) Olsem na Josep i go lukim em bambai Pailat i ken givim tok orait long em i ken kisim bodi bilong Jisas. Josep i lukim Jisas i bin karim bikpela pen taim em i hangamap long diwai pos, na ating maus bilong bel i kotim em na dispela i kirapim em long tokaut olsem em i wanpela disaipel. Em i no stap moa olsem wanpela disaipel i stap hait.

JOSEP I PLANIM BODI BILONG JISAS

Lo bilong ol Juda i tok olsem sapos man i mekim rong na ol i kilim em na hangamapim bodi bilong em long wanpela pos, orait ol i mas planim bodi paslain long san i go daun. (Lo 21:22, 23) Tasol long Rom, ol i save larim bodi bilong ol raskolman i hangamap long diwai na sting o ol i save rausim na tromoi i go insait long wanpela bikpela hul. Tasol Josep i no laik bai ol i mekim olsem long bodi bilong Jisas. Josep i katim  wanpela nupela ston matmat klostu long hap em ol i kilim Jisas long en. Em i no bin yusim dispela matmat na ating dispela i makim olsem taim em i lusim Arimatea * na go long Jerusalem, em i tingting long yusim dispela matmat bilong planim ol wanfamili bilong em. (Luk 23:53; Jon 19:41) Josep i mekim gutpela pasin taim em i planim Jisas long matmat we em bai yusim long bihain, na dispela i truim tok profet olsem ol bai planim bodi bilong Mesaia “wantaim ol man i gat planti mani samting.”—Ais. 53:5, 8, 9.

I gat sampela samting we i stap namba 1 samting long laip bilong yu winim pasin pren bilong yu wantaim Jehova?

Ol Gutnius i stori olsem bihain long ol man i rausim bodi bilong Jisas long pos, Josep i karamapim bodi bilong Jisas long gutpela laplap na putim long matmat bilong em. (Mat. 27:59-61; Mak 15:46, 47; Luk 23:53, 55; Jon 19:38-40) Baibel i stori long wanpela man tasol i bin helpim Josep, em Nikodemus. Em i bringim ol lip i gat gutpela smel bilong putim long bodi bilong Jisas. Josep na Nikodemus i gat biknem, olsem na ating ol i tokim ol wokman long karim bodi bilong Jisas na putim long matmat. Maski ol wokman i karim bodi bilong Jisas, dispela 2-pela man i bin mekim bikpela wok tru long redim bodi bilong Jisas. Sapos wanpela man i tatsim bodi bilong daiman, em i no inap i stap klin inap 7-pela de. Sapos em i redim kaikai na holim ol narapela samting, ol dispela samting bai kamap doti. (Nam. 19:11; Hag. 2:13) Long kain taim olsem, em i no ken bung wantaim ol manmeri long taim bilong Pasova na em i no ken insait tu long ol narapela bung i kamap. (Nam. 9:6) Taim Josep i redim ol samting bilong planim Jisas, dispela bai kirapim ol wanwok bilong em long belhat long em. Tasol em i redi long karim ol hevi na tokaut olsem em i wanpela disaipel bilong Krais.

PINIS BILONG STORI BILONG JOSEP

Bihain long Josep i planim bodi bilong Jisas, Baibel i no stori moa long em. Wanem samting i kamap long Josep? Yumi no save long samting i kamap long em. Tasol ol samting yumi skelim long dispela atikol i helpim yumi long kisim tingting olsem ating Josep i bin tokaut olsem em i wanpela Kristen. Taim ol man i birua long Jisas na kilim em i dai, dispela i strongim bilip bilong Josep.

Stori bilong Josep i kirapim yumi long tingim dispela askim: Yumi larim biknem, wok mani, ol samting yumi gat, wanfamili, na fridom bilong yumi long mekim ol samting i winim pasin pren bilong yumi wantaim Jehova?

^ par. 18 Arimatea em narapela nem bilong Rama, nau ol i kolim olsem Rentis (Rantis). Dispela ples i stap inap olsem 35 kilomita long hap not-wes long Jerusalem, na em ples bilong profet Samuel.—1 Sml. 1:19, 20.