Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Wastaua—Stadi Edisen  |  Oktoba 2016

 LAIP STORI

Bihainim Ol Gutpela Eksampel

Bihainim Ol Gutpela Eksampel

Mi askim Izak Marais: “Yu save mi gat hamas krismas?” Em i tok: “Mi save long krismas bilong yu.” Em i stap long Colorado long Patterson, New York, na em i ringim mi. Mi laik stori long ol samting i kamap.

MAMA i karim mi long Disemba 10, 1936, long Wichita, Kansas, long Amerika. Mipela 4-pela pikinini long famili, na mi fesbon. Papamama bilong mi em William na Jean, na tupela i givim bel tru long lotuim Jehova. Papa i mekim wok olsem kampani sevan, em man i go pas long kongrigesen long dispela taim bipo. Mama bilong mi i kisim save long tok bilong Baibel long mama bilong em, Emma Wagner. Emma i skulim planti manmeri long tok bilong Baibel. Wanpela bilong ol em Gertrude Steele—em i mekim wok misineri inap planti yia long Pueto Riko. * Olsem na planti lain i stap olsem gutpela eksampel mi ken bihainim.

TINGIM OL GUTPELA EKSAMPEL

Papa i sanap long kona bilong strit na tilim nius long ol man i go i kam

Taim mi gat 5 krismas, long wanpela Sarere apinun mitupela Papa i go tilim nius Wastaua na Consolation (nau Kirap!) long ol man i go i kam long strit. Long dispela taim, kantri i insait long Wol Woa 2. Wanpela dokta i spak na em i kam na sutim tok long Papa bikos Papa i no insait long pait. Em i tok Papa em man bilong pret, na em i giaman na em i no putim nem long joinim ami. Dispela dokta i putim pes bilong em i kam klostu tru long pes bilong Papa na i tok: “Paitim mi, yu man bilong pret!” Mi pret nogut tru, tasol mi laikim tru pasin bilong Papa. Em i no pret; em i wok yet long tilim magasin long ol manmeri i kam bung. Bihain wanpela soldia i wokabaut i kam, na dokta i singaut na tok: “Mekim save long dispela man bilong pret!” Soldia i luksave olsem dispela man i spak, olsem na soldia i tokim em, “Yu go long haus na tingting bilong yu bai klia!” Tupela wantaim i lusim mipela na go. Mi luksave olsem Jehova i strongim Papa na em i no pret. Papa i gat 2-pela stua long Wichita we ol man i save go bilong katim na stretim gras bilong ol!

Mi na Papamama i go long kibung long Wichita long wanpela bilong ol yia bihain long 1940

Taim mi gat 8 krismas, Papamama i salim haus na ol stua bilong ol. Tupela i wokim liklik haus kar, na mipela i go stap long Colorado bikos dispela hap i sot tru long ol pablisa, na Papamama i helpim wok autim tok. Mipela i stap long wanpela taun, Grand Junction, na Papamama i mekim wok painia na mekim haptaim  wok mani long fam bilong planim kaikai na lukautim ol animal. Jehova i blesim hatwok bilong tupela, na wanpela kongrigesen i kamap long dispela hap. Long Jun 20, 1948, Papa i baptaisim mi na ol narapela husat i bilip long ol tok bilong Baibel. Em i baptaisim mipela long wanpela liklik wara i kam daun long maunten. Em i baptaisim tu Billie Nichols na meri bilong em. Bihain Billie na meri bilong em i mekim wok sekit, na pikinini man bilong ol na meri bilong em tu i mekim wankain wok.

Mipela i pas gut wantaim ol narapela husat i givim bel tru long mekim wok bilong Kingdom, na mipela i strongim narapela narapela. Mipela i pas gut moa wantaim famili bilong Steele—em Don na Earlene, Dave na Julia, na Si na Martha—na ol i strongim mi tru long sait bilong bilip. Ol i helpim mi long luksave olsem man i save kisim bikpela amamas na pilim olsem laip i gat mining taim em i putim Kingdom i stap namba 1 samting long laip bilong em.

GO LONG NARAPELA PLES

Bud Hasty em wanpela brata husat i save long famili bilong mipela. Taim mi gat 19 krismas, em i askim mi long mekim wok painia wantaim em long hap saut bilong Amerika. Wasman sekit i tokim mipela long mekim wok painia long biktaun Ruston, long Louisiana, na em hap we planti Witnes i lusim wok autim tok. Ol brata i tokim mipela long mekim olgeta miting, maski liklik lain tasol i kam long bung. Mipela i painim wanpela hap na mipela i stretim bilong mekim miting long en. Mipela i mekim olgeta miting, tasol sampela taim mitupela tasol i stap long miting. Long kain taim olsem, wanpela i save lukautim wanpela hap bilong miting, na narapela i bekim olgeta askim—mitupela i senis senis long mekim olsem. Tasol long ol hap i gat soim long en, mitupela wantaim i save go long pletfom na mekim soim, na i no gat man long odiens! Bihain, wanpela lapun sista i kam long ol miting. Isi isi sampela Baibel sumatin na ol lain i lusim wok autim tok, ol tu i kirap gen long kam long ol miting. I no longtaim, kongrigesen i kamap na i stap strong gen.

Wanpela taim, mi na Bud i bungim wanpela man i save lotu long Church of Christ, na em i toktok long ol skripsa we mi no kliagut long en. Dispela ekspiriens i kirapim mi long luksave olsem mi mas kliagut long ol samting mi bilip long en. Inap wanpela wik olgeta, mi mekim wok painimaut long kisim bekim bilong ol askim dispela man i bin kamapim. Dispela i kirapim mi yet long laikim tok i tru, na mi laik tru long bungim wanpela lotuman bambai mi inap autim tok long em.

Bihain, wasman sekit i askim mi long i go helpim wok long kongrigesen i stap long biktaun El Dorado long Arkansas. Taim mi stap long hap, mi save go kam long Colorado long stretim tok wantaim ol lain i save makim ol man long joinim ami. Wanpela taim, sampela  painia i kam wantaim mi long kar bilong mi. Taim mipela i draiv long Texas, mipela i kisim eksiden na kar bilong mi bagarap olgeta. Mipela i ringim wanpela brata na em i kam kisim mipela i go long haus bilong em, na bihain mipela i go long miting. Ol brata i toksave long kongrigesen olsem mipela i bungim hevi, olsem na ol bratasista i helpim mipela long sait bilong mani. Brata i salim kar bilong mi long 25 dola.

Mipela i go long Wichita, na wanpela pren bilong famili bilong mi em i mekim wok painia long dispela hap, em E. F. McCartney; mipela i kolim em long narapela nem, “Doc.” Tupela twin pikinini man bilong McCartney em Frank na Francis, na tupela i stap yet olsem ol gutpela pren bilong mi. Tupela i salim wanpela olpela kar long 25 dola na mi baim, na em inap stret long mani mi kisim long olpela kar bilong mi. Dispela em fes taim bilong mi long luksave olsem Jehova i givim ol samting mi bai nidim bikos mi putim wok bilong Kingdom i stap namba 1. Long dispela taim, McCartney i kisim mi i go bungim Bethel Crane, em wanpela sista i givim bel tru long mekim wok bilong God. Mama bilong Bethel em Ruth. Maski Ruth i winim pinis 90 krismas, em i givim bel long mekim wok painia long biktaun Wellington long Kansas. Long 1958, klostu olsem wanpela yia bihain, mitupela Bethel i marit na em i joinim mi long mekim wok painia long El Dorado.

OL GUTPELA INVATESEN

Mitupela i skelim ol gutpela eksampel bilong ol wanfamili na ol pren, na mipela i pasim tok olsem mipela bai mekim olgeta kain wok oganaisesen bilong Jehova i askim mipela long mekim. Mipela i kisim asainmen bilong mekim wok olsem spesel painia long Walnut Ridge long Arkansas. Long 1962, mipela i amamas long kisim invatesen bilong i go long namba 37 klas bilong Skul Gileat. Mipela i amamas tru olsem Don Steele i kam long seim klas long Skul Gileat. Taim mipela i grediuet, mitupela Bethel i kisim asainmen bilong i go mekim wok misineri long Nairobi, Kenya. Mitupela i aiwara taim mipela i lusim New York, tasol mipela i amamas taim mipela i bungim ol bratasista long ples balus long Nairobi!

Mipela i autim tok wantaim Mary na Chris Kanaiya long Nairobi

I no longtaim, mipela i laikim tru Kenya na mipela i amamas long autim tok long dispela kantri. Fes lain mipela i stadi wantaim ol em Chris na Mary Kanaiya. Nau tupela i stap yet long fultaim sevis long Kenya. Wanpela yia bihain, asainmen i senis na mipela i go long Kampala long kantri Yuganda, na mipela i fes lain long i go olsem misineri long dispela hap. Mipela i amamas tru bikos planti manmeri i laik kisim save long tok bilong Baibel, na ol i kamap wanbilip bilong mipela. Mipela i stap 3 na hap yia long Afrika, na bihain mipela i gat pikinini. Olsem na mipela i go bek long Amerika. Taim mipela i laik lusim Afrika, aiwara bilong mipela i bikpela moa winim aiwara bilong mipela taim mipela i lusim New York. Mipela i laikim tru ol manmeri long Afrika, na mipela i gat laik long i go bek sapos rot i op.

NUPELA ASAINMEN

Mipela i go stap long hap wes bilong Colorado, em ples papamama bilong mi i stap long en. Fes pikinini meri bilong mipela, Kimberly, i bon. Inap 17 mun bihain, Stephany i bon. Mipela i tingim tru wok bilong mipela olsem papamama, na mipela i wok strong long planim tok i tru long bel bilong 2-pela naispela pikinini meri bilong mipela. Mipela i laik bihainim eksampel bilong ol lain i stap paslain long mipela. Maski gutpela eksampel bilong ol narapela i gat strong long stiaim ol pikinini, taim ol pikinini i kamap bikpela, ol yet bai mekim disisen olsem ol bai lotuim Jehova o nogat. Liklik brata na susa bilong mi i lusim tok i tru. Ating wanpela taim tupela bai bihainim gen  gutpela eksampel bilong ol wanfamili na ol pren.

Mipela i amamas tru long lukautim na skulim 2-pela pikinini bilong mipela, na oltaim mipela i save bung wantaim long mekim ol samting. Mipela i stap klostu long Aspen, Colorado. Olsem na mipela i lain long i go ski long ais bambai sampela taim mipela olgeta inap i go ski. Taim mipela i kalap long lift bilong i go antap long maunten bilong redi long ski, mipela i save toktok gut wantaim 2-pela pikinini. Mipela i save go na mekim kem long wanpela hap, na long nait mipela i save sindaun raunim paia na stori long planti gutpela samting. Maski ol pikinini i liklik yet, tupela i save askim olsem, “Mi bai mekim wanem taim mi kamap bikpela?” na “Mi laikim wanem kain poroman marit?” Mipela i wok strong long putim ol lo bilong God i go daun long tingting na bel bilong tupela. Mipela i kirapim ol long givim bikpela haptaim moa long mekim wok bilong God, na maritim man i holim wankain tingting olsem ol long mekim wok bilong God. Mipela i helpim ol long luksave olsem i gutpela moa long ol i no ken marit taim ol i yangpela tumas. Mipela i save mekim dispela hap tok, “Stap fri inap yu winim 23 krismas.”

Wankain olsem ol papamama bilong mipela i bin mekim, mipela i save go oltaim long ol miting na autim tok wantaim olsem famili. Mipela i save invaitim ol bratasista i stap long fultaim sevis long kam stap wantaim mipela. Taim mipela i stori long wok misineri bilong mipela, mipela i save soim olsem mipela i laikim tru dispela wok. Mipela i save tok olsem wanpela taim mipela 4-pela bai i go wantaim long Afrika. Tupela pikinini bilong mipela i laik tru long mekim olsem.

Oltaim mipela i save mekim famili stadi, na mipela i save mekim soim long ol samting inap kamap long skul. Tupela pikinini i save stap olsem ol Witnes na bekim ol askim bilong mipela. Tupela i save amamas tru long mekim olsem, na dispela i mekim na tupela i no pret o sem. Taim tupela i kamap bikpela, sampela taim tupela i save komplein taim mipela i no mekim famili stadi. Wanpela taim, mi tokim tupela long i go long rum bilong ol bikos mipela i no inap stadi. Tupela i kirap nogut na krai na tok ol i laik stadi. Mipela i luksave olsem mipela i bin helpim ol long kisim pasin bilong laikim tumas Tok Bilong God taim ol i liklik yet. Tupela i laikim tru pasin bilong stadi, na mipela i larim ol long stori long olgeta samting ol i tingting long en. Sampela taim, mipela i save bel hevi taim ol i tok ol i no wanbel long sampela samting long sait bilong tok i tru. Tasol dispela i opim rot bilong mipela long kisim save long tingting tru i stap long bel bilong ol. Bihain long mipela i stori gut wantaim ol, ol i save wanbel long tingting bilong Jehova.

PLANTI MOA SENIS

Wok bilong mipela long lukautim pikinini i pinis kwiktaim. Mipela i bihainim tok bilong oganaisesen na wok strong long helpim ol long laikim Jehova. Mipela i amamas taim tupela i pinisim haiskul na kirap mekim wok painia, na tupela yet i mekim sampela wok bilong lukautim tupela long sait bilong mani. Long taun Cleveland, Tennessee, ol i sot tru long ol pablisa, olsem na 2-pela pikinini bilong mipela i go wantaim 2-pela narapela sista long helpim wok autim tok long dispela hap. Mipela i misim ol tru, tasol mipela i amamas olsem tupela i yusim laip bilong tupela long fultaim sevis. Mitupela Bethel i kirap gen long mekim wok painia, na dispela i opim rot long mipela inap mekim ol narapela gutpela wok. Mipela i mekim wok olsem helpim bilong wasman sekit na mipela i helpim tu long ol kibung.

Paslain long 2-pela pikinini meri i go long Tennessee, tupela i go raun long London long Inglan na visitim brens ofis. Stephany i gat 19 krismas, na em i bungim Paul Norton, em yangpela brata i mekim wok long Betel. Bihain, ol i go raun gen long London na Kimberly i bungim Brian Llewellyn, em wanwok bilong Paul Norton. Stephany i wet inap em i winim 23 krismas na em i maritim Paul. Kimberly i wet inap em i gat 25 krismas na em i maritim Brian. Tupela i stap fri inap long ol i winim 23 krismas. Mipela i amamas tru olsem tupela i makim ol gutpela poroman marit.

Mitupela Bethel i sanap wantaim Paul, Stephany, Kimberly, na Brian long Malawi brens ofis long yia 2002

Tupela pikinini meri i tokim mipela olsem eksampel bilong mipela na ol bubu bilong ol i helpim ol long bihainim tok bilong Jisas long “painim Kingdom pastaim,” maski ol i bungim hevi bilong mani. (Mat. 6:33) Long Epril 1998, Paul na Stephany i kisim invatesen bilong i go long 105 klas bilong Skul Gileat, na bihain ol i kisim asainmen bilong wok misineri long Malawi long Afrika. Long wankain taim, Brian na Kimberly i kisim invatesen bilong i go wok long Betel long London, na bihain ol i salim tupela i go long Betel long Malawi. Mipela i amamas tru olsem dispela  em nambawan gutpela wok ol yangpela inap mekim.

NARAPELA GUTPELA BLESING

Long Janueri 2001, brata i ringim mi olsem mi bin stori long en long kirap bilong dispela stori. Brata Marais em ovasia bilong Trenslesen Sevis, na em i tok ol brata i stretim rot long givim trening bilong tok Inglis long olgeta trensleta long olgeta hap. Mi gat 64 krismas na ol i makim mi tu long mekim wok tisa. Mi na Bethel i beten na toktok wantaim 2-pela lapun mama bilong mipela long kisim tingting bilong ol. Tupela wantaim i laik bai mipela i go, maski mipela bai i no stap na lukautim ol. Mi ringim gen Brata Marais na toksave olsem mipela i amamas tru long mekim dispela wok.

Bihain, mama bilong mi i kisim sik kensa. Mi tokim em olsem mipela bai stap na helpim susa bilong mi Linda long lukautim em. Mama i tok: “Yupela i no ken mekim olsem. Mi bai bel hevi tru sapos yupela i no go.” Linda i gat wankain tingting olsem mama. Mipela i amamas tru long pasin bilong Mama na Linda long daunim laik bilong ol yet, na tu, mipela i amamas long gutpela pasin bilong ol neiba! Mipela i lusim ol na go long Wastaua Ediukesen Senta long Patterson, na long neks de Linda i ring na toksave olsem Mama i dai. Sapos Mama i stap laip, em bai tokim mipela long givim bel tru long mekim nupela asainmen bilong mipela, olsem na mipela i givim bel tru long mekim dispela wok.

Mipela i amamas tru olsem fes asainmen bilong mipela em long go long Malawi brens, em hap we 2-pela pikinini meri na man bilong ol i stap na wok long en. Mipela i amamas tru long bung gen! Bihain mipela i go givim skul long Simbabwe na Sambia. Mipela i mekim dispela wok inap 3 na hap yia, na bihain ol i askim mipela long go bek long Malawi na raitim stori bilong ol Witnes husat i karim hevi bilong pasin birua na ol i sanap strong long bilip. *

Mipela i autim tok wantaim 2-pela bubu

Long 2005, mipela i krai taim mipela i lusim Afrika na kam bek long Basalt long Colorado na mitupela Bethel i mekim gen wok painia. Long 2006, Brian na Kimberly i kam i stap neiba bilong mipela na lukautim 2-pela pikinini meri bilong ol, em Mackenzie na Elizabeth. Paul na Stephany i stap yet long Malawi na Paul i stap memba bilong Brens Komiti. Klostu nau bai mi gat 80 krismas, na mi amamas tru long lukim ol yangpela man mi bin wok wantaim ol i mekim ol wok mi mekim long bipo. Mipela i amamas bikos mipela i bihainim eksampel bilong ol wanfamili na ol pren, na mipela i wok strong long stap gutpela eksampel long ol pikinini na ol bubu bilong mipela.

^ par. 5 Sapos yu laik save moa long wok misineri bilong lain famili bilong Steele, lukim Watchtower bilong Me 1, 1956, p. 269-272, na Mas 15, 1971, p. 186-190.

^ par. 30 Lukim laip stori bilong Trophim Nsomba long Wastaua bilong Epril 15, p. 14-18.