Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Wastaua—Stadi Edisen  |  Ogas 2016

Yu Mas Trenim Ol Narapela

Yu Mas Trenim Ol Narapela

“Tok mi givim yupela, em i gutpela tru.”—SND. 4:2.

OL SINGSING: 93, 96

1, 2. Bilong wanem yumi mas trenim ol narapela long mekim ol wok tiokratik?

JISAS i lusim bikpela haptaim long autim gutnius bilong Kingdom. Tasol em i lusim sampela haptaim long trenim ol narapela long mekim wok olsem ol wasman na ol tisa. (Mat. 10:5-7) Maski Filip i bisi long mekim wok bilong autim gutnius, em i trenim 4-pela pikinini meri bilong em tu long mekim gut wok bilong autim tok bilong God. (Apo. 21:8, 9) Bilong wanem yumi mas trenim ol narapela long nau?

2 Long olgeta hap bilong graun, planti manmeri moa i wok long putim yau long gutnius. Ol nupela manmeri husat i no baptais yet, ol i mas luksave olsem em i bikpela samting long ol yet i mas stadi long Baibel. Ol i mas lain long autim gutnius na skulim ol man long tok i tru. Insait long kongrigesen, ol brata i mas wok strong bambai ol inap winim mak bilong mekim wok olsem kongrigesen sevan na elda. Ol strongpela Kristen i ken mekim ‘tok i gutpela tru’ na helpim ol nupela manmeri long kamap strong long bilip.—Snd. 4:2.

HELPIM OL LONG KISIM STRONG NA SAVETINGTING LONG BAIBEL

3, 4. (a) Olsem wanem Pol i soim olsem pasin bilong stadi long Baibel bai helpim yumi long mekim gut wok autim tok? (b) Yumi yet i mas mekim wanem paslain long yumi kirapim sumatin long stadi long Baibel?

3 Bilong wanem em i bikpela samting long yumi yet i mas stadi gut  long Tok Bilong God? Yumi kisim bekim bilong dispela askim long tok em aposel Pol i raitim i go long ol Kristen i stap long Kolosi. Em i tok: “Oltaim mipela i save beten askim God long helpim yupela. Mipela i beten olsem stretpela save long ol laik bilong em i ken pulap long yupela na yupela i ken kisim olgeta savetingting na holi spirit i ken helpim yupela long kisimgut ol tok. Olsem bai yupela inap wokabaut olsem ol manmeri tru bilong Jehova na olgeta samting yupela i mekim bai amamasim em. Na long seim taim bai yupela i karim kaikai yet long rot bilong olgeta gutpela wok. Na stretpela save bilong yupela long God i ken kamap bikpela moa.” (Kol. 1:9, 10) Taim ol Kristen long Kolosi i kisim stretpela save, dispela bai redim ol long “wokabaut olsem ol manmeri tru bilong Jehova na olgeta samting [ol] i mekim bai amamasim em.” Ol bai “karim kaikai yet long rot bilong olgeta gutpela wok,” na moa yet long wok bilong autim gutnius. Sapos wokman bilong Jehova i laik mekim gut wok lotu, em i mas kisim pasin bilong stadi long Baibel. Yumi mas helpim ol Baibel sumatin long kisim pasin bilong mekim stadi bilong ol yet.

4 Paslain long yumi stiaim ol narapela long kisim helpim long pasin bilong mekim Baibel stadi bilong ol yet, yumi yet i mas i gat pasin bilong stadi long Baibel na luksave long olsem wanem dispela i helpim yumi. Olsem na yu ken askim yu yet olsem: ‘Taim ol man bilong haus i kamapim ol tok i no stret wantaim tok bilong Baibel o ol i givim askim long sampela bikpela tok, orait mi inap yusim tok bilong Baibel long bekim askim bilong ol o nogat? Taim mi ritim stori bilong Jisas, Pol, na ol narapela husat i bin wok strong long autim tok, mi save tingim tingim olsem wanem mi inap bihainim eksampel bilong ol taim mi mekim wok bilong Jehova?’ Yumi olgeta i mas kisim save na skultok i kam long Baibel. Sapos yumi tokim ol narapela olsem yumi kisim bikpela helpim taim yumi yet i stadi long Baibel, dispela inap kirapim ol tu long stadi gut long Baibel na kisim wankain helpim.

5. Yu ken mekim wanem bilong helpim sumatin long kisim pasin bilong stadi long Baibel?

5 Ating yu laik save olsem, ‘Hau bai mi inap trenim sumatin bilong mi long kisim pasin bilong stadi long Baibel?’ Wanpela rot em olsem, yu ken soim em long hau em inap redim buk yupela i stadi long en. Yu ken tokim em long ritim sampela tok long apendiks bilong buk Tru Tru Baibel i Tok Wanem? na ritim ol skripsa i stap long dispela hap. Helpim em long redim ol miting na bekim tok long miting. Kirapim em long ritim ol nupela Wastaua na Kirap! Sapos Wastaua Laibreri o Wastaua ONLINE LIBRARY i stap tu long tokples bilong em, orait yu ken soim em long hau em inap yusim dispela laibreri long painim bekim bilong ol askim em i gat long tok bilong Baibel. Dispela bai helpim sumatin long kisim amamas long pasin bilong stadi gut long Tok Bilong God.

6. (a) Yu ken mekim wanem bilong helpim sumatin long kisim pasin bilong laikim tru ol tok bilong Baibel? (b)  Pasin bilong laikim tru tok bilong Baibel bai kirapim sumatin long mekim wanem?

 6 Em tru olsem yumi no ken fosim ol man long rit o stadi long Baibel. Yumi ken yusim ol tul em oganaisesen bilong Jehova i redim na helpim sumatin long kisim pasin bilong laikim tumas ol tok bilong Baibel. Bihain, sumatin inap bihainim wankain pasin olsem man bilong raitim song, em i tok: “Mi stap klostu long yu na dispela i gutpela tru. God, Bikpela, yu banis tru bilong mi.” (Sng. 73:28) Spirit bilong Jehova bai sambai long Baibel sumatin husat i givim bel tru long stadi gut long Baibel.

TRENIM OL LONG AUTIM TOK NA SKULIM MAN

7. Olsem wanem Jisas i trenim ol disaipel long autim gutnius? (Lukim piksa long kirap bilong stadi.)

7 Long Matyu sapta 10, yumi inap lukim ol instraksen em Jisas i givim long 12-pela aposel. Em i kolim stret ol samting ol i mas mekim na ol samting ol i no ken mekim. [1] Ol aposel i putim gut yau taim Jisas i skulim ol long wei bilong mekim gut wok autim tok. Ol aposel i bin lukim gut wei bilong Jisas long autim tok, olsem na i no longtaim ol yet i skulim gut ol man long Tok Bilong God. (Mat. 11:1) Yumi inap trenim ol Baibel sumatin long mekim gut wok bilong autim gutnius. Orait nau yumi ken skelim 2-pela rot bilong helpim ol.

8, 9. (a) Jisas i bihainim wanem kain pasin taim em i toktok wantaim ol manmeri? (b) Olsem wanem yumi inap helpim ol nupela pablisa long toktok gut wantaim ol manmeri olsem Jisas i bin mekim?

8 Toktok wantaim ol man. Taim Jisas i toktok wantaim ol man, em i save stori long Kingdom. Wanpela taim em i toktok gut wantaim wanpela meri em i bungim long hulwara bilong Jekop, klostu long taun Sikar. (Jon 4:5-30) Na tu, em i bin toktok wantaim Matyu Levi, em wanpela takisman. Ol stori bilong 4-pela Gutnius i no kamapim planti stori long toktok i kamap namel long Matyu na Jisas, tasol bihain Matyu i kamap disaipel bilong Jisas. Matyu na ol narapela i harim Jisas i mekim sampela tok inap longpela taim liklik taim ol i stap long wanpela bung i kamap long haus bilong Matyu.—Mat. 9:9; Luk 5:27-39.

9 Long narapela taim, Jisas i mekim gutpela tok long Nataniel, em man husat i holim tingting kranki long ol manmeri bilong Nasaret. Tok bilong Jisas i helpim Nataniel long kisim stretpela tingting. Em i redi long kisim sampela save moa long ol tok em Jisas Bilong Nasaret i wok long skulim ol man long en. (Jon 1:46-51) Olsem na yumi mas trenim ol nupela pablisa long bihainim pasin pren taim ol i toktok wantaim ol manmeri. [2] Taim yumi trenim ol pablisa long bihainim dispela pasin, ol bai amamas taim ol i lukim ol manmeri i putim yau long tok ol i autim.

10-12. (a) Olsem wanem Jisas i kirapim laik bilong ol manmeri husat i amamas long putim yau long gutnius? (b) Olsem wanem yumi inap helpim ol nupela pablisa long kamap gutpela moa long wok bilong skulim ol man long tok bilong Baibel?

10 Kirapim laik bilong man. Jisas i bin i gat sotpela taim tasol long autim tok. Maski i olsem, em i lusim sampela haptaim long kirapim laik bilong ol manmeri husat i putim yau long gutnius. Wanpela taim, Jisas i stap antap long bot na em i autim tok long bikpela lain manmeri i bung. Long dispela taim, em i wokim mirakel na Pita i kisim planti pis long umben, na em i tokim Pita olsem: “Stat long nau na i go, yu bai i gat wok long kisim ol man.” Toktok na pasin bilong Jisas i kirapim ol disaipel long mekim wanem? Pita na ol wanlain bilong em “i kisim ol bot i kam bek long nambis, na ol i lusim olgeta samting na bihainim [Jisas].”—Luk 5:1-11.

11 Nikodemus em memba bilong Sanhedrin, na em i laikim ol tok Jisas i skulim ol man long en. Em i laik kisim sampela save moa, tasol em i pret long ol narapela bai tok wanem sapos ol i lukim em i toktok wantaim Jisas. Tasol Jisas i redi long yusim taim bilong em long helpim  ol narapela, olsem na em i toktok wantaim Nikodemus long nait taim i no gat planti manmeri i stap. (Jon 3:1, 2) Yumi inap kisim wanem skul long ol dispela stori? Pikinini Bilong God i lusim sampela haptaim long strongim bilip bilong ol manmeri. Dispela i skulim yumi long wok strong moa long mekim gut ol gobek na stadi long Baibel wantaim ol manmeri husat i laik kisim sampela save moa.

12 Sapos yumi autim tok wantaim ol nupela pablisa, dispela bai helpim ol long kamap gutpela moa long pasin bilong skulim ol man long tok bilong Baibel. Yumi mas helpim ol long tingim gut olgeta manmeri husat i putim yau, maski sapos ol dispela manmeri i no amamas tumas. Yumi ken tokim ol nupela pablisa long wok wantaim yumi taim yumi mekim gobek na Baibel stadi. Taim yumi trenim na strongim ol nupela pablisa, ol yet bai inap long kirapim tingting bilong ol manmeri na stadi wantaim ol long Baibel. Na tu, ol bai lain long bihainim pasin isi na wok strong yet long autim tok na ol i no inap les kwik.—Gal. 5:22; lukim blok “ Yumi No Ken Les Kwik.”

TRENIM OL LONG HELPIM OL WANBILIP

13, 14. (a) Yu kisim wanem skul long ol manmeri em Baibel i stori olsem ol i daunim tru laik bilong ol yet bambai ol inap helpim ol narapela? (b) Olsem wanem yu inap trenim ol nupela pablisa na ol yangpela long soim pasin laikim long ol bratasista?

13 Ol stori bilong Baibel i soim klia olsem yumi inap soim “pasin bilong laikim tru ol brata” na helpim narapela narapela. (Ritim 1 Pita 1:22; Luk 22:24-27.) Pikinini Bilong God i bin givim olgeta samting, na laip bilong em tu, bilong helpim ol narapela. (Mat. 20:28) Dorkas “i save mekim planti samting bilong helpim ol arapela na oltaim em i save givim ol samting long ol rabisman.” (Apo. 9:36, 39) Maria em wanpela sista i stap long Rom, na “em i bin mekim planti wok bilong helpim” ol wanbilip insait long kongrigesen. (Rom 16:6) Olsem wanem yumi inap helpim ol sumatin long luksave olsem em i bikpela samting long helpim ol narapela bratasista?

Trenim ol nupela pablisa long soim pasin laikim long ol wanbilip (Lukim paragraf 13 na 14)

14 Ol Witnes husat i stap strong long bilip, ol i ken tokim ol nupela pablisa long bihainim ol taim ol i go visitim ol lapun bratasista na ol bratasista husat i sik. Sapos i orait, ol papamama i ken bringim ol pikinini i go wantaim ol. Ol elda i ken wok bung wantaim ol narapela pablisa na lukautim ol lapun bratasista long sait bilong kaikai na stretim ol samting i bagarap long haus bilong ol. Long dispela rot, ol yangpela na ol nupela pablisa bai lain long pasin bilong helpim ol narapela. Taim wanpela elda i mekim wok autim tok, em i save go visitim ol Witnes i stap long teritori bilong em na lukim sapos ol i stap orait o nogat. Wanpela yangpela brata i save go wantaim em, na dispela yangpela i luksave olsem yumi mas mekim pasin we inap kirapim olgeta long kongrigesen long pilim olsem yumi laikim ol.—Rom 12:10.

15. Bilong wanem ol elda i mas helpim ol brata long kongrigesen long kamap gutpela moa long mekim wok tisa?

15 Jehova i yusim ol man long mekim wok tisa insait long kongrigesen, olsem na em i bikpela samting long ol brata i mas lain long pasin bilong toktok gut. Sapos yu mekim wok elda, orait yu ting yu inap lusim sampela haptaim long putim yau taim wanpela kongrigesen sevan i prektisim tok bilong em? Sapos yu helpim em, em inap kamap gutpela moa long pasin bilong skulim ol man long Tok Bilong God.—Neh. 8:8. [3]

16, 17. (a) Olsem wanem Pol i helpim Timoti long mekim gut wok wasman? (b) Olsem wanem ol elda inap trenim gut ol brata husat inap kamap wasman insait long kongrigesen?

16 Olgeta kongrigesen i nidim tru ol wasman. Ol brata husat i winim mak na kamap wasman, ol i mas wok yet long kisim trening. Pol i stori gut long olsem wanem ol dispela brata inap kisim trening, na em i tokim Timoti olsem: “Pikinini bilong mi, yu mas wok yet long kisim strong long bikpela pasin helpim i  kamap long rot bilong pas wantaim Krais Jisas. Ol tok yu bin harim long mi, na planti arapela tu i bin harim, dispela tok yu mas givim long ol man i save holimpas bilip. Na ol bai inap tru long winim mak bilong skulim ol arapela.” (2 Tim. 2:1, 2) Timoti i kisim skul long mekim dispela wok taim em i wok wantaim aposel Pol, em man i gat bikpela krismas moa winim Timoti. Bihain, Timoti i bihainim ol pasin bilong Pol taim em yet i mekim wok autim tok na ol narapela samting long wok lotu.—2 Tim. 3:10-12.

17 Pol i no larim Timoti long i stap em yet na mekim ol wok, nogat. Em i tokim Timoti long raun wantaim em na mekim ol wok. (Apo. 16:1-5) Ol elda i ken bihainim pasin bilong Pol na kisim ol kongrigesen sevan i go wantaim ol taim ol i mekim sepeding visit. Ol kongrigesen sevan inap lukim na kisim skul long ol pasin em ol wasman i mas i gat—pasin laikim, strongpela bilip, i no les kwik, na pasin bilong skulim gut ol man. Long dispela rot, ol elda inap trenim ol brata husat inap mekim wok olsem ol wasman bilong “lukautim gut ol sipsip bilong God.”—1 Pita 5:2.

WOK BILONG TRENIM OL NARAPELA

18. Bilong wanem em i bikpela samting long yumi mas trenim ol narapela long mekim wok bilong Jehova?

18 Em i bikpela samting long yumi mas trenim ol narapela bikos i gat planti samting moa em ol manmeri bilong Jehova i mas mekim. Yumi mas bihainim eksampel bilong Jisas na Pol long trenim ol narapela. Jehova i laik bai ol wokman bilong em long nau i mas kisim gut trening bambai ol inap mekim gut wok bilong Em. Yumi inap helpim ol arapela pablisa long lain gut long mekim sampela wok insait long kongrigesen. Pasin bilong dispela graun i wok long kamap nogut moa na planti rot moa i op long yumi inap mekim wok autim tok, olsem na em i bikpela samting long yumi mas hariap long trenim ol narapela.

19. Bilong wanem yu ken bilip olsem hatwok bilong yu i no inap lus nating taim yu trenim gut ol narapela long mekim wok bilong Jehova?

19 Em tru olsem yumi mas wok hat na lusim bikpela haptaim bilong yumi long trenim ol narapela. Tasol Jehova na Pikinini bilong em bai sambai long yumi na givim yumi savetingting bambai yumi inap trenim gut ol narapela. Yumi bai amamas tru taim yumi lukim olsem ol lain yumi helpim, ol i “wok hat na taitim bun.” (1 Tim. 4:10) Yumi tu i ken kamap strong moa long bilip taim yumi mekim wok bilong Jehova.

^ [1] (paragraf 7) Jisas i toktok tu long ol dispela samting: (1) Autim tok i stret. (2) Amamas long ol samting God i givim. (3) No ken tok pait wantaim ol man. (4) Trastim God taim ol man i birua. (5) No ken pret long ol man.

^ [2] (paragraf 9) Buk Skul Tiokratik Bilong Autim Tok, p. 62-64, i kamapim ol gutpela stiatok long pasin bilong toktok gut wantaim ol manmeri taim yumi autim tok.

^ [3] (paragraf 15) Buk Skul Tiokratik Bilong Autim Tok, p. 52-61, i stori gut long ol pasin em man i mas bihainim bambai em inap mekim gut tok long ai bilong pablik.