Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Wastau—Stadi Edisen  |  Ogas 2016

Johannes Rauthe i autim tok, ating long ol yia bihain long 1920

 HISTORI BILONG YUMI

“Mi Mekim Wok i Litimapim Nem Bilong Jehova”

“Mi Mekim Wok i Litimapim Nem Bilong Jehova”

“BIKPELA woa i kamap nau long Yurop i winim tru olgeta narapela woa i kamap long bipo.” Dispela tok i stap long The Watch Tower bilong Septemba 1, 1915 we i stori long Wol Woa 1—inap 30 kantri olgeta i insait long dispela woa. Planti manmeri tru i kisim bagarap, olsem na The Watch Tower i tok: “I no gat rot long autim tok long Jemani na Frans.”

Long dispela taim, pait i kamap long olgeta hap bilong graun, na ol Sumatin Bilong Baibel i no kliagut olsem ol Kristen i no ken insait long pait. Tasol ol i tingting strong long autim gutnius. Wilhelm Hildebrandt em wanpela brata, na em i laik mekim wok bilong Kingdom. Olsem na em i putim oda long kisim ol kopi bilong nius The Bible Students Monthly long tokples Frans. Em i no mekim wok olsem kolpota (wok painia) long Frans, nogat, em i mekim wok olsem soldia bilong Jemani. Brata Wilhelm i werim yunifom bilong ami na em i luk olsem wanpela birua, tasol ol manmeri bilong Frans i kirap nogut taim em i autim gutnius bilong bel isi.

Ol pas ol i prinim long The Watch Tower i soim olsem ol narapela Sumatin Bilong Baibel long Jemani i mekim wok soldia, tasol ol i autim gutnius bilong Kingdom. Brata Lemke i mekim wok nevi, na em i lukim olsem 5-pela wanwok bilong em i amamas long harim tok em i autim. Em i tok: “Maski mi stap long sip, mi mekim wok i litimapim nem bilong Jehova.”

Georg Kayser i go long pait olsem soldia, tasol em i kam bek olsem wokman bilong God. Wanem samting i kamap? Em i kisim pablikesen bilong ol Sumatin Bilong Baibel, na em i laikim tru tok bilong Kingdom, na em i lusim pait. Em i mekim ol narapela wok we i no sapotim pait. Bihain long woa, em i givim bel tru long mekim wok painia inap planti yia.

Maski ol Sumatin Bilong Baibel i no kliagut yet olsem ol i no ken insait long pait, ol i stap narapela kain tru long ol manmeri husat i insait long pait. Lain politik na ol bikman bilong lotu i sapotim  kantri bilong ol, tasol ol Sumatin Bilong Baibel i stap gut long “King bilong kamapim gutpela sindaun na bel isi.” (Ais. 9:6) Sampela Sumatin Bilong Baibel i sapotim pait, tasol ol i holim wankain tingting olsem Konrad Mörtter, em tu i Sumatin Bilong Baibel. Konrad i tok: “Mi luksave olsem Baibel i tok Kristen i no ken kilim man.”—Kis. 20:13. *

Hans Hölterhoff i yusim dispela wilkar long edvetaisim nius The Golden Age

Long Jemani, i no gat wanpela lo i sambai long ol man i bihainim maus bilong bel na i no laik insait long pait. Maski i olsem, winim 20 Sumatin Bilong Baibel i no joinim ami. Olsem na gavman i listim sampela Sumatin Bilong Baibel olsem ol lain i gat sik long tingting. Wanpela em Gustav Kujath. Ol i putim em long hap bilong lukautim ol man i gat sik long tingting na ol i givim drak long em. Hans Hölterhoff em narapela brata husat i no laik insait long ami. Ol i kalabusim em, tasol em i sakim olgeta narapela wok bilong sapotim pait. Ol gad i pasim em insait long saket we i taitim bodi na bodi bilong em i dai. Tasol em i no senisim tingting, olsem na ol gad i trikim em olsem ol bai kilim em i dai. Maski i olsem, Hans i stap gut yet long God i go inap long woa i pinis.

Sampela brata i joinim ami, tasol ol i no laik holim gan. Ol i askim long mekim ol narapela wok we i no sapotim pait. * Johannes Rauthe i go wok long rot bilong tren. Konrad Mörtter i mekim wok dokta, na Reinhold Weber i mekim wok nes. August Krafzig i amamas tru olsem em i mekim narapela wok na em i no insait long pait. Ol dispela Sumatin Bilong Baibel na ol narapela, ol i tingim pasin laikim na pasin bilong i stap gut long God na ol narapela, olsem na ol i tingting strong long mekim wok bilong Jehova.

Pasin ol Sumatin Bilong Baibel i bihainim long taim bilong woa i mekim na gavman i skelim olgeta samting ol i mekim. Ol Sumatin Bilong Baibel long Jemani i autim tok, olsem na kirap long dispela taim na i kam, ol i sanap long planti tausen kot keis. Olsem na brens ofis bilong Jemani i kamapim Ligol Dipatmen long Betel long Magdeburg.

Isi isi, save bilong ol Witnes Bilong Jehova i kamap klia moa olsem ol i no ken insait long pait. Taim Wol Woa 2 i kirap, ol i stap gut long God na ol i no insait liklik long pait. Olsem na gavman bilong Jemani i lukim ol olsem ol birua na mekim nogut tru long ol. Tasol dispela em narapela stori bai kamap long atikol “Histori Bilong Yumi.”—Histori bilong yumi long Sentral Yurop.

^ par. 7 Lukim stori bilong ol Sumatin Bilong Baibel long Briten long Wol Woa 1 long atikol “Histori Bilong Yumi—Ol i Sanap Strong Long ‘Taim Bilong Traim’” long Wastaua bilong Me 15, 2013.

^ par. 9 Dispela stori i stap long Volium 6 bilong Millennial Dawn (1904), na tu, long Zion’s Watch Tower bilong Ogas 1906 long tokples Jemani. The Watch Tower bilong Septemba 1915 i kamapim klia olsem ol Sumatin Bilong Baibel i mas sakim wok bilong ami. Tasol dispela atikol i no kamap long tokples Jemani.