Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Wastau—Stadi Edisen  |  Ogas 2016

Marit—Kirap Olsem Wanem na Bilong Wanem?

Marit—Kirap Olsem Wanem na Bilong Wanem?

“God, Bikpela i tok olsem, ‘Em i no gutpela long dispela man i stap wanpis. Mi mas mekim kamap wanpela poroman bilong helpim em.’”—STT. 2:18.

OL SINGSING: 36, 11

1, 2. (a) Marit i kamap olsem wanem? (b) Ol samting God i mekim i helpim fes man na meri long luksave long wanem samting? (Lukim piksa long kirap bilong stadi.)

EM NOMOL long man na meri i marit. Taim yumi skelim gen stori bilong marit i kirap olsem wanem, na bilong wanem dispela samting i kamap, dispela bai helpim yumi long holim stretpela tingting na amamas moa long ol blesing bilong en. Bihain long God i wokim fes man Adam, em i bringim ol animal i kam long Adam long givim nem long ol. “Tasol i no gat wanpela bilong ol dispela samting inap i stap poroman bilong helpim Adam.” Olsem na God i mekim Adam i slip i dai tru, na God i kisim wanpela bun long bros bilong Adam na wokim wanpela meri na bringim em i kam long Adam. (Ritim Stat 2:19-24.) Long dispela rot, God i kamapim pasin bilong marit.

2 Jisas i kolim gen tok em Jehova i bin mekim: “Long dispela as man bai lusim papa na mama bilong en na pas wantaim meri bilong en, na tupela bai kamap wanpela bodi.” (Mat. 19:4, 5) God i bin yusim bun long bros bilong Adam long wokim fes meri, olsem na ating dispela i helpim tupela long luksave olsem em i bikpela  samting long tupela i mas pas gut wantaim. God i no mekim wanpela samting bilong soim olsem tupela i ken divos o kisim 2-pela o 3-pela poroman marit, nogat tru.

MARIT I STRET WANTAIM LAIK BILONG JEHOVA

3. Bilong wanem God i kamapim marit?

3 Adam i amamas tru long naispela meri bilong em na i kolim em Iv. Meri bai stap “poroman bilong helpim” Adam, na long olgeta de tupela bai amamasim narapela narapela taim tupela i inapim wok bilong tupela olsem maritman na maritmeri. (Stt. 2:18) God i kamapim marit, long wanem, em i laik bai ol manmeri i kamap planti na i go sindaun long olgeta hap bilong graun. (Stt. 1:28) Maski pikinini man na pikinini meri i laikim tru papamama bilong ol, ol bai lusim papamama na marit na kamapim nupela famili. Ol manmeri bai pulapim graun inap stret long mak God i laikim na mekim olgeta hap bilong graun i kamap ples paradais.

4. Wanem samting i kamap long fes marit?

4 Hevi i painim fes marit. Adam na Iv i stap fri long mekim ol samting, tasol tupela i no mekim gutpela disisen, olsem na ol i sakim tok bilong Jehova. Satan “em dispela snek bilong bipo yet.” Em i giamanim Iv long bilip olsem sapos em i kaikai prut bilong “diwai bilong givim gutpela save long wanem samting i gutpela na wanem samting i nogut,” Iv inap save long ol samting i stret na ol samting i no stret. Adam em het bilong famili, tasol Iv i no rispektim wok bos bilong Adam na kisim tingting bilong em. Adam i sakim tok bilong God na em i kaikai prut Iv i givim long em.—Rev. 12:9; Stt. 2:9, 16, 17; 3:1-6.

5. Yumi kisim wanem tok lukaut long ol tok em Adam na Iv i mekim?

5 Taim God i askim Adam long samting i kamap, Adam i sutim tok long meri na tok: “Dispela meri yu bin givim mi olsem poroman bilong mi, em tasol i givim mi pikinini bilong dispela diwai na mi kaikai.” Iv i sutim tok olsem snek i giamanim em. (Stt. 3:12, 13) Ol i mekim ol giaman eskius! Fes man na meri i bikhet na sakim tok bilong Jehova, olsem na em i panisim tupela. Stori bilong tupela i stap olsem tok lukaut long yumi! Sapos tupela marit i laik bai marit bilong ol i kamap gut, orait ol i mas inapim wok bilong ol olsem poroman marit na bihainim tok bilong Jehova.

6. Wanem mining bilong tok i stap long Stat 3:15?

6 Maski Satan i kamapim hevi long gaden Iden, Jehova i mekim fes tok profet we i soim olsem ol manmeri i gat rot long kisim gen gutpela sindaun. (Ritim Stat 3:15.) “Lain bilong meri” bai krungutim het bilong bikhet ensel, em Satan. Dispela tok profet i helpim ol manmeri long luksave olsem Jehova i pas gut wantaim planti milion ensel bilong em long heven. Dispela lain ensel i insait long oganaisesen we i stap olsem meri bilong God. Baibel i kamapim klia olsem God bai makim wanpela long dispela oganaisesen long “krungutim” het bilong Satan na opim rot long ol gutpela manmeri i ken kisim gen gutpela laip em Adam na Iv i lusim—ol bai stap laip oltaim long graun na inapim samting Jehova i tingting pinis long kamapim.—Jon 3:16.

7. (a) Wanem hevi i kamap long ol marit kirap long taim Adam na Iv i bikhet? (b) Baibel i tok tupela marit i mas mekim wanem?

7 Pasin bikhet bilong Adam na Iv i putim hevi long marit bilong tupela na olgeta marit i kamap bihain. Iv na olgeta tumbuna pikinini meri bilong em bai pilim bikpela pen tru taim ol i gat bel na ol i laik karim pikinini. Meri bai laikim tru man bilong em, tasol man bai bosim meri, na em inap bosim meri long hatpela pasin olsem yumi lukim long planti marit long nau. (Stt. 3:16) Baibel i  kamapim klia olsem man i mas bihainim pasin laikim long wok bos bilong em, na meri i mas stap daun long wok bos bilong man. (Efe. 5:33) Sapos tupela marit i bihainim tok bilong God na wok bung wantaim, tupela inap kontrolim o abrusim ol hevi i save kamap insait long marit.

MARIT—TAIM BILONG ADAM I KAM INAP LONG TAIM BILONG NOA

8. Wanem samting i kamap long sait bilong marit long taim bilong Adam na i kam inap long taim bilong Noa?

8 Paslain long Adam na Iv i dai, tupela i kamapim ol pikinini man na ol pikinini meri. (Stt. 5:4) Fes bon pikinini bilong tupela em Kein, na em i maritim wanpela pikinini meri bilong Adam na Iv. Lamek em tumbuna pikinini bilong Kein, na em i fes man long maritim 2-pela meri. (Stt. 4:17, 19) Namel long lain manmeri i stap long taim bilong Adam na i kam inap long taim bilong Noa, wan wan man tasol i lotuim Jehova. Em ol kain man olsem Abel, Inok, na Noa wantaim famili bilong em. Baibel i stori long samting i kamap long taim bilong Noa: “Ol pikinini man bilong God i lukim ol dispela meri [ol pikinini meri bilong ol manmeri long graun] i naispela tumas. Na ol i kisim ol meri long laik bilong ol yet na maritim ol.” God i no wokim ol ensel long marit na kamapim ol pikinini. Olsem na ol pikinini ol i kamapim wantaim ol meri long graun i traipela man tru na ol i save pait na bagarapim ol manmeri—ol i kolim ol olsem ol Nefilim. Na tu, “pasin bilong ol manmeri long olgeta hap i nogut tru. Ol manmeri i tingting tasol long ol samting nogut.”—Stt. 6:1-5.

9. (a) Jehova i mekim wanem long ol manmeri nogut long taim bilong Noa? (b) Yumi kisim wanem skul long dispela stori?

9 Long taim bilong Noa, Jehova i kamapim Bikpela Tait bikos em i laik bagarapim ol manmeri nogut. “Noa em i man bilong tokaut long stretpela pasin,” na em i wok long autim tok long bagarap bai kamap. Tasol ol manmeri i bisi tru long mekim ol wok bilong wan wan de, kain olsem marit, na ol i no putim yau long tok bilong Noa. (2 Pita 2:5) Jisas i tok wankain samting bai kamap long taim bilong yumi. (Ritim Matyu 24:37-39.) Long nau, planti man i no laik putim yau long gutnius bilong Kingdom Bilong God em lain bilong God i wok long autim long olgeta hap bilong graun paslain long pinis i kamap. Yumi no ken tingting tasol long marit na wok bilong lukautim ol pikinini na larim dispela i pasim yumi long luksave olsem de bilong Jehova i kam klostu pinis.

MARIT—TAIM BILONG NOA I KAM INAP LONG TAIM BILONG JISAS

10. (a) Long planti kantri, wanem kain pasin i kamap olsem nomol samting? (b) Olsem wanem Abraham na Sara i soim gutpela eksampel?

10 Noa na 3-pela pikinini man bilong em i gat wan wan meri bilong ol yet, tasol long taim bilong ol bilipman i kamap bihain, ol man i maritim planti meri. Long planti kantri, pasin pamuk i kamap olsem nomol samting, na sampela lotu i orait long dispela pasin. Taim Abram (Abraham) na meri bilong em Sarai (Sara) i bihainim tok bilong God na i go sindaun long Kenan, ol manmeri long dispela kantri i no bihainim stretpela lo long sait bilong marit. Olsem na Jehova i bagarapim ol manmeri bilong Sodom na Gomora bikos ol i mekim kain kain pasin pamuk i nogut tru. Abraham i mekim gut wok bos insait long famili, na Sara i soim gutpela eksampel long bihainim pasin daun na stap aninit long wok bos bilong man. (Ritim 1 Pita 3:3-6.) Abraham i stretim rot na pikinini bilong em Aisak i maritim wanpela meri i lotuim Jehova. Wankain pasin bilong bihainim lotu i tru i stiaim pikinini bilong Aisak, em Jekop—bihain Jekop i kamap tumbuna papa bilong 12-pela lain Israel.

11. Olsem wanem Lo Bilong Moses i lukautim ol Israel?

 11 Bihain, Jehova i mekim kontrak wantaim lain Israel, em ol tumbuna pikinini bilong Jekop. Lo Bilong Moses i kolim ol tok bilong stiaim ol marit i gat 1-pela poroman marit na ol marit i gat 2-pela o 3-pela poroman marit. Lo i tambuim ol Israel long maritim ol manmeri i lotuim ol giaman god. (Ritim Lo 7:3, 4.) Taim bikpela hevi i kamap insait long marit, ol hetman i save helpim ol long stretim. Sapos man o meri i jeles, saspek, o i no stap gut long poroman marit bilong em, ol hetman i save bihainim lo na helpim ol long stretim ol dispela hevi. Ol marit inap divos, tasol i gat lo bilong stiaim ol. Man inap divos long meri sapos “em i painim wanpela rong long dispela meri.” (Lo 24:1) Baibel i no kolim stret wanem kain “rong,” tasol yumi inap tok olsem dispela i no makim ol liklik hevi.—Wkp. 19:18.

NO KEN TRU GIAMANIM POROMAN MARIT

12, 13. (a) Long taim bilong Malakai, sampela man i mekim wanem kain pasin long meri bilong ol? (b) Long nau, sapos wanpela baptais brata o sista i prenim poroman marit bilong narapela man o meri, kongrigesen bai mekim wanem long em?

12 Long taim bilong profet Malakai, planti man Juda i giamanim meri bilong ol. Ol i yusim kain kain eskius long divosim meri. Ol dispela man i rausim meri ol i maritim taim ol i yangpela—ating sampela i laik maritim ol meri i yangpela moa na sampela i laik maritim ol haiden. Long taim bilong Jisas, ol man Juda i bihainim yet pasin bilong giamanim poroman marit na yusim “olgeta kain samting” olsem eskius bilong kisim divos. (Mat. 19:3) God Jehova i heitim tru dispela pasin.—Ritim Malakai 2:13-16.

13 Long nau, ol manmeri bilong Jehova i heitim pasin bilong giamanim poroman marit. Tasol olsem wanem sapos wanpela baptais brata o sista i divosim poroman marit, na em i prenim poroman marit bilong narapela man o meri, na bihain ol i marit? Sapos dispela baptais brata o sista i no tanim bel, em bai raus long kongrigesen bambai kongrigesen i stap klin. (1 Kor. 5:11-13) Dispela man o meri i mas “kamapim ol kaikai i stret wantaim pasin bilong tanim bel” paslain long kongrigesen i kisim em bek. (Luk 3:8; 2 Kor. 2:5-10) Wan wan taim tasol dispela kain hevi i kamap insait long kongrigesen, na i no gat lo i makim olsem wanpela haptaim stret i mas lus paslain long kongrigesen i kisim em bek. Sampela haptaim inap lus—1-pela yia o moa—na man i mas mekim ol samting i soim klia olsem em i tanim bel. Maski sapos kongrigesen i kisim bek dispela man o meri, em “bai sanap long ples kot bilong God,” na dispela i makim olsem God yet bai skelim sapos em i tanim bel tru o nogat.—Rom 14:10-12; lukim Wastaua, Me 1980, p. 21-23.

MARIT NAMEL LONG OL KRISTEN

14. Lo Bilong Moses i mekim wanem wok?

14 Lo Bilong Moses i stiaim lain Israel winim 1,500 yia. Dispela Lo i stiaim ol manmeri bilong God long bihainim stretpela pasin insait long famili na long ol narapela samting ol i mekim. Dispela Lo i stap olsem waspapa na bringim ol i go long Mesaia. (Gal. 3:23, 24) Dai bilong Jisas i pinisim Lo Bilong Moses, na God i kamapim nupela kontrak. (Hib. 8:6) Long rot bilong dispela kontrak, ol man i no inap mekim moa sampela samting em Lo i bin tok orait long en.

15. (a) Kongrigesen Kristen i mas bihainim wanem lo bilong marit? (b) Kristen i mas skelim wanem ol samting taim em i tingting long divosim poroman marit?

15 Jisas i bekim askim bilong sampela Farisi na em i tok, “long pastaim tru i no gat kain pasin olsem” bilong divosim poroman marit,  olsem i stap long lo bilong Moses. (Mat. 19:6-8) Tok bilong Jisas i soim klia olsem kongrigesen Kristen i mas bihainim lo bilong marit olsem God i bin kamapim long gaden Iden. (1 Tim. 3:2, 12) Tupela marit i mas stap wantaim olsem “wanpela bodi tasol” na larim pasin bilong laikim God na narapela narapela i strongim marit bilong tupela. Sapos poroman marit i no mekim pasin pamuk na ol i katim marit, dispela i makim olsem man i no stap fri long marit gen. (Mat. 19:9) Sapos man o meri i mekim pasin pamuk na em i tanim bel tru, orait poroman marit i ken fogivim em. Profet Hosea i bin fogivim meri bilong em Gomer long pasin pamuk em i mekim. Na tu, taim lain Israel i lotuim ol giaman god na bihain ol i tanim bel na kam bek long Jehova, em i marimari long ol. (Hos. 3:1-5) Sapos man o meri i save olsem poroman marit bilong em i mekim pasin adaltri, tasol em i laik slip wantaim dispela poroman marit husat i mekim rong, dispela i soim klia olsem em i fogivim poroman marit na em i no inap kisim divos.

16. Jisas i tok wanem long pasin bilong i stap singel?

16 Bihain, Jisas i stori long “ol man i kisim dispela presen” bilong i stap singel. Em i tok moa olsem: “Man husat inap mekim olsem, gutpela em i mekim olsem.” (Mat. 19:10-12) Planti Kristen i laik i stap singel bikos ol i laik mekim gut wok bilong Jehova na i no gat samting i pulim nabaut tingting bilong ol. Yumi ken tok amamas long ol.

17. Kristen i mas mekim wanem bambai em i ken mekim disisen olsem em bai marit o nogat?

17 Wan wan man yet i mas skelim tingting na laik bilong em na mekim disisen olsem em bai stap singel o em bai marit. Aposel Pol i kirapim ol Kristen long i stap singel, tasol em i tok: “Pasin pamuk i go bikpela, olsem na olgeta man i mas i gat meri bilong ol yet na olgeta meri i mas i gat man bilong ol yet.” Pol i tok moa olsem: “Sapos ol i no inap bosim gut laik bilong bodi bilong ol, orait ol i ken marit. Mobeta ol i marit, nogut strongpela laik long bel i winim ol.” Taim man i marit, dispela i helpim em long abrusim pasin bilong pilai long sem bilong em yet o mekim pasin pamuk. Na tu, man i mas tingim krismas bilong em bikos Pol i tok: “Sapos wanpela man husat i no bin mekim maritpasin i ting em i no inap bosim laik bilong bodi bilong en na i gutpela moa long em i marit, orait larim em i bihainim laik bilong em sapos em i no yangpela tumas. Em i no mekim sin. Larim ol kain man olsem i marit.” (1 Kor. 7:2, 9, 36; 1 Tim. 4:1-3) Taim man i stap yangpela, em inap kisim laik bilong mekim maritpasin, tasol em i no ken larim dispela laik i stiaim em long marit. Ating em bai i no redi gut long mekim wok olsem maritman o maritmeri.

18, 19. (a) Kristen i mas maritim husat? (b) Neks stadi bai stori long wanem samting?

18 Sapos wanpela Kristen i laik marit, em i mas maritim Kristen husat i dediket na laikim tru Jehova. Mobeta ol i laikim tru narapela narapela paslain long ol i marit. God bai blesim ol bikos ol i bihainim tok bilong em na “maritim man i bihainim Bikpela.” (1 Kor. 7:39) Taim ol i marit pinis, ol bai luksave olsem Baibel i givim gutpela edvais bilong helpim marit bilong ol long i stap gut.

19 Neks stadi bai stori long sampela poin bilong Baibel we inap helpim ol marit Kristen long karim ol hevi bilong “las de.” Planti man na meri i gat ol pasin we inap putim hevi long marit. (2 Tim. 3:1-5) Long rot bilong Baibel, Jehova i givim ol tok em ol marit i nidim bilong helpim ol long i stap gut na stap amamas, na wokabaut yet wantaim ol manmeri bilong God long rot i bringim ol i go long laip oltaim.—Mat. 7:13, 14.