Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Wastau—Stadi Edisen  |  Novemba 2017

Amamas na Singsing!

Amamas na Singsing!

“I gutpela long yumi singim song na litimapim nem bilong God bilong yumi.”—SNG. 147:1.

OL SINGSING: 9, 138 [1]

1. Wanpela saveman bilong raitim ol singsing i tok wanem?

WANPELA saveman bilong raitim ol singsing i tok: “Taim yu harim ol tok, dispela i mekim yu tingting. Taim yu harim musik, dispela bai mekim yu pilim amamas o bel sori. Tasol taim yu singsing, yu bai pilim tru long bel ol tok bilong dispela singsing.” Ol singsing yumi mekim i litimapim nem bilong Jehova na i soim olsem yumi laikim em. Ol singsing em bikpela samting long wok lotu bilong yumi, maski yumi yet i singsing o yumi bung wantaim kongrigesen na singsing.

2, 3. (a) Sampela bratasista i pilim olsem wanem long singsing wantaim long taim bilong miting? (b) Yumi bai skelim wanem ol askim?

2 Yu pilim olsem wanem taim yu singsing wantaim ol narapela long kongrigesen? Yu save pilim sem? Long sampela ples, ol meri i save singsing long pablik, tasol ol man i save pilim sem long mekim olsem. Dispela kain pasin i no inap helpim kongrigesen, na moa yet sapos ol lain i go pas long kongrigesen i pilim hatwok long singsing wantaim ol bratasista o ol i bisi long mekim ol narapela wok taim ol bratasista i singsing.—Sng. 30:12.

3 Sapos yumi tingim olsem singsing em wanpela hap bilong wok lotu bilong yumi, yumi no inap i go ausait o mekim ol narapela samting taim kongrigesen i singsing. Olsem na yumi ken askim yumi yet: ‘Mi gat wanem tingting long pasin bilong singsing long  taim bilong miting? Olsem wanem mi inap daunim pasin bilong tingting planti na bai mi ken amamas na singsing? Mi inap mekim wanem na bai mi inap pilim tru ol tok bilong ol singsing?’

SINGSING—BIKPELA SAMTING LONG WOK LOTU

4, 5. Olsem wanem singsing i stap olsem bikpela samting long wok lotu bilong lain Israel?

4 Long bipo yet na i kam inap long nau, ol manmeri i lotuim Jehova i save pilaim musik bilong litimapim nem bilong em. Taim lain Israel i mekim wok bilong Jehova, ol i save pilaim musik na mekim ol singsing long taim bilong lotu. Taim ol i redim ol samting bilong lotu long tempel, King Devit i makim 4 tausen Livai long pilaim musik. Namel long dispela lain Livai, inap 288 bilong ol i “skul gut long singim ol song bilong litimapim nem bilong Bikpela. . . . Olgeta dispela man i save gut tru long mekim musik.”—1 Sto. 23:5; 25:7.

5 Taim ol i dediketim tempel, ol Livai i singsing na pilaim musik. Baibel i tok: “Ol lain man bilong mekim musik i stat long winim biugel na paitim plet bras, na ol i kirapim song bilong litimapim nem bilong Bikpela. . . . Taim ol i kirapim dispela song, orait wantu klaut i pulapim haus bilong Bikpela.” Ating dispela samting i strongim bilip bilong ol manmeri long dispela taim!—2 Sto. 5:11, 13, 14; 7:6.

6. Stori long olsem wanem Nehemia i oganaisim lain bilong mekim singsing taim em i stap gavana long Jerusalem.

6 Nehemia i go pas long lain Israel na ol i wokim banis bilong Jerusalem, na em i oganaisim ol Livai long pilaim ol musik na mekim singsing. Taim ol i dediketim banis bilong Jerusalem, ol Livai i pilaim musik na mekim singsing na dispela i givim bikpela amamas tru long ol manmeri. I gat ‘tupela bikpela lain bilong singim song bilong tenkyu long God.’ Sampela i tanim long han sut na wokabaut i go kamap long banis i stap klostu long tempel na bungim narapela lain em ol i tanim long han kais na wokabaut i kam. Long dispela rot, ol man i stap longwe inap harim ol i singsing. (Neh. 12:27-29, 31, 38, 40, 43) Jehova i amamas tru long harim ol wokman bilong em i givim bel tru long singsing na litimapim nem bilong em.

7. Jisas i mekim wanem na dispela i kamapim klia olsem singsing em bikpela samting long lotu i tru?

7 Taim kongrigesen Kristen i kamap, pasin bilong singsing i stap yet olsem bikpela samting long lotu i tru. Bihain long Jisas i kirapim Kaikai Bilong Bikpela, em na ol disaipel i mekim singsing bilong litimapim nem bilong God.—Ritim Matyu 26:30.

8. Olsem wanem ol Kristen long taim bilong ol aposel i stap gutpela eksampel long pasin bilong bung wantaim na singsing?

8 Ol Kristen long taim bilong ol aposel i stap gutpela eksampel long pasin bilong bung wantaim na mekim ol singsing bilong litimapim nem bilong God. Maski ol i bung long haus bilong ol narapela, ol i givim bel yet long mekim ol singsing long Jehova. Holi spirit i kirapim aposel Pol long mekim dispela tok bilong strongim ol Kristen, em i tok: “Yupela i mas wok yet long skulim na givim tok long narapela narapela long rot bilong ol song, na ol singsing i litimapim nem bilong God, na ol naispela singsing lotu. Na long bel yupela i mas singsing long Jehova.” (Kol. 3:16) Ol singsing i stap long singsing buk bilong yumi em “ol naispela singsing lotu” na yumi mas givim bel long singim. “Gutpela wokboi i gat savetingting” i redim ol dispela singsing olsem hap bilong kaikai bilong strongim bilip bilong yumi.—Mat. 24:45.

NO KEN PRET LONG SINGSING

9. (a) Wanem sampela samting inap pasim yumi long singsing strong long ol miting na kibung? (b) Yumi ken mekim wanem taim yumi singsing bilong litimapim nem bilong Jehova? (c) Husat i mas i go pas long taim bilong singsing? (Lukim piksa long kirap bilong stadi.)

9 Olsem wanem sapos pasin bilong singsing i no samting em famili bilong yu i save mekim, o i no pasin bilong ples yu stap long en?  Ating teknoloji i mekim na yu save amamas long harim singsing bilong ol lain i gat biknem long singsing. Tasol ating yu bai sem o bel hevi taim yu skelim vois bilong yu wantaim vois bilong ol dispela lain. Maski i olsem, dispela i no ken pasim yu long singsing na litimapim nem bilong Jehova. Yu ken holim singsing buk bilong yu i go antap, apim het bilong yu, na givim bel olgeta long singsing! (Esra 3:11; ritim Song 147:1.) Long planti Haus Kingdom long nau, ol tok bilong singsing i save kamap long skrin na dispela i helpim yumi long opim maus na singsing strong. Yumi amamas long save olsem long Skul Bilong Wok Kingdom, ol elda i save singim ol singsing bilong Kingdom. Dispela i kirapim ol elda insait long kongrigesen long go pas long taim bilong singsing.

10. Yumi mas tingim wanem samting sapos pasin bilong pret i pasim yumi long singsing strong?

10 Planti man i save pret na dispela i pasim ol long singsing strong. Ating yumi pret long ol narapela bai harim nek bilong yumi o nek bilong yumi i no krai gutpela tumas. Tasol yumi mas tingim olsem taim yumi toktok, “planti taim yumi olgeta i save popaia.” (Jems 3:2) Dispela i no pasim yumi long toktok. Olsem na maski yumi pilim olsem yumi no inap singsing gut, dispela i no ken pasim yumi long singsing na litimapim nem bilong Jehova.

11, 12. Yumi inap mekim wanem ol samting bilong helpim yumi long singsing strong?

11 Ating yumi pret long singsing bikos yumi no save long olsem wanem yumi inap singsing strong. Yumi ken bihainim sampela rot bilong helpim yumi long singsing strong. *

12 Sapos yu pulim win gut, dispela bai helpim yu long singsing strong. Wankain  olsem pawa i givim strong long lait, taim yu pulim win dispela inap helpim yu long toktok bikpela o singsing strong. Yu mas singsing strong olsem yu save toktok bikpela, o yu ken apim nek na singsing strong moa winim pasin bilong yu long toktok. (Lukim buk Kisim Helpim Long Skul Tiokratik Bilong Autim Tok, pes 181 i go 184, aninit long liklik het tok “Pasin Bilong Pulim Gut Win.”) Baibel i kirapim ol manmeri i lotuim Jehova long singsing na “singaut strong.”—Sng. 33:1-3.

13. Stori long olsem wanem yumi inap daunim pasin bilong pret taim yumi singsing.

13 Long taim bilong famili lotu o taim yu yet i stap, traim ol dispela samting: Makim wanpela feiveret song bilong yu long singsing buk bilong yumi. Ritim ol tok bilong dispela singsing long strongpela nek. Bihain, pulim win na kolim olgeta tok bilong wanpela sentens long strongpela nek. Orait singim ol tok bilong dispela sentens long strongpela nek. (Ais. 24:14) Vois bilong yu bai kamap strong na yu bai kolim gut ol tok taim yu singsing, na dispela em gutpela samting. Yu no ken pret o sem!

14. (a) Yu ken mekim wanem samting moa bambai yu inap singsing strong? (Lukim blok “ Rot Bilong Singsing Gut.”) (b) Yu inap bihainim wanem sampela rot bilong helpim yu long singsing strong?

14 Sapos yu opim maus, dispela bai helpim yu long singsing strong. Olsem na taim yu singsing, yu mas opim maus bilong yu i go bikpela winim taim yu toktok. Olsem wanem sapos yu pilim olsem yu no gat strongpela vois o vois bilong yu i sap tumas? Lukim buk Kisim Helpim Long Skul Tiokratik Bilong Autim Tok, pes 184, long blok “Winim Sampela Hevi.”

GIVIM BEL LONG SINGSING

15. (a) Long Annual Miting bilong 2016, ol i tokaut long wanem samting? (b) Wanem sampela senis long nupela singsing buk?

15 Long Annual Miting bilong 2016, em spesel miting ol Witnes Bilong Jehova i save mekim long mun Oktoba long olgeta yia, Brata Stephen Lett bilong Gavening Bodi i tokaut long nupela singsing buk,  nem bilong en “Singsing Amamas Long Jehova.” Brata Lett i stori olsem, wanpela risen na ol i wokim dispela nupela singsing buk em long senisim ol tok bilong en na bai i stret wantaim ol tok bilong nupela edisen bilong Baibel New World Translation em ol i prinim long 2013. Dispela i makim olsem ol i rausim o senisim ol tok bilong singsing buk bikos sampela bilong ol dispela tok i no stap moa long nupela edisen bilong Baibel New World Translation. Na tu, ol i putim ol nupela singsing we i stori long wok autim tok bilong yumi na ol singsing bilong tok tenkyu long God long pe bilong baim bek man. Singsing em wanpela hap bilong wok lotu bilong yumi, olsem na Gavening Bodi i laik wokim singsing buk we i luk nais olsem nupela edisen bilong Baibel New World Translation.

16, 17. Ol i mekim wanem ol senis long nupela singsing buk?

16 Long nupela singsing buk “Singsing Amamas Long Jehova,” ol i stretim ol singsing long het tok bilong ol bambai i no hatwok long painim ol singsing. Kain olsem, fes 12-pela singsing i stori long Jehova na narapela 8-pela singsing i stori long Jisas na pe bilong baim bek man. Na tu, i gat indeks bilong ol tok na dispela i helpim ol brata taim ol i laik makim wanpela singsing bilong pablik tok.

17 Ol i senisim ol tok bilong sampela singsing bilong kamapim klia mining bilong wanpela tok, na ol i rausim ol tok em yumi no yusim moa. Dispela bai helpim yumi olgeta long givim bel long singsing. Ol i bin senisim het tok “Was Gut Long Bel Bilong Yu” i go long “Was Gut Long Bel Bilong Yumi.” Bilong wanem? Long taim bilong ol miting na ol kibung bilong yumi, i gat planti nupela lain, ol lain i gat intres, ol yangpela, na ol sista. Olsem na taim ol i singim dispela song, i kain olsem ol i tokim ol narapela long wanem samting ol i mas mekim. Olsem na ol i senisim het tok na ol tok bilong singsing.

Mekim prektis long ol singsing long taim bilong famili lotu (Lukim paragraf 18)

18. Bilong wanem yumi mas save gut long ol singsing long nupela singsing buk? (Lukim futnot.)

18 Planti bilong ol singsing long nupela singsing buk “Singsing Amamas Long Jehova” i kamapim ol tok em man inap kolim long beten. Yu ken singim ol dispela singsing na kamapim tingting bilong yu long Jehova. Ol narapela singsing bai “kirapim [yumi] long mekim pasin laikim na mekim ol gutpela wok.” (Hib. 10:24) Yumi laik save gut long krai bilong singsing na ol tok bilong ol. Yu ken go long jw.org na harim ol dispela singsing. Taim yu stap long haus na prektis long singsing, yu bai givim bel long singsing na pilim tru ol tok bilong en. *

19. Olsem wanem olgeta long kongrigesen inap bung wantaim na lotuim Jehova?

19 Pasin bilong singsing em bikpela samting long wok lotu bilong yumi. Em wanpela gutpela rot bilong kamapim tenkyu na pasin laikim bilong yumi long Jehova. (Ritim Aisaia 12:5.) Taim yu amamas na singsing strong, dispela bai kirapim ol narapela long givim bel na singsing. Tru tumas, yumi olgeta long kongrigesen—ol yangpela, ol lapun, na ol nupela lain—i ken bung wantaim na mekim singsing bilong lotuim Jehova. Olsem na yu no ken surik long kamapim bel na tingting bilong yu long rot bilong singsing. Yumi laik bihainim tok bilong man bilong raitim song, em i tok: “Singim song bilong Bikpela.” Yes, yumi olgeta i mas singsing na amamas wantaim!—Sng. 96:1.

^ par. 11 Sapos yu laik save long rot bilong helpim yu long singsing gut, lukim program bilong JW Brodkas bilong Disemba 2014 long tok Inglis (stap long hap FROM OUR STUDIO).

^ par. 18 Long taim bilong kibung, ol i save pilaim 10 minit musik vidio paslain long program i kirap na dispela bai kirapim ol bratasista long givim bel long singsing. Ol i wokim ol musik vidio bilong redim bel na tingting bilong ol bratasista long program bai kamap. Olsem na yumi mas sindaun long sia paslain long program i kirap na putim gut yau long ol dispela musik.