Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Wastaua—Stadi Edisen  |  Me 2017

Helpim Ol Pikinini “Bilong Narapela Ples”

Helpim Ol Pikinini “Bilong Narapela Ples”

“Taim mi harim olsem ol pikinini bilong mi i wokabaut yet long tok i tru, dispela i save givim bikpela amamas tru long mi.”—3 JON 4.

OL SINGSING: 88 [41], 41 [11]

1, 2. (a) Ol pikinini husat i lusim kantri bilong ol na ol i stap long narapela kantri, ol i bungim wanem hevi? (b) Yumi bai skelim wanem ol askim?

JOSHUA i tok: “Papamama i go stap long narapela kantri, olsem na taim mi liklik yet, mi mekim tokples bilong papamama taim mi stap long haus na long kongrigesen. Tasol taim mi go long skul, mi laikim tokples bilong hap mipela i go stap long en. Bihain long sampela yia, mi save gut long dispela tokples. Mi no kliagut long ol tok i kamap long miting, na mi lusim tingting long kalsa bilong papamama.” Planti pikinini i gat wankain ekspiriens olsem Joshua.

2 Long nau, winim 240 milion manmeri i stap long ol narapela kantri na i no long asples bilong ol. Sapos yu papa o mama na yu lusim kantri bilong yu na yu stap long narapela hap, olsem wanem yu inap helpim pikinini long kamap strong long bilip na “wokabaut yet long tok i tru”? (3 Jon 4) Olsem wanem ol narapela inap helpim yu?

PAPAMAMA, SOIM GUTPELA EKSAMPEL

3, 4. (a) Olsem wanem papamama inap soim gutpela eksampel long ol pikinini? (b) Papamama i mas abrusim wanem kain tingting?

3 Papamama, gutpela eksampel bilong yupela bai helpim ol pikinini long wokabaut long rot i go long laip oltaim. Taim yu “wok yet long painim Kingdom pastaim,” dispela bai kirapim ol pikinini  long bilip olsem Jehova bai lukautim ol long ol samting ol i nidim long olgeta wan wan de. (Mat. 6:33, 34) Olsem na daunim laik bilong bungim mani kago na mekim ol wok bilong strongim bilip bilong yu. Wok strong long abrusim pasin bilong kisim dinau. Painim “ol samting i dia tumas long heven,” olsem mekim ol wok em Jehova i orait long en, na no ken painim mani kago o mekim ol samting bambai “ol man i litimapim nem” bilong yu.—Ritim Mak 10:21, 22; Jon 12:43.

4 Yu mas lusim haptaim long i stap wantaim ol pikinini. Tokim ol olsem yu amamas long disisen bilong ol long putim Jehova i stap namba 1 long laip bilong ol, na ol i no tingting long kisim biknem o mani kago bilong helpim ol yet o bilong helpim yu. Abrusim giaman tingting olsem ol pikinini i mas mekim wok bilong lukautim papamama bambai papamama i kisim gutpela sindaun. Tingim, “ol pikinini i no ken bungim ol samting bilong helpim papamama, nogat, ol papamama i mas bungim ol samting bilong helpim ol pikinini.”—2 Kor. 12:14.

PAPAMAMA, STRETIM HEVI BILONG TOKPLES

5. Wai na papamama i mas tokim pikinini long ol lo bilong Jehova?

5 Baibel i tok profet olsem, ol “man bilong ol longwe ples” bai i kam long oganaisesen bilong Jehova. (Sek. 8:23) Tasol hevi bilong tokples inap mekim na i hatwok long skulim pikinini long tok i tru. Em i bikpela samting tru long stadi long Baibel wantaim ol pikinini bikos “ol i mas kisim save” long Jehova na kisim laip oltaim. (Jon 17:3) Sapos yu laik bai ol pikinini i kisim save long ol lo bilong Jehova, orait yu mas “tokim ol” long olgeta kain taim.—Ritim Lo 6:6, 7.

6. Taim pikinini i lainim tokples bilong yu, hau bai dispela i helpim em? (Lukim piksa long kirap bilong stadi.)

6 Taim ol pikinini i stap long skul, ol bai lainim tokples bilong kantri yupela i stap long en, tasol ol bai lainim tokples bilong yupela yet sapos yu toktok planti taim wantaim ol long dispela tokples. Sapos ol i save long tokples bilong yupela, ol bai kamapim olgeta tingting bilong ol taim ol i stori wantaim yu. Taim ol i save long 2-pela tokples, nau ol inap long wokim tingting na amamas long bung wantaim ol narapela. Na tu, ol inap mekim bikpela wok moa bilong autim tok. Papamama bilong Carolina i lusim kantri bilong ol na ol i go stap long narapela kantri. Carolina i tok: “Mi amamas tru long i stap long kongrigesen i mekim narapela tokples. Na tu, mi amamas long autim tok long ol hap i sot tru long ol pablisa.”

7. Yu ken mekim wanem sapos i gat hevi bilong tokples insait long famili?

7 Taim ol pikinini i lainim nupela kalsa na tokples, sampela inap lusim tingting long tokples bilong papamama, na sampela i no inap amamas moa long yusim dispela tokples. Papamama, sapos dispela samting i kamap long pikinini, orait yu ting yu inap lainim sampela tokples bilong hap yupela i stap long en? Yupela inap stiaim ol pikinini long kamap Kristen sapos yupela i kliagut long toktok bilong ol, na ol samting ol i mekim bilong kisim amamas, na yupela inap toktok wantaim ol tisa na kliagut long skul wok bilong ol pikinini. Taim man i lainim nupela tokples, em i mas lusim haptaim na strong na bihainim pasin daun. Sapos pikinini i kamap yaupas, ating yu bai lainim tokples sain na bai yu inap toktok gut wantaim em, a? Olsem tasol, sapos pikinini i save stori gut taim em i yusim narapela tokples, ating i stret long yu mas lainim dispela tokples, a? *

8. Hau bai yu inap helpim ol pikinini sapos yu no kliagut long tokples ol i save gut long en?

8 Sampela papamama i pilim hatwok long lainim gut nupela tokples em pikinini i  lainim. Dispela inap mekim na i hatwok long ol i skulim ol pikinini long ol bikpela tok bilong “ol Rait Holi.” (2 Tim. 3:15) Sapos yu gat dispela hevi, i gat rot long helpim ol pikinini long kisim save long Jehova na laikim em. Shan em wanpela elda, na em i tok: “Mama bilong mipela em mama wanpis, na em i no kliagut long tokples mi na ol susa bilong mi i save gut long en, na mipela i no save gut long tokples bilong em. Tasol long olgeta wik mipela i lukim em i stadi, beten, na wok strong long mekim famili lotu, olsem na mipela i save olsem em i bikpela samting long kisim save long Jehova.”

9. Olsem wanem ol papamama inap helpim ol pikinini husat i mas mekim Baibel stadi long 2-pela tokples?

9 Sampela pikinini i kisim save long Jehova long rot bilong 2-pela tokples—tokples ol i yusim long skul na tokples bilong papamama. Sampela papamama i yusim ol litresa, odio rekoding, na ol vidio long 2-pela tokples wantaim. Papamama husat i lusim kantri bilong ol na i go sindaun long narapela kantri, ol i mas lusim bikpela haptaim na go pas long helpim ol pikinini long pas gut wantaim Jehova.

YU MAS GO LONG KONGRIGESEN I MEKIM WANEM TOKPLES?

10. (a) Husat i mas mekim disisen long kongrigesen em famili i mas i go long en? (b) Em i ken mekim wanem paslain long em i mekim wanpela disisen?

10 Taim “ol man bilong narapela ples” i stap longwe long ol Witnes i mekim wankain tokples olsem ol, ol i mas bung wantaim kongrigesen i mekim tokples bilong hap ol i stap long en. (Sng. 146:9) Sapos wanpela kongrigesen klostu long yu i mekim tokples bilong yu, askim yu yet: Wanem kongrigesen i gutpela long mi na famili bilong mi? Paslain long het bilong famili i mekim disisen, em i mas beten na skelim gut dispela samting, na toktok wantaim famili. (1 Kor. 11:3) Het bilong famili i mas skelim wanem ol samting? Em i mas tingim wanem ol stiatok? Yumi ken stori long ol dispela samting.

11, 12. (a) Tokples ol i yusim long miting inap mekim wanem long pikinini? (b) Wai na sampela pikinini i les long lainim tokples bilong papamama?

11 Papamama i mas skelim ol samting we inap helpim gut pikinini. Maski pikinini i save gut long wanem tokples, em i mas i go long olgeta miting bambai em inap kliagut long tok i tru, tasol em i mas mekim sampela samting moa. Tingim: Taim pikinini i stap long ol miting i kamap long tokples em i kliagut long en, em inap kisim save long planti samting moa na pilim tru ol samting em i lainim. Dispela samting i no inap kamap sapos em i no kliagut long tokples ol i yusim long miting. (Ritim 1 Korin 14:9, 11.) Maski pikinini i kamap bikpela wantaim wanpela tokples, dispela i no makim olsem dispela tokples tasol bai helpim em long kliagut long olgeta samting, nogat. Sampela pikinini inap bekim tok long miting, mekim ol asainmen, na mekim ol tok long tokples bilong papamama, tasol ol bai no pilim tru ol tok ol i mekim.

12 I gat planti samting we inap stiaim tingting bilong pikinini. Dispela samting i kamap long Joshua, em yumi stori pinis long em. Esther em susa bilong Joshua, na em i tok: “Sapos liklik pikinini i lainim tokples bilong papamama, ol bai lain tu long kalsa na lotu bilong ol.” Sapos pikinini i no save long kalsa bilong papamama, ol bai les long lainim tokples bilong papamama na ol bai i no laikim lotu bilong papamama. Orait, ol papamama i ken mekim wanem?

13, 14. (a) Bilong wanem tupela marit i kisim famili i go long kongrigesen i mekim tokples bilong hap ol i stap long en? (b) Dispela tupela marit i mekim wanem bambai ol inap stap strong long bilip?

13 Papamama Kristen i daunim laik bilong ol yet na helpim ol pikinini long sait bilong bilip. (1 Kor. 10:24) Samuel em papa bilong Joshua na Esther, na em i tok: “Mitupela meri bilong mi i skelim ol pikinini na mipela i laik  painimaut wanem tokples i helpim ol long sait bilong bilip, na mipela i beten askim God long givim gutpela tingting long mipela. Samting mipela i painimaut long en i no stret wantaim laik bilong mipela. Tasol taim mipela i luksave olsem ol i no kisim helpim long ol miting i kamap long tokples bilong mipela, mipela i go long kongrigesen i mekim tokples bilong hap mipela i stap long en. Oltaim mipela i go long ol miting na autim tok. Na tu, mipela i save invaitim ol bratasista bilong dispela hap long kam kaikai na raun wantaim mipela. Dispela i helpim ol pikinini long save gut long ol bratasista, na tu, ol i save gut long Jehova na tingim em olsem God, Papa, na Pren. Mipela i pilim olsem dispela em i bikpela samting moa winim tokples bilong mipela.”

14 Samuel i tok: “Mi na meri bilong mi i laik stap strong long bilip, olsem na mitupela i go tu long ol miting i kamap long tokples bilong mipela. Mipela i bisi stret na pilim taiet. Tasol mipela i tenkyu long Jehova long em i blesim ol hatwok na ol sakrifais mipela i mekim. Olsem na 3-pela pikinini wantaim i mekim wok bilong Jehova fultaim.”

OL SAMTING OL YANGPELA INAP MEKIM

15. Wai na Kristina i pilim olsem em bai givim bel moa long mekim wok bilong God sapos em i go long kongrigesen i mekim tokples bilong hap em i stap long en?

15 Taim ol pikinini i kamap bikpela, ating ol bai luksave olsem ol bai givim bel moa long mekim wok bilong Jehova sapos ol i stap long kongrigesen i mekim tokples ol i kliagut long en. Sapos pikinini i pilim olsem, papamama i no ken ting olsem pikinini i no laikim ol. Kristina i tok: “Mi save long ol bikpela tok long tokples bilong papamama, tasol mi no kliagut long ol tok ol i yusim long miting. Taim mi gat 12 krismas, mi go long wanpela kibung i kamap long tokples mi yusim long skul. Dispela em fes taim mi kliagut long tok i tru! Taim mi beten, mi yusim tokples mi lainim long skul, na mi inap tokim Jehova long ol samting mi pilim tru long bel!” (Apo. 2:11, 41) Taim Kristina i kamap bikpela, em i toktok wantaim papamama na em i go long kongrigesen i mekim tokples bilong hap ol i stap long en. Em i tok: “Mi kisim sampela save moa long Jehova long rot bilong tokples mi mekim long skul, na dispela i kirapim mi long mekim wok.” I no longtaim, Kristina i kamap painia oltaim.

16. Bilong wanem Nadia i amamas olsem em i stap long kongrigesen i mekim narapela tokples?

16 Ol yangpela, yu laik i go long kongrigesen i mekim tokples bilong hap yu stap long en? Sapos olsem, orait askim yu yet: Bilong wanem yu laik mekim olsem? Yu ting dispela bai helpim yu long i go klostu moa long Jehova? (Jems 4:8) Yu laik i go bikos yu no laik bai ol narapela i bosim yu o givim planti wok long yu? Nadia em wanpela sista i mekim wok long Betel, na em i tok: “Taim mi na ol bratasusa bilong mi i kamap tineja, mipela i laik i go long kongrigesen i mekim tokples bilong hap mipela i stap long en.” Tasol papamama bilong em i save olsem sapos ol i go, ol i no inap kamap strong long bilip. Nadia i tok moa: “Long nau, mipela i amamas tru olsem papamama i wok strong long skulim mipela long tokples bilong ol, na ol i larim mipela i stap long kongrigesen i mekim narapela tokples. Mipela i kamap strong long bilip, na planti rot i op long mipela inap helpim ol narapela long kisim save long Jehova.”

OL NARAPELA INAP HELPIM

17. (a) Jehova i givim wok long husat long lukautim na stiaim ol pikinini? (b) Olsem wanem papamama inap kisim helpim long skulim ol pikinini long tok i tru?

17 Jehova i givim wok long ol papamama—em i no givim wok long ol bubu na ol narapela—long lukautim na stiaim ol pikinini long kamap bikpela insait long tok i tru. (Ritim Sindaun 1:8; 31:10, 27, 28.) Tasol ol  papamama husat i no save long tokples bilong hap ol i stap long en, ating ol narapela i ken helpim ol long stiaim gut ol pikinini. Dispela i no makim olsem papamama i givim baksait long wok God i givim long ol, nogat. Helpim bilong ol narapela inap strongim ol papamama long “trenim ol [pikinini] olsem Jehova i makim, na putim tingting bilong em long bel bilong ol.” (Efe. 6:4) Papamama i ken askim ol elda long kamapim sampela tingting long pasin bilong mekim famili lotu na helpim ol pikinini long kisim ol gutpela poroman.

Pikinini na papamama i kisim helpim taim ol i bung wantaim kongrigesen (Lukim paragraf 18 na 19)

18, 19. (a) Olsem wanem ol bratasista i stap strong long bilip inap helpim ol yangpela? (b) Ol papamama i mas wok yet long mekim wanem?

18 Sampela taim papamama i ken invaitim ol narapela famili long bung wantaim ol long famili lotu. Planti yangpela i kamap strong long bilip taim ol i bung wantaim ol narapela husat i stap strong long bilip na wok wantaim long autim tok na mekim ol samting bilong kisim amamas. (Snd. 27:17) Shan em yumi stori pinis long em, em i tok: “Mi tingim ol brata husat i mekim gut long mi. Mi kisim planti save moa taim ol i helpim mi long redim ol asainmen bilong mekim tok long ol miting. Mi save amamas taim mipela olgeta i bung wantaim long mekim ol samting bilong kisim amamas.”

19 Ol lain em papamama i makim long helpim ol pikinini, oltaim ol i mas kirapim ol pikinini long rispektim papamama. Ol i no ken kisim wok bilong papamama, nogat, ol i mas kirapim ol pikinini long holim stretpela tingting long papamama. Na tu, ol lain i stap olsem helpim i no ken mekim pasin we inap pundaunim sampela insait o ausait long kongrigesen. (1 Pita 2:12) Papamama i no ken larim ol narapela tasol long skulim ol pikinini long ol samting bilong lotu. Ol i mas skelim ol samting em ol narapela i mekim bilong helpim ol pikinini na ol yet i mas skulim ol pikinini.

20. Olsem wanem ol papamama i ken helpim ol pikinini bilong ol long kamap gutpela wokman bilong Jehova?

20 Papamama, beten askim Jehova long helpim yupela, na givim bel olgeta long mekim wok bilong yupela. (Ritim 2 Stori 15:7.) Daunim laik bilong yupela yet na helpim pikinini long pas gut wantaim Jehova. Mekim olgeta samting yupela inap mekim bilong putim Tok Bilong God i go daun long bel bilong pikinini. Oltaim yupela i mas holim tingting olsem pikinini inap kamap wokman bilong Jehova. Taim pikinini i bihainim Tok Bilong God na gutpela eksampel bilong yupela, yupela bai pilim wankain olsem aposel Jon i pilim long ol pikinini bilong em long sait bilong bilip. Em i tok: “Taim mi harim olsem ol pikinini bilong mi i wokabaut yet long tok i tru, dispela i save givim bikpela amamas tru long mi.”—3 Jon 4.

^ par. 7 Lukim atikol “Yu Inap Lainim Narapela Tok Ples!” long Kirap! bilong Mas 2007, p. 10-12.