Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Wastaua—Stadi Edisen  |  Me 2017

 LAIP STORI

Mi Yaupas, Tasol Mi Inap Skulim Ol Narapela

Mi Yaupas, Tasol Mi Inap Skulim Ol Narapela

Mi kisim baptais long 1941 taim mi gat 12 krismas. Tasol mi no kliagut long tok i tru i go inap long 1946. Olsem wanem dispela samting i kamap? Mi laik kamapim stori bilong mi.

LONG ol yia bihain long 1910, papamama i lusim ples Tbilisi, long Jojia, na ol i go sindaun long wanpela liklik haus long fam klostu long Pelly, em wanpela ples long Saskatchewan, long westen Kanada. Mi bon long 1928. Mipela 6-pela pikinini long famili na mi las bon. Papa i dai 6-pela mun paslain long mi bon, na Mama i dai taim mi stap bebi yet. Lucy em bikpela susa bilong mi, na em i dai taim em i gat 17 krismas. Bihain, ankol bilong mi, Nick, i lukautim mi na ol bratasusa bilong mi.

Taim mi lain long wokabaut, wanpela taim famili bilong mi i lukim mi pulim tel bilong wanpela hos man long fam. Ol i pret nogut dispela hos bai kikim mi, olsem na ol i singaut strong long mi no ken pulim tel bilong hos, tasol mi pulim yet. Ol i stap baksait long mi, na mi no harim singaut bilong ol. Gutpela tru olsem hos i no kikim mi. Tasol long dispela de, ol i luksave olsem mi yaupas.

Wanpela pren bilong mipela i tokim famili long salim mi i go skul wantaim ol narapela yaupas pikinini, olsem na Ankol Nick i putim mi long skul bilong ol yaupas long Saskatoon, Saskatchewan. Famili i save draiv inap sampela aua bilong visitim mi. Mi gat 5-pela krismas, olsem na mi pret. Long taim bilong holide tasol mi inap i go lukim famili. Isi isi, mi lainim tokples sain na mi amamas long pilai wantaim ol narapela pikinini.

KISIM SKUL LONG TOK BILONG BAIBEL

Long 1939, biksusa bilong mi, Marion, i maritim Bill Danylchuck, na ol i lukautim mi na susa bilong mi Frances. Tupela i fes lain long famili long bung wantaim ol Witnes Bilong Jehova. Long skul holide, ol i save traim bes long skulim mi long ol samting ol i lainim long Baibel. I hatwok long toktok wantaim ol bikos ol i no save long tokples sain. Tasol ol i lukim olsem mi laikim tru  tok bilong Baibel. Mi luksave olsem wok bilong ol i stret wantaim tok bilong Baibel, olsem na mi go wantaim ol taim ol i autim tok. I no longtaim, mi laik kisim baptais, na long Septemba 5, 1941, Bill i baptaisim mi insait long wanpela ain dram. Ol i yusim pam long pulim wara long hulwara na pulimapim long dram, na wara i kol nogut tru!

Mi na sampela yaupas long kibung long Cleveland, Ohio, long 1946

Long 1946, taim mi go long ples long malolo, mipela i go long kibung long Cleveland, Ohio, long Amerika. Long fes de, sista bilong mi i raitim ol tok i kamap long kibung bambai mi inap save long ol tok i kamap long program. Long namba 2 de, mi amamas tru long save olsem sampela yaupas i stap long kibung, na i gat man bilong tanim tok long tokples sain. Nau mi amamas long program bilong kibung, na mi inap kliagut long tok i tru bilong Baibel!

SKULIM OL MAN LONG TOK I TRU

Long dispela taim, Wol Woa 2 i pinis na planti manmeri i litimapim nem bilong kantri. Taim mi go bek long skul bihain long kibung, mi tingting strong long sambai long bilip bilong mi. Olsem na mi no salutim fleg, singim nesenel entem, selebretim ol holide, na go long ol bung bilong lotu em skul i makim. Ol tisa long skul i no amamas na ol i pretim mi na mekim ol tok giaman bilong senisim tingting bilong mi. Ol wanskul i lukim ol dispela samting na ol i tingting planti, na dispela i opim rot long mi inap autim tok long ol. Sampela wanskul bilong mi olsem Larry Androsoff, Norman Dittrick, na Emil Schneider, ol i kisim tok i tru na ol i stap gut yet long Jehova i kam inap long nau.

Taim mi go long ol narapela biktaun, mi wok strong long autim tok long ol yaupas. Wanpela taim mi go long klap bilong ol yaupas long biktaun Montreal, na mi autim tok long Eddie Taeger, em wanpela yangpela memba bilong wanpela geng. Eddie i stap long kongrigesen bilong tokples sain long Laval, Quebec, tasol em i dai long las yia. Na tu, mi bungim wanpela yangpela man, em Juan Ardanez. Em i bihainim pasin bilong lain Beria long mekim wok painimaut bambai em inap save sapos tok bilong Baibel i tru. (Apo. 17:10, 11) Juan i kisim tok i tru, na em i stap gut long God na mekim wok elda long Ottawa, long Ontario, i go inap long em i dai.

Sanap long strit na autim tok bihain long 1950

Long 1950, mi go i stap long Vancouver. Maski mi amamas long autim tok long ol yaupas, mi no inap lusim tingting long ekspiriens bilong mi long autim tok long wanpela meri mi bungim long strit, em Chris Spicer. Em i no yaupas. Em i kisim wanpela magasin na em i laik mi bungim man bilong em, Gary. Olsem na mi go long haus bilong ol na mipela i stori inap longpela taim—mipela i raitim  ol tok long pepa na stori i go i kam. Bihain long sampela yia, mi go long kibung long Toronto, Ontario, na mi kirap nogut taim tupela i lukim mi namel long ol bratasista. Gary bai kisim baptais long dispela de. Dispela ekspiriens i kirapim mi long tingim olsem em i bikpela samting long wok yet long autim tok bikos yumi no save husat bai kisim tok i tru, na ol bai kisim tok i tru long wanem taim.

Bihain mi go bek na i stap long Saskatoon. Long dispela hap, mi bungim wanpela mama na em i askim mi long stadi wantaim 2-pela pikinini meri bilong em husat i yaupas. Nem bilong tupela em Jean na Joan Rothenberger, na tupela i go long skul bilong ol yaupas em mi go long en. Tupela i autim tok long ol wanklas, na 5-pela bilong ol i kamap Witnes Bilong Jehova. Wanpela bilong ol em Eunice Colin. Mi bin bungim Eunice long skul bilong ol yaupas; em i stap long liklik gret na mi stap long bikpela gret. Long dispela taim, Eunice i givim loli long mi na em i laik bai mitupela i kamap pren. Bihain mi maritim Eunice na em i kamap gutpela pren bilong mi!

Mi na Eunice long 1960 na 1989

Taim mama bilong Eunice i painimaut olsem Eunice i stadi long Baibel, em i tokim prinsipol bilong skul long mekim sampela samting bilong stopim Eunice long stadi. Em i rausim ol buk na nius em Eunice i yusim long mekim Baibel stadi. Tasol Eunice i tingting strong long bihainim laik bilong Jehova. Taim em i laik kisim baptais, papamama i tokim em: “Sapos yu kamap wanpela Witnes Bilong Jehova, yu bai lusim haus!” Taim Eunice i gat 17 krismas, wanpela Witnes famili i kisim em na lukautim em. Em i stadi yet long Baibel na bihain em i kisim baptais. Taim mitupela i marit long 1960, papamama bilong em i no kam long weding. Tasol bihain long sampela yia, ol i rispektim mipela taim ol i skelim bilip bilong mipela na pasin bilong mipela long lukautim ol pikinini.

 JEHOVA I LUKAUTIM MI

Pikinini bilong mi Nicholas na meri bilong em Deborah i mekim wok long Betel long London

Mitupela Eunice i yaupas, na mipela i gat 7-pela pikinini man na olgeta bilong ol inap toktok. Dispela i putim hevi long mipela, tasol mipela i stretim rot bilong ol long kisim save long tokples sain bambai mipela inap toktok gut wantaim na skulim ol long tok i tru. Ol bratasista long kongrigesen i helpim mipela. Wanpela papa i raitim ol tok long pepa na em i toksave long mipela olsem wanpela pikinini bilong mipela i mekim ol tok nogut insait long Haus Kingdom. Kwiktaim mipela i stretim pikinini. Fopela pikinini bilong mipela—James, Jerry, Nicholas, na Steven—i mekim wok bilong Jehova wantaim meri na pikinini bilong ol. Olgeta 4-pela bilong ol i mekim wok elda. Nicholas na meri bilong em Deborah i wok wantaim trenslesen dipatmen bilong tokples sain long brens ofis long Briten. Steven na meri bilong em Shannan i stap long trenslesen tim bilong tokples sain long brens ofis long Amerika.

Ol pikinini, James, Jerry, na Steven wantaim meri bilong ol i sapotim wok autim tok long tokples sain

Eunice i kisim sik kensa, olsem na em i dai 1-pela mun paslain long 40 yia weding aniveseri bilong mipela. Em i stap strong na karim dispela hevi. Bilip bilong em long kirap bek i strongim em. Mi i laik tru long lukim em taim em i kirap bek.

Faye na James, Jerry na Evelyn, Shannan na Steven

Long Februeri 2012, mi pundaun na brukim bun long hip bilong mi, na mi nidim helpim. Olsem na mi go i stap wantaim wanpela pikinini bilong mi na meri bilong em. Nau mipela i stap long kongrigesen bilong tokples sain long Calgary, na mi mekim yet wok elda. Em fes taim bilong mi long stap long kongrigesen i mekim tokples sain. Kirap long 1946, mi stap long Inglis kongrigesen na olsem wanem mi stap strong long bilip? Jehova i truim tok promis bilong em long lukautim ol pikinini i no gat papa. (Sng. 10:14) Mi pilim tru gutpela pasin em olgeta narapela i mekim long helpim mi, kain olsem ol i raitim ol hap tok long pepa na givim mi, lainim tokples sain, na wok strong long tanim tok long tokples sain.

Mi go long painia skul long tokples sain bilong Amerika taim mi gat 79 krismas

Sampela taim mi bel hevi na mi pilim olsem mi laik givap bikos mi no kliagut long tok bilong ol narapela, na sampela taim mi pilim olsem ol narapela i no kliagut long tingting bilong ol yaupas. Tasol mi save tingim tok em Pita i mekim long Jisas, em i tok: “Bikpela, bai mipela i go long husat? Ol tok bilong yu i bringim man i go long laip oltaim.” (Jon 6:66-68) Mi kisim pasin bilong i no les kwik, wankain olsem planti arapela yaupas bratasista. Mi wet long kisim helpim i kam long Jehova na oganaisesen bilong em, na dispela i strongim mi! Nau mi gat planti buk na nius na ol vidio samting long tokples bilong mi yet, na mi amamas long ol miting na ol kibung i kamap long tokples sain bilong Amerika. Mi stap amamas na mi kisim planti blesing long mekim wok bilong Jehova, em nambawan God bilong yumi.