Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Wastaua—Stadi Edisen  |  Mas 2017

Yu Mas Bilip—Mekim Gutpela Disisen!

Yu Mas Bilip—Mekim Gutpela Disisen!

“Bilip na wok yet long askim, na . . . no ken holim tupela tingting.”—JEMS 1:6.

OL SINGSING: 118 [21], 35

1. (a) Bilong wanem Kein i no mekim gutpela disisen? (b) Disisen bilong Kein i stiaim em long mekim wanem?

KEIN i mas mekim wanpela disisen: Em bai daunim belhat, o em bai larim belhat i winim em. Disisen em i mekim bai helpim em o kamapim hevi long laip olgeta bilong em. Yu save long disisen bilong Kein; em i no mekim gutpela disisen. Disisen em i mekim i stiaim em long kilim brata bilong em Abel. Na tu, disisen bilong em i mekim na em i no pas gut moa wantaim God.—Stt. 4:3-16.

2. Taim yumi mekim ol gutpela disisen, dispela bai helpim yumi olsem wanem?

2 Yumi tu i mas mekim disisen long planti samting. I no olsem oltaim yumi mekim disisen long ol bikpela samting tasol, nogat. Planti disisen bilong yumi inap helpim yumi o kamapim hevi. Taim yumi mekim ol gutpela disisen, dispela inap helpim yumi long i stap gut na i stap bel isi, na yumi no paul nabaut, kros, o bel hevi.—Snd. 14:8.

3. (a) Sapos yumi laik mekim ol gutpela disisen, yumi mas bilip long wanem ol samting? (b) Yumi bai skelim wanem ol askim?

3 Wanem samting bai helpim yumi long mekim gutpela  disisen? Yumi mas bilip long God, na no ken holim 2-pela tingting long pasin bilong em long redi long helpim yumi long bihainim savetingting. Yumi mas bilip tu long Baibel na pasin bilong Jehova long mekim ol samting, na trastim ol stiatok bilong em. (Ritim Jems 1:5-8.) Taim yumi go klostu long God na laikim moa yet tok bilong em long Baibel, yumi bai trastim ol tok bilong em. Yumi bai kisim pasin bilong skelim Tok Bilong God paslain long yumi mekim ol disisen. Tasol olsem wanem yumi inap kisim pasin bilong mekim ol gutpela disisen? Taim yumi mekim pinis wanpela disisen, yu ting i stret long yumi bihainim dispela disisen maski wanem samting i kamap?

MEKIM DISISEN LONG LAIP OLGETA

4. (a) Adam i mas mekim disisen long wanem samting? (b) Disisen bilong Adam i kamapim wanem samting?

4 Kirap long taim bilong namba 1 man na meri na i kam inap long nau, ol man na ol meri i gat wok long mekim ol bikpela disisen. Adam i mas mekim disisen olsem em bai bihainim tok bilong God o em bai bihainim tok bilong Iv. Adam i redi long mekim disisen, tasol yu pilim olsem wanem long disisen em i mekim? Iv i bilipim tok giaman, na Adam i larim Iv i stiaim em long mekim disisen i no stret. Olsem na em i lusim gutpela sindaun bilong em long Paradais, na bihain em i dai. Dispela em kirap tasol bilong olgeta hevi. Yumi wok yet long karim ol hevi i kamap long disisen bilong Adam.

5. Yumi mas holim wanem tingting long pasin bilong mekim disisen?

5 Ating sampela man i pilim olsem yumi bai stap amamas tru sapos yumi no gat wok long mekim ol disisen. Olsem wanem? Yu tu i pilim olsem? Ol robot i no inap wokim tingting na mekim ol disisen. Tasol Jehova i no wokim ol man olsem ol robot. Baibel i skulim yumi long olsem wanem yumi inap mekim ol gutpela disisen. Jehova i laik bai yumi yet i mekim ol disisen, na dispela i no inap putim hevi long yumi.

6, 7. (a) Ol Israel i gat wok long mekim wanem disisen? (b) Wanem ol samting i mekim na ol Israel i hatwok long mekim gutpela disisen? (Lukim piksa long kirap bilong stadi.)

6 Taim lain Israel i kisim pinis Graun Bilong Promis, ol i mas mekim wanpela bikpela disisen: Ol bai lotuim Jehova o lotuim ol narapela god. (Ritim Josua 24:15.) I luk olsem i no hatwok long mekim dispela disisen. Tasol disisen bilong ol inap makim olsem ol bai stap laip o ol bai dai. Long haptaim we ol Hetman i bosim lain Israel, planti taim lain Israel i no mekim ol gutpela disisen. Ol i givim baksait long Jehova na lotuim ol giaman god. (Het. 2:3, 11-23) Sampela haptaim bihain, lain Israel i gat wok long mekim wanpela disisen. Profet Elaija i tok: Yupela i mas lotu long Jehova o lotuim giaman god Bal. (1 Kin. 18:21) Elaija i krosim ol manmeri bikos ol i paul long mekim disisen. Ating yu inap pilim olsem dispela disisen em isi long mekim bikos i stret long yumi mas lotuim Jehova. Man i gat stretpela tingting i no inap lotuim Bal o laikim dispela giaman god. Tasol lain Israel i holim “tupela tingting.” Elaija i kirapim ol long mekim disisen long lotuim Jehova—i stret long lotuim Jehova bikos em i winim tru olgeta narapela god.

7 Wanem ol samting i mekim na ol Israel i hatwok long mekim gutpela disisen? Ol i no bilip moa long Jehova na ol i no laik bihainim tok bilong em. Ol i lusim pasin bilong kisim stretpela save long God, na ol i no trastim Jehova. Sapos ol i wok yet long kisim stretpela save na bihainim, dispela inap helpim ol long mekim ol gutpela disisen. (Sng. 25:12) Ol i larim ol narapela  i stiaim disisen ol i mekim, na tu, ol i larim ol narapela i mekim disisen bilong ol. Ol lain haiden i paulim tingting bilong ol Israel na pulim ol long bihainim pasin haiden. Long pastaim yet, Jehova i bin givim tok lukaut olsem dispela hevi inap kamap.—Kis. 23:2.

YU TING I STRET OL NARAPELA I MEKIM DISISEN BILONG YU?

8. Stori bilong lain Israel i givim wanem skul long yumi long pasin bilong mekim ol gutpela disisen?

8 Yumi inap kisim skul long ol eksampel yumi stori pinis long en. Yumi olgeta wan wan i mas mekim disisen, na Baibel bai stiaim yumi long mekim ol gutpela disisen. Galesia 6:5 i tok: “Olgeta wan wan i mas mekim ol samting em ol yet i gat wok long mekim.” Yumi no ken larim ol narapela i mekim ol disisen bilong yumi, nogat. Yumi yet i mas lain long wanem samting i stret long ai bilong God na mekim dispela samting.

9. Bilong wanem i no stret long larim ol narapela i mekim disisen bilong yumi?

9 Wanem ol samting inap kirapim yumi long larim ol narapela i mekim disisen bilong yumi? Ol wanlain inap pulim yumi long mekim ol rong disisen. (Snd. 1:10, 15) Maski ol narapela i putim presa long yumi, em wok bilong yumi yet long bihainim maus bilong bel em Baibel i skulim pinis. Sapos yumi larim ol narapela i mekim ol disisen bilong yumi, i olsem yumi “bihainim ol.” Dispela i makim olsem yumi mekim disisen we inap kamapim bikpela hevi.

10. Pol i givim wanem tok lukaut long ol Kristen long Galesia?

10 Aposel Pol i tok lukaut long ol Kristen long Galesia long hevi inap kamap sapos ol i larim ol narapela i mekim disisen bilong ol. (Ritim Galesia 4:17.) Sampela long kongrigesen i laik mekim disisen bilong ol narapela na pulim ol long lusim ol aposel. Ol i laik kisim biknem. Ol i no rispektim ol wanbilip Kristen na larim ol yet long mekim disisen.

11. Olsem wanem yumi ken helpim ol narapela taim ol i laik mekim disisen bilong ol yet?

11 Pol i stap gutpela eksampel long rispektim ol wanbilip na luksave olsem ol i gat rait long mekim disisen bilong ol yet.  (Ritim 2 Korin 1:24.) Long nau, ol elda i mas bihainim eksampel bilong Pol taim ol i givim tok kaunsel long pasin bilong mekim disisen. Ol i amamas long skulim ol narapela long tok bilong Baibel. Tasol ol i larim ol bratasista yet long mekim disisen. Dispela i stret bikos olgeta wan wan bratasista bai karim hevi long disisen ol yet i mekim. Tingim dispela samting: Yumi inap soim olsem yumi tingim tru ol narapela na kirapim ol long tingim ol stiatok na tok kaunsel bilong Baibel. Tasol ol i gat rait long mekim disisen bilong ol yet. Taim ol i mekim gutpela disisen, dispela inap helpim ol. Yumi no ken pilim olsem yumi gat wok long mekim disisen bilong ol arapela bratasista.

Ol elda i save helpim ol narapela long mekim ol disisen bilong ol yet (Lukim paragraf 11)

MEKIM DISISEN TAIM YU KROS O BEL HEVI

12, 13. Wai na i no gutpela long mekim disisen taim yumi kros o bel hevi?

12 Planti man i save tok: Bihainim laik bilong yu yet. Tasol hevi inap kamap bikos yumi no bihainim ol tok bilong Baibel. Baibel i tok lukaut olsem yumi no ken bihainim laik na save bilong yumi yet taim yumi laik mekim disisen. (Snd. 28:26) Ol stori bilong Baibel i soim olsem hevi inap kamap taim yumi bihainim tingting i stap long bel bilong yumi. Yumi gat sin, olsem na “bel bilong olgeta man i save tingting oltaim long mekim pasin giaman. Tingting bilong man em i nogut tru.” (Jer. 3:17; 13:10; 17:9; 1 Kin. 11:9, 10) Olsem na wanem samting inap kamap sapos yumi bihainim tingting i stap long bel bilong yumi?

13 Ol Kristen i mas lukautim gut tingting i stap long bel bikos Baibel i tok yumi mas laikim Jehova long bel olgeta bilong yumi na laikim ol narapela olsem yumi laikim yumi yet. (Mat. 22:37-39) Tasol ol tok bilong Baibel long paragraf paslain i kamapim klia olsem hevi inap kamap sapos yumi mekim disisen taim yumi kros o bel hevi. Ating kain samting olsem i bin kamap long yumi. (Snd. 14:17; 29:22) Yu ting yumi bai mekim gutpela disisen taim yumi bel hevi? (Nam. 32:6-12; Snd. 24:10) Tok Bilong God i soim olsem yumi bai amamas sapos yumi “stap wokboi bilong lo bilong God.” (Rom 7:25) Sapos yumi kros o bel hevi, yumi no inap bihainim gutpela tingting sapos yumi mekim bikpela disisen.

TAIM BILONG SENISIM TINGTING

14. Olsem wanem yumi save olsem i no gat rong long man i senisim disisen bilong em?

14 Yumi mas mekim ol gutpela disisen. Tasol dispela i no makim olsem yumi no ken senisim tingting taim yumi mekim pinis wanpela disisen, nogat. Sampela taim, yumi ken skelim gen na senisim disisen yumi bin mekim. Tingim pasin Jehova i mekim long lain Ninive long taim bilong Jona. “Ol i lusim pasin nogut bilong ol, na God i lukim dispela samting ol i mekim. Na God i senisim tingting bilong en, na em i no mekim dispela samting nogut em i tok pinis long mekim.” (Jna. 3:10) Taim Jehova i lukim olsem lain Ninive i tanim bel na senisim pasin nogut bilong ol, em i senisim disisen bilong em. Em i bihainim stretpela tingting, pasin daun, na pasin sori. Na tu, dispela i soim olsem God i no save hariap long mekim disisen taim em i belhat, na dispela em pasin we planti man i save mekim.

15. Long wanem kain taim i stret long yumi ken senisim disisen bilong yumi?

15 Ating sampela taim i gutpela long yumi ken skelim gen na senisim disisen yumi mekim pinis. Yumi ken mekim olsem taim sampela senis i kamap. Sampela taim Jehova i senisim disisen bilong em taim senis i kamap. (1 Kin. 21:20, 21, 27-29; 2 Kin. 20:1-5) Yumi ken senisim disisen bilong  yumi sapos yumi kliagut moa long sampela samting i kamap. Mefiboset em tumbuna pikinini bilong Sol. Wokboi bilong Mefiboset i mekim tok giaman long King Devit. Bihain, Devit i save olsem dispela tok i no tru, olsem na em i senisim disisen bilong em. (2 Sml. 16:3, 4; 19:24-29) Sampela taim, i stret long yumi tu i ken mekim olsem.

16. (a) Yumi ken mekim wanem ol samting sapos yumi laik mekim gutpela disisen? (b) Yumi mas holim wanem tingting long ol disisen yumi mekim pinis?

16 Baibel i tok yumi no ken hariap tumas long mekim wanpela bikpela disisen. (Snd. 21:5) Sapos yumi lusim sampela haptaim long skelim gut olgeta samting we inap kamap long disisen yumi mekim, gutpela samting bai kamap. (1 Tes. 5:21) Paslain long het bilong famili i mekim wanpela disisen, em i mas lusim sampela haptaim long mekim wok painimaut long ol tok bilong Baibel na ol pablikesen bilong Baibel, na tu, em i mas kisim tingting bilong ol narapela insait long famili. Tingim, God i bin tokim Abraham long bihainim tok bilong meri bilong em. (Stt. 21:9-12) Ol elda tu i mas lusim sampela haptaim long mekim wok painimaut. Sapos ol i holim stretpela tingting na bihainim pasin daun, ol bai redi long skelim gen disisen bilong ol taim ol i kisim nupela save long sampela samting. Ol i mas redi long stretim tingting bilong ol na senisim disisen ol i bin mekim sapos i stret long mekim olsem, na yumi olgeta i ken bihainim eksampel bilong ol. Long dispela rot, ol wok bilong kongrigesen bai kamap gut na yumi inap stap wanbel.—Apo. 6:1-4.

BIHAINIM DISISEN

17. Olsem wanem yumi inap mekim ol gutpela disisen?

17 Sampela disisen i bikpela moa. Sapos yumi laik mekim kain disisen olsem, orait yumi mas lusim bikpela haptaim long tingting gut na beten. Ol Kristen i mekim bikpela disisen taim ol i laik marit na makim husat ol i laik maritim. Taim Kristen i mekim disisen long olsem wanem na wanem taim em i laik insait long fultaim sevis, dispela tu em narapela bikpela disisen we inap opim rot bilong em long kisim planti blesing. Taim ol Kristen i laik mekim ol kain disisen olsem, em i bikpela samting long ol i mas bilip olsem Jehova inap givim gutpela tingting bilong stiaim ol. (Snd. 1:5) Olsem na yumi mas kisim ol gutpela edvais i kam long Baibel, na beten askim Jehova long stiaim yumi. Jehova inap helpim yumi long kisim ol gutpela pasin we inap opim rot bilong yumi long mekim ol disisen i stret wantaim laik bilong em. Taim yumi laik mekim ol bikpela disisen, yumi ken askim yumi yet olsem: ‘Disisen bilong mi bai soim olsem mi laikim Jehova? Disisen bilong mi bai kamapim amamas na bel isi insait long famili? O, disisen bilong mi i soim olsem mi no save les kwik na mi gat gutpela pasin?’

18. Bilong wanem Jehova i laik bai yumi yet i mekim ol disisen?

18 Jehova i no fosim yumi long laikim em o mekim wok bilong em. Em i larim yumi yet long mekim dispela disisen. Em i givim yumi fridom bilong mekim disisen, olsem na em i rispektim rait bilong yumi long makim husat yumi laik lotuim. (Jos. 24:15; Sav. 5:4) Taim yumi larim God i stiaim yumi long mekim ol disisen, em i laik bai yumi inapim ol dispela disisen. Sapos yumi bilip long Jehova na bihainim ol stiatok bilong em, yumi inap mekim ol gutpela disisen na yumi no inap senisim nabaut tingting bilong yumi.—Jems 1:5-8; 4:8.