Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Wastaua—Stadi Edisen  |  Mas 2017

Asa, Jehosafat, Hesekia, Josaia

Givim Bel Olgeta Long Mekim Wok Bilong Jehova!

Givim Bel Olgeta Long Mekim Wok Bilong Jehova!

“Bikpela, mi bin bihainim yu tru na mi mekim wok bilong yu. Oltaim mi bin bihainim laik bilong yu [“na givim bel olgeta long yu,” NW]. Olsem na yu tingim ol wok mi bin mekim.”—2 KIN. 20:3.

OL SINGSING: 36, 54

1-3. Olsem wanem yumi inap soim olsem yumi “givim bel olgeta” long mekim wok bilong Jehova?

YUMI olgeta i gat sin, olsem na yumi save mekim popaia. Tasol yumi tenkyu tru olsem yumi inap bilip long ofa bilong Jisas long baim bek man, na yumi tanim bel na i go long Jehova, na long dispela rot em i no save givim “pe nogut” long ol sin yumi mekim. (Sng. 103:10) Yumi mas tingim tok em Devit i givim long Solomon. Sapos yumi laik bai Jehova i orait long wok lotu bilong yumi, orait yumi mas “givim bel olgeta” long mekim wok bilong em. (1 Sto. 28:9, NW) Olsem wanem yumi ol sinman inap mekim olsem?

2 Yumi ken skelim ol samting i kamap long laip bilong King Asa na King Amasia. Tupela wantaim i bin stap king bilong Juda na mekim ol samting i stret long ai bilong Jehova, na Asa i givim bel olgeta long mekim wok. (2 Sto. 15:16, 17; 25:1, 2; Snd. 17:3) Tupela king wantaim i sinman na ol i mekim ol popaia. Tasol Asa i no givim baksait long rot God i makim, long wanem, em “i gat wanpela tingting tasol” long stap gut long God. (1 Sto. 28:9) Tasol Amasia i holim 2-pela tingting na em i no stap gut long Jehova.  Taim em i winim pait na daunim ol birua bilong God, em i bringim ol god bilong ol birua i kam bek na em i lotuim ol dispela god.—2 Sto. 25:11-16.

3 Taim yumi “givim bel olgeta” long mekim wok bilong God, dispela i makim olsem yumi stap gut long God na yumi no lusim dispela pasin. Taim Baibel i yusim dispela tok “bel,” dispela i makim olgeta laik, tingting, pasin, save, na ol mak em man i laik winim. Olsem na taim man i givim bel olgeta long lotuim Jehova, dispela i makim olsem em i no holim 2-pela tingting long wok em i mekim. Em i no giaman long mekim wok bilong Jehova. Orait olsem wanem long yumi? Em tru olsem yumi sinman, tasol sapos yumi stap gut yet long God na yumi no bihainim pasin giaman, dispela i makim olsem yumi givim bel olgeta long mekim wok bilong em.—2 Sto. 19:9.

4. Yumi bai skelim wanem samting?

4 Yumi ken skelim laip bilong Asa na ol narapela king bilong Juda em ol i bin givim bel olgeta long mekim wok bilong God. Yumi ken skelim tu stori bilong Jehosafat, Hesekia, na Josaia. Dispela 4-pela king i bin mekim popaia, tasol Jehova i orait long ol. Bilong wanem God i tingim ol dispela king olsem ol man husat i givim bel olgeta long mekim wok bilong em? Olsem wanem yumi inap bihainim pasin bilong ol?

ASA I “LAIKIM TUMAS” JEHOVA

5. Asa i mekim wanem ol bikpela wok?

5 Lain Israel i bruk na 10-pela lain i kamap lain Israel bilong hap not, na 2-pela lain i kamap lain Juda bilong hap saut. Asa em namba 3 man long i stap king bilong Juda. Em i pinisim pasin bilong lotuim ol god giaman na em i rausim ol man i mekim pasin pamuk long tempel. “Em i rausim tumbuna mama bilong en, Maka, long wok bilong en na i no larim em i gat namba moa olsem mama bilong king. Long wanem, Maka i bin wokim wanpela piksa bilong god meri Asera.” (1 Kin. 15:11-13) Na tu, Asa i tokim ol manmeri olsem “ol i mas strong long bihainim laik bilong God, . . . na bihainim olgeta lo na tok bilong en.” Yes, em i strongim lotu i tru.—2 Sto. 14:4.

6. Asa i mekim wanem taim lain Sudan i kam bilong pait long ol Juda?

6 Kirap long taim Asa i mekim wok king, inap 10-pela yia Jehova i blesim lain Juda na ol i stap bel isi. Bihain, Sera em man bilong kantri Sudan, em i kisim 1 milion man na 300 karis na ol i kam bilong pait long lain Juda. (2 Sto. 14:1, 6, 7, 9, 10) Asa i mekim wanem? Em i bilip tru long Jehova. (Ritim 2 Stori 14:11.) God i bekim beten bilong Asa, na Asa i winim pait na daunim tru lain ami bilong Sudan. (2 Sto. 14:12, 13) Maski ol king i no stap gut long Jehova, em i save tingim nem bilong em na helpim ol long winim pait. (1 Kin. 20:13, 26-30) Asa i bilip long Jehova, olsem na em i kisim helpim. Bihain, Asa i no bihainim gutpela tingting. Em i askim king bilong Siria long helpim em, na em i no bilip long Jehova. (1 Kin. 15:16-22) Tasol taim God i skelim Asa, em i lukim olsem “Asa i givim bel olgeta long Jehova long laip olgeta bilong em.” Olsem wanem yumi inap bihainim gutpela pasin bilong Asa?—1 Kin. 15:14NW.

7, 8. Olsem wanem yu inap bihainim pasin bilong Asa taim yu mekim wok bilong Jehova?

7 Yumi olgeta wan wan i ken skelim yumi yet na painimaut sapos yumi givim bel tru long God o nogat. Askim yu yet, ‘Mi tingting strong long amamasim Jehova, sambai long lotu i tru, na abrusim ol pasin nogut we inap bagarapim pasin bilong ol manmeri bilong God?’ Asa i strongim bel tru na em inap rausim namba bilong Maka olsem “mama bilong king.” Ating i no gat wanpela Kristen i mekim wankain pasin olsem Maka,  tasol sampela samting inap kamap na yu ken bihainim pasin bilong Asa. Bai yu mekim wanem sapos wanfamili bilong yu o wanpela gutpela pren i mekim sin na em i no tanim bel na i raus long kongrigesen? Bai yu tingting strong olsem yu no inap bung moa wantaim em? Bel bilong yu bai kirapim yu long mekim wanem?

8 Taim ol narapela i birua long yu na i luk olsem yu no inap winim dispela hevi, orait yu ken bihainim pasin bilong Asa na givim bel olgeta long bilip tru olsem God bai helpim yu. Ating ol wanskul inap hatim bel o tok bilas long yu bikos yu wanpela Witnes Bilong Jehova. O ating ol wanwok bilong yu i tok bilas long yu bikos yu kisim sampela de of na yu go mekim wok lotu o yu no save wok ovataim tumas. Long kain taim olsem, bihainim pasin bilong Asa na beten long God. Strongim bel na askim Jehova long helpim yu, na sanap strong long bihainim stretpela pasin. Tingim, God i bin strongim Asa na helpim em, na Em bai strongim yu.

9. Olsem wanem yumi inap soim olsem yumi givim bel olgeta long mekim wok autim tok?

9 Ol manmeri bilong God i no save tingim ol yet tasol. Asa i mekim ol samting bilong strongim lotu i tru. Yumi tu i helpim ol narapela long “bihainim laik bilong God.” Jehova i save amamas tru taim yumi tokim ol narapela long em. Yumi mekim olsem bikos yumi laikim tru God na yumi laik tru long helpim ol narapela long kisim laip oltaim!

JEHOSAFAT I BIHAINIM LAIK BILONG JEHOVA

10, 11. Olsem wanem yu inap bihainim pasin bilong Jehosafat?

10 Jehosafat em pikinini bilong Asa, na em “i bihainim gut olgeta pasin bilong papa bilong en, Asa.” (2 Sto. 20:31, 32) Jehosafat i kirapim ol manmeri long bihainim laik bilong Jehova. Em i oganaisim wok bilong skulim ol manmeri long “buk i gat ol lo bilong Bikpela i stap long en.” (2 Sto. 17:7-10) Em i go long hap not bilong Israel long ples maunten bilong Efraim. Em i laik kirapim “ol manmeri long ol i mas kam bek long God.” (2 Sto. 19:4) Jehosafat em wanpela king husat i “bihainim tru laik bilong Bikpela long tingting bilong em olgeta.”—2 Sto. 22:9.

11 Yumi olgeta inap mekim bikpela wok bilong autim tok na skulim ol man, em wok Jehova i stretim rot long yumi inap mekim long nau. Olsem wanem? Yu putim mak olsem long olgeta wan wan mun, yu bai skulim ol man long Tok Bilong God na kirapim laik bilong ol long mekim wok bilong Em? Taim yu mekim olsem, God bai blesim yu na yu inap kirapim Baibel stadi. Olsem wanem? Yu save beten long winim dispela mak? Yu redi long yusim sampela haptaim bilong yu yet long mekim dispela wok? Yumi inap helpim ol lain i kamap slek long bilip, wankain olsem Jehosafat i go long hap bilong lain Efraim na helpim ol manmeri long bihainim gen lotu i tru. Na tu, ol elda i save stretim rot long visitim na helpim ol raus lain long teritori bilong ol, em ol lain husat i lusim pinis pasin nogut bilong ol.

12, 13. (a) Jehosafat i mekim wanem taim bikpela hevi i laik painim em na lain bilong em? (b) Bilong wanem yumi mas bihainim pasin bilong Jehosafat na luksave olsem yumi no gat strong?

12 Jehosafat i bihainim pasin bilong papa bilong em Asa, na em i stap gut yet long God maski ol strongpela birua i laik pait long em. (Ritim 2 Stori 20:2-4.) Em tru olsem Jehosafat i pret! Maski i olsem, “em i gat strongpela tingting bilong painimaut laik bilong Bikpela.” Em i beten na tokim God olsem “bikpela lain ami i laik pait” long ol, na em na lain bilong em i pilim olsem ol  “i no gat strong bilong pait long ol.” Em i bilip strong long Jehova na i tok: “Mipela i lukluk long yu tasol long helpim mipela.”—2 Sto. 20:12.

13 Sampela taim, yumi inap pilim wankain olsem Jehosafat; yumi pret na yumi no save long wanem samting yumi mas mekim. (2 Kor. 4:8, 9) Tasol tingim, Jehosafat i beten long ai bilong ol manmeri na tokaut olsem em na ol manmeri bilong em i pilim olsem ol i no gat strong. (2 Sto. 20:5) Ol het bilong famili i ken bihainim pasin bilong Jehosafat na askim Jehova long stiaim ol na strongim ol long karim hevi. No ken pilim sem long famili bilong yu bai harim kain beten olsem. Ol bai luksave olsem yu trastim Jehova. God i bin helpim Jehosafat, na em bai helpim yu tu.

HESEKIA I NO LUSIM STRETPELA PASIN

14, 15. Olsem wanem Hesekia i soim olsem em i bilip tru long God?

14 Papa bilong Hesekia i lotuim ol god giaman, olsem na Hesekia i sakim pasin nogut bilong papa na em i “pas tru” long Jehova. “Hesekia i bagarapim ol ples bilong lotuim ol giaman god na em i brukim ol pos ston i gat piksa bilong ol giaman god na katim ol pos diwai i gat piksa bilong god meri Asera. Na tu em i kisim dispela snek bras bipo Moses i bin wokim, . . . na em i brukim liklik liklik” bikos ol manmeri i lotuim dispela snek. Em i givim bel tru long Jehova, long wanem, “em i bihainim gut olgeta lo Bikpela i bin givim long Moses.”—2 Kin. 18:1-6.

15 Asiria i stap strongpela kantri long dispela taim bipo, na ol i laik i go pait long Juda na bagarapim Jerusalem, tasol Hesekia i bilip strong long Jehova. King Senakerip bilong Asiria i tok bilas long Jehova na i laik kirapim Hesekia long putim ol yet long han bilong lain Asiria. Tasol Hesekia i beten na tokaut olsem em i bilip tru olsem Jehova i gat strong long kisim bek ol. (Ritim Aisaia 37:15-20.) God i harim beten bilong em na salim wanpela ensel i go kilim i dai 185 tausen soldia bilong Asiria.—Ais. 37:36, 37.

16, 17. Olsem wanem yu inap bihainim pasin bilong Hesekia taim yu mekim wok bilong God?

16 Hesekia i kisim bikpela sik na em i stap long mak bilong dai. Em i beten askim Jehova long tingim bek ol gutpela wok em i bin mekim. (Ritim 2 King 20:1-3.) Yumi kisim save long Baibel olsem, long nau yumi no ken holim kain tingting olsem God bai wokim mirakel na oraitim sik bilong yumi o surikim laip bilong yumi i go longpela moa. Tasol olsem Hesekia i bin mekim, yumi olgeta wan wan inap beten long Jehova na tok: “Mi bin bihainim yu tru na mi mekim wok bilong yu.” Olsem wanem? Yu bilip olsem Jehova i gat strong na em inap oraitim yu taim yu sik?—Sng. 41:3.

17 Taim yumi tingim tingim eksampel bilong Hesekia, dispela inap kirapim yumi long lusim sampela samting we i pasim rot bilong yumi long pas gut wantaim God, o i laik pulim yumi long lusim lotu i tru. Yumi no laik bihainim pasin bilong ol man long graun em ol i yusim TV, redio, magasin, na Intenet long givim biknem long ol narapela man na mekim ol i kamap olsem ol god. Em tru olsem sampela Kristen i amamas long yusim ol program bilong Intenet long toktok wantaim ol famili na ol pren. Tasol planti manmeri i yusim tumas Intenet long bihainim man na meri em ol i no save long ol. Ol i lusim bikpela haptaim long lukim ol piksa bilong ol dispela lain o ritim stori bilong ol. Ol i lusim bikpela haptaim long mekim ol samting we i no gat as bilong en. Kristen inap kisim pasin antap sapos planti manmeri i laikim ol piksa em i putim long Intenet, na em inap bel hevi sapos ol i no bihainim em. Yu ting aposel Pol o Akwila o  Prisila inap lusim bikpela haptaim long olgeta de long putim ol piksa long Intenet o bihainim ol manmeri husat i no stap insait long tok i tru? Baibel i tok Pol i “lusim bikpela haptaim tru long autim tok.” Akwila na Prisila i yusim taim bilong ol long “kliaim gut tingting bilong [ol narapela] long ol tok i stori long rot bilong God.” (Apo. 18:4, 5, 26) Yumi ken askim yumi yet olsem, ‘Mi save abrusim pasin bilong givim biknem long ol man, na abrusim pasin bilong tromoi bikpela haptaim long ol samting we i no gat as bilong en?’—Ritim Efesus 5:15, 16.

JOSAIA I BIHAINIM OL LO BILONG JEHOVA

18, 19. Yu laik bihainim wanem ol pasin bilong Josaia?

18 King Josaia em tumbuna pikinini bilong Hesekia, na em tu i holim “wanpela laik na tingting tasol” long bihainim ol lo bilong Jehova. (2 Sto. 34:31) Taim em i tineja yet, “em i stat long lotu long God bilong tumbuna bilong en, King Devit,” na taim em i gat 20 krismas, em i pinisim pasin bilong lotuim ol god giaman long Juda. (Ritim 2 Stori 34:1-3.) Josaia i givim bel tru long mekim stretpela pasin long ai bilong God, na pasin bilong em i winim pasin bilong planti king bilong Juda. Taim ol i painim kopi bilong Lo Bilong Moses na ritim long Josaia, em i luksave olsem ol manmeri i no givim bel olgeta long mekim laik bilong God. Olsem na em i kirapim ol long mekim wok bilong Jehova. Long taim Josaia i stap king, “ol manmeri i strong long bihainim God.”—2 Sto. 34:27, 33.

19 Ol yangpela i mas bihainim pasin bilong Josaia na mekim laik bilong Jehova kirap long taim ol i liklik yet. Taim King Manase i tanim bel, em i pilim tru pasin marimari bilong God, olsem na ating em i skulim Josaia long dispela pasin. Yupela ol yangpela i mas pas gut wantaim ol lapun long famili na long kongrigesen em ol i stap gut long God, na painimaut long olsem wanem Jehova i bin mekim gut long ol. Tingim tu olsem, Josaia i pilim tru ol tok i stap long Rait Holi, na dispela i kirapim em long mekim ol samting i stret. Pasin bilong ritim Baibel inap kirapim yu long mekim ol samting we inap givim bikpela amamas long yu na strongim pasin bilong yu long i stap pren bilong God. Na tu, dispela inap strongim yu long helpim ol narapela long kisim save long God. (Ritim 2 Stori 34:18, 19.) Taim yu stadi long Baibel, dispela inap helpim yu long luksave long ol samting yu inap mekim na bai wok lotu bilong yu i kamap gutpela moa. Sapos yu mekim ol dispela samting, orait bihainim pasin bilong Josaia na mekim ol samting i stret.

GIVIM BEL OLGETA LONG MEKIM WOK BILONG JEHOVA!

20, 21. (a) Wanem samting i wankain long ol dispela 4-pela king yumi bin stori long ol? (b) Yumi bai skelim wanem samting long neks stadi?

20 Yumi skelim pinis stori bilong 4-pela king bilong Juda em ol i bin givim bel olgeta long mekim wok bilong Jehova. Yu ting stori bilong ol inap helpim yumi? Ol i bin givim bel tru long mekim laik bilong God, na ol i no lusim dispela pasin. Ol i bihainim yet laik bilong God maski bikpela hevi tru i painim ol. Bikpela samting moa em olsem, ol i holim stretpela tingting taim ol i mekim wok bilong Jehova.

21 Long neks stadi, yumi bai stori long popaia bilong ol dispela 4-pela king. Maski i olsem, God i skelim bel bilong ol na em i lukim olsem ol i givim bel olgeta long mekim wok bilong em. Yumi tu i gat sin. Taim Jehova i skelim yumi, yu ting em i lukim olsem yumi givim bel olgeta long mekim wok bilong em? Yumi ken skelim dispela samting long neks stadi.