Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Wastaua—Stadi Edisen  |  Jun 2017

Sapotim Wok Bos Bilong Jehova!

Sapotim Wok Bos Bilong Jehova!

“Jehova, yu God bilong mipela, i stret tru long yu kisim glori na ona na strong, long wanem, yu bin wokim olgeta samting.” REV. 4:11.

OL SINGSING: 112 [2], 133 [49]

1, 2. Yumi olgeta wan wan i mas luksave long wanem samting? (Lukim piksa long kirap bilong stadi.)

LONG stadi i kamap paslain, yumi stori long tok Satan i sutim long wok bos bilong Jehova. Na tu, Satan i tok olsem ol manmeri bai stap amamas sapos ol i bosim wokabaut bilong ol yet. Yu ting tok bilong Satan i tru? Tingim olsem ol manmeri inap bosim wokabaut bilong ol yet na i stap oltaim. Yu ting ol bai stap amamas yet sapos God i no bosim ol? Yu ting yu bai stap amamas sapos yu yet i bosim wokabaut bilong yu na stap laip oltaim?

2 Yumi olgeta wan wan i mas tingim ol dispela askim. Dispela bai helpim yumi long luksave olsem i stret long God i mekim wok bos, na wok bos bilong em i nambawan tru. Olsem na i stret long yumi mas givim bel tru long i stap gut long God. Baibel i stori long rait bilong Jehova long bosim yumi.

JEHOVA I GAT RAIT LONG MEKIM WOK BOS

3. Bilong wanem i stret Jehova tasol i stap King bilong heven na graun?

3 Jehova i gat rait long i stap King bilong heven na graun bikos em i Krieta na God i Gat Olgeta Strong. (1 Sto. 29:11; Apo. 4:24) Long Revelesen 4:11, Baibel i stori long tok em lain 144,000 i mekim long God. Ol i tok: “Jehova, yu God bilong mipela, i stret tru long yu kisim glori na ona na strong, long wanem, yu bin  wokim olgeta samting. Na long laik bilong yu yet yu bin wokim ol na ol i stap.” Tru tumas, Jehova i wokim olgeta samting, olsem na i stret em i bosim ol manmeri na ol ensel.

4. Bilong wanem pasin bilong bikhet long wok bos bilong God i soim olsem yumi no yusim gut pasin bilong yumi long i stap fri?

4 Satan i no bin wokim wanpela samting. Olsem na em i no gat rait long i stap king bilong heven na graun. Satan na namba 1 man na meri i bikhet long Jehova taim ol i sakim wok bos bilong em. (Jer. 10:23) Ol i stap fri long makim wanem samting ol i laik mekim. Tasol yu ting dispela i makim olsem ol i gat rait long sakim wok bos bilong God? Nogat. Pasin bilong i stap fri i opim rot long ol man inap mekim ol gutpela disisen long olgeta wan wan de. Tasol dispela i no givim rait long ol i ken bikhet long Krieta na Man bilong givim laip long yumi. Yumi luksave olsem pasin bilong bikhet long wok bos bilong Jehova i soim olsem yumi no yusim gut pasin bilong i stap fri long makim wanem samting yumi laik mekim. Olsem na i stret yumi mas i stap aninit long wok bos bilong Jehova.

5. Bilong wanem yumi ken bilip tru olsem ol disisen bilong God i stret olgeta?

5 I gat narapela risen na i stret long Jehova i stap King bilong yumi. Em i save mekim wok bos long stretpela pasin tasol. God i tok: “Oltaim mi save laikim tumas olgeta manmeri bilong graun na mi save mekim gutpela na stretpela pasin long ol. Mi Bikpela, mi save amamas long mekim dispela kain pasin.” (Jer. 9:24) God i no yusim ol buk bilong lo em ol man i raitim bilong tokaut long wanem ol samting i stret, nogat. God yet i as bilong stretpela pasin, olsem na em i givim ol lo long yumi ken bihainim. “[Em i] stap king na [em i] bosim ol manmeri long stretpela pasin tasol,” olsem na yumi inap bilip tru olsem ol lo, ol stiatok, na ol disisen bilong em i stret olgeta. (Sng. 89:14; 119:128) Satan i sutim tok olsem Jehova i no mekim gut wok bos bilong em, tasol graun Satan yet i bosim i no gat stretpela pasin long en.

6. Wanem wanpela risen na Jehova tasol i gat olgeta rait long mekim wok bos?

6 Jehova i gat olgeta rait long mekim wok bos bikos em i gat save na savetingting bilong lukautim olgeta samting long heven na graun. God i givim strong long Jisas long oraitim ol sik em ol dokta i no inap long oraitim. (Mat. 4:23, 24; Mak 5:25-29) I no hatwok long Jehova i mekim olsem bikos em i save long rot bilong stretim ol sik, na em i gat strong long stretim bek ol samting i bagarap. Na tu, God i gat save na savetingting long kirapim bek ol daiman na stopim ol disasta long kamap.

7. Olsem wanem savetingting bilong Jehova i winim tru save bilong ol man?

7 Ol manmeri i stap aninit long wok bos bilong Satan i wok yet long painim rot bilong stretim ol hevi. Jehova i gat savetingting long kamapim bel isi long olgeta hap bilong graun. (Ais. 2:3, 4; 54:13) Taim yumi kliagut long save na savetingting bilong Jehova, yumi bai pilim wankain olsem aposel Pol. Em i tok: “Olaman! Ol blesing na savetingting na save bilong God i daun tumas olsem solwara. Yumi man i no inap tru long painim as bilong ol pasin em i save skelim ol man long en. Na yumi no inap tru long kliagut long olgeta rot bilong en.”—Rom 11:33.

WOK BOS BILONG JEHOVA EM NAMBAWAN TRU

8. Wanem samting i kirapim yu long laikim tru wok bos bilong Jehova?

8 Baibel i stori olsem Jehova i gat rait long mekim wok bos. Na tu, Baibel i kamapim risen na wok bos bilong God i winim wok bos bilong ol narapela. Wanpela risen em olsem, pasin laikim i stiaim wok bos bilong em.  Yumi pilim tru pasin bilong em long mekim wok bos. Em i gat pasin ‘marimari na sori. Na em i no save belhat kwik. Em i save laikim tru olgeta manmeri, na em i save bihainim olgeta tok bilong em.’ (Kis. 34:6) God i save tingim na rispektim ol wokman bilong em. Na tu, em i save lukautim gut yumi. Maski Satan i sutim tok olsem Jehova i no mekim wok bos long stretpela pasin, God i save givim yet planti gutpela samting long ol man i stap gut na lotuim em. Na tu, em i givim Pikinini bilong em olsem ofa na dispela i opim rot long yumi inap kisim laip oltaim!—Ritim Song 84:11; Rom 8:32.

9. Olsem wanem yumi save olsem God i save tingim yumi olgeta wan wan?

9 Jehova i save tingim tru olgeta manmeri bilong em long ol samting ol i nidim. Na tu, em i save tingim tru yumi olgeta wan wan. Tingim, insait long 3 handret yia, Jehova i makim ol hetman long kisim bek ol Israel long han bilong ol birua. Long dispela taim, God i luksave long gutpela pasin bilong Rut, em meri bilong narapela kantri. Em i lusim planti samting bilong em bambai em inap lotuim God. Jehova i blesim Rut na givim man marit long em na wanpela pikinini man. Na tu, taim Rut i kirap bek, em bai kisim save olsem pikinini bilong em i wanpela bilong ol lain tumbuna bilong Mesaia. Rut bai amamas tu long save olsem nem bilong em i stap long wanpela buk bilong Baibel we i kamapim laip stori bilong em!—Rut 4:13; Mat. 1:5, 16.

10. Bilong wanem wok bos bilong God i no pasim yumi long i stap amamas?

10 Jehova i no save mekim wok bos long hatpela pasin. Em i larim yumi stap fri long makim wanem samting yumi laik mekim, na dispela i mekim yumi stap amamas. (2 Kor. 3:17) Devit i stori long pasin bilong God na i tok: “Bikpela i stap long haus bilong en na em i gat biknem na i stap king. Na em i as bilong olgeta strong na olgeta pasin bilong amamas.” (1 Sto. 16:7, 27) Etan em wanpela man i bin raitim Buk Song, na em i tok: “Ol manmeri i save mekim song na lotu long yu, na i save wokabaut long marimari bilong yu olsem ol i wokabaut long lait, ol i ken amamas. Ol i save tingting long gutpela pasin yu bin mekim long ol, na olgeta de long san na long nait ol i save amamas na litimapim nem bilong yu.”—Sng. 89:15, 16.

11. Olsem wanem yumi inap strongim bilip bilong yumi olsem wok bos bilong Jehova em i nambawan tru?

11 Sapos oltaim yumi tingim tingim ol gutpela pasin bilong Jehova, dispela inap strongim bilip bilong yumi olsem wok bos bilong em i nambawan tru. Yumi bai pilim wankain olsem man bilong raitim song, em i tok: “Sapos mi stap wanpela de tasol long haus bilong yu, em i winim tru 1,000 de long narapela ples.” (Sng. 84:10) Bilong wanem Baibel i tok olsem? Jehova em Man i wokim yumi, olsem na em i save long ol samting yumi nidim bilong i stap amamas tru, na em i save givim yumi ol dispela samting. God i tokaut long samting yumi ken mekim bilong i stap amamas tru, maski yumi mas lusim sampela samting bilong yumi yet.—Ritim Aisaia 48:17.

12. Wanem samting i kirapim yumi long i stap aninit long wok bos bilong Jehova?

12 Baibel i stori olsem bihain long Taim Bilong Wan Tausen Yia Bilong Krais i Stap King, sampela manmeri bai bikhet long wok bos bilong Jehova. (Rev. 20:7, 8) Taim Satan i lusim kalabus, em bai tingim em yet tasol na wok strong long giamanim planti manmeri, wankain olsem em i save mekim oltaim. Ating em bai kirapim ol man long kisim tingting olsem i gat rot bilong i stap laip oltaim, na ol i no gat wok long bihainim tok bilong Jehova. Dispela tok i no tru. Tasol tingim: Yu ting yumi inap bilip long dispela  tok giaman? Sapos yumi laikim Jehova, ol gutpela pasin bilong em, na tingim olsem i stret long em i stap King bilong heven na graun, orait dispela tok giaman bilong Satan i no inap pundaunim yumi. Yumi bai laikim tru wok bos bilong Jehova na i stap aninit long em wanpela tasol.

STAP GUT NA SAPOTIM WOK BOS BILONG GOD

13. Olsem wanem yumi inap sapotim wok bos bilong Jehova?

13 Yumi mas givim bel tru long sapotim wok bos bilong Jehova. God i gat rait long mekim wok bos, na wok bos bilong em i nambawan tru. Taim yumi stap gut long Jehova na mekim wok bilong em, dispela i soim olsem yumi sapotim wok bos bilong em. Yumi ken mekim wanem ol narapela samting bilong sapotim wok bos bilong God? Yumi ken bihainim tingting bilong Jehova long mekim ol wok. Taim yumi mekim olsem, yumi soim olsem yumi laikim em na yumi sapotim wok bos bilong em.—Ritim Efesus 5:1, 2.

14. Olsem wanem ol het bilong famili na ol elda inap bihainim pasin bilong Jehova?

14 Yumi kisim save olsem pasin laikim i stiaim wok bos bilong Jehova. Olsem tasol, ol het bilong famili na ol elda husat i laikim wok bos bilong God bai i no inap subim ol narapela long mekim ol samting, nogat. Ol bai bihainim pasin bilong Jehova na larim pasin laikim i stiaim ol wok ol i mekim. Pol tu i bihainim pasin bilong God na Pikinini bilong em. (1 Kor. 11:1) Pol i no semim ol narapela o putim presa long ol long bihainim tingting bilong em long mekim ol samting, nogat. Em i save askim ol long mekim ol samting. (Rom 12:1; Efe. 4:1; File. 8-10) Dispela em pasin bilong Jehova long mekim ol wok. Olsem na olgeta manmeri i laikim wok bos bilong God, ol i mas bihainim wankain pasin.

15. Olsem wanem yumi inap soim olsem yumi laikim wok bos bilong Jehova?

15 Yumi mas holim wanem tingting long ol man em God i yusim bilong stiaim yumi? Taim yumi soim pasin rispek na wok gut  wantaim ol, yumi soim olsem yumi laikim wok bos bilong Jehova. Maski yumi no kliagut long sampela disisen ol i mekim, yumi bai wok strong yet long sapotim ol wok tiokratik. Ol man bilong graun i no gat dispela pasin, tasol em pasin yumi mas bihainim aninit long wok bos bilong Jehova. (Efe. 5:22, 23; 6:1-3; Hib. 13:17) Taim yumi stap daun long wok bos bilong God, em bai helpim yumi bikos em i save tingim tru yumi.

16. Ol lain i sapotim wok bos bilong God i larim wanem samting i stiaim ol long mekim ol disisen?

16 Yumi ken soim olsem yumi sapotim wok bos bilong God long rot bilong ol disisen yumi mekim. Jehova i no tokim yumi long olgeta liklik liklik samting yumi mas mekim, nogat. Em i kamapim ol tingting bilong stiaim yumi. Olsem, em i no kolim olgeta liklik liklik samting ol Kristen i mas bihainim long sait bilong bilas, nogat. Em i laik bai yumi mas makim ol klos i stret long ol Kristen i mas werim. (1 Tim. 2:9, 10) Na tu, em i no laik bai yumi mekim ol disisen we i pundaunim ol narapela. (1 Kor. 10:31-33) Taim yumi larim tingting bilong Jehova i stiaim wokabaut bilong yumi, yumi soim olsem yumi laikim na sapotim pasin em i bihainim bilong bosim yumi.

Sapotim wok bos bilong Jehova long rot bilong mekim gutpela disisen na ol wok bilong famili(Lukim paragraf 16-18)

17, 18. Ol marit i ken mekim wanem bilong soim olsem ol i sapotim wok bos bilong Jehova?

17 Tingim wanpela samting em ol marit Kristen inap mekim bilong soim olsem ol i sapotim wok bos bilong Jehova. Olsem wanem sapos hevi i kamap insait long marit na ol i no redi long karim dispela hevi? Olsem wanem sapos ol i bel hevi? Ol i ken tingim tingim pasin Jehova i mekim long lain Israel. God i stap olsem man marit bilong lain Israel bilong bipo. (Ais. 54:5; 62:4) Dispela em wanpela marit i gat planti hevi long en! Tasol Jehova i no givap long ol. Planti taim em i marimari long ol na em i stap gut long kontrak em i mekim wantaim ol. (Ritim Song 106:43-45.) Jehova i gat pasin bilong i stap gut long narapela, olsem na yumi laik i go klostu long em.

18 Ol marit husat i laikim Jehova, ol i save bihainim pasin bilong em. Ol i no bihainim tingting bilong ol yet na katim marit. Ol i luksave olsem Jehova i pasim tupela wantaim na em i laik bai tupela i “pas wantaim.” Baibel i orait long katim marit sapos poroman marit i mekim pasin adaltri. (Mat. 19:5, 6, 9) Taim ol marit i traim bes long stretim ol hevi bilong ol na mekim ol samting em Jehova i orait long en, dispela i soim olsem ol i sapotim stretpela pasin bilong em long mekim wok bos.

19. Sapos yumi mekim popaia, orait yumi mas mekim wanem?

19 Yumi no gutpela olgeta, olsem na sampela taim yumi inap mekim ol samting we i mekim Jehova i bel hevi. Em i save long dispela, olsem na em i stretim rot long Krais i ken i dai bilong baim bek yumi. Olsem na sapos yumi popaia, yumi mas askim Jehova long fogivim yumi. (1 Jon 2:1, 2) Yumi no ken larim bel hevi i daunim yumi, mobeta yumi yet i mas kisim skul long ol popaia yumi mekim. Sapos yumi stap gut long Jehova, em bai fogivim yumi na helpim yumi long daunim ol bel hevi na soim rot long olsem wanem yumi inap karim kain hevi olsem long bihain.—Sng. 103:3.

20. Bilong wanem yumi mas sapotim wok bos bilong Jehova?

20 Long nupela taim, yumi olgeta bai i stap aninit long wok bos bilong Jehova na kisim skul long ol stretpela pasin bilong em. (Ais. 11:9) Long nau, yumi kisim planti gutpela skul long ol pasin bilong God. Klostu nau, God bai stretim bek bikpela tok i bin kamap. Nau em taim bilong sapotim wok bos bilong God long rot bilong i stap gut long em, mekim ol wok bilong Kingdom, na wok strong long bihainim ol pasin bilong em long olgeta samting yumi mekim.