Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Wastaua—Stadi Edisen  |  Jun 2017

Yu Save Long Dispela?

Yu Save Long Dispela?

Yu ting i stret long kolim ol man i salim ol animal insait long tempel bilong Jerusalem olsem “ol stilman”?

GUTNIUS BILONG MATYU i tok, “Jisas i go insait long tempel na em i rausim ol man i wok long baim na salim ol samting insait long tempel. Na em i kapsaitim ol tebol bilong ol man i wok long senisim mani na ol fom bilong ol man i wok long salim ol pisin balus. Na em i tokim ol: ‘Rait Holi i tok: “Ol bai kolim haus bilong mi olsem haus bilong mekim beten.” Tasol yupela i mekim em i kamap olsem ples hait bilong ol stilman.’”—Mat. 21:12, 13.

Ol olpela rait bilong ol Juda i soim olsem ol man i salim ol animal samting long tempel i save putim pe i antap tumas na pulim bikpela mani long ol man. Buk Misna (Keritot 1:7) i stori long samting i kamap long taim bilong ol aposel. Ol bisnisman i salim 2-pela pisin balus na ol i putim pe i winim 25 silva denarius. Dispela em pe wanpela wokman i no gat bikpela save inap kisim sapos em i wok inap 25 de. Lo i orait long ol man i stap rabis i ken givim ol pisin balus olsem ofa. Tasol pe ol bisnisman i makim i antap tumas. (Wkp. 1:14; 5:7; 12:6-8) Rabai Simeon ben Gamaliel i no wanbel liklik long samting i kamap, olsem na em i daunim pe bilong 2-pela pisin balus na bai ol man i stap rabis i ken baim.

Tru tumas, ol dispela man i gat gridi pasin na ol i no sori long ol man i no gat planti samting, olsem na i stret long Jisas i kolim ol olsem “ol stilman.”