Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Wastau—Stadi Edisen  |  Janueri 2017

Yumi Mas Bihainim Pasin Daun

Yumi Mas Bihainim Pasin Daun

“Ol man i gat gutpela tingting i save daunim ol yet.”—SND. 11:2.

OL SINGSING: 33, 88 [41]

1, 2. Bilong wanem God i no orait moa long Sol? (Lukim piksa long kirap bilong stadi.)

TAIM King Sol i kirap mekim wok king namel long lain Israel bilong bipo, em i gat pasin daun na ol manmeri i rispektim em. (1 Sml. 9:1, 2, 21; 10:20-24) Tasol bihain, em i hambak na mekim pasin antap. Profet Samuel i tokim Sol long wetim em long Gilgal, tasol Samuel i no go kamap long taim stret, olsem na Sol i kros. Ol Filistia i redi long pait, na ol Israel i stat long lusim Sol na i go nabaut. Ating Sol i kisim tingting olsem, ‘Mi mas mekim sampela samting—mi mas mekim hariap.’ Em i mekim ofa long God, tasol God i no makim em long mekim dispela wok. Olsem na Jehova i no amamas long Sol.—1 Sml. 13:5-9.

2 Taim Samuel i go kamap long Gilgal, em i givim strongpela tok long Sol. Tasol Sol i no laik kisim dispela tok bilong helpim em, nogat. Em i givim ol eskius, sutim tok long ol narapela, na mekim popaia bilong em i kamap olsem liklik samting. (1 Sml. 13:10-14) Kirap long dispela taim, Sol i mekim ol narapela samting we i putim hevi long wok king bilong em, na moa yet, Jehova i no orait long  em. (1 Sml. 15:22, 23) Sol i kisim pasin antap, olsem na bikpela hevi i painim em na em i lusim laip bilong em.—1 Sml. 31:1-6.

3. (a) Planti man i holim wanem tingting long pasin daun? (b) Yumi bai kisim bekim bilong wanem ol askim?

3 Long nau, planti manmeri i gat pasin resis. Ol i pilim olsem ol i mas i gat biknem long ai bilong ol manmeri bambai ol inap i stap gut. Olsem na ol i no gat pasin daun. Wanpela ekta husat i insait long wok politik, em i tok: “Pasin daun em i no pasin bilong mi—mi no laik tru long kisim dispela pasin.” Tasol bilong wanem pasin daun em i bikpela samting? Pasin daun bai kirapim man long mekim wanem, na em bai abrusim wanem ol pasin? Olsem wanem yumi inap bihainim yet pasin daun long taim bilong hevi, o taim ol narapela i putim presa long yumi? Long dispela stadi, yumi bai kisim bekim bilong namba 1 na namba 2 askim. Neks stadi bai stori long namba 3 askim.

BILONG WANEM PASIN DAUN EM I BIKPELA SAMTING?

4. Sapos man i gat pasin bikhet, dispela bai kirapim em long mekim wanem?

4 Baibel i tok, sapos man i no gat pasin daun, em bai mekim pasin bikhet na litimapim nem bilong em yet. (Ritim Sindaun 11:2.) Devit i bihainim savetingting na askim Jehova long “was gut long [em], bai [em i] no ken bikhet.” (Sng. 19:13) Sapos man i gat pasin “bikhet,” dispela bai kirapim em long mekim wanem? Em bai i no tingting gut na em bai mekim ol samting em i no gat rait long mekim. Yumi olgeta i gat sin, olsem na sampela taim yumi save mekim pasin bikhet. Stori bilong King Sol i soim olsem, sapos yumi kisim pasin bilong bihainim laik bilong yumi yet, dispela inap kirapim yumi long brukim lo bilong God. Song 119:21 i tok Jehova i “save krosim ol bikhetman.” Bilong wanem?

5. Bilong wanem pasin bikhet em bikpela rong?

5 Sapos man i mekim pasin bikhet, dispela rong i bikpela moa winim pasin bilong mekim popaia. I gat sampela risen na yumi inap tok olsem. Namba 1: Taim pasin bikhet i kirapim yumi long mekim pasin antap, yumi no givim ona long Jehova olsem Nambawan King. Namba 2: Taim yumi mekim ol samting yumi no gat rait long mekim, kros inap kamap namel long yumi na ol narapela. (Snd. 13:10) Namba 3: Taim olgeta i luksave olsem yumi mekim pasin bikhet, yumi bai sem na gutnem bilong yumi bai bagarap. (Luk 14:8, 9) Pasin bikhet i save kamapim hevi. Baibel i kamapim klia olsem i stret long yumi bihainim pasin daun.

PASIN DAUN I KIRAPIM MAN LONG MEKIM WANEM?

6, 7. Pasin daun bai kirapim man long mekim wanem?

6 Baibel i tok, sapos man i gat pasin daun, em i no inap hambak o mekim pasin antap. (Fili. 2:3) Man i gat pasin daun bai luksave long ol samting em inap long mekim, na luksave long ol popaia bilong em, na em bai redi long putim yau taim ol narapela i kamapim tingting bilong ol. Jehova i save amamas tru long man i gat pasin daun.

7 Baibel i tok tu olsem sapos yumi gat pasin daun, yumi bai holim stretpela tingting long yumi yet na luksave long ol samting yumi no inap long mekim. Tok Grik ol i tanim olsem pasin daun i strongim poin olsem sapos yumi luksave long ol samting yumi no inap long mekim, dispela bai stiaim pasin yumi mekim long ol narapela.

8. Wanem ol samting inap soim olsem yumi bihainim pasin bikhet?

8 Wanem ol samting inap soim olsem yumi bihainim pasin antap? Ating yumi holim tingting olsem yumi yet na ol wok yumi mekim i gutpela moa winim ol narapela. (Rom 12:16) Ating yumi mekim sampela samting i no stret bilong  kirapim ol narapela long givim biknem long yumi. (1 Tim. 2:9, 10) O ating yumi strong long ol narapela i mas bihainim tingting bilong yumi bikos yumi holim sampela kain namba long wok, o yumi save long sampela lain husat i gat biknem, o yumi bihainim tingting bilong yumi yet. (1 Kor. 4:6) Taim yumi mekim ol dispela samting, ating yumi no inap luksave olsem yumi lusim pasin daun na yumi mekim pasin bikhet.

9. Wanem samting i kirapim sampela man long mekim pasin bikhet? Stori long sampela eksampel.

9 Sapos man i larim ol laik bilong bodi i kontrolim em inap liklik haptaim, dispela inap kirapim em long mekim pasin antap. Strongpela laik bilong kisim namba, na pasin bilong jeles na belhat kwik i kirapim planti man long mekim pasin bikhet. Baibel i stori olsem Apsalom, Usia, na Nebukatnesar i mekim ol pasin em laik nogut bilong bel i kamapim na Jehova i givim strafe long pasin bikhet ol i mekim.—2 Sml. 15:1-6; 18:9-17; 2 Sto. 26:16-21; Dan. 5:18-21.

10. Bilong wanem yumi no ken skelim astingting bilong ol samting em ol narapela i mekim? Stori long wanpela eksampel long Baibel.

10 I gat ol narapela samting tu we i save kirapim man long bihainim pasin antap. Tingim stori bilong Baibel long Stat 20:2-7 na Matyu 26:31-35. Yu ting laik nogut bilong mekim sin i kirapim Abimelek na Pita long mekim pasin i luk olsem pasin bikhet? O yu ting ol i no save long stori tru, na ol i no stap redi? Yumi no inap lukim tingting na laik i stap long bel bilong man. Olsem na yumi mas bihainim savetingting na soim pasin laikim na no ken skelim astingting bilong ol samting em ol narapela i mekim.—Ritim Jems 4:12.

AMAMAS LONG ASAINMEN BILONG YUMI

11. Sapos yumi luksave long wok yumi mekim insait long oganaisesen bilong God, hau bai dispela i kirapim yumi long mekim pasin daun?

11 Sapos yumi luksave long wok yumi mekim insait long oganaisesen bilong God, dispela bai kirapim yumi long mekim pasin daun. Jehova i mekim stret ol samting, olsem na em i givim wok long yumi olgeta wan wan manmeri bilong em. Olgeta wan wan memba bilong kongrigesen i gat wok bilong mekim, na ol dispela wok i strongim kongrigesen. Jehova i soim bikpela pasin helpim taim em i givim yumi sampela kain presen, strong, na save. Yumi inap yusim ol dispela samting long litimapim nem bilong em na helpim ol narapela. (Rom 12:4-8) Jehova i givim wok long yumi olsem ol bosboi, na ol narapela inap rispektim na trastim yumi.—Ritim 1 Pita 4:10.

Olsem wanem eksampel bilong Jisas inap helpim yumi taim asainmen bilong yumi i senis? (Lukim paragraf 12-14)

12, 13. Bilong wanem yumi no ken tingting planti taim asainmen bilong yumi i senis?

12 Asainmen bilong yumi insait long oganaisesen bilong God inap senis. Tingim senis i kamap long wok Jisas i mekim. Pastaim, em wanpela tasol i stap wantaim Jehova. (Snd. 8:22) Jisas i wok wantaim God long wokim ol ensel, ol samting long ples antap na long graun, na ol manmeri. (Kol. 1:16) Bihain, Jisas i kisim nupela asainmen; em i bon olsem wanpela bebi na kamap man long graun. (Fili. 2:7) Jisas i dai na givim laip bilong em olsem ofa, na em i go bek long heven olsem wanpela spirit na kamap King long Kingdom Bilong God long 1914. (Hib. 2:9) Tasol dispela i no laspela asainmen bilong em, nogat. Bihain long Wan Tausen Yia, Jisas bai putim Kingdom long han bilong Jehova bambai “God i ken i stap het bilong olgeta samting.”—1 Kor. 15:28.

13 Yumi ken tingim olsem asainmen bilong yumi tu bai senis senis. Ating pastaim yu stap singel, na nau yu marit. Ating nau yu gat ol pikinini. Bihain, ating yu holim liklik kago tasol na yu laik autim tok fultaim. Olgeta wan wan disisen yu mekim i opim rot bilong yu long kisim sampela kain wok. Ol senis i kamap long laip inap opim rot bilong yumi long mekim bikpela  wok moa o liklik wok tasol long wok bilong Kingdom. Olsem wanem? Yu stap yangpela yet o yu lapun? Yu gat gutpela helt? Jehova i save skelim ol dispela samting na givim wok i stret long sindaun bilong yumi. Em i laik bai yumi mekim wok inap long skel bilong yumi, na em i save amamas long wok yumi mekim.—Hib. 6:10.

14. Olsem wanem pasin daun bai helpim yumi long mekim gut wok na stap amamas?

14 Jisas i kisim amamas long olgeta asainmen em i mekim, na yumi tu inap kisim amamas long olgeta asainmen bilong yumi. (Snd. 8:30, 31) Sapos man i gat pasin daun, em i no inap pilim olsem ol asainmen bilong em long kongrigesen i putim presa long em. Em i no inap tingting planti long wanem kain asainmen em bai kisim long bihain, na em i no inap bel hevi sapos ol narapela i kisim wok insait long kongrigesen na em yet nogat. Em bai tingim wok em i mekim olsem wok i kam long Jehova, olsem na em bai mekim gut dispela wok na kisim amamas long en. Na tu, em bai rispektim wok em Jehova i givim long ol narapela. Pasin daun i save kirapim yumi long givim biknem long ol narapela na sambai long ol narapela.—Rom 12:10.

PASIN DAUN I KIRAPIM MAN LONG ABRUSIM WANEM OL PASIN?

15. Olsem wanem yumi inap bihainim pasin daun bilong Gideon?

15 Gideon i stap gutpela eksampel long mekim pasin daun. Taim ensel bilong Jehova i kamap long Gideon, Gideon i tok em i no gat nem na lain bilong em i no gat strong. (Het. 6:15) Gideon i kisim asainmen Jehova i givim long em, na em i askim God long helpim em long kliagut  long wok em i mas mekim, na em i larim Jehova i stiaim em. (Het. 6:36-40) Gideon em man i gat strongpela bel na em i no pret. Tasol em i was gut na bihainim savetingting. (Het. 6:11, 27) Em i no yusim asainmen bilong em long kisim biknem, nogat. Taim Gideon i inapim pinis asainmen bilong em, em i amamas na i go bek long ples bilong em.—Het. 8:22, 23, 29.

16, 17. Taim man i gat pasin daun i laik mekim sampela wok moa long sait bilong bilip, em i mas skelim wanem ol samting?

16 Pasin daun i no makim olsem yumi no ken wok strong long winim ol mak long mekim bikpela wok moa long wok bilong God. Baibel i kirapim yumi olgeta long winim ol mak bilong mekim sampela wok moa. (1 Tim. 4:13-15) Yu ting dispela i makim olsem oltaim asainmen bilong yumi bai senis? Nogat. Jehova bai blesim wok yumi mekim long nau bambai dispela wok i kamap gutpela moa. Yumi inap yusim save God i givim long yumi na mekim planti wok moa long wok bilong Kingdom.

17 Man i gat pasin daun i no inap hariap long kisim wanpela asainmen. Pastaim, em bai painimaut wanem ol samting em i mas mekim long asainmen ol i laik givim long em. Em bai holim stretpela tingting na skelim sindaun bilong em. Olsem wanem? Em inap long mekim sampela wok moa na em bai i gat taim long mekim tu ol narapela bikpela wok? Em inap larim ol narapela i mekim wok em i mekim long nau bambai em i gat taim long mekim nupela wok? Sapos bekim bilong dispela 2-pela askim em nogat, orait ating narapela pablisa inap mekim gut dispela wok. Taim yumi beten na skelim sindaun bilong yumi yet, yumi bai holim stretpela tingting long save na strong bilong yumi long mekim wok. Pasin daun inap stiaim yumi long tok nogat.

18. (a) Pasin daun bai kirapim yumi long mekim wanem taim yumi kisim nupela asainmen? (b) Olsem wanem tok bilong Rom 12:3 i stret long man i gat pasin daun?

18 Taim yumi kisim nupela asainmen, eksampel bilong Gideon bai kirapim yumi long tingim olsem yumi bai mekim gut wok sapos yumi larim Jehova i stiaim na blesim wok bilong yumi. God i singautim yumi long “daunim tingting bilong yumi yet na i stap wanbel wantaim God bilong yumi, na bihainim em wanpela tasol.” (Mai. 6:8) Olsem na taim yumi kisim wanpela asainmen, yumi mas beten na tingim tingim ol tok Jehova i givim yumi long rot bilong Baibel na oganaisesen bilong em. Yumi mas senisim ol pasin bilong yumi bambai pasin bilong yumi i stret wantaim laik bilong Jehova. Yumi mas tingim olsem pasin daun bilong Jehova i opim rot na ‘yumi gat biknem long ai bilong ol manmeri,’ na dispela samting i no kamap long strong bilong yumi yet. (Sng. 18:35) Taim yumi daunim tingting bilong yumi yet na stap wanbel wantaim God, yumi no inap ting olsem yumi nambawan tru o yumi no inap long mekim wanpela samting.—Ritim Rom 12:3.

19. Bilong wanem yumi mas kisim pasin daun?

19 Man i gat pasin daun bai givim ona long Jehova bikos Jehova em Krieta na King Bilong Heven na Graun. (Rev. 4:11) Pasin daun bai helpim yumi long stap belgut na mekim gut asainmen bilong yumi long oganaisesen bilong God. Pasin daun bai stiaim yumi long abrusim ol pasin we inap bagarapim gutnem bilong yumi, na yumi bai strongim pasin wanbel namel long ol manmeri bilong Jehova. Pasin daun bai kirapim yumi long tingim laik bilong ol narapela pastaim, bihainim savetingting, na abrusim ol bikpela rong. Olsem na olgeta manmeri bilong God i mas bihainim pasin daun. Jehova i laikim tru ol manmeri husat i bihainim dispela pasin. Tasol olsem wanem sapos sampela samting i putim presa long yumi? Neks stadi bai stori long olsem wanem yumi inap bihainim pasin daun sapos sampela samting i putim presa long yumi.