Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Wastau—Stadi Edisen  |  Janueri 2017

Ol i Amamas Long Givim Ol Yet

Ol i Amamas Long Givim Ol Yet

PLANTI Witnes i givim bel tru long autim tok long ol hap i sot tru long ol pablisa, na planti em ol singel sista. Sampela i autim tok long ol narapela kantri winim planti yia. Wanem samting i kirapim ol long mekim olsem? Taim ol i autim tok long narapela kantri, dispela i givim wanem skul long ol? Ol i kisim wanem ol blesing? Mipela i mekim intaviu long sampela bilong ol. Toktok bilong ol dispela sista bai helpim yu sapos yu singel sista na yu laik tru long mekim wok we inap givim bikpela amamas tru long yu. Olgeta manmeri bilong God inap kisim helpim long eksampel bilong ol dispela sista.

DAUNIM PASIN BILONG HOLIM 2-PELA TINGTING

Anita

Sapos yu stap singel, orait olsem wanem? Yu holim 2-pela tingting long i go mekim wok painia long narapela kantri? Anita em wanpela singel sista, na long nau em i gat 75 krismas samting. Pastaim em i holim 2-pela tingting long i go mekim wok painia long narapela kantri. Em i kamap bikpela long Inglan, na em i mekim wok painia taim em i gat 18 krismas. Em i tok: “Mi amamas long skulim ol manmeri long Jehova, tasol mi no ting mi inap mekim wok autim tok long narapela kantri. Mi no bin lainim tokples bilong narapela kantri, na mi pilim olsem mi no fit long mekim olsem. Olsem na mi kirap nogut taim mi kisim pas bilong i go long Skul Gileat. Mi pilim olsem mi no gat nem, na mi no gutpela inap long kisim dispela invatesen. Tasol mi tingting olsem, ‘Sapos Jehova i pilim olsem mi inap mekim dispela wok, orait bai mi mekim.’ Dispela samting i kamap winim 50 yia i go pinis. Kirap long dispela taim na i kam inap long nau, mi mekim wok misineri long Japan.” Em i tok moa: “Sampela taim, mi save smail na tokim ol yangpela sista olsem, ‘Karim beg bilong yupela na kam wantaim mi long dispela raun we yupela bai lain long planti samting na kisim bikpela amamas!’ Mi amamas olsem planti singel sista i mekim olsem.”

STRONGIM BEL

Pastaim, planti sista i pret long mekim wok painia long narapela kantri. Tasol wanem samting i kirapim ol long strongim bel na mekim dispela wok?

Maureen

Maureen em wanpela singel sista, na long nau em i gat 65 krismas samting. Em i tok: “Taim mi kamap bikpela, mi laik helpim ol narapela bambai laip bilong mi i gat as bilong en.” Taim em i gat 20 krismas, em i go long Quebec long Kanada bikos ol i sot tru long ol painia. Em i tok: “Bihain mi kisim pas bilong i go long Skul Gileat, tasol mi no laik lusim ol pren na go long hap mi no save long en.” Em i tok moa: “Mi wari tu long lusim Mama bikos Papa i sik na Mama i lukautim  em. Planti nait mi aiwara wantaim na beten na tokim Jehova long ol dispela samting. Taim mi toktok wantaim papamama, ol i kirapim mi long i go long Skul Gileat. Ol bratasista long kongrigesen i sambai long papamama bilong mi. Taim mi lukim olsem Jehova i lukautim tupela, mi bilip olsem Jehova bai lukautim mi tu. Olsem na mi redi long i go!” Kirap long 1979, Maureen i mekim wok misineri winim 30 yia long Wes Afrika. Long nau, Maureen i lukautim mama bilong em long Kanada, na em i mekim wok olsem spesel painia. Em i tingim bek ol yia em i mekim wok misineri long narapela kantri, na em i tok: “Taim mi nidim wanpela samting, Jehova i save givim dispela samting long taim stret.”

Wendy

Wendy i gat 65 krismas samting, na em i kirap mekim wok painia long Australia taim em i stap tineja yet. Em i tok: “Mi save pret na sem long toktok wantaim ol manmeri mi no save long ol. Tasol wok painia i trenim mi long toktok wantaim olgeta kain man. Bihain, mi luksave olsem mi no pret moa long toktok wantaim olgeta kain manmeri. Wok painia i skulim mi long trastim Jehova, na mi pilim olsem mi inap i go mekim wok painia long narapela kantri. Na tu, wanpela singel sista husat i mekim wok misineri long Japan winim 30 yia, em i tokim mi long i go autim tok long Japan inap 3-pela mun. Taim mi autim tok wantaim em, dispela i kirapim laik bilong mi long i go autim tok long narapela kantri.” Long 1985 samting, Wendy i go long Vanuatu—ailan kantri i stap 1,770 kilomita long hap is bilong Australia.

Wendy i stap yet long Vanuatu, na em i mekim wok long Rimot Trenslesen Ofis. Em i tok: “Mi kisim bikpela amamas tru taim mi lukim ol liklik grup na ol kongrigesen i kamap long dispela hap. Mi pilim olsem em spesel blesing tru long mi inap helpim wok bilong Jehova long dispela ailan.”

Kumiko (namel)

Kumiko em wanpela sista long Japan, na long nau em i gat 65 krismas samting. Em i mekim wok painia long Japan, na painia poroman bilong em i tok long tupela i go mekim wok painia long Nepal. Kumiko i tok: “Em i tokim mi planti taim, tasol mi tok nogat. Mi pilim olsem mi bai hatwok long lainim narapela tokples na nupela kalsa. Na tu, i hatwok long bungim mani bilong i go sindaun long narapela kantri, olsem na mi no hariap long mekim disisen. Bihain, mi kisim eksiden long motobaik na mi edmit long haus sik. Taim mi stap long haus sik, mi tingting olsem: ‘Wanem hevi moa bai painim mi? Nogut mi kisim bikpela sik, na mi no gat rot long mekim wok painia long narapela kantri. Ating mi inap mekim wok painia long narapela kantri inap wanpela yia.’ Mi beten strong long Jehova long helpim mi long mekim wok painia long narapela kantri.” Taim Kumiko i kamap orait na lusim haus sik, em i go raun long Nepal, na bihain em na painia poroman bilong em i go mekim wok painia long hap.

 Kumiko i tingim bek 10-pela yia em i mekim wok painia long Nepal, na em i tok: “Pastaim, ol samting mi tingting planti long en i stap olsem solwara Retsi na i pasim rot bilong mi. Tasol mi no larim ol dispela samting i pasim mi, na i olsem solwara Retsi i bruk long 2-pela hap na mi inap i go long hap sait. Mi amamas tru olsem mi inap i go autim tok long hap i sot tru long ol pablisa. Taim mipela i go long haus bilong wanpela famili na stori wantaim ol long tok bilong Baibel, inap 5-pela o 6-pela narapela manmeri i save kam na putim yau. Ol liklik pikinini tu i save askim mi long givim liklik nius bilong Baibel long ol. Mi amamas tru long autim tok long dispela hap we ol manmeri i redi long putim yau.”

SANAP STRONG NA KARIM HEVI

Sampela hevi i painim ol singel sista em mipela i mekim intaviu long ol. Olsem wanem ol i sanap strong na karim hevi?

Diane

Diane em wanpela sista long Kanada, na em i tok: “Pastaim mi pilim olsem mi hatwok tru long stap longwe long famili bilong mi.” Nau em i winim pinis 60 krismas, na inap 20 yia em i mekim wok misineri long Aivori Kos (nau ol i kolim Kot Diwa). “Mi beten askim Jehova long helpim mi long laikim ol manmeri long teritori bilong mi. Wanpela tisa long Gileat em Brata Jack Redford. Em i tokim mipela olsem pastaim bel na tingting bilong mipela bai i no stap isi taim mipela i lukim ol hevi i stap long teritori, na moa yet taim mipela i lukim olsem ol manmeri i stap rabis tru. Tasol em i tok: ‘No ken tingim hevi bilong i stap rabis, nogat. Tingim ol manmeri na lukluk long pes na ai bilong ol. Lukim pasin ol i mekim taim ol i harim ol tok bilong Baibel.’ Mi mekim olsem, na mi kisim planti blesing! Taim mi autim tok bilong Kingdom long ol manmeri, ol i save amamas tru!” Wanem samting moa i helpim Diane? “Mi pas gut wantaim ol Baibel sumatin bilong mi, na mi kisim bikpela amamas tru taim ol i mekim wok bilong Jehova. Teritori bilong mi i kamap olsem ples bilong mi. Long sait bilong bilip, mi kisim planti papa na mama, na brata na sista olsem Jisas i tok promis long en.”—Mak 10:29, 30.

Anne i gat 45 krismas samting, na em i autim tok long wanpela kantri long Esia we ol i tambuim wok bilong yumi. Em i tok: “Insait long ol yia i go pinis, taim mi mekim wok long narapela narapela hap, mi stap wantaim ol sista em kalsa na pasin bilong ol i no wankain long kalsa na pasin bilong mi. Sampela taim, dispela i kamapim bel hevi namel long mipela. Long kain taim olsem, mi traim long pas gut moa wantaim ol, na kliagut moa long kalsa bilong ol. Na tu, mi wok strong long holim stretpela tingting na soim pasin laikim long ol. Olsem na mi inap pas gut wantaim ol na mipela i kamap gutpela pren tru, na dispela i helpim mi long i stap gut yet long asainmen bilong mi.”

Ute

 Ute em wanpela sista long Jemani na nau em i winim pinis 50 krismas. Long 1993, em i kisim asainmen bilong i go mekim wok misineri long Madagaska. Em i tok: “Pastaim, mi pilim hatwok long lainim tokples, lain long weda, na karim hevi bilong sik malaria, amiba, na ol wem i karim ol jem. Tasol mi kisim planti helpim. Ol asples sista na ol pikinini, na ol Baibel sumatin bilong mi i helpim mi long lainim tokples. Sista i poromanim mi long wok misineri i save lukautim mi taim mi sik. Tasol Jehova i helpim mi long planti samting. Oltaim mi beten long em na tokim em long ol samting i putim hevi long mi. Mi save wet long kisim bekim long beten bilong mi—mi save wet inap sampela de o sampela mun. Jehova i stretim olgeta hevi bilong mi.” Long nau, Ute i mekim wok misineri long Madagaska inap 23 yia.

PLANTI BLESING

Ol singel sista husat i autim tok long narapela kantri, ol i kisim planti blesing. Ol i kisim wanem ol blesing?

Heidi

Heidi em wanpela sista bilong Jemani, na nau em i winim 70 krismas. Kirap long 1968, em i mekim wok misineri long Aivori Kos (nau ol i kolim Kot Diwa). Em i tok: “Mi amamas tru long lukim olsem ol pikinini long sait bilong bilip ‘i wokabaut yet long tok i tru.’ Long nau, sampela Baibel sumatin bilong mi i mekim wok painia na wok elda long kongrigesen. Planti bilong ol i kolim mi Mama o Bubu. Wanpela bilong ol dispela elda na meri bilong em wantaim ol pikinini i tingim mi olsem wanfamili bilong ol. Olsem na mi inap tok, Jehova i givim mi wanpela pikinini man, tambu meri, na 3-pela tumbuna pikinini.”—3 Jon 4.

Karen (namel)

Karen em wanpela sista long Kanada, na nau em i winim 70 krismas. Em i mekim wok misineri long Wes Afrika winim 20 yia. Em i tok: “Wok misineri i lainim mi long daunim ol laik bilong mi yet, soim pasin laikim, na bihainim pasin isi. Na tu, mi wok bung wantaim ol bratasista bilong ol narapela kantri na dispela i helpim mi long holim stretpela tingting. Mi kisim save olsem i gat narapela narapela rot bilong mekim ol samting. Long nau, mi amamas tru olsem mi gat ol gutpela pren long olgeta hap bilong graun! Maski laip na asainmen bilong mipela i senis, mipela i stap yet olsem ol gutpela pren.”

Margaret em wanpela sista bilong Inglan, na nau em i gat 78 krismas samting. Em i mekim wok misineri long Laos. Em i tok: “Taim mi mekim wok autim tok long narapela kantri, mi lukim olsem Jehova i kirapim ol manmeri bilong kain kain sindaun na skin kala long kam insait long oganaisesen bilong em. Dispela i strongim tru bilip bilong mi. Mi bilip tru olsem Jehova i stiaim oganaisesen bilong em na em bai kamapim samting em i tingting pinis long mekim.”

Tru tumas, ol singel sista husat i autim tok long narapela kantri, ol i sapotim tru wok bilong Kingdom. I stret long yumi tok amamas long ol. (Het. 11:40) Planti moa singel sista i kirap long sapotim wok bilong Kingdom. (Sng. 68:11) Yu ting yu inap stretim sindaun bilong yu na bihainim eksampel bilong ol sista mipela i bin intaviuim long dispela atikol? Sapos yu mekim olsem, yu bai “traim na lukim na bai [yu] save olsem [“Jehova,” NW] i gutpela tru.”—Sng. 34:8.