TAIM meri bilong mi Mairambubu i ron long bas, em i harim wanpela meri i tok: “Bai i no gat dai moa, na ol man i dai pinis bai kirap bek.” Meri bilong mi i tingting planti na em i laik kisim sampela save moa. Olsem na taim bas i stop na ol pasindia i go daun, em i bihainim meri i mekim ol dispela tok, nem bilong em Apun Mambetsadykova, na em i wanpela Witnes Bilong Jehova. Long dispela taim, hevi inap kamap long man husat i toktok wantaim wanpela Witnes, tasol samting Apun i skulim mipela long en i senisim laip bilong mipela.

WOK LONG MONING I GO INAP APINUN

Mama i karim mi long 1937 long bikpela fam i stap klostu long biktaun Tokmok long Kirgistan. Papamama i bilong lain Kirgistan, na mipela i save mekim tokples Kirgistan. Papamama i save wok long fam kirap long moning i go inap long apinun. Ol i save kisim kaikai olsem pe bilong wok long fam, na ol i kisim mani 1-pela taim tasol long olgeta yia. Mama bilong mi i wok strong long lukautim mi na liklik susa bilong mi. Mi skul 5-pela yia tasol, na bihain mi wok fultaim long fam.

Ol maunten bilong Teskey Ala-Too

Ol manmeri long hap mipela i stap long en, ol i stap rabis, olsem na mipela i mas wok hat long lukautim mipela yet long ol samting mipela i nidim. Taim mi yangpela yet, mi no save bisi long painimaut wai na yumi stap laip, o wanem samting bai painim yumi long bihain. Mi no bin ting olsem tok i tru bilong God Jehova, na ol samting em i tingting pinis long mekim bai senisim laip bilong mi. Em narakain tru long tingim olsem wanem tok i tru i kam long Kirgistan na i go long olgeta hap bilong dispela kantri. Tok i tru i bin kam namba 1 taim long asples bilong mi long not Kirgistan.

OL KALABUSMAN I BRINGIM TOK I TRU LONG KIRGISTAN

Tok i tru bilong God Jehova i kam long Kirgistan long ol yia bihain long 1950. Tasol i hatwok liklik long skulim ol man long tok i tru bikos ol manmeri long Kirgistan i bilip long pasin Komiunis. Pastaim Ripablik Bilong Soviet Yunion (USSR) i bosim Kirgistan. Ol Witnes Bilong Jehova long ol hap em Soviet Yunion i bosim, ol i no sapotim wok politik. (Jon 18:36) Olsem na gavman Komiunis i tingim ol Witnes olsem ol birua. Tasol dispela i no stopim ol man i gat gutpela bel long harim Tok Bilong God. Dispela i skulim mi olsem  Jehova “inap mekim olgeta samting.”—Mak 10:27.

Emil Yantzen

Pasin bilong birua long ol Witnes Bilong Jehova i mekim na tok i tru i go bikpela long Kirgistan. Olsem wanem dispela samting i kamap? Soviet Yunion i save kalabusim ol birua bilong en long Saibiria. Taim ol dispela lain i lusim kalabus, sampela bilong ol i bringim tok i tru i kam long Kirgistan. Wanpela bilong ol dispela kalabusman em Emil Yantzen. Mama i karim em long Kirgistan long 1919. Taim ol i salim Emil long wok kalabus long kem, em i bungim ol Witnes long dispela hap. Em i kisim tok i tru na kam bek long ples long 1956. Em i kam i stap long Sokuluk, em asples bilong mi. Long 1958, fes kongrigesen long Kirgistan i kamap long Sokuluk.

Victor Vinter

Bihain long 1-pela yia, Victor Vinter i kam i stap long Sokuluk. Dispela brata i kisim planti hevi long han bilong ol man i birua long tok i tru. Inap 2-pela taim em i go kalabus inap 3-pela yia bikos em i no laik insait long wok politik, na bihain em i kalabus narapela 10-pela yia moa. Na tu, em i go stap 5-pela yia long narapela kantri bikos gavman i birua long em. Maski i olsem, pasin birua i no stopim lotu i tru long i go bikpela.

TOK I TRU I KAM KLOSTU LONG PLES

Eduard Varter

Long 1963, i gat 160 Witnes long Kirgistan. Planti bilong ol i kam long Jemani, Yukren, na Rasia. Wanpela bilong ol em Eduard Varter. Em i wanpela Witnes husat i kisim baptais long 1924 long Jemani, tasol em i lusim kantri bikos gavman i birua long em. Long ol yia bihain long 1940, ol Natsi i salim Eduard i go long banis kalabus, na sampela yia bihain, Soviet Yunion i salim em i go long narapela kantri. Long 1961, dispela strongpela brata i kam i stap long Kant, em wanpela taun i stap klostu long ples bilong mi.

Elizabeth Fot; Aksamai Sultanalieva

Elizabeth Fot em wanpela Witnes Bilong Jehova, na em tu i stap long Kant. Em i save samapim ol klos na salim. Em i wanpela savemeri tru bilong samapim ol klos, olsem na ol dokta na tisa i save putim oda na em i save wokim klos bilong ol. Wanpela kastama bilong Elizabeth em Aksamai Sultanalieva, na man bilong em i save wok long ofis bilong pablik prosikiuta. Taim Aksamai i kam baim ol klos long Elizabeth, em i givim planti askim long risen na yumi stap laip, na wanem samting i painim ol daiman. Elizabeth i save yusim Baibel long bekim olgeta askim bilong em. Bihain, Aksamai i kamap wanpela meri bilong givim bel long autim gutnius.

Nikolai Chimpoesh

Long dispela taim, Nikolai Chimpoesh long Moldova i mekim wok sekit, na em i mekim dispela wok klostu 30 yia. Em i save visitim ol kongrigesen, na tu, em i save oganaisim wok bilong kopim na tilim ol litresa. Ol bikman bilong gavman i save long wok bilong brata Nikolai, olsem na Eduard Varter i tokim em olsem: “Taim ol bikman bilong gavman i tromoi askim long yu, tokim ol stret olsem mipela i kisim ol litresa long hetkota long Bruklin. Lukluk stret long ai bilong bikman bilong KGB. Yu no ken pret.”—Mat. 10:19.

Tupela i toktok pinis na ol KGB i tokim Nikolai long i go long hetkota bilong ol long Kant. Nikolai i tok: “Bikman bilong KGB i askim long mipela i save kisim litresa bilong mipela long wanem hap. Mi tokim em olsem mipela i kisim long Bruklin. Em i no gat tok long mekim. Em i larim mi i go na em i no singautim mi  gen.” Ol Witnes i strongim bel na ol i was gut taim ol i autim gutnius long olgeta hap mipela i stap long en long not Kirgistan. Bihain long 1980, famili bilong mi i kisim save long tok i tru, na meri bilong mi Mairambubu em fes meri long kisim tok i tru.

KWIKTAIM MERI BILONG MI I LUKSAVE LONG TOK I TRU

Mairambubu em bilong Naryn, em wanpela hap long Kirgistan. Wanpela de long Ogas 1974, em i visitim liklik susa bilong mi long haus bilong em. Em ples mipela i bung long fes taim, na long dispela taim stret mi laikim em. Olsem na long seim de yet mitupela i marit.

Apun Mambetsadykova

Long Janueri 1981, Mairambubu i ron long bas bilong i go long maket na em i harim toktok i bin stap long kirap bilong atikol. Meri bilong mi i laik kisim sampela save moa, olsem na em i askim dispela meri i bin toktok long bas long givim nem na atres bilong em. Dispela meri i tokim meri bilong mi olsem nem bilong em Apun, tasol em i was gut bikos ol yia bihain long 1980, gavman i tambuim yet wok bilong ol Witnes. Em i no givim atres bilong em long meri bilong mi, tasol em i askim meri bilong mi long givim atres bilong mipela long em. Meri bilong mi i amamas tru taim em i kam long haus.

Mairambubu i tok: “Mi harim gutpela nius. Wanpela meri i tokim mi olsem klostu nau ol man bai i no dai moa. Na tu, ol wail animal i no inap pret long ol man.” Tasol mi pilim olsem dispela em wanpela stori nating. Olsem na mi tok: “Yumi wet na em yet bai kam na stori gut long yumi.”

Inap 3-pela mun bihain, Apun i visitim mipela. Em i wok long i go i kam long visitim mipela, na long dispela rot mipela i bungim ol sampela fes Witnes bilong Kirgistan. Ol dispela sista i skulim mipela long Jehova na ol samting em i tingting pinis long kamapim. Ol i yusim buk From Paradise Lost to Paradise Regained long stadi wantaim mipela. * I gat wanpela kopi tasol bilong dispela buk long tokples Tokmok, olsem na mipela i raitim olgeta tok bilong en olsem kopi bilong mipela.

Fes samting mipela i kisim save long en, em tok profet long Stat 3:15. Dispela tok profet bai kamap tru long rot bilong Jisas, em man God i makim olsem King Mesaia. Dispela em bikpela tok i tru we olgeta man i mas save long en! Olsem na mipela i amamas long tokaut long dispela samting. (Mat. 24:14) I no longtaim, tok bilong Baibel i senisim laip bilong mipela.

MITING NA BAPTAIS TAIM I GAT TAMBU

Wanpela brata long Tokmok i invaitim mipela long i go long wanpela weding. Long dispela taim, mi na meri bilong mi i luksave olsem pasin bilong ol Witnes i narapela kain. Ol i no dring bia long taim bilong weding, olsem na bung bilong weding i kamap gut stret. Dispela i narapela kain long ol narapela weding em mitupela i save go long en, ol  manmeri i save dring spak, mekim nabaut, na mekim ol tok nogut.

Mipela i go tu long sampela miting long kongrigesen long Tokmok. Ol i save mekim ol dispela miting aninit long ol diwai taim weda i gutpela. Ol bratasista i save olsem ol polis i save painim mipela, olsem na wanpela brata i save redi na spai long ol polis. Long taim bilong kol, mipela i save mekim miting insait long haus. Inap 2-pela taim ol polis i kam long haus na askim long mipela i mekim wanem. Taim mitupela Mairambubu i kisim baptais long Julai 1982 long Wara Chüy, mipela i mas was gut. (Mat. 10:16) Sampela bratasista tasol i kam na mipela i bung long bikbus na i singim ol singsing bilong Kingdom, na harim tok bilong baptais.

ROT I OP LONG MEKIM BIKPELA WOK BILONG AUTIM TOK

Long 1987, wanpela brata i askim mi long i go visitim wanpela man i gat gutpela bel husat i stap long taun Balykchy. Mi kalap long tren na ron inap 4-pela aua na kamap long dispela taun. Sampela taim bihain long mipela i go autim tok long dispela taun, mipela i luksave olsem planti manmeri i gat gutpela bel. Dispela i kamapim klia olsem rot i op long mipela i ken mekim bikpela wok moa long autim tok.

Planti taim mi na Mairambubu i save i go long Balykchy, mipela i stap long ol wiken, na autim tok, na mekim ol miting. Ol manmeri long dispela hap i laikim tru ol pablikesen bilong mipela. Mipela i save kisim ol pablikesen long Tokmok na putim long wanpela beg bilong pulimapim ol poteto (Mishok), na kisim i go long Balykchy. Mipela i save pulimapim ol pablikesen long 2-pela beg long olgeta wan wan mun na karim i go, tasol ol dispela nius i no inap long olgeta man. Na tu, mipela i save autim tok long ol pasindia long tren taim mipela i save go i kam long Balykchy.

Long 1995, kongrigesen i kamap long Balykchy, em 8-pela yia bihain long mipela i go autim tok long dispela taun. Long ol yia mipela i go i kam long Tokmok na Balykchy, mipela i tromoi bikpela mani. Mipela i no gat planti mani, olsem na oltaim wanpela brata i save givim mani bilong helpim mipela long mekim wok. Jehova i save olsem mipela i laik mekim bikpela wok moa bilong autim tok, olsem na em i “givim planti gutpela samting” long mipela. (Mal. 3:10) Tru tumas, Jehova inap mekim olgeta samting!

BISI LONG FAMILI NA WOK AUTIM TOK

Long 1992, ol i makim mi long kamap elda, olsem na mi namba 1 man long kamap elda long Kirgistan. Rot i op long mekim bikpela wok moa long kongrigesen bilong mipela long Tokmok. Mipela i stadi wantaim planti asples sumatin long wanpela skul. Long nau, wanpela bilong ol Baibel sumatin i mekim wok olsem Brens Komiti, na narapela 2-pela i mekim wok olsem painia salim. Na tu, mipela i save helpim ol narapela long ol miting bilong mipela. Long 1992 samting, mipela i save yusim ol pablikesen long tokples Rasia na mekim ol miting. Tasol planti long kongrigesen i save mekim tokples Kirgistan. Olsem na mi save trensletim ol tok bilong pablikesen, na dispela i helpim ol long kisim gut tok i tru.

Mi na meri bilong mi wantaim 8-pela pikinini long 1989

Mi na Mairambubu i bisi tu long lukautim ol pikinini bilong mipela. Mipela i save kisim ol pikinini i go long autim tok na long ol miting. Gulsayra em pikinini meri bilong mipela, na taim em i gat 12 krismas,  em i save autim tok bilong Baibel long ol manmeri i save wokabaut i go i kam. Ol pikinini bilong mipela i save laik tru long tingim gut ol hap tok bilong Baibel. Olsem na ol pikinini bilong mipela na ol tumbuna pikinini i givim bel tru long mekim wok bilong kongrigesen. Mipela i gat 9-pela pikinini na 11-pela bubu, na 16 bilong ol i mekim wok bilong Jehova o i save go long miting wantaim papamama bilong ol.

OL BIKPELA SENIS

Ol bratasista husat i kirapim wok autim tok long ol yia bihain long 1950 long Kirgistan, ol bai kirap nogut long lukim ol bikpela senis. Long ol yia bihain long 1990, mipela i gat fridom long autim gutnius na bung wantaim long ol miting.

Mi na meri bilong mi i autim tok

Long 1991, mi na meri bilong mi i go long namba 1 kibung bilong mipela long Alma-Ata (nau ol i kolim Almaty) long Kasakstan. Long 1993, ol brata long Kirgistan i stretim rot na mipela i mekim fes kibung long Spartak Stediam long biktaun Bishkek. Ol bratasista i klinim stediam inap 1-pela wik olgeta paslain long taim bilong kibung. Dairekta bilong stediam i amamas tru na em i no sasim mipela long yusim ples kibung.

Long 1994, mipela i kisim gutpela presen tru taim ol i prinim ol pablikesen long tokples Kirgistan. Nau ol i save trensletim ol pablikesen bilong mipela long brens ofis long biktaun Bishkek. Long 1998, gavman bilong Kirgistan i tok orait long wok bilong ol Witnes. Oganaisesen i wok long i go bikpela moa, olsem na namba bilong ol pablisa long Kirgistan em winim 5 tausen. Long nau, mipela i gat 83 kongrigesen na 25 grup long narapela narapela tokples, em tok Inglis, Kirgistan, Rasia, Saina, Tokples Sain Bilong Rasia, tok Teki, Uighur, na Uzbek. Maski olgeta dispela bratasista i bilong narapela narapela ples na ol i gat narapela narapela sindaun, olgeta i pas gut wantaim na mekim wok bilong Jehova. Jehova yet i mekim na olgeta dispela bikpela senis i kamap.

Na tu, Jehova i senisim laip bilong mi. Famili bilong mi i save wok leba, na mi skul inap 5-pela yia tasol. Maski i olsem, Jehova i yusim mi long mekim wok elda na skulim ol man long tok i tru bilong Baibel, em ol man i go long bikpela skul winim mi. Tru tumas, Jehova i save mekim ol narakain samting tru. Ekspiriens bilong mi yet i kirapim mi long wok yet long tokaut long wok bilong Jehova, em man husat “inap mekim olgeta samting.”—Mat. 19:26.

^ par. 21 Ol Witnes Bilong Jehova i bin wokim, tasol long nau ol i no wokim moa.