Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Wastaua—Stadi Edisen  |  Februeri 2017

Jehova i Lidim Ol Manmeri Bilong Em

Jehova i Lidim Ol Manmeri Bilong Em

“Mi Bikpela, oltaim bai mi was gut na stiaim wokabaut bilong yupela.”—AIS. 58:11.

OL SINGSING: 3, 4

1, 2. (a) Olsem wanem ol man i lidim ol Witnes Bilong Jehova i narapela kain long ol lida bilong ol narapela lotu? (b) Long dispela stadi na long neks stadi, yumi bai stori long wanem samting?

“HUSAT em lida bilong yupela?” Ol manmeri i save givim dispela askim long ol Witnes Bilong Jehova. Yumi no kirap nogut long dispela askim! Planti lotu i gat wanpela man o meri i stap olsem lida bilong ol. Tasol yumi amamas long tokim ol narapela olsem Lida bilong yumi em i no wanpela sinman long graun. Yumi stap aninit long wok bos bilong Krais, husat i kirap bek pinis, na em i stap aninit long wok bos bilong Papa bilong em, Jehova.—Mat. 23:10.

2 Tasol i gat wanpela lain i stap nau long graun, em “gutpela wokboi i gat savetingting,” na dispela lain i lidim ol manmeri bilong God. (Mat. 24:45) Olsem wanem yumi inap save tru olsem Jehova i lidim yumi long rot bilong Pikinini bilong em? Long dispela stadi na long neks stadi, yumi bai stori long olsem wanem inap planti tausen yia Jehova i yusim ol man bilong graun long lidim ol manmeri bilong em. Ol dispela atikol bai stori long 3-pela evidens i soim olsem Jehova i stiaim ol dispela man, na dispela i kamapim klia olsem bipo—na long nau tu—em i stap Lida bilong ol manmeri bilong em.—Ais. 58:11.

HOLI SPIRIT I STRONGIM OL

3. Olsem wanem Moses inap lidim lain Israel?

3 Holi spirit i strongim ol mausman bilong God. Tingim Moses —God i makim em long kamap lida bilong ol Israel. Olsem wanem em inap mekim dispela bikpela wok? Jehova i “larim spirit bilong en i stap wantaim [Moses].” (Ritim Aisaia 63:11-14.) Long dispela rot, Jehova yet i lidim ol manmeri bilong em.

4. Olsem wanem ol Israel inap luksave olsem spirit bilong God i stap wantaim Moses? (Lukim piksa long kirap bilong stadi.)

4 Holi spirit em strong bilong God na lain Israel i no inap lukim dispela strong long ai tru bilong ol, olsem na hau bai ol inap save olsem holi spirit i stap wantaim Moses? Holi spirit i strongim Moses long wokim ol mirakel na autim nem bilong God long Fero. (Kis. 7:1-3) Na tu, holi spirit i helpim Moses long kamapim ol gutpela pasin, olsem pasin laikim, pasin daun, na pasin bilong i no les kwik, na ol dispela pasin i helpim Moses long lidim lain Israel. Pasin bilong Moses i narapela kain tru long pasin bilong ol lida bilong ol narapela kantri em ol i tingim ol yet tasol! (Kis. 5:2, 6-9) Ol manmeri inap luksave olsem Jehova i makim Moses long kamap lida bilong lain bilong Em.

5. Olsem wanem Jehova i strongim ol man Israel em i makim long lidim lain bilong em?

5 Bihain, holi spirit bilong Jehova i strongim ol narapela man em i makim long lidim lain bilong em. “God i givim Josua, pikinini bilong Nun, planti gutpela save na tingting.” (Lo 34:9) “Spirit bilong Bikpela i kam i stap long Gideon.” (Het. 6:34) “Spirit bilong Bikpela i kam i stap strong long [Devit].” (1 Sml. 16:13) Ol dispela man i larim spirit bilong God i helpim ol, na dispela spirit i strongim ol long mekim ol samting em ol i no inap mekim long strong bilong ol yet. (Jos. 11:16-18; Het. 7:7, 22; 1 Sml. 17:37, 50) Olsem na i stret long Jehova i kisim biknem long wok ol dispela man i mekim.

6. Wai na God i laik bai ol manmeri bilong em i mas rispektim ol lida bilong Israel?

6 Lain Israel i luksave olsem God i yusim holi spirit long strongim ol dispela man, olsem na lain Israel i mas mekim wanem? Taim ol manmeri i komplein long wok lida bilong Moses, Jehova i tok: “Planti taim ol dispela lain manmeri i sakim tok bilong mi.” (Nam. 14:2, 11) Tru tumas, Jehova i stap Lida na em i makim Moses, Josua, Gideon, na Devit long stap olsem mausman bilong em. Taim ol manmeri i bihainim tok bilong ol dispela man, i olsem ol i bihainim tok bilong Jehova, em Lida bilong ol.

OL ENSEL I HELPIM OL

7. Olsem wanem ol ensel i helpim Moses?

7 Ol ensel i helpim ol mausman bilong God. (Ritim Hibru 1:7, 14.) Jehova i yusim ol ensel long givim wok long Moses, redim em, na stiaim em. God i salim Moses “i go olsem hetman na man bilong kisim bek [lain Israel]. God i mekim olsem long rot bilong dispela ensel i bin kamap long liklik nil diwai.” (Apo. 7:35) Jehova i givim Lo “long ol ensel” na ol i givim long Moses, na Moses i skulim lain Israel long dispela Lo. (Gal. 3:19) Jehova i tokim Moses: “Yu go nau na kisim ol manmeri i go long dispela ples mi tokim yu long en. Harim. Ensel bilong mi bai i bringim yupela long rot.” (Kis. 32:34) Baibel i no stori olsem dispela ensel i tanim kamap man na i mekim ol dispela wok na ol Israel i lukim em, nogat. Wei bilong Moses long skulim na stiaim ol manmeri i soim klia olsem ensel bilong God i helpim em.

8. Olsem wanem ol ensel i helpim Josua na Hesekia?

8 Taim Josua i kisim ples bilong Moses na kamap lida, “kepten bilong ami bilong Bikpela” i strongim em long lidim lain bilong God na i go pait long ol Kenan; na lain Israel i winim pait. (Jos. 5:13-15; 6:2, 21) Bihain, ol ami bilong Asiria i laik bagarapim Jerusalem, na dispela i putim bikpela presa long King Hesekia. Long nait, “wanpela ensel  bilong Bikpela i go long kem bilong ol Asiria na i kilim i dai 185,000 soldia.”—2 Kin. 19:35.

9. Ol mausman bilong God i save popaia, olsem na yu ting i stret long lain Israel i sakim tok bilong ol? Stori long dispela.

9 Ol ensel i gutpela olgeta, na ol i sambai long ol sinman husat i mekim wok lida. Wanpela taim Moses i popaia na em i no litimapim nem bilong Jehova. (Nam. 20:12) Josua i no kisim tingting bilong God paslain long em i mekim kontrak wantaim lain Gibeon. (Jos. 9:14, 15) Sampela yia bihain Hesekia i “bikhet na i no tenkyu long Bikpela.” (2 Sto. 32:25, 26) Maski ol dispela man i no gutpela olgeta, God i laik bai lain Israel i mas bihainim tok bilong ol. Jehova i yusim ol ensel long helpim ol dispela man. Yes, Jehova i lidim lain bilong em.

TOK BILONG GOD I STIAIM OL

10. Olsem wanem Lo Bilong God i stiaim Moses?

10 Tok Bilong God i stiaim ol mausman bilong God. Moses i skulim lain Israel long ol tok bilong Lo, na Baibel i kolim dispela lo olsem “Lo Bilong Moses.” (1 Kin. 2:3, NW) Tasol Baibel i tok Jehova yet i givim dispela Lo, na Moses i stap daun long dispela Lo. (2 Sto. 34:14) Jehova i tokim Moses long olsem wanem em bai wokim haus sel, na “Moses i harim dispela tok na em i mekim olgeta samting olsem Bikpela i bin tokim em.”—Kis. 40:1-16.

11, 12. (a) God i laik bai Josua na ol king bilong Israel i mas mekim wanem? (b) Tok Bilong God i mekim wanem long ol man i lidim lain bilong God?

11 Taim Josua i kirap long lidim ol manmeri bilong God, em yet i raitim kopi bilong Tok Bilong God. God i tokim Josua olsem: “Yu mas ritim isi long san na long nait, bambai yu ken was gut na bihainim olgeta tok i stap long dispela lo.” (Jos. 1:8, NW) Bihain, ol king i lidim ol manmeri bilong God na ol tu i mekim wankain samting. Long olgeta de, ol i mas ritim buk i gat dispela Lo, raitim kopi bilong en, na “bihainim tru olgeta lo na tok bilong God i stap long dispela buk.”—Ritim Lo 17:18-20.

12 Tok Bilong God i mekim wanem long ol man i mekim wok olsem lida? Tingim stori bilong King Josaia. Taim ol man i lukim buk i gat Lo Bilong Moses long en, kuskus bilong Josaia i ritim na Josaia i putim yau. * “Taim king i harim tok bilong lo bilong God i stap insait long dispela buk, orait em i bel hevi tru na i brukim klos bilong en.” Tasol king i mekim sampela samting moa. Tok Bilong God i stiaim Josaia na em i mekim bikpela wok long rausim ol god giaman na stretim rot long mekim bikpela bung bilong Pasova—dispela bung i winim ol narapela bung bilong Pasova ol i mekim long bipo. (2 Kin. 22:11; 23:1-23) Tok Bilong God i stiaim Josaia na ol narapela lida, olsem na ol i redi long kamapim ol senis na skulim gut ol manmeri long Tok Bilong God. Ol dispela senis i kirapim lain bilong God long bipo long bihainim laik bilong Em.

13. Olsem wanem ol lida bilong ol manmeri bilong God i narapela kain long ol lida bilong ol lain haiden?

13 Ol king bilong lain Israel i narapela kain tru long ol lida bilong ol narapela kantri. Ol lida bilong ol narapela kantri i bihainim tingting bilong ol yet na ol i no skelim ol samting bai kamap long bihain! Ol lida bilong Kenan i larim ol manmeri i mekim ol stingpela pasin: ol i mekim pasin sem wantaim wanblut bilong ol yet, man i slip wantaim man na meri i slip wantaim meri, ol i mekim pasin sem wantaim ol animal, kukim ol pikinini long paia olsem ofa, na lotuim ol god giaman. (Wkp. 18:6, 21-25) Ol lida bilong Babilon na Isip i no stiaim ol manmeri long bihainim ol lo bilong i stap klin long bodi na lukautim gut helt bilong ol. (Nam. 19:13) Tasol ol lida bilong ol manmeri bilong God long bipo i strong long ol manmeri i mas bihainim klinpela pasin na stap klin long bodi na long sait  bilong lotu. Dispela i soim klia olsem Jehova i lidim ol manmeri bilong em.

14. Bilong wanem Jehova i givim strongpela tok bilong stretim sampela man husat i lidim lain bilong em?

14 I no olgeta king i bosim ol manmeri bilong God long bipo i bihainim ol lo bilong God. Ol i sakim tok bilong Jehova taim ol i no laik kisim helpim long holi spirit, ol ensel, na Tok Bilong God. Olsem na sampela taim Jehova i givim strongpela tok bilong stretim ol, na sampela taim em i makim narapela man long kisim ples bilong ol na kamap lida. (1 Sml. 13:13, 14) Bihain, God i makim wanpela man long kamap lida, na dispela man i winim tru olgeta narapela man husat i bin stap lida.

JEHOVA I MAKIM LIDA I GUTPELA OLGETA

15. (a) Olsem wanem ol profet i kamapim klia olsem wanpela lida bai kamap na em bai winim tru olgeta narapela lida long graun? (b) Husat dispela lida ol tok profet i stori long em?

15 Inap planti handret yia, Jehova i tok profet olsem em bai makim wanpela nupela lida bilong ol manmeri bilong Em—dispela man bai narapela kain tru long olgeta narapela man. Moses i tokim lain Israel olsem: “God, Bikpela bilong yupela, em bai i makim wanpela brata bilong yupela na mekim em i kamap profet olsem mi yet. Na yupela i mas bihainim tok bilong en.” (Lo 18:15) Aisaia i tok profet olsem dispela Man bai kamap “bikman na . . . bosim ol manmeri.” (Ais. 55:4) Daniel i tok profet long kam bek bilong “bikman God i bin makim.” (Dan. 9:25) Bihain, Jisas Krais i tokaut olsem em i “Lida” bilong ol manmeri bilong God. (Ritim Matyu 23:10.) Ol disaipel bilong Jisas i amamas long bihainim em, na ol i bilip tru olsem Jehova i makim em. (Jon 6:68, 69) Wanem samting i kirapim ol long bilip tru olsem Jisas Krais em man Jehova i makim long lidim ol manmeri bilong em?

16. Wanem samting i soim olsem holi spirit i strongim Jisas?

16 Holi spirit i strongim Jisas. Taim Jisas i kisim baptais, Jon Bilong Baptais i lukim “skai i op na holi spirit i kam daun long em olsem wanpela pisin balus.” Bihain, “holi spirit i kirapim em long go long ples nating.” (Mak 1:10-12) Long laip olgeta bilong Jisas long graun, holi spirit i strongim em long wokim ol mirakel na wei bilong em long toktok i soim klia olsem God i givim namba long em. (Apo. 10:38) Na tu, holi spirit i stiaim Jisas long kamapim ol gutpela pasin, olsem pasin laikim, pasin bilong amamas, na strongpela bilip. (Jon 15:9; Hib. 12:2) I no gat narapela lida inap mekim olsem. Jisas em man Jehova i makim.

Olsem wanem ol ensel i helpim Jisas bihain long em i kisim baptais? (Lukim paragraf 17)

17. Ol ensel i mekim wanem bilong helpim Jisas?

17 Ol ensel i helpim Jisas. Bihain tasol long Jisas i kisim baptais, “ol ensel i kam na helpim [em].” (Mat. 4:11) Sampela aua paslain long ol i kilim Jisas i dai, “wanpela ensel i kam long heven na strongim em.” (Luk 22:43) Jisas i bilip tru olsem Jehova bai  salim ensel i kam helpim em sapos em i nidim helpim long inapim laik bilong God.—Mat. 26:53.

18, 19. Olsem wanem Tok Bilong God i stiaim Jisas long ol samting em i mekim na wok tisa bilong em?

18 Tok Bilong God i stiaim Jisas. Taim Jisas i kirap long mekim wok autim tok, em i larim Tok Bilong God i stiaim em. (Mat. 4:4) Em i bihainim Tok Bilong God i go inap long em i dai long diwai pos. Paslain long Jisas i dai, em i kolim gen ol tok profet i makim ol samting bai kamap long Mesaia. (Mat. 27:46; Luk 23:46) Tasol ol lida bilong lotu i sakim Tok Bilong God taim tok bilong Em i pait wantaim bilip bilong ol. Jisas i kolim gen tok bilong Jehova em profet Aisaia i kamapim. Jisas i tok: “Ol dispela manmeri i save onarim mi long maus, tasol bel bilong ol i stap longwe long mi. Ol i lotu nating long mi, long wanem, ol samting ol i skulim ol man long en em tok bilong ol man tasol.” (Mat. 15:7-9) Yu ting Jehova inap makim wanpela bilong ol dispela man long lidim ol manmeri bilong em?

19 Jisas i larim Tok Bilong God i stiaim pasin bilong em na wok tisa bilong em. Em i gat bikpela savetingting, tasol taim ol lida bilong lotu i laik tok pait wantaim em, em i no yusim tingting na save bilong em yet, nogat. Oltaim em i kolim Tok Bilong God long bekim tok bilong ol dispela lida. (Mat. 22:33-40) Taim em i mekim wok tisa, em i no save stori nating long laip bilong em long heven, na olsem wanem em i helpim Papa long mekim ol samting long ples antap na long graun. Taim em i skulim ol man, “em i mekim na tingting bilong ol i op tru na ol inap kliagut long mining bilong ol Rait Holi.” (Luk 24:32, 45) Jisas i laikim tru Tok Bilong God, na em i amamas long autim dispela tok long ol narapela.

20. (a) Olsem wanem Jisas i soim olsem em i stap daun long God? (b) Pasin bilong Jisas na Herot Agripa Namba 1 i soim olsem Jehova i laikim wanem kain man long i stap lida?

20 Ol manmeri i kirap nogut long “ol gutpela tok” Jisas i autim, tasol em i kamapim klia olsem ol dispela tok i kam long Tisa bilong em, Jehova. (Luk 4:22) Taim wanpela maniman i laik givim glori long Jisas na kolim em “Gutpela Tisa,” long pasin daun Jisas i tokim em: “Bilong wanem yu kolim mi gutpela? I no gat wanpela man i gutpela, God wanpela tasol i gutpela.” (Mak 10:17, 18) Pasin bilong Jisas i narapela kain tru long pasin bilong Herot Agripa Namba 1, em man i kamap king na bosim Judia inap olsem 8-pela yia bihain! Long wanpela bikpela de, Herot i “pasim ol klos bilong king.” Taim em i toktok, ol manmeri i singaut na tok: “Em nek bilong wanpela god, i no bilong wanpela man!” Herot i laik kisim biknem. Wanem samting i kamap? “Herot i no givim glori long God, olsem na wantu ensel bilong Jehova i mekim save long em na planti liklik snek i pulap long em na em i dai.” (Apo. 12:21-23) Man i gat gutpela tingting bai luksave olsem Jehova i no makim Herot long i stap lida. Tasol ol samting Jisas i mekim i soim klia olsem God yet i makim em, na oltaim em i givim glori long Jehova olsem Nambawan Lida bilong ol manmeri bilong em.

21. Yumi bai skelim wanem ol askim long neks stadi?

21 Wok bilong Jisas olsem lida i no bilong sampela yia tasol, nogat. Bihain long Jisas i kirap bek, em i tok: “God i givim mi namba long bosim olgeta samting long heven na long graun . . . Na harim! Mi stap wantaim yupela olgeta de i go inap long pinis bilong dispela taim.” (Mat. 28:18-20) Tasol Jisas i stap long heven na em i gat spirit bodi, olsem na hau bai em i lidim ol manmeri bilong God long graun? Jehova bai yusim husat long wok aninit long wok bos bilong Krais na lidim ol manmeri bilong Em? Olsem wanem bai ol Kristen inap luksave long ol man i stap olsem ol mausman bilong God? Neks stadi bai bekim ol dispela askim.

^ par. 12 Ating Moses yet i raitim dispela buk.