Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Wastaua—Stadi Edisen  |  Februeri 2017

Tupela painia, George Rollston na Arthur Willis, i pulimapim wara long redieta bilong kar.—Noten Teritori, 1933

 HISTORI BILONG YUMI

“I No Gat Rot i Raf Tumas o Longpela Tumas”

“I No Gat Rot i Raf Tumas o Longpela Tumas”

LONG MAS 26, 1937, 2-pela man i draivim wanpela kar em das i karamapim na ol i go kamap long Sydney, Australia. Tupela i taiet stret. Tupela i bin lusim Sydney inap 1-pela yia i go pinis, na tupela i bin raun long ol hap i stap longwe tru long biktaun. Tupela i raun winim 19,300 kilomita. Tupela i no raun long painimaut ol nupela samting o raun long kisim amamas. Dispela 2-pela man em Arthur Willis na Bill Newlands. Tupela i mekim wok painia na givim bel tru long bringim gutnius bilong Kingdom Bilong God i go long kantri sait bilong Australia.

Long 1928 samting, liklik lain Sumatin Bilong Baibel * long Australia i autim tok pinis long ol taun i stap klostu long nambis. Wan wan manmeri tasol i stap long ol ples i stap longwe long taun—sapos yumi brukim graun bilong Amerika long 2-pela hap, wanpela hap i wankain long sais bilong kantri sait bilong Australia. Tasol ol brata i luksave olsem ol disaipel bilong Jisas i mas i go “long olgeta hap bilong graun” na tokim ol manmeri long Jisas, olsem na ol i mas autim tok tu long kantri sait bilong Australia. (Apo. 1:8) Tasol hau bai ol inap mekim dispela bikpela wok? Ol i bilip tru olsem Jehova bai blesim wok bilong ol, olsem na ol i tingting strong long mekim gut dispela wok.

OL PAINIA I KIRAPIM WOK

Long 1929, ol kongrigesen long Queensland na Westen Australia i wokim ol kar we ol inap yusim long autim tok long kantri sait. Ol painia husat inap raun long ol rot nogut na stretim kar, ol i yusim ol dispela kar. Ol i raun autim tok long planti ples em bipo i no gat Witnes i go long en.

Ol painia husat i no gat kar, ol i yusim baisikol na i go long ol longwe ples. Wanpela bilong ol em Bennett Brickell husat i gat 23 krismas. Long 1932, em i lusim Rockhampton, Queensland, na ron long baisikol i go long hap not bilong Queensland, na em i autim tok long dispela hap inap 5-pela mun. Antap long baisikol, em i karim ol blanket, ol klos, kaikai, na planti buk. Taim taia bilong baisikol i flet, em i bilip olsem Jehova  bai lukautim em, olsem na em i autim tok i go yet. Em i pusim baisikol inap 320 kilomita na em i go olsem long ol hap em bipo ol manmeri i dai bikos i no gat wara. Inap 30 yia olgeta, Brata Brickell i raun inap planti handret tausen kilomita long olgeta hap bilong Australia long rot bilong baisikol, motobaik, na kar. Em i autim tok long ol lain Aborijini na kamapim ol nupela kongrigesen. Planti manmeri long kantri sait bilong Australia i save gut long em na rispektim em.

WINIM OL HATWOK

Graun long Australia i bikpela tru, tasol namba bilong ol manmeri i stap long en i no bikpela, na wan wan manmeri tasol i stap long kantri sait. Olsem na lain bilong Jehova i wok strong long painim ol manmeri i stap nabaut long ol kantri sait.

Stuart Keltie na William Torrington em 2-pela painia husat i mekim olsem. Long 1933, tupela i katim namel long Simpson Deset na i go autim tok long Alice Springs, em taun i stap long senta bilong Australia. Brata Keltie i yusim giaman lek ol i wokim long diwai. Taim liklik kar bilong ol i bagarap, Brata Keltie i yusim kamel na mekim yet wok autim tok! Wok autim tok bilong ol painia i karim kaikai taim ol i bungim maneja bilong hotel long William Creek, em bas stop bilong ol tren. Dispela man em Charles Bernhardt. Bihain em i kisim tok i tru na salim hotel bilong em, na em i mekim wok painia inap 15 yia, na em i autim tok long ol ples drai na long ol ples i stap longwe tru long biktaun.

Arthur Willis i redi long i go autim tok long bikpela kantri sait bilong Australia.—Perth, Westen Australia, 1936

Ol painia long dispela taim bipo i mas strongim bel na holim strongpela tingting bambai ol inap winim ol hevi i painim ol. Wanpela taim Arthur Willis na Bill Newlands i raun na autim tok long kantri sait, na inap 2-pela wik ol i hatwok tru long draivim kar inap 32 kilomita bikos bikpela ren i mekim ples drai i kamap malumalum olgeta. Sampela taim, san i hot tru na tupela i tuhat wantaim na pusim kar i go antap long ol liklik maunten, na go olsem long ples daun i gat ol traipela ston, na ol i mas brukim ol wara i gat wesan long en. Planti taim kar i save bagarap, na tupela i save wokabaut o ron long baisikol inap sampela de na go kamap long taun i stap klostu na wet inap sampela wik long kisim ol speapat bilong stretim kar. Maski ol kain hevi olsem i painim ol, ol i holim yet stretpela tingting. Arthur Willis i kolim gen wanpela hap tok i bin kamap long nius The Golden Age, na em i tok: “I no gat rot i raf tumas o longpela tumas long ol witnes bilong Em.”

Charles Harris i mekim wok painia inap planti yia na em i tok, taim em i stap wanpis na ol hevi i painim em, dispela i kirapim em long i go klostu moa long Jehova. Em i tok: “Yu bai stap fri long mekim planti wok moa sapos yu holim liklik kago tasol. Sampela taim Jisas i slip ausait, olsem na long asainmen yumi stap long en, yumi tu i mas redi long mekim olsem.” Planti painia i bin mekim olsem. Gutpela wok bilong ol i mekim na gutnius i go long olgeta hap bilong Australia, na dispela i helpim planti manmeri long sapotim Kingdom Bilong God.

^ par. 4 Ol Sumatin Bilong Baibel i kisim nem olsem ol Witnes Bilong Jehova long 1931.—Ais. 43:10.