“Yupela i mas tingim ol man husat i go pas long yupela.” —HIB. 13:7.

OL SINGSING: 123 [42], 126 [13]

1, 2. Taim Jisas i lusim ol aposel na i go antap long heven, ating ol aposel i gat wanem askim?

OL DISAIPEL bilong Jisas i sanap long Maunten Oliv na lukluk i go antap long skai. Ol i lukim pren na bosman bilong ol, Jisas, i go antap na klaut i haitim em. (Apo. 1:9, 10) Inap olsem 2-pela yia, Jisas i bin skulim ol, strongim ol, na lidim ol. Nau em i lusim ol na i go. Ol bai mekim wanem?

2 Jisas i tokim ol disaipel: “Yupela bai stap witnes bilong mi long Jerusalem na long olgeta hap bilong Judia na Samaria, na i go inap long olgeta hap bilong graun.” (Apo. 1:8) Hau bai ol disaipel inap mekim dispela wok? Jisas i promisim ol olsem ol bai kisim holi spirit. (Apo. 1:5) Tasol ol i mas autim tok long olgeta hap bilong graun, olsem na ol i nidim wanpela long stiaim na oganaisim wok ol i mekim. Long bipo, Jehova i yusim ol mausman bilong em hia long graun long stiaim na oganaisim ol manmeri bilong em. Olsem na taim Jisas i lusim ol aposel, ating ol i gat dispela askim, ‘Jehova bai makim nupela lida?’

3. (a) Bihain long Jisas i go long heven, ol aposel i mekim wanem bikpela disisen? (b) Long dispela stadi, yumi bai skelim wanem ol askim?

 3 Bihain tasol long Jisas i lusim ol disaipel, ol i skelim ol tok bilong Rait Holi, beten askim God long stiaim ol, na ol i makim Matias long kisim ples bilong Judas Iskariot na kamap namba 12 aposel. (Apo. 1:15-26) Bilong wanem wok bilong makim namba 12 aposel i bikpela samting long ol disaipel na Jehova? Matias bai mekim bikpela wok insait long oganaisesen bilong God. * Jisas i no bin makim ol aposel long raun nating wantaim em long wok autim tok, nogat. Em i trenim ol long mekim bikpela wok tru namel long ol manmeri bilong God. Ol bai mekim wanem wok? Olsem wanem Jehova i yusim Jisas long redim ol disaipel long mekim dispela wok? Olsem wanem ol manmeri bilong God long nau i stiaim na oganaisim wok bilong ol? Olsem wanem yumi inap “tingim ol man husat i go pas” long yumi long nau, na moa yet em ol man i stap olsem “gutpela wokboi i gat savetingting”?—Hib. 13:7; Mat. 24:45.

JISAS I STAP LIDA BILONG OL MAN

4. Ol aposel na ol narapela hetman i bin mekim wanem wok?

4 Long Pentikos 33 C.E., ol aposel i go pas long lidim kongrigesen Kristen. Long dispela taim, “Pita i sanap wantaim 11-pela aposel” na autim tok i tru long planti manmeri bilong Juda na ol man i bin joinim lotu Juda. (Apo. 2:14, 15) Planti bilong ol i kisim tok i tru. Bihain long Pentikos, ol dispela nupela Kristen i “wok yet long putim tingting bilong ol i go long ol tok bilong ol aposel.” (Apo. 2:42) Ol aposel i lukautim mani bilong kongrigesen. (Apo. 4:34, 35) Ol i lukautim ol manmeri bilong God long sait bilong bilip, na ol i tok: “Mipela i mas wok oltaim long beten na skulim ol manmeri long tok bilong God.” (Apo. 6:4) Ol i makim ol Kristen husat i stap strong long bilip na salim ol i go autim tok long ol nupela teritori. (Apo. 8:14, 15) Bihain, ol narapela hetman i wok bung wantaim ol aposel long dairektim wok bilong ol kongrigesen. Ol i stap olsem gavening bodi na stiaim wok bilong ol kongrigesen.—Apo. 15:2.

5, 6. (a) Holi spirit i strongim gavening bodi long mekim wanem? (Lukim piksa long kirap bilong stadi.) (b) Olsem wanem ol ensel i helpim gavening bodi? (c) Olsem wanem Tok Bilong God i stiaim gavening bodi?

5 Ol Kristen long taim bilong ol aposel i luksave olsem God Jehova i yusim Lida bilong ol, Jisas, long stiaim gavening bodi. Olsem wanem ol inap luksave long dispela? Namba 1: Holi spirit i strongim gavening bodi. (Jon 16:13) God i givim holi spirit long olgeta Kristen em i anointim, na holi spirit i helpim tru ol aposel na ol hetman long Jerusalem long mekim gut wok bilong ol olsem ol wasman. Long 49 C.E., holi spirit i stiaim gavening bodi long mekim disisen bilong stretim tok pait i kamap long sait bilong katim skin. Ol kongrigesen i bihainim tok bilong gavening bodi na ol “i kamap strong moa long bilip, na long olgeta de ol i wok long i go bikpela.” (Apo. 16:4, 5) Taim gavening bodi i salim pas bilong toksave long disisen ol i mekim, dispela pas i soim olsem gavening bodi i bihainim ol pasin em holi spirit i kamapim, olsem pasin laikim na bilip.—Apo. 15:11, 25-29; Gal. 5:22, 23.

6 Namba 2: Ol ensel i helpim gavening bodi. Kornilius em i no man Israel, olsem na em i no bin katim skin. Paslain long Kornilius i kisim baptais na kamap Kristen, wanpela ensel i tokim em long salim tok long aposel Pita bai kam lukim em. Bihain long Pita i autim tok long Kornilius na ol wanblut bilong em, holi spirit i kam daun long ol maski ol i no bin katim skin. Dispela i kirapim ol aposel  na ol arapela Kristen long bihainim laik bilong God na orait long ol manmeri bilong ol narapela lain tu long joinim kongrigesen Kristen. (Apo. 11:13-18) Ol ensel i wok strong long sapotim wok autim tok em gavening bodi i go pas long en. (Apo. 5:19, 20) Namba 3: Tok Bilong God i stiaim gavening bodi. Ol hetman i save bihainim Tok Bilong God taim ol i stretim tok long sait bilong bilip o ol i givim tok bilong stiaim oganaisesen.—Apo. 1:20-22; 15:15-20.

7. Bilong wanem yumi inap tok olsem Jisas i bin lidim ol Kristen bilong pastaim?

7 Long taim bilong ol aposel, gavening bodi i holim namba bilong mekim wok bos, tasol ol i tingim Jisas olsem Lida bilong ol. Aposel Pol i tok: “Em [Krais] i givim sampela man olsem ol aposel . . . . Long rot bilong pasin laikim yumi mas kamap olsem man i bikpela pinis long olgeta samting na stap aninit long man husat i stap het, em Krais.” (Efe. 4:11, 15) Ol disaipel i no kisim nem Kristen long wanpela aposel husat i gat biknem, nogat, ol “i kisim nem Kristen” bikos “God i bin stiaim dispela samting.” (Apo. 11:26) Pol i luksave olsem em i bikpela samting long ol i mas “holimpas ol tok” bilong Rait Holi em ol i bin harim long ol aposel na ol arapela man husat i bin stap lida bilong ol. Em i tok moa olsem: “Tasol mi laik bai yupela i save olsem het bilong olgeta man [dispela i makim tu olgeta memba bilong gavening bodi] em Krais, . . . na het bilong Krais em God.” (1 Kor. 11:2, 3) Yes, God Jehova em Nambawan Lida, na Krais Jisas i bin kisim glori na em i stap aninit long wok bos bilong God na em i lidim kongrigesen.

“DISPELA EM I NO WOK BILONG OL MAN”

8, 9. Klostu long yia 1900, Brata Russell i mekim wanem bikpela wok?

8 Klostu long yia 1900, Charles Taze Russell na sampela wanwok bilong em i wok strong long kirapim gen lotu i tru. Long 1884, ol i kamapim koporesen bilong Zion’s Watch Tower Tract Society, na dispela i helpim ol long kamapim ol tok bilong Baibel long narapela narapela tokples, na Brata Russell i stap olsem presiden. * Em i stadi gut long ol tok bilong Baibel, na em i no pret long tokaut olsem bilip bilong God Triwan na spirit i no save dai em ol tok giaman. Em i luksave olsem ol man i no inap lukim Krais long ai tru bilong ol taim em i kam bek, na “haptaim bilong ol manmeri bilong ol arapela lain” bai pinis long 1914. (Luk 21:24) Brata Russell i givim bikpela haptaim, strong, na mani bilong em long mekim wok bilong autim ol dispela tok long ol narapela. Jehova na Jisas i yusim Brata Russell long mekim dispela wok.

9 Brata Russell i no laik bai ol man i givim biknem long em. Long 1896, em i tok: “Mipela i no laik bai ol manmeri i litimapim nem bilong mipela na ol tok mipela i raitim, na tu, mipela i no laik bai ol i kolim mipela olsem Reveren o Rabai. Mipela i no laik bai ol manmeri i yusim nem bilong mipela olsem nem bilong grup bilong ol.” Bihain em i tok: “Dispela em i no wok bilong ol man.”

10. (a) Wanem taim Jisas i makim “gutpela wokboi i gat savetingting”? (b) Stori long olsem wanem Gavening Bodi na Sosaiti Was Taua i kamap narapela narapela grup?

10 Long 1919, em 3-pela yia bihain long Brata Russell i dai, Jisas i makim ol man husat bai stap olsem “gutpela wokboi i gat savetingting.” Jisas i laik strongim bilip bilong ol arapela wokboi na “givim kaikai long ol long taim stret.” (Mat. 24:45) Long hetkota long Brooklyn, New York, i gat liklik grup bilong ol brata em God i anointim, na ol i redim na tilim kaikai bilong bilip long ol disaipel bilong Jisas. Dispela hap tok, “gavening  bodi,” i kamap long ol pablikesen bilong yumi long ol yia bihain long 1940. Taim ol bratasista i lukim dispela tok, ol i save tingim Watch Tower Bible and Tract Society. Tasol long 1971, Gavening Bodi i kamap olsem wanpela grup em Baibel i tok orait long en, na Sosaiti Was Taua i gat ol dairekta bilong en na ol i kamap narapela grup em gavman i tok orait long en. Olsem na ol brata em God i anointim ol, ol i stap olsem ol memba bilong Gavening Bodi, na ol i no mekim wok olsem ol dairekta bilong Sosaiti. Inap sampela yia i go pinis, ol brata bilong lain “arapela sipsip” husat i holim bikpela wok insait long oganaisesen, ol i stap olsem ol dairekta bilong Sosaiti Was Taua na ol narapela koporesen em ol manmeri bilong God i yusim, na long dispela rot Gavening Bodi i tingting tasol long redim ol skul i kam long Baibel. (Jon 10:16; Apo. 6:4) Wastaua bilong Julai 15, 2013, i stori olsem “gutpela wokboi i gat savetingting” em liklik grup bilong ol brata em God i anointim ol na ol i stap olsem ol memba bilong Gavening Bodi.

Gavening bodi, bihain long 1950

11. Gavening Bodi i mekim wok olsem wanem?

11 Olgeta memba bilong Gavening Bodi i save bung wantaim na mekim ol bikpela disisen. Ol i save mekim miting bilong ol long olgeta wik, olsem na dispela i strongim pasin bilong ol long toktok gut wantaim na stap wanbel. (Snd. 20:18) Long olgeta yia, ol i save senis senis long mekim wok siaman long ol dispela miting, long wanem, ol i no holim tingting olsem wanpela memba bilong Gavening Bodi i gat biknem i winim ol narapela. (1 Pita 5:1) Gavening Bodi i gat 6-pela komiti, na ol memba bilong ol dispela komiti tu i save senis senis long mekim wok olsem siaman long ol miting bilong ol. Olgeta wan wan memba bilong Gavening Bodi i no tingim ol yet olsem lida bilong ol narapela brata, nogat. Ol i tingim ol yet olsem wanpela bilong “ol arapela wokboi,” na ol i kisim kaikai i kam long “gutpela wokboi” na ol i stap daun long wok bos bilong en.

Kirap long 1919, gutpela wokboi i redim kaikai bilong strongim bilip bilong ol manmeri bilong God (Lukim paragraf 10 na 11)

“HUSAT TRU EM I GUTPELA WOKBOI I GAT SAVETINGTING?”

12. God yet i no kamapim Gavening Bodi, na tu, ol memba bilong en i sinman olsem yumi, olsem na wanem ol askim i kamap?

12 God yet i no kamapim Gavening Bodi, na tu, ol memba bilong en i sinman olsem yumi. Olsem na Gavening Bodi inap popaia long ol tok ol i skulim ol man long en na givim bilong stiaim oganaisesen. Stadi Indeks Bilong Ol Witnes Bilong Jehova i gat het tok “Bilip i Kamap Klia Moa,” na aninit long dispela het tok i gat lista bilong ol senis we i kamap long save bilong yumi long ol tok bilong Baibel kirap long yia 1870. Jisas i no tok olsem dispela gutpela wokboi bai kamapim kaikai i gutpela olgeta. Olsem na hau bai yumi inap bekim dispela askim bilong Jisas: “Husat tru em i gutpela wokboi i gat savetingting?” (Mat. 24:45) Wanem ol samting i soim klia olsem Gavening Bodi i stap olsem dispela gutpela wokboi? Yumi ken skelim 3-pela samting i stiaim wok bilong gavening bodi long taim bilong ol aposel.

13. Olsem wanem holi spirit i helpim Gavening Bodi?

13 Holi spirit i helpim Gavening Bodi. Holi spirit i helpim Gavening Bodi long kliagut long ol tok bilong Baibel em pastaim ol i no kliagut long en. Kain olsem: Skelim lista bilong ol bilip em referens long paragraf 12 i kolim. I no stret long wanpela man i kisim biknem long mekim wok painimaut na kamapim klia “ol bikpela tok hait bilong God.” (Ritim 1 Korin 2:10.) Gavening Bodi i mekim wankain tok olsem aposel Pol i bin mekim: “Yumi autim ol dispela samting tu, tasol yumi no kolim ol tok i kam long savetingting bilong ol man, nogat, yumi kolim ol tok em holi spirit bilong God i lainim yumi long en.” (1 Kor. 2:13) Inap planti handret yia, ol man  i bihainim pasin apostet na ol i stap long tudak bilong bilip. Tasol kirap long 1919, save bilong Baibel i kamap bikpela na klia moa, olsem na dispela i soim olsem holi spirit i stiaim dispela wok.

14. Olsem Revelesen 14:6, 7 i kamapim, olsem wanem ol ensel i helpim ol manmeri bilong God long nau?

14 Ol ensel i helpim Gavening Bodi. Long nau, Gavening Bodi i mekim bikpela wok tru bilong stiaim wok autim tok i kamap long olgeta hap bilong graun, na winim 8 milion manmeri i autim gutnius. Olsem wanem na dispela wok i kamap gut tru? Wanpela risen em olsem, ol ensel i helpim dispela wok. (Ritim Revelesen 14:6, 7.) Planti taim ol pablisa i save bungim ol manmeri husat i beten long kisim helpim! * Long sampela kantri, ol man i birua tru long wok bilong autim tok na kamapim ol disaipel, tasol dispela wok i kamap bikpela moa, na dispela i soim klia olsem ol ensel i helpim dispela wok.

15. Olsem wanem pasin bilong Gavening Bodi long mekim disisen i narapela kain long pasin bilong ol lida bilong Kristendom? Stori long wanpela eksampel.

15 Tok Bilong God i stiaim Gavening Bodi. (Ritim Jon 17:17.) Wastaua bilong Jun 1, 1973, long tok Inglis i kamapim dispela askim: “Yu ting . . . ol man husat i no lusim pasin bilong smok tabak i winim mak bilong kisim baptais?” Bekim bilong dispela askim em olsem: “Tok bilong Baibel i kamapim klia olsem ol i no winim mak.” Wastaua i kamapim sampela skripsa na i stori long risen na kongrigesen i mas rausim ol man husat i no lusim pasin bilong smok tabak. (1 Kor. 5:7;  2 Kor. 7:1) Wastaua i tok: “Dispela i no makim olsem mipela i mekim hatpela pasin, nogat. God yet i putim dispela lo long Baibel.” Yu save long sampela oganaisesen bilong lotu em ol i redi long bihainim gut Tok Bilong God maski dispela i putim hevi long sampela memba bilong ol? Wanpela buk bilong ol lotu long Amerika i tok: “Ol lida bilong ol Kristen i save senisim senisim ol tok ol i skulim ol man long en bambai ol dispela tok i stret wantaim bilip na tingting bilong ol manmeri, na dispela bai kirapim ol manmeri long sapotim ol dispela lotu.” Gavening Bodi i no larim tingting bilong ol manmeri i stiaim ol disisen ol i mekim, nogat, ol i larim Tok Bilong God i stiaim ol. Olsem na husat tru i lidim ol manmeri bilong God long nau?

‘TINGIM OL MAN I GO PAS LONG YUPELA’

16. Wanem wanpela rot bilong tingim Gavening Bodi?

16 Ritim Hibru 13:7. Dispela tok ol i trensletim olsem “tingim,” ol inap trensletim tu olsem “kolim.” Olsem na wanpela rot bilong “tingim ol man husat i go pas” long yumi em olsem, yumi ken kolim Gavening Bodi long ol beten bilong yumi. (Efe. 6:18) Tingim bikpela wok ol i mekim long givim kaikai bilong strongim bilip, stiaim wok autim tok i kamap long olgeta hap, na yusim ol donesen long mekim ol gutpela wok. Oltaim yumi mas tingim ol long rot bilong beten!

17, 18. (a) Olsem wanem yumi inap wok bung wantaim Gavening Bodi? (b) Taim yumi autim tok, olsem wanem yumi helpim Jisas na gutpela wokboi?

17 Sapos yumi tingim Gavening Bodi, dispela i no makim olsem yumi tok tasol long maus, nogat. Yumi mas bihainim ol tok ol i givim long yumi. Gavening Bodi i givim ol tok bilong stiaim yumi long rot bilong ol pablikesen, ol miting, na ol kibung. Na tu, Gavening Bodi i save makim ol brata long mekim wok olsem wasman sekit, na ol wasman sekit i save makim ol elda bilong kongrigesen. Ol wasman sekit na ol elda i bihainim gut ol tok em Gavening Bodi i givim bilong stiaim wok ol i mekim, na long dispela rot ol i soim olsem ol i tingim Gavening Bodi. Taim yumi bihainim tok na stap daun long ol man em Jisas i yusim long stiaim yumi, dispela i soim olsem yumi rispektim Lida bilong yumi, em Jisas.—Hib. 13:17.

18 Narapela rot bilong soim olsem yumi tingim Gavening Bodi em olsem, yumi ken givim bel tru long mekim wok autim tok. Pol i bin kirapim ol Kristen long bihainim bilip bilong ol man husat i go pas long ol. Gutpela wokboi i holim strongpela bilip na givim bel tru long autim gutnius bilong Kingdom long planti hap bilong graun. Olsem wanem? Yu wanpela bilong ol arapela sipsip husat i helpim ol Kristen God i bin anointim long mekim dispela bikpela wok? Yu bai amamas tru taim Lida bilong yu, Jisas, i tokim yu olsem: “Samting [yu] mekim long ol brata bilong mi i no gat nem liklik, em [yu] mekim long mi.”—Mat. 25:34-40.

19. Bilong wanem yu tingting strong long bihainim Lida bilong yumi, Jisas?

19 Taim Jisas i go bek long heven, em i no lusim tingting long ol disaipel bilong em. (Mat. 28:20) Em i save olsem taim em i stap long graun na lidim ol disaipel, em i kisim helpim long holi spirit, ol ensel, na Tok Bilong God. Olsem na long nau, em i givim wankain helpim long gutpela wokboi. Ol brata em God i bin anointim, ol i stap olsem dispela wokboi na “maski wanem hap Pikinini Sipsip i go long en, ol dispela lain i save bihainim em.” (Rev. 14:4) Olsem na taim yumi bihainim tok bilong ol, i olsem yumi bihainim Lida bilong yumi, Jisas. Klostu nau, em bai lidim yumi i go bilong kisim laip oltaim. (Rev. 7:14-17) I no gat wanpela lida bilong ol man inap long mekim olsem!

^ par. 3 Jehova i tingting pinis olsem 12-pela aposel bai stap olsem “12-pela as ston” bilong Nupela Jerusalem. (Rev. 21:14) Sapos ol dispela 12-pela aposel i stap gut long God i go inap long ol i dai, bai i no gat wok long makim narapela man long kisim ples bilong ol.

^ par. 8 Kirap long 1955, dispela koporesen i kisim nem olsem Watch Tower Bible and Tract Society of Pennsylvania.

^ par. 14 Lukim buk “Autim Gut Tru” Tok Bilong Kingdom Bilong God, p. 58-59.