Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Wastau—Stadi Edisen  |  Februeri 2017

 LAIP STORI

God i Soim Bikpela Pasin Helpim Long Kain Kain Rot

God i Soim Bikpela Pasin Helpim Long Kain Kain Rot

TAIM papa bilong mi Arthur i yangpela man yet, em i tingim tru lotu, olsem na em i laik kamap wokman bilong lotu Metodis. Tasol tingting bilong em i senis taim em i ritim litresa bilong ol Sumatin Bilong Baibel, na em i kirap long bung wantaim ol. Papa i kisim baptais long 1914 taim em i gat 17 krismas. Wol Woa 1 i kirap pinis, na gavman i singautim em long joinim ami. Tasol Papa i no laik holim gan, olsem na ol i putim em long Kingston Banis Kalabus long Ontario, Kanada, inap 10-pela mun. Bihain long Papa i lusim kalabus, em i kirap autim tok fultaim olsem wanpela kolpota (painia).

Long 1926, Arthur Guest i maritim Hazel Wilkinson. Mama bilong Hazel i kisim tok i tru long 1908. Mi bon long Epril 24, 1931—Papa na Mama i gat 4-pela pikinini na mi seken bon. Mipela olgeta i lotuim Jehova, na Papa i rispektim tru tok bilong Baibel na dispela i kirapim mipela long laikim tru Tok Bilong God. Oltaim mipela i save go long haus bilong ol man na autim tok.—Apo. 20:20.

SAKIM PASIN BILONG LITIMAPIM KANTRI NA MEKIM WOK PAINIA OLSEM PAPA

Wol Woa 2 i kirap long 1939, na long 1940 ol i tambuim wok bilong ol Witnes Bilong Jehova long Kanada. Ol gavman skul i mekim ol bung bilong litimapim kantri, salutim fleg, na singim nesenel entem. Ol i rausim mi na bikpela susa bilong mi, Dorothy, long klasrum. Wanpela taim, tisa bilong mi i laik semim mi na em i kolim mi olsem mangi bilong pret. Bihain long skul, sampela wanklas i paitim mi na pusim mi i go daun long graun. Tasol dispela hevi i strongim tingting bilong mi long ‘bihainim tok bilong God tasol, na mi no bihainim tok bilong ol man.’—Apo. 5:29.

Long Julai 1942, mi kisim baptais long tenk wara long fam taim mi gat 11 krismas. Long taim bilong skul holide, mi save mekim wok painia haptaim. Inap 1-pela yia olgeta, mi na 3-pela narapela brata i autim tok long ol wokman i katim ol diwai long  bikbus long hap not bilong Ontario, em hap we i no gat kongrigesen i autim tok long en.

Long Me 1, 1949, mi kirap long mekim wok painia oltaim. Wok konstraksen i kamap long brens, olsem na ol i singautim mi long i go helpim wok konstraksen, na long Disemba 1 mi kamap memba bilong Betel famili long Kanada. Mi kisim asainmen bilong wok long printeri, na ol i lainim mi long kontrolim ol masin bilong prinim ol tok. Inap sampela wik, mi wok long nait na prinim liklik nius i stori long pasin birua ol man i mekim long lain bilong Jehova long Kanada.

Bihain, mi mekim wok long Sevis Dipatmen, na mi intaviuim ol painia husat i kam long brens ofis paslain long ol i go long Quebec—wanpela provins bilong Kanada, na long dispela taim ol man i birua tru long lain bilong yumi. Wanpela bilong ol dispela painia em Mary Zazula. Em i kam long taun Edmonton, long provins Alberta. Mary na bikpela brata bilong em Joe, i givim bel tru long stadi long Baibel, olsem na papamama bilong tupela i rausim ol long haus bikos papamama i strong long bihainim lotu Otodoks. Long Jun 1951, Mary na Joe i kisim baptais. Inap 6-pela mun bihain, tupela i kirap long mekim wok painia. Taim mi intaviuim ol, mi amamas tru long gutpela pasin bilong Mary long tingim wok bilong God. Mi tokim mi yet olsem, ‘Sapos i no gat wanpela samting i pasim mi, mi bai maritim dispela meri.’ Mitupela i marit 9-pela mun bihain, long Janueri 30, 1954. Wanpela wik bihain, ol i invaitim mipela long kisim trening long mekim wok sekit. Inap 2-pela yia olgeta, mipela i mekim wok sekit long hap not bilong Ontario.

Wok autim tok i kamap bikpela long olgeta hap bilong graun, na Sosaiti i singautim planti moa pablisa long kamap misineri. Long Kanada, ples i save kol tru long taim bilong winta, na moskito i save pulap tru long taim bilong san. Olsem na mipela i pilim olsem mipela inap karim olgeta kain hevi long asainmen bilong mipela. Long Julai 1956, mipela i grediuet long namba 27 klas bilong Skul Gileat, na long Novemba mipela i go long asainmen bilong mipela long Brasil.

WOK MISINERI LONG BRASIL

Taim mipela i kamap long brens long Brasil, ol i skulim mipela long tokples Potugal. Mipela i lain long wei bilong gritim ol man na ol tok mipela bai mekim bilong tilim magasin, na ol i tokim mipela long i go autim tok. Sapos ol man i amamas long putim yau, orait mipela i mas ritim ol skripsa i stori long ol blesing bai kamap taim Kingdom Bilong God i bosim graun. Long fes de mipela i autim tok, wanpela meri i putim gut yau, olsem na mi ritim Revelesen 21:3, 4—na bihain mi airaun na pundaun! Bodi bilong mi i no lain yet long ples i hot, na dispela i putim hevi long mi.

Mipela i kisim asainmen long mekim wok misineri  long taun Campos—long nau i gat 15 kongrigesen long dispela hap. Taim mipela i go kamap long dispela taun, i gat wanpela grup tasol, na wanpela haus misineri we 4-pela sista i stap long en: Esther Tracy, Ramona Bauer, Luiza Schwarz, na Lorraine Brookes (nau em Lorraine Wallen). Mi helpim long mekim londri na painim paiawut bilong kukim kaikai. Wanpela taim, bihain long Wastaua stadi long Mande nait, wanpela visita i kam. Meri bilong mi i slip malolo antap long kauts taim mipela i wok long stori long ol wok mipela i mekim long de olgeta. Taim em i apim het long pilo na kirap, wanpela snek i kamaut na mi kilim em i dai!

Bihain long mipela i lainim tokples Potugal inap 1-pela yia, ol i makim mi long kamap wasman sekit. Mipela i no gat planti kago—mipela i no gat pawa, mipela i slip long mat, na raun long hos na wilkar. Taim mipela i laik autim tok long ol hap i no gat kongrigesen i lukautim, mipela i kalap long tren na go long taun i stap antap long ol maunten na rentim wanpela rum. Brens ofis i salim 800 magasin bilong tilim taim mipela i autim tok. Planti taim mipela i go i kam long pos ofis long kisim ol boks magasin na karim i go long hap mipela i stap long en.

Long 1962, Skul Bilong Wok Kingdom i kamap long olgeta hap long Brasil, na em skul bilong ol bratasista i mekim wok misineri. Mi kisim asainmen bilong mekim wok tisa long ol dispela skul, olsem na inap 6-pela mun mi stap long planti skul, tasol Mary i no raun wantaim mi. Mi mekim wok tisa long ol skul i kamap long Manaus, Belém, Fortaleza, Recife, na Salvador. Mi oganaisim wanpela kibung distrik long wanpela bikpela haus bung long Manaus. Bikpela ren i pundaun na i bagarapim wara bilong dring, na mipela i no gat gutpela ples bilong putim kaikai long taim bilong kibung. (Long dispela taim bipo, ol i save redim kaikai long taim bilong kibung.) Mi ringim lain ami, na wanpela ofisa i stretim rot bilong givim wara bilong dring long ol lain i kam long kibung, na em i salim ol soldia i kam sanapim 2-pela traipela haus sel na mipela i yusim long redim na tilim kaikai.

Taim Mary yet i stap, em i autim tok long teritori we lain Potugal i mekim wok bisnis long en, na ol manmeri long dispela teritori i tingting tasol long kisim mani. Mary i painim hat long stori wantaim ol man long Baibel, olsem na em i tokim sampela bratasista long Betel olsem: “Mi no laik tru long i go i stap long Potugal.” Tasol mipela i kirap nogut olsem ol i singautim mipela long i go long Potugal! Long dispela taim, gavman i tambuim wok autim tok long Potugal, tasol mipela i orait long kisim dispela asainmen maski long pastaim Mary i les long i go long Potugal.

ASAINMEN LONG POTUGAL

Mipela i go kamap long taun Lisbon long Potugal long Ogas 1964. Wanpela lain polis bilong  Potugal (PIDE) i mekim nogut tru long ol bratasista. Olsem na ol bratasista i no welkamim mipela taim mipela i go kamap, na mipela i no bung wantaim ol asples bratasista. Mipela i stap long haus pasindia na wetim gavman long givim tok orait long mipela i ken i go stap long wanpela haus. Bihain long mipela i kisim visa, mipela i rentim wanpela flet. Long Janueri 1965, mipela inap toktok wantaim ol brata long brens ofis. Rot i op long mipela inap i go long fes miting bilong mipela—inap 5-pela mun olgeta mipela i no bin i go long miting!

Long olgeta de, ol polis i sekim na mekim nabaut long haus bilong ol bratasista. Ol birua i pasim ol Haus Kingdom, olsem na ol bratasista i bung long haus bilong narapela narapela na mekim ol miting. Ol i kisim planti handret Witnes i go long polis stesin na kwestenim ol na fosim ol long tokaut long nem bilong ol. Ol i mekim nogut moa yet long ol brata bambai ol i tokaut long nem bilong ol brata i go pas long lukautim ol miting. Olsem na ol brata i bihainim pasin bilong kolim tasol fes nem bilong ol, kain olsem José o Paulo, na ol i no kolim nem bilong papa bilong ol. Mipela i bihainim wankain pasin.

Mipela i laik tru long redim na givim ol samting bilong strongim bilip bilong ol bratasista. Mary i save taipim ol tok bilong Wastaua stadi na ol narapela litresa long stensil pepa em mipela inap yusim long wokim planti moa kopi.

SAMBAI LONG GUTNIUS LONG KOT

Long Jun 1966, wanpela bikpela kot keis i kamap long Lisbon. Ol i bringim olgeta 49 memba bilong Feijó Kongrigesen i go long kot—ol birua i sutim tok olsem ol brata i go long haus bilong wanpela Witnes na mekim miting em gavman i tambuim. Mi redim ol brata long i go long kot, olsem na mi kamap olsem loya na kwestenim ol. Mipela i save olsem mipela i no inap winim kot keis, tasol dispela kot bai opim rot long mipela inap autim tok long planti manmeri moa. Taim loya bilong mipela i laik pinisim toktok em i mekim bilong sambai long mipela, em i kolim tok bilong Gamaliel long taim bilong ol aposel. (Apo. 5:33-39) Nius bilong dispela kot keis i kamap long olgeta hap bilong Potugal, na olgeta 49 bratasista i go kalabus—haptaim bilong ol long kalabus i narapela narapela, namel long 45 de na 5 na hap mun. Mipela i amamas olsem loya bilong mipela i no surik long sambai long mipela, na em i kirap long stadi long Baibel na kam long ol miting paslain long em i dai.

Long Disemba 1966, ol i makim mi long kamap brens ovasia na mi lusim bikpela haptaim long stretim sait bilong ol kot keis. Mipela i stretim rot long ol Witnes Bilong Jehova inap i stap fri long mekim wok lotu. (Fili. 1:7) Long Disemba 18, 1974, gavman i givim tok orait long mipela. Brata Nathan Knorr na Brata Frederick Franz long hetkota i visitim Potugal na amamas wantaim mipela long  wanpela bikpela kibung i kamap long taun Oporto na taun Lisbon, na 46,870 manmeri i bung.

Jehova i opim rot na wok autim tok i kamap long sampela ailan we ol manmeri i mekim tokples Potugal, olsem Asores, Kep Verd, Madera, Sau Tome na Prinsipi. Long 1988, ol i pinisim wok bilong sanapim bikpela brens ofis. Long Epril 23, 1988, Brata Milton Henschel i kam mekim tok bilong dediketim nupela bilding, na 45,522 manmeri i bung. Mipela i amamas tru olsem 20 bratasista husat i bin mekim wok misineri long Potugal i kam long dispela bung.

KISIM HELPIM LONG OL GUTPELA EKSAMPEL

Inap planti yia, mipela i bung wantaim ol brata i stap strong long bilip na dispela i strongim tru bilip bilong mipela. Wanpela taim mi wok wantaim Brata Theodore Jaracz long visitim ol brens ofis. Mipela i visitim wanpela brens i gat bikpela hevi, na ol memba bilong Brens Komiti i traim pinis olgeta kain rot bilong stretim dispela hevi. Brata Jaracz i mekim isi bel bilong ol na em i tok: “Nau em taim bilong larim holi spirit long mekim wok.” Planti yia i go pinis, mitupela Mary i go long Brooklyn na long apinun mitupela i go bung wantaim Brata Franz na sampela narapela. Long pinis bilong dispela bung, ol narapela i askim Brata Franz long stori long ekspiriens bilong em long planti yia em i lusim long mekim wok bilong Jehova, na em i tok: “Mi laik kirapim yupela olsem: Stap gut long oganaisesen bilong Jehova long gutpela taim na long taim nogut. Dispela oganaisesen tasol i mekim wok em Jisas i tokim ol disaipel long mekim—autim gutnius bilong Kingdom Bilong God!”

Mi na meri bilong mi i kisim bikpela amamas tru long mekim dispela wok. Mipela i laikim tru ol raun bilong mipela long mekim son visit long ol brens. Ol dispela visit i opim rot long mipela inap soim ol yangpela na ol lapun olsem mipela i amamas tru long wok ol i mekim, na mipela inap strongim ol long mekim yet wok bilong Jehova.

Planti yia i kam i go pinis na nau mitupela i winim pinis 80 krismas. Mary i gat planti hevi long sait bilong helt. (2 Kor. 12:9) Ol hevi i strongim bilip bilong mipela na mipela inap i stap gut long God. Taim mitupela i tingim bek ol wok mitupela i mekim long laip bilong mipela, mipela inap tru long tok olsem Jehova i soim bikpela pasin helpim long kain kain rot. *

^ par. 29 Taim ol i wok long redim dispela atikol, Douglas Guest i stap gut long Jehova na em i dai long Oktoba 25, 2015