Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Wastaua—Stadi Edisen  |  Februeri 2016

 HISTORI BILONG YUMI

Planti Milion Manmeri i Save Long Saun Kar

Planti Milion Manmeri i Save Long Saun Kar

“I gat wanpela saun kar i mekim wok bilong Bikpela long Brasil, na planti milion manmeri i kolim dispela kar olsem, ‘saun kar bilong Was Taua.’”—Nathaniel A. Yuille, long 1938.

LONG ol yia bihain long 1930, wok bilong Kingdom long Brasil i no go bikpela hariap. Tasol long 1935, Nathaniel na Maud Yuille—2-pela painia—i raitim pas i go long Joseph F. Rutherford, em man i lukautim wok autim tok. Tupela i volantia long helpim wok autim tok, na tupela i tok ol “i amamas long i go long olgeta kain hap.”

Nathaniel i gat 62 krismas, na em i ritaia long wok ensinia. Em i stap sevis dairekta bilong lukautim wok autim tok long wanpela kongrigesen bilong ol Witnes Bilong Jehova long San Francisco, California, long Amerika. Em i oganaisim wok autim tok na yusim saun long autim gutnius. Em i gat ekspiriens long mekim ol dispela wok, na em man bilong amamas long mekim wok, olsem na dispela i helpim em long nupela asainmen bilong em olsem brens sevan long Brasil—ol manmeri long Brasil i mekim planti tokples.

Long 1936, Nathaniel na Maud i go kamap long Brasil. Wanpela painia i go wantaim tupela bambai em inap tanim tok bilong ol. Dispela painia em Antonio P. Andrade. Ol i bringim gutpela kago i go wantaim ol—35 masin pikap na wanpela saun kar. Brasil em namba 5 kantri i gat bikpela hap graun, tasol long dispela taim i gat 60 pablisa tasol! Maski i olsem, ol masin pikap na saun kar i helpim ol long autim gutnius long planti milion manmeri insait long sampela yia tasol.

Wanpela mun bihain long Nathaniel na Maud i go kamap long Brasil, brens ofis i oganaisim fes kibung long biktaun São Paulo long Brasil. Dispela kibung i bilong kirapim ol pablisa long mekim wok autim tok. Maud i draivim saun kar na edvetaisim pablik tok, na 110 manmeri i kam long kibung! Program bilong kibung i kirapim tingting bilong ol pablisa long mekim bikpela wok moa long autim tok. Ol pablisa i  lain long wei bilong yusim ol litresa na testimoni kat long autim tok. Na tu, ol i lain long yusim masin pikap long pilaim ol rekoding long tok Hangari, tok Inglis, tok Jeman, tok Polan, tok Spen—bihain ol i pilaim tu ol rekoding long tok Potugal.

Dispela saun kar i autim gutnius long planti milion manmeri long Brasil

Long 1937, ol i mekim 3-pela kibung long ol siti long Brasil, em São Paulo, Rio de Janeiro, na Curitiba, na ol dispela kibung i kirapim ol pablisa long autim tok. Ol pablisa long ol dispela kibung i yusim saun kar long i go long haus bilong ol man na autim tok. José Maglovsky em yangpela man long dispela taim, na em i tok: “Mipela i putim ol pablikesen bilong Baibel long tebol, na yusim saun kar long pilaim wanpela rekoding, na mipela i toktok wantaim ol manmeri i lusim haus na kam long lukim ol samting mipela i mekim.”

Ol pablisa i baptaisim ol nupela disaipel long ol bikpela wara we ol manmeri i go swim na sindaun long san. Saun kar i helpim tru wok bilong autim gutnius! Rekoding bilong tok bilong baptais em Brata Rutherford i mekim i kamaut klia long ol spika. Olsem na ol manmeri i kam na sanap raunim kar, na wanpela pablisa i tanim tok i go long tok Potugal. Ol pablisa i pilaim ol song bilong Kingdom long tok Polan na baptaisim ol manmeri. Ol bratasista i singim ol song bilong Kingdom long kain kain tokples. Ripot bilong 1938 Yearbook i tok: “Ol man i tingim de Pentikos, taim olgeta manmeri i harim tok long tokples bilong ol yet.”

Bihain long ol kibung, long olgeta Sande, maski em taim bilong san o ren, ol pablisa i yusim saun kar long pilaim rekoding bilong ol tok bilong Baibel long ol pak, haus bilong ol man, na ol faktori long São Paulo na ol taun i stap klostu. Long olgeta mun, saun kar i pilaim wanpela program long 3 tausen manmeri long wanpela komiuniti bilong ol lepraman. Dispela komiuniti i stap 97 kilomita longwe long São Paulo, long not wes. Bihain, wanpela kongrigesen i kamap. Maski ol pablisa bilong dispela kongrigesen i gat sik lepra, ol i kisim tok orait long i go autim tok bilong Baibel long ol lepraman i stap long narapela komiuniti.

Rekoding bilong ol tok bilong Kingdom long tok Potugal i kamap long pinis bilong 1938. Long wanpela holide (All Souls’ Day) bilong krai sori long ol man i dai pinis, saun kar i go long ol matmat na pilaim ol rekoding i gat ol dispela het tok, “Where Are the Dead?,” “Jehovah” na “Riches.” Winim 40 tausen manmeri i harim ol dispela rekoding!

Ol pris pasto i belhat taim ol i harim ol tok i tru bilong Baibel long ol dispela rekoding, na planti taim ol i fosim polis long stopim wok bilong saun kar. Sister Yuille i stori olsem, wanpela taim wanpela pris i kirapim ol manmeri long bung bung na kam banisim saun kar. Tasol meya bilong taun na ol bikman bilong polis i kam na putim yau long program olgeta. Meya i kisim sampela nius bilong Baibel na em i go. Long dispela de, i no gat man i mekim pasin birua. Maski i gat lain i birua, ripot bilong Brasil long 1940 Yearbook i tok, 1939 em “gutpela taim tru long mekim wok bilong Nambawan Bosman bilong yumi na autim nem bilong em.”

Taim “saun kar bilong Was Taua” i go kamap long Brasil, em i kamapim bikpela senis tru long wok autim tok. Dispela kar i opim rot bilong planti milion manmeri long harim tok bilong Kingdom. Ol i salim dispela kar long 1941, tasol planti tausen Witnes Bilong Jehova i wok yet long autim gutnius long ol manmeri i gat gutpela bel long bikpela teritori bilong Brasil.—Histori bilong yumi long Brasil.