Mi tokim ofisa olsem mi go pinis long kalabus bikos mi no insait long pait. Mi askim em: “Yu laik putim mi gen long kalabus?” Dispela toktok i kamap taim ol i singautim mi namba 2 taim long joinim ami bilong Amerika.

MAMA i karim mi long 1926, long Crooksville, Ohio, long Amerika. Papa na Mama i no save go long lotu, tasol ol i tokim mipela 8-pela pikinini long i go long lotu. Mi joinim lotu Metodis. Taim mi gat 14 krismas, bikman bilong lotu i givim mi presen bikos inap 1-pela yia olgeta, mi go long lotu long olgeta Sande.

Margaret Walker (namba 2 sista long left sait) i helpim mi long kisim save long tok i tru

Long dispela taim, wanpela neiba bilong mipela em Margaret Walker. Em i wanpela Witnes Bilong Jehova, na em i kam toktok wantaim Mama long tok bilong Baibel. Wanpela taim mi stap wantaim tupela long stadi. Mama i ting mi bai distebim stadi bilong tupela, olsem na em i tokim mi long lusim ol na go ausait. Tasol mi traim yet long putim yau long toktok bilong tupela. Bihain long Margaret i visitim mama inap sampela haptaim, em i askim mi, “Yu save long nem bilong God?” Mi tokim em, “Olgeta man i save olsem nem bilong em God.” Em i tok, “Kisim Baibel na ritim Song 83:18.” Mi ritim na painimaut olsem nem bilong God em Jehova. Mi ran i go long ol pren bilong mi na tokim ol olsem, “Taim yupela i go long haus long nait, kisim Baibel na ritim Song 83:18 na lukim nem bilong God.” Ating yu bai tok mi stat long autim tok.

 Mi stadi long Baibel na kisim baptais long 1941. Bihain liklik, ol i givim mi asainmen bilong lukautim buk stadi bilong kongrigesen. Mi kirapim Mama na ol brata na ol susa bilong mi long kam, na olgeta i kam long buk stadi. Tasol papa i no kam.

PASIN BIRUA INSAIT LONG FAMILI

Ol i makim mi long mekim planti wok long kongrigesen, olsem na mi bungim ol litresa bilong yumi na wokim laibreri bilong mi. Wanpela taim Papa i poinim han long ol buk bilong mi na em i tok: “Yu lukim olgeta dispela samting? Yu mas rausim ol dispela litresa na yu tu i mas lusim dispela haus.” Mi lusim haus na mi rentim wanpela rum long Zanesville, Ohio, tasol mi wok yet long i go lukim ol wanfamili na strongim ol.

Papa i traim long stopim Mama long i go long ol miting. Taim mama i laik i go long ol miting, Papa i save ron bihainim em na pulim em i kam bek insait long haus. Tasol Mama i save ran i go ausait long narapela dua na i go long miting. Mi tokim Mama: “Yu no ken wari. Papa bai mekim i go na em bai les.” Bihain, Papa i givap na em i no traim moa long stopim Mama, olsem na Mama i stap fri long i go long ol miting.

Long 1943, kongrigesen bilong mipela i kirap long mekim miting bilong Skul Tiokratik Bilong Autim Tok na mi stat long givim ol tok long skul. Taim ol i givim tok kaunsel bihain long mi mekim tok, dispela i helpim pasin bilong mi long mekim tok.

MI NO JOINIM AMI

Long dispela taim, ol kantri i insait long Wol Woa 2. Long 1944, ol i singautim mi long joinim ami. Mi go long Fort Hayes long Columbus, Ohio, na ol i sekim helt bilong mi, na tu, mi raitim tok long pepa i gat askim long en. Mi tokim ol bikman bilong ami olsem mi no inap joinim ami. Ol i larim mi i go. Sampela de bihain, wanpela bikman bilong ami i kam long haus na tokim mi olsem: “Corwin Robison, mi kisim tok orait long arestim yu.”

Tupela wik bihain, mi sanap long kot na jas i tok: “Sapos mi yet bai mekim disisen, bai mi makim yu long i stap kalabus inap long taim yu dai. Yu gat sampela tok long mekim?” Mi bekim tok olsem: “Bikman, mobeta yupela i bin raitim nem bilong mi long lista olsem lotuman. Haus dua bilong olgeta man i stap olsem pletfom bilong mi, na mi bin sanap long dispela hap na autim gutnius bilong Kingdom long planti manmeri.” Jas i tokim ol man bilong skelim kot olsem: “Yupela i no kam bilong makim olsem dispela yangpela man i stap olsem lotuman, nogat. Yupela i kam bilong skelim olsem em i bin putim pepa bilong joinim ami o nogat.” Bihain long sampela minit, lain bilong skelim kot i kam bek wantaim disisen bilong ol na ol i tok mi gat asua. Jas i makim mi long i stap kalabus inap 5-pela yia long Ashland, Kentucky.

JEHOVA I LUKAUTIM MI LONG KALABUS

Inap 2-pela wik mi stap long kalabus long Columbus, Ohio, na long fes de mi stap long rum sel bilong mi. Mi beten long Jehova na tok: “Mi no inap stap tasol insait long sel inap 5-pela yia. Mi no save bai mi mekim wanem.”

Long neks de, ol gad i larim mi long lusim rum sel na wokabaut raun long sampela hap insait long banis kalabus. Mi wokabaut i go long wanpela longpela kalabusman i gat traipela solda, na mitupela i sanap na lukluk i go ausait long windo. Em i askim mi, “Soti, yu mekim wanem?” Mi tokim em: “Mi wanpela Witnes Bilong Jehova.”  Em i tok: “Tru, a? Sapos olsem, orait wai na yu kam kalabus? Mi tokim em: “Ol Witnes Bilong Jehova i no save go long woa na kilim man.” Em i tok: “Ol i putim yu long kalabus bikos yu no inap kilim ol man. Na tu, ol i putim ol narapela man long kalabus bikos ol i kilim ol man. Yu ting ol i mekim stretpela pasin?” Mi tok: “Nogat.”

Em i tok: “Inap 15 yia mi stap long narapela banis kalabus na mi ritim sampela litresa bilong yupela.” Mi beten olsem: “Jehova, kirapim dispela man long i stap long sait bilong mi.” Nem bilong dispela man em Pol. Em i tokim mi: “Sapos wanpela man i laik mekim nogut long yu, orait yu singaut tasol. Bai mi mekim save long ol.” Inap 50 man i stap kalabus long wankain seksen olsem mi, tasol i no gat wanpela bilong ol i mekim nogut long mi.

Mi na ol arapela Witnes i no joinim ami, olsem na ol i kalabusim mipela long Ashland, Kentucky

Taim ol bikman bilong banis kalabus i salim mi i go long Ashland, mi bungim ol brata em ol i stap strong long bilip. Ol i pas gut wantaim mi na sampela narapela, na dispela i helpim mipela long sanap strong long bilip. Ol i makim hap bilong Baibel em mipela i mas ritim long olgeta wan wan wik, na mipela i redim ol askim na ol bekim bilong skelim long ol miting em mipela i kolim olsem Baibel Binen. Na tu, i gat teritori sevan. Mipela i stap long bikpela dometri i gat ol bet i stap arere long wol. Teritori sevan i tokim mi: “Robison, teritori bilong yu em ol dispela bet. Sapos ol i salim ol man i kam stap long ol dispela bet, orait em wok bilong yu long autim tok long ol paslain long ol i lusim dispela hap.” Long dispela rot, mipela inap autim tok.

AUSAIT LONG BANIS KALABUS

Wol Woa 2 i pinis long 1945, tasol mi stap yet long kalabus. Mi wari long famili bilong mi bikos Papa i bin tokim mi olsem: “Mi rausim yu, olsem na mi inap rausim ol narapela tu.” Bihain long mi lusim kalabus, mi kirap nogut long sampela samting. Maski Papa i birua long famili, 7-pela long famili i go long ol miting, na liklik susa bilong mi i kisim baptais.

Mi autim tok wantaim Demetrius Papageorge, em brata God i makim long holi spirit na em i kirap mekim wok bilong Jehova long 1913

Taim woa i kamap long Korea long 1950, ol i singautim mi namba 2 taim long joinim ami, olsem na mi go long Fort Hayes. Bihain long ol i testim save bilong mipela, wanpela bikman i tokim mi: “Long grup yu stap long en, yu wanpela bilong ol man husat i gat bikpela strong winim ol narapela.” Mi tokim em: “Em gutpela, tasol mi no inap joinim ami.” Mi kolim tok bilong 2 Timoti 2:3 na mi tok: “Mi stap pinis olsem soldia bilong Krais.” Em i pasim maus na stap isi inap sampela minit, na bihain em i tok: “Yu ken i go.”

Bihain liklik, mi stap long kibung long Cincinnati, Ohio, na mi go long miting bilong ol lain i laik i go wok long Betel. Brata Milton Henschel i tokim mipela olsem,  sapos wanpela brata i laik mekim bikpela wok bilong Kingdom, oganaisesen bai yusim em long wok long Betel. Mi putim aplikesen bilong i go long Betel, na long Ogas 1954 ol i singautim mi long i go wok long Brooklyn Betel. Kirap long dispela taim i kam inap long nau, mi mekim wok long Betel.

Mi mekim planti wok long Betel. Inap sampela yia, mi mekim wok bilong lukautim ol bikpela tenk i stap long printeri na ol ofis, na mi stretim ol masin na ol lok i bagarap. Na tu, mi helpim wok long ol Haus Kibung long New York Siti.

Lukautim ol tenk long bikpela ofis long Brooklyn Betel

Mi laikim tru ol wok lotu i kamap long Betel, olsem moning wosip, Wastaua Stadi, na tu, mi amamas long autim tok wantaim kongrigesen. I stret long olgeta famili Witnes i mekim ol dispela wok lotu. Taim papamama na ol pikinini i bung wantaim long skelim teks bilong de, mekim Famili Lotu long olgeta taim, givim bel long insait long ol miting bilong kongrigesen, na mekim wok bilong autim gutnius, dispela bai helpim famili olgeta long i stap strong long bilip.

Mi gat planti pren long Betel na long kongrigesen. Sampela em lain God i makim na ol i go pinis long heven na kisim prais bilong ol. Sampela i bilong kisim laip long graun. Tasol olgeta wokman bilong Jehova, ol i sinman, na dispela i makim tu ol lain i wok long Betel. Sapos mi gat kros wantaim wanpela brata, oltaim mi save mekim samting bilong kamap wanbel gen. Mi tingim tok bilong Matyu 5:23, 24, na mi tingim ol samting mipela i mas mekim sapos mipela i laik stretim wanpela hevi. I hatwok long tok sori, tasol mi lukim olsem taim mi tok sori, dispela i save pinisim hevi namel long mi na ol narapela.

OL GUTPELA BLESING

Nau mi lapun, olsem na mi painim hat long go long ol haus na autim tok, tasol mi no givap. Mi lainim sampela tok bilong tokples Mandarin bilong Saina, na mi amamas long toktok wantaim ol Saina man long strit. Long sampela moning, mi save tilim 30 o 40 magasin long ol man i gat laik long ritim.

Autim tok long ol manmeri bilong Saina long Brooklyn, New York

 Mi mekim wanpela gobek long Saina! Wanpela de, wanpela yangpela meri i smail long mi taim em i tilim edvetaismen bilong hap ol i salim ol prut long en. Mi smail na givim em Wastaua na Kirap! long tokples Saina. Em i kisim ol dispela nius na tokim mi olsem nem bilong em Katie. Taim Katie i lukim mi, oltaim em i save kam na toktok long mi. Mi skulim em long nem bilong ol prut long tok Inglis, na em i bihainim mi na kolim nem bilong ol prut. Na tu, mi stori long em long ol tok bilong Baibel, na em i kisim buk Baibel i Tok. Tasol sampela wik bihain, mi no lukim em moa.

Sampela mun bihain, narapela yangpela meri i tilim ol edvetaismen na em i kisim ol magasin mi givim long em. Long wik bihain, em i givim fon long mi na tok: “Yu toktok long Saina.” Mi tokim em: “Mi no save long wanpela man i stap long Saina.” Tasol em i strong long mi mas toktok long fon, olsem na mi kisim fon na mi tok: “Halo, mi Robison.” Nek long fon i tok: “Robby, mi Katie. Mi kam bek long Saina.” Mi tok: “ Yu stap long Saina?” Katie i tok: “Yes. Robby, yu save long dispela meri i givim fon long yu? Em susa bilong mi. Yu bin skulim mi long planti gutpela samting. Plis, skulim em olsem yu bin skulim mi.” Mi tokim em: “Katie, bai mi traim bes long mekim olsem. Tenkyu long toksave long mi long hap yu stap long en.” Bihain, mi toktok wantaim susa bilong Katie, na dispela em laspela taim mi toktok wantaim em. Maski dispela 2-pela yangpela meri i stap long wanem hap, mi laik tru bai ol i kisim sampela save moa long Jehova.

Mi mekim wok bilong Jehova inap 73 yia. Mi amamas olsem Em i helpim mi na mi no insait long ami na mi stap gut long em taim mi stap kalabus. Na tu, ol bratasusa bilong mi i tokim mi olsem ol i kisim bikpela strong taim ol i lukim olsem mi sanap strong na mi no givap maski Papa i birua long mi. Mama na 6-pela bratasusa bilong mi i kisim baptais. Na tu, Papa i no kros moa, na em i go long ol miting paslain long em i dai.

Sapos God i laik, mi bilip olsem olgeta wanfamili na ol pren bilong mi bai kirap bek na kisim laip long nupela taim. Tingim bikpela amamas yumi bai kisim taim yumi bung wantaim ol lain yumi laikim ol tumas, na yumi lotuim Jehova inap oltaim oltaim! *

^ par. 32 Taim ol i wok long redim dispela atikol, Corwin Robison i stap gut long Jehova na em i dai.