Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Wastaua—Stadi Edisen  |  Epril 2017

 LAIP STORI

Tingting Strong Long i Stap Soldia Bilong Krais

Tingting Strong Long i Stap Soldia Bilong Krais

Taim ol bulet i flai i kam long mi, isi isi mi apim waitpela hankesip bilong mi. Ol soldia i singaut long mi mas lusim ples hait na kam ausait. Isi isi, mi wokabaut i go long ol, na mi no save sapos mi bai i stap laip o mi bai i dai. Hau na dispela hevi i painim mi?

MIPELA 8-pela pikinini long famili, na mi seken las. Papamama i stap long Karítsa, em liklik ples long Grik. Em long yia 1926.

Long 1925, papamama i bungim John Papparizos, wanpela Sumatin Bilong Baibel, em nem bilong ol Witnes Bilong Jehova long bipo. John em man bilong toktok na em i givim bel tru long mekim wok bilong God. Papamama i laikim wei bilong John long eksplenim ol skripsa, olsem na ol i go long ol miting bilong ol Sumatin Bilong Baibel long ples bilong mipela. Mama i bilip tru long God Jehova, na maski em i no save long rit na rait, em i autim tok long ol manmeri long olgeta kain taim. Papa i tingim tumas popaia bilong ol narapela, olsem na em i lusim pasin bilong go long ol miting.

Mi na ol bratasusa bilong mi i rispektim Baibel, tasol amamas bilong ol yangpela i pulim tingting bilong mipela. Long 1939, Wol Woa 2 i kamap long olgeta hap bilong Yurop, na wanpela samting i kamap long ples na i kirapim tingting bilong mipela. Nicolas Psarras, em kasen bilong mi, na em i gat 20 krismas. Em i baptais nupela na kamap wanpela Witnes, na gavman i putim nem bilong em long joinim ami bilong Grik. Tasol em i tokim ol bikman bilong ami olsem, “Mi no inap pait bikos mi soldia bilong Krais.” Ol i bringim em i go long kot bilong ami, na ol i tok em bai kalabus 10-pela yia. Mipela i kirap nogut tru!

Long 1941, ol ami bilong ol narapela kantri i kam long Grik na Nicolas i lusim kalabus. Em i go bek long Karítsa, na bikbrata bilong mi, Ilias, i givim planti askim long em long ol tok bilong Baibel. Mi putim yau long ol. Bihain, mi, Ilias, na liklik susa, Efmorfia, i stadi long Baibel na go oltaim long ol miting bilong ol Witnes. Long 1942, mipela 3-pela i dediket long Jehova na kisim baptais. Bihain, 4-pela moa bratasusa bilong mipela i kamap Witnes.

Long 1942, Karítsa Kongrigesen i gat 9-pela yangpela  bratasista, em krismas bilong ol i namel long 15 na 25. Mipela olgeta i save olsem ol bikpela hevi bai kamap. Mipela i save bung wantaim na stadi long Baibel, singim ol song bilong lotu, na beten. Long dispela rot, mipela i strongim bilip bilong mipela.

Demetrius na ol pren bilong em long Karítsa

PAIT INSAIT LONG KANTRI

Taim Wol Woa 2 i wok long pinis, lain Komiunis bilong Grik i birua long gavman Grik, na dispela i kirapim bikpela pait long kantri. Ol paitman bilong lain komiunis i stap long kantri sait na fosim ol manmeri long joinim ol. Taim ol i kam long ples, ol i bagarapim ol samting na kidnepim 3-pela yangpela Witnes—mi, Antonio Tsoukaris, na Ilias. Mipela i tokim ol olsem mipela Kristen na mipela i no save pait, tasol ol i fosim mipela long mats i go long Maunten Olympus—mipela i wokabaut inap olsem 12 aua bilong i go kamap long hap.

Bihain liklik, wanpela ofisa bilong lain komiunis i odaim mipela long joinim wanpela grup bilong pait, stil, na bagarapim ol samting. Taim mipela i tokim em olsem ol Kristen tru i no save pait long ol narapela man, em i kros na kisim mipela i go long jeneral bilong ol. Taim mipela i mekim wankain tok long dispela jeneral, em i tok: “Orait, kisim donki na go long ples bilong pait, na bringim ol man i kisim bagarap i go long haus sik.”

Mipela i tokim em: “Olsem wanem sapos ol soldia bilong gavman i lukim mipela? Ol bai ting mipela ol man bilong pait.” Jeneral i tok: “Kisim bret i go long ol lain i stap long ples bilong pait.” Mipela i tokim em: “Tasol olsem wanem sapos wanpela ofisa i lukim mipela i go wantaim donki na em i tokim mipela long karim ol samting bilong pait i go long ol man i pait?” Dispela tok i mekim jeneral i tingting inap longpela taim liklik. Bihain em i bikmaus na tok: “Yupela inap lukautim ol sipsip! Stap long maunten na mekim dispela wok.”

Pait i kamap long olgeta hap bilong kantri. Mipela i pilim olsem i no gat rong long mipela i lukautim ol sipsip. Ilias em bikbrata, olsem na wanpela yia bihain, ol i larim em i go bek long ples long lukautim wido mama bilong mipela. Antonio i sik, olsem na ol i larim em i go bek long ples. Tasol mi stap yet olsem kalabusman.

Ami bilong Grik i pait strong na ol i wok long daunim ol komiunis. Lain komiunis husat i kalabusim mi, ol i kisim mi na mipela i bihainim ol maunten long ranawe i go long Albenia. Taim mipela i kamap klostu long boda, mipela i luksave olsem ol soldia bilong Grik i banisim mipela. Lain komiunis i pret na ranawe. Mi hait baksait long wanpela diwai i bin pundaun, na ol soldia bilong Grik i bungim mi.

Taim mi tokim ol soldia bilong Grik olsem lain komiunis i kalabusim mi, ol i laik painimaut moa long mi, olsem na ol i kisim mi i go long kem bilong ami klostu long Véroia—taun Beria em Baibel i stori long en. Ol i tokim mi long digim baret bilong ol soldia. Taim mi tok nogat, komanda i givim oda bilong kalabusim mi long ailan Makrónisos (Makronisi), em ailan bilong kalabusim ol man.

AILAN I GAT NEM NOGUT

Makrónisos em ston ailan i drai olgeta na i stap long nambis bilong Attica. Em i stap 50 kilomita  longwe long Atens. Ailan i longpela inap 13 kilomita na braitpela bilong en em 2.5 kilomita. Tasol long 1947 i go inap 1958, winim 100,000 kalabusman i go long dispela ailan; sampela em ol lain komiunis, na ol lain ol narapela i saspek long ol, na ol lain i pait long bipo, na planti Witnes Bilong Jehova.

Taim mi go long dispela ailan long kirap bilong 1949, ol i tilim ol kalabusman long sampela kem. Ol i putim mi wantaim sampela handret man long kem i no gat planti gad long en. Inap 40 man i slip long haus sel we 10-pela man tasol inap slip long en. Mipela i dringim wara nogut na kaikai bin na egplan. Das na win i bagarapim mipela. Tasol mipela i no pulim ol ston i go i kam—em strongpela panismen i save bagarapim bodi na tingting bilong planti kalabusman.

Wantaim ol narapela Witnes i stap kalabus long Ailan Makrónisos

Wanpela taim mi wokabaut long nambis na mi bungim sampela Witnes em ol i stap long ol narapela kem. Mipela i amamas tru long bungim narapela narapela! Mipela i no laik bai ol gad i painimaut long bung bilong mipela, olsem na mipela i bung wan wan taim. Mipela i bihainim savetingting na autim tok long ol kalabusman, na bihain sampela bilong ol i kamap Witnes Bilong Jehova. Na tu, mipela i save beten na olgeta dispela samting i helpim mipela long stap strong long bilip.

BIKPELA HEVI TRU I PAINIM MI

Bihain long 10-pela mun, ol woda i tok mi mas werim yunifom bilong ami. Taim mi tok nogat, ol i pulim mi go long komanda bilong kem. Mi raitim tok long pepa na givim long komanda. Mi raitim tok olsem: “Mi laik i stap soldia bilong Krais tasol.” Komanda i mekim ol tok bilong pretim mi, na bihain em i salim mi i go long man i stap olsem nambatu bilong em, em asbisop bilong lotu Otodoks bilong Grik, na em i werim olgeta bilas bilong pris. Mi no surik long yusim ol tok bilong Baibel long bekim ol askim bilong em, olsem na em i belhat nogut tru na bikmaus na tok: “Kisim em i go ausait. I hatwok tru long senisim tingting bilong em!”

Long neks moning, ol soldia i fosim mi gen long werim yunifom bilong ami. Taim mi tok nogat, ol i paitim mi long han bilong ol na ol i yusim tu strongpela kopi stik. Ol i kisim mi go long haus sik bilong kem long painimaut sapos ol bun bilong mi i bruk o nogat, na bihain ol i kisim mi go bek long haus sel bilong mi. Ol i mekim olsem long mi inap 2-pela mun.

Ol soldia i lukim olsem mi no inap lusim bilip bilong mi, olsem na ol i traim narapela rot bilong pundaunim mi. Ol i putim ol han bilong mi i go long baksait bilong mi na pasim long rop, na ol i yusim ol rop long paitim aninit bilong 2-pela lek bilong mi. Taim ol i wok long paitim mi, mi tingim tok bilong Jisas: “Sapos . . . ol man i krosim yupela na mekim nogut long yupela . . . , orait yupela i ken amamas. Yupela i ken belgut na amamas tru, long wanem, pe bilong yupela long heven bai i bikpela tru. Ol man i bin mekim ol wankain pasin long ol profet i bin stap paslain long yupela.” (Mat. 5:11, 12) Ol i paitim mi inap longpela taim tru i go inap mi airaun na mi pundaun.

Taim mi kirap, mi luksave olsem mi stap long sel, na mi no gat kaikai, wara, o wanpela blanket. Tasol mi stap bel isi na mi no tingting planti. Olsem Baibel i tok promis, “bel isi bilong God” i ‘lukautim bel na tingting bilong mi.’ (Fili. 4:7) Long de bihain, wanpela soldia i givim mi bret, wara, na saket. Narapela soldia i givim sampela kaikai long mi. Mi pilim tru pasin laikim bilong Jehova long lukautim mi.

Ol bosman i skelim olsem mi wanpela bikhetman i gat strongpela het, olsem na ol i salim mi i go long Atens long bikpela kot bilong ol ami. Dispela kot i salim mi i go stap kalabus inap 3-pela yia long Yíaros (Gyaros), em wanpela ailan i stap longwe inap 50 kilomita long hap is bilong Makrónisos.

“MIPELA INAP TRASTIM YUPELA”

Haus kalabus long Yíaros i bikpela na ol i wokim long retpela brik na winim 5,000 kalabusman i stap long en. Na tu, 7-pela Witnes Bilong Jehova i stap long dispela kalabus bikos ol i no joinim ami. I gat tambu long pasin bilong stadi long Baibel, tasol mipela i bung long pasin hait na stadi. Long pasin hait, mipela i kisim kopi bilong ol Wastaua, na raitim ol tok bilong en bambai mipela i ken yusim long stadi.

 Wanpela taim mipela i hait na stadi, na wanpela gad i wokabaut i kam long hap mipela i bung long en na em i kisim olgeta litresa bilong mipela. Ol i singautim mipela i go long ofis bilong nambatu bosman bilong haus kalabus, na mipela i ting olsem em bai surikim haptaim bilong mipela long i stap kalabus. Tasol em i tok: “Mipela i save yupela i husat, na mipela i rispektim bilip bilong yupela. Mipela i save olsem mipela inap trastim yupela. Yupela i ken go bek na mekim wok bilong yupela.” Em i makim sampela bilong mipela long mekim ol liklik wok. Mipela i tenkyu tru long Jehova. Mipela i stap gut long God, olsem na maski mipela i stap long kalabus, dispela i litimapim nem bilong Jehova.

Mipela i stap strong long bilip na dispela i kamapim planti gutpela samting. Wanpela kalabusman em profesa bilong matematiks. Em i lukim gutpela pasin bilong mipela, na dispela i kirapim em long givim ol askim bilong painimaut long bilip bilong mipela. Long kirap bilong 1951, ol i larim mipela ol Witnes i kamap fri na lusim kalabus, na dispela profesa tu i lusim kalabus. Bihain, em i kisim baptais na kamap wanpela Witnes na em i insait long fultaim sevis.

STAP YET OLSEM SOLDIA

Mi na meri bilong mi, Janette

Taim mi lusim kalabus, mi go bek long famili bilong mi long Karítsa. Bihain, mi na sampela man long kantri bilong mi, mipela i muv i go long Melbourne, long Australia. Mi bungim Janette, em wanpela gutpela sista, na mitupela i marit. Mipela i gat 4-pela pikinini, wanpela boi na 3-pela gels, na mipela i skulim ol long bihainim pasin Kristen.

Long nau, mi winim 90 krismas, tasol mi mekim yet wok elda. Mi bin kisim planti bagarap long bodi bilong mi, olsem na taim mi go autim tok, sampela taim bodi na lek bilong mi i save pen. Maski bikpela hevi i painim mi, mi tingting strong yet long i stap olsem “soldia bilong Krais.”—2 Tim. 2:3.