Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Wastaua—Stadi Edisen  |  Epril 2017

Pasin Bilong Yu Long Volantia i Ken Litimapim Nem Bilong Jehova!

Pasin Bilong Yu Long Volantia i Ken Litimapim Nem Bilong Jehova!

“Litimapim nem bilong Bikpela. . . . Olgeta man i amamas na ol i laik pait.”—HET. 5:2.

OL SINGSING: 84 [25], 75 [28]

1, 2. (a) Elifas na Bildat i tok wanem long pasin bilong yumi long mekim wok bilong God? (b) Olsem wanem Jehova i kamapim klia tingting bilong em?

“ATING yumi man nating inap mekim ol samting bilong helpim God, a? Nogat tru. Ol saveman tu i no inap. Ol inap helpim ol yet tasol. Yu ting stretpela pasin bilong yu bai i helpim God I Gat Olgeta Strong long mekim wok bilong en, a? Na sapos yu mekim gutpela pasin tasol, yu ting dispela bai i mekim gut long God, a? Nogat tru.” (Jop 22:1-3) Olsem wanem? Sampela taim yu laik save long ol bekim bilong ol kain askim olsem? Taim Elifas bilong taun Teman i givim ol dispela askim long Jop, ating Elifas i save olsem bekim bilong ol dispela askim em nogat. Pren bilong em, Bildat bilong taun Suha i tok yumi ol man bilong graun i no inap kamap stretpela man long ai bilong God.—Ritim Jop 25:4.

2 Ol dispela giaman pren i tok, maski yumi stap gut long Jehova na mekim wok bilong em, wok bilong yumi i no inap helpim em; yumi olsem ol bataplai ol man i krungutim, ol liklik binatang, na ol liklik snek bilong graun. (Jop 4:19; 25:6) Pastaim yumi inap ting olsem Elifas na Bildat i soim pasin daun. (Jop 22:29) Em tru olsem sapos yumi sanap antap long wanpela bikpela maunten o yumi stap long balus na lukluk i kam daun long graun, olgeta samting  bai i luk olsem ol i liklik tru na ol i samting nating. Jehova i stap antap tru na em i lukluk i kam daun long graun na lukim ol wok yumi mekim bilong sapotim Kingdom bilong em. Olsem na yu ting em i tingim hatwok bilong yumi olsem samting nating? Jehova i kamapim klia tingting bilong em taim em i stretim Elifas, Bildat, na Sofar long tok giaman ol i mekim, tasol em i amamas long Jop na em i kolim Jop olsem “wokman bilong mi.” (Jop 42:7, 8) Dispela i soim klia olsem yumi ol man bilong graun “inap mekim ol samting bilong helpim God.”

“DISPELA BAI I HELPIM GOD OLSEM WANEM?”

3. (a) Elihu i tok wanem long pasin bilong yumi long mekim wok bilong Jehova? (b) Tok bilong em i makim wanem samting?

3 Jehova i no stretim Elihu taim Elihu i askim olsem: “Sapos yu mekim stretpela pasin oltaim, dispela bai i helpim God olsem wanem? Na em bai i kisim wanem gutpela samting long han bilong yu?” (Jop 35:7) Yu ting tok bilong Elihu i makim olsem hatwok bilong yumi bai lus nating taim yumi mekim wok bilong God? Nogat. Tok bilong em i makim olsem Jehova i no sot long wanpela samting na em i nidim yumi long mekim wok bilong em. Jehova i gat olgeta samting. I no olsem em i nidim wok bilong yumi long mekim em i kamap maniman, o kisim bikpela strong moa. Tasol God i givim yumi save, strong, na ol gutpela pasin, na em i skelim hau yumi yusim ol dispela samting.

4. Taim yumi soim pasin marimari long ol narapela, i olsem yumi mekim wanem long Jehova?

4 Taim yumi soim gutpela pasin long ol wokman bilong Jehova, em i tingim olsem yumi soim dispela pasin long em. Sindaun 19:17 i tok: “Sapos yu marimari long rabisman na yu givim samting long em, i olsem yu larim Bikpela i dinau long yu, na bihain Bikpela bai i bekim dispela dinau.” Yu ting dispela skripsa i makim olsem Jehova i tingim olgeta samting yumi mekim bilong helpim ol rabisman? Yu ting Krieta bilong heven na graun i pilim olsem em i gat dinau long ol manmeri nating husat i soim pasin marimari long ol narapela, na em bai orait long ol na blesim ol? Yes, Pikinini bilong God yet i strongim dispela tok.—Ritim Luk 14:13, 14.

5. Yumi bai skelim wanem ol askim?

5 Jehova i tokim profet Aisaia long stap olsem mausman bilong em, na kamapim klia olsem God i amamas long ol man bilong graun inap wok wantaim em long inapim samting em i tingting pinis long mekim. (Ais. 6:8-10) Aisaia i amamas long mekim dispela wok. Long nau, planti tausen manmeri i mekim wankain tok olsem Aisaia, na ol i tok, “Mi stap! Salim mi,” na ol i mekim ol bikpela wok insait long oganaisesen bilong Jehova. Ating ol Kristen i laik save long bekim bilong ol dispela askim: ‘Wok bilong mi em i bikpela samting o nogat? Jehova i soim gutpela pasin na em i larim mi tu long mekim wok bilong em. Olsem na sapos mi mekim liklik wok tasol, em bai mekim ol samting bilong truim tok bilong em long Baibel o nogat?’ Ol samting i kamap long taim bilong Debora na Barak i bekim ol dispela askim.

PRET I DAUNIM OL, NA GOD I STRONGIM OL

6. Wanem samting i no wankain long lain Israel na lain ami bilong Jabin?

6 King Jabin bilong Kenan i “mekim nogut tru” long lain Israel inap 20 yia. Ol manmeri i pret long raun long ples klia. Ol i no gat ol strongpela spia na ol strongpela bainat, na ol i no gat ol plang bilong banisim ol spia bilong ol birua. Ol i sot tru long ol samting bilong pait; tasol ol birua bilong ol i gat 900 karis ain.—Het. 4:1-3, 13; 5:6-8. *

7, 8. (a) Jehova i givim wanem tok long Barak? (b) Olsem wanem lain Israel i winim ol ami bilong Jabin? (Lukim piksa long kirap bilong stadi.)

 7 Long rot bilong profet meri Debora, Jehova i tokim Barak olsem: “Yu go na kisim 10,000 man long lain bilong Naptali na long lain bilong Sebulun na bungim ol long maunten Tabor. Bai mi Bikpela, mi bringim Sisera, namba wan ofisa bilong ami bilong King Jabin, i kam pait long yupela long wara Kison. Em bai i kam wantaim ol karis na ol soldia bilong em, tasol maski, bai mi givim ol long han bilong yupela.”—Het. 4:4-7.

8 Tok i go long olgeta lain Israel. Ol man husat i amamas long i go long pait, ol i go bung long maunten Tabor. Kwiktaim Barak i bihainim tok bilong Jehova. (Ritim Hetman 4:14-16.) Taim ol i mekim bikpela pait long taun Tanak, bikpela ren i pundaun na i mekim graun i malumalum olgeta. Barak i ronim lain ami bilong Sisera i go olgeta long Haroset Hagoim inap 24 kilomita. Sisera i lusim karis bilong em na ranawe i go long Sananim, ating dispela ples i stap klostu long taun Kedes. Em i ranawe na em i go kamap long haus bilong Jael. Jael i welkamim em na em i hait long haus bilong Jael. Jael em meri bilong Heber, em man bilong lain Kin. Sisera i taiet tru, na em i slip. Taim em i slip, Jael i kisim hama na wanpela nil diwai na em i paitim long het bilong Sisera na kilim em i dai. (Het. 4:17-21) Lain Israel i pinisim olgeta birua bilong ol! *

STRETPELA TINGTING LONG FULTAIM SEVIS

9. Hetman 5:20, 21 i stori olsem wanem long pait i kamap namel long lain Israel na ami bilong Sisera?

9 Long Buk Hetman, sapta 4 i stori long ol samting em sapta 5 i no stori long en, na sapta 5 i stori long ol samting em sapta 4 i no stori long en. Olsem na i gutpela long stadi long dispela 2-pela sapta long wankain taim. Hetman 5:20, 21 i tok: “Ol sta long skai i pait. Ol i bihainim rot bilong ol antap, na ol i pait long Sisera. Tait bilong wara Kison i karim ol i go.” Yu ting ol ensel i helpim lain Israel, o ol ston bilong ples antap, kain olsem ol suting sta, i pundaun i kam daun? Baibel i no stori tumas long dispela samting. Tasol yumi ken bilip olsem God i mekim na long dispela taim stret bikpela ren i pundaun long ples ol i pait long en, na graun i malumalum olgeta na 900 karis bilong pait i pas long graun. Inap 3-pela taim Hetman 4:14, 15 i tok God i winim pait. Inap 10 tausen man Israel i volantia long i go long pait, na i no gat wanpela bilong ol inap tok olsem ol i daunim ol birua long strong bilong ol yet.

10, 11. Bilong wanem ensel i mekim strongpela tok bilong daunim taun Meros?

10 Debora na Barak i mekim wanpela singsing i litimapim nem bilong Jehova bikos em i wokim mirakel na ol i winim pait, na ol i tok: “Ensel bilong Bikpela i tok, ‘Taun Meros i mas kisim bagarap. Na ol man i stap long dispela taun ol tu i mas kisim bagarap. Long wanem, ol i no bin i kam bilong helpim Bikpela. Ol i no i kam olsem ol soldia bilong helpim Bikpela long pait.’”—Het. 5:23.

11 Ating tok bilong ensel i kamap tru na taun Meros i bagarap olgeta, olsem na yumi no inap lukim dispela taun long nau. Ating ol manmeri bilong dispela taun i no volantia long i go long pait. Sapos dispela taun i stap long rot we Sisera i ranawe long en, orait ol manmeri inap kalabusim Sisera, tasol ol i no mekim olsem. Ating ol i harim olsem Jehova i askim ol man long volantia long i go long pait. Inap olsem 10 tausen man long ol taun i stap klostu long ol i volantia long mekim olsem. Ating ol manmeri bilong taun Meros i lukim Sisera i ran namel long ol strit bilong ol na em i painim ples hait. Ol inap mekim samting em Jehova i laik bai kamap long Sisera, na ol inap kisim blesing. Ol i mas mekim disisen, olsem ol bai daunim man i birua long lain bilong God o nogat, tasol ol i no mekim  wanpela samting. Pasin bilong ol i narapela kain tru long pasin bilong Jael long strongim bel na mekim samting em ol ves i kamap bihain i stori long en!—Het. 5:24-27.

12. (a) Olsem Hetman 5:9, 10 i stori long en, olsem wanem pasin bilong ol manmeri i narapela narapela? (b) Dispela i mas kirapim yumi long mekim wanem?

12 Long Hetman 5:9, 10, yumi inap lukim olsem pasin bilong ol man i go wantaim Barak long pait i narapela kain long pasin bilong ol man husat i no go long pait. Debora na Barak i tok amamas long “ol ofisa bilong ami bilong Israel” em ol i volantia long i go wantaim ol man bilong pait. Pasin bilong ol i narapela kain tru long pasin bilong ol “man i save sindaun . . . long ol waitpela donki,” na ol i no laik volantia long i go long pait! Na tu, pasin bilong ol dispela ofisa i narapela kain tru long pasin bilong ol “man i save sindaun long satel,” na ol i laikim gutpela sindaun! Ol man husat i “wokabaut long lek,” ol i no laik mekim wok i gat hatwok long en. Pasin bilong ol i narapela kain long pasin bilong ol man i go wantaim Barak na ol i pait long maunten ples bilong Tabor we i gat ol bikpela ston, na ples daun bilong Kison we graun i malumalum olgeta! Ol man husat i tingting tasol long amamasim ol yet, Baibel i mekim dispela tok long ol, “Yupela i mas tokaut long dispela samting”! Yes, ol i mas skelim na tokaut long samting i pasim ol long bihainim laik bilong Jehova. Dispela i wankain tu long ol manmeri long nau em ol i no laik givim bel olgeta long mekim wok bilong God.

13. Olsem wanem pasin bilong lain Ruben, Dan, na Aser i narapela kain long pasin bilong lain Sebulun na Naptali?

13 Ol man husat i volantia long i go long pait, ol yet i lukim ol samting Jehova i mekim bilong soim klia olsem em i stap Nambawan King. Olsem na taim ol i stori na “tokaut long Bikpela i win” long pait, ol inap stori gut long ol samting ol yet i lukim long ai bilong ol. (Het. 5:11) Tasol Hetman 5:15-17 i stori long ol manmeri bilong lain Ruben, Dan, na Aser. Baibel i tok, ol i lusim bikpela haptaim long inapim laik bilong ol yet long sait bilong mani kago—ol i gat ol sipsip, ol nambis, na ol sip—na ol i no tingim wok bilong Jehova. Tasol lain Sebulun na lain Naptali i sambai long Debora na Barak, na ol i go long pait na “klostu ol i kisim bagarap long ples bilong pait.” (Het. 5:18) Yumi inap kisim bikpela skul long pasin bilong dispela 2-pela lain long volantia.

 “LITIMAPIM NEM BILONG BIKPELA”

14. Long nau, olsem wanem yumi inap soim olsem yumi stap daun long wok bos bilong Jehova?

14 Long nau, yumi no volantia long mekim pait tru, tasol yumi inap strongim bel long mekim wok autim tok. Oganaisesen bilong Jehova i nidim planti manmeri moa long volantia long mekim wok. Planti milion brata, sista, na ol yangpela manmeri i volantia long mekim wok painia, wok long Betel, mekim wok konstraksen bilong sanapim ol Haus Kingdom, na helpim wok bilong ol kibung. Tingim tu ol elda husat i mekim bikpela wok wantaim Hospital Lieson Komiti na mekim wok bilong oganaisim ol kibung. Yu ken bilip tru olsem Jehova i tingim tru pasin bilong yu long amamas long volantia, na em i no inap lusim tingting long dispela pasin.—Hib. 6:10.

Paslain long yu mekim disisen, yu mas skelim olsem dispela disisen bai mekim wanem long famili na kongrigesen bilong yu (Lukim paragraf 15)

15. Yumi ken mekim wanem na bai yumi no ken larim ol narapela samting i pasim yumi long mekim wok bilong Jehova?

15 Yumi olgeta wan wan i ken askim yumi yet olsem: ‘Mi amamas long larim ol narapela tasol i mekim bikpela wok moa? Mi larim laik bilong bungim mani kago i pasim mi long volantia long mekim wok? Wankain olsem Barak, Debora, Jael, na 10 tausen man husat i volantia long i go pait, mi bilip na strongim bel long yusim olgeta samting mi gat long mekim wok bilong Jehova? Sapos mi tingting long i go stap long narapela taun o kantri na mekim wok mani, orait olsem wanem? Mi beten na skelim wanem ol samting bai kamap long famili na kongrigesen bilong mi?’ *

16. Yumi inap givim wanem samting long Jehova?

16 Jehova i larim yumi long mekim wok bilong sapotim wok bos bilong em, na long dispela rot em i givim biknem long yumi. Satan i bin pulim ol man long sapotim wok bos bilong em, olsem na taim yu mekim disisen long mekim wok bilong Jehova, dispela em i bikpela samting. Jehova bai amamas tru bikos yu bilip na yu stap gut long em, na dispela i kirapim yu long mekim wok volantia. (Snd. 23:15, 16) Taim yu mekim wok bilong God, dispela i opim rot na em inap bekim tok long Satan. (Snd. 27:11) Olsem na taim yu stap gut long Jehova na bihainim tok bilong em, i olsem yu givim gutpela samting tru long Jehova, na dispela i mekim em i amamas tru.

17. Tok bilong Hetman 5:31 i givim wanem skul long yumi long ol samting bai kamap bihain?

17 Klostu nau dispela graun bai pulap long ol manmeri husat i laik stap daun long wok bos bilong Jehova wanpela tasol. Yumi laik tru long lukim dispela de i kamap! Yumi laik mekim wankain singsing olsem Debora na Barak, ol i singsing olsem: “Bikpela, . . . ol birua bilong yu i ken i dai. Tasol ol pren bilong yu i ken lait olsem lait bilong san i kamap.” (Het. 5:31) Dispela tok bai kamap tru taim Jehova i pinisim ol manmeri nogut bilong Satan! Taim pait bilong Armagedon i kirap, bai i no gat wok long ol manmeri long volantia long mekim pait bilong daunim birua. Long dispela taim, yumi bai ‘sanap na lukluk tasol, na bai yumi lukim Bikpela i helpim yumi na winim pait.’ (2 Sto. 20:17) Tasol long nau, planti rot i op long yumi inap givim bel tru long sapotim wok bilong Jehova.

18. Taim yu mekim wok volantia, dispela inap mekim wanem long ol manmeri yu helpim?

18 “Litimapim nem bilong Bikpela. . . . Olgeta man i amamas na ol i laik pait”! Debora na Barak i mekim dispela song bilong kamapim amamas bilong ol long winim pait, na ol i no singim dispela song long ol man o animal, nogat, ol i singim dispela song long God Antap Tru. (Het. 5:1, 2) Long nau tu, pasin bilong yu long volantia i ken kirapim ol lain yu helpim, na ol i ken “litimapim nem bilong Bikpela”!

^ par. 6 Dispela ain i olsem longpela huk na em i sap tru. Ol dispela ain i stap long hap bilong ol wil long sait sait bilong karis. Olsem na ol man bai pret long i go klostu long ol dispela strongpela karis bilong pait!

^ par. 8 Sampela stori moa bilong dispela pait i stap long atikol “Mi Stap Olsem Wanpela Mama Bilong Lukautim Israel” long Wastaua bilong Ogas 1, 2015, p. 12-15.

^ par. 15 Lukim atikol “Tingting Planti Long Mani,” long Wastaua bilong Julai 1, 2015.