Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Wastaua—Stadi Edisen  |  Disemba 2017

“Mi Save Em Bai Kirap Bek”

“Mi Save Em Bai Kirap Bek”

Pren bilong yumi Lasarus, em i slip. Tasol mi bai go long hap na kirapim em.”JON 11:11.

OL SINGSING: 142 [54], 129 [51]

1. Marta i bilip long wanem samting bai kamap long Lasarus long bihain? (Lukim piksa long kirap bilong stadi.)

MARTA em i gutpela pren na disaipel bilong Jisas. Em i krai sori bikos brata bilong em Lasarus i dai. Olsem wanem? I gat wanpela samting we inap pinisim bel sori bilong em? Jisas i tokim em: “Brata bilong yu bai kirap bek.” Dispela tok i no pinisim olgeta bel sori bilong Marta, tasol em i wanbel long tok Jisas i mekim. Marta i tok: “Mi save em bai kirap bek long las de.” (Jon 11:20-24) Marta i bilip olsem Lasarus bai kirap bek long bihain. Jisas i wokim wanpela mirakel. Long dispela de yet, em i kirapim bek Lasarus.

2. Bilong wanem yu laik holim wankain bilip olsem bilong Marta?

2 Yumi no ken ting olsem Jisas o Papa bilong em bai wokim kain mirakel olsem long nau. Tasol olsem wanem? Yu bilip olsem wanpela em yu laikim tru bai kirap bek long bihain? Ating poroman marit bilong yu, mama o papa bilong yu, o ol bubu bilong yu i dai. O ating yu krai sori long pikinini bilong yu i dai. Yu laik tru long hagim em, toktok wantaim em, na lap wantaim em. Wankain olsem Marta, yu inap mekim dispela tok, ‘Mi save olsem ol  lain mi laikim tru em ol i dai pinis, ol bai kirap bek.’ Tasol em i bikpela samting long wan wan Kristen i mas tingim risen na ol i bilip long kirap bek.

3, 4. Olsem wanem ol mirakel Jisas i wokim i bin strongim bilip bilong Marta?

3 Marta i stap klostu long Jerusalem, na ating em i no lukim Jisas i kirapim bek pikinini man bilong wido meri klostu long taun Nain long Galili. Maski i olsem, ating em i harim stori bilong dispela samting. Na tu, ating Marta i harim stori bilong Jisas i kirapim bek pikinini meri bilong Jairus. Ol lain i stap long haus bilong Jairus, “ol i save olsem liklik gel i dai pinis.” Tasol Jisas i holim han bilong em na i singaut olsem: “Liklik gel, yu kirap!” Na wantu em i kirap. (Luk 7:11-17; 8:41, 42, 49-55) Marta na susa bilong em Maria ol i save olsem Jisas inap oraitim ol sikman. Olsem na ol i ting olsem sapos Jisas i stap wantaim ol, Lasarus i no inap dai. Tasol Lasarus i dai pinis, olsem na wanem samting bai painim em long bihain? Marta i tok olsem Lasarus bai kirap bek long bihain, “long las de.” Bilong wanem Marta i bilip long kirap bek? Bilong wanem yu inap bilip tru olsem ol lain em yu laikim tru, ol bai kirap bek long bihain?

4 I gat risen na yu inap bilip olsem ol man i dai pinis ol bai kirap bek. Tok Bilong God bai helpim yu long luksave long sampela samting we inap strongim bilip bilong yu olsem ol lain yu laikim tru, ol bai kirap bek long bihain.

OL STORI I STRONGIM BILIP!

5. Wanem samting i strongim bilip bilong Marta olsem Lasarus bai kirap bek?

5 Olsem yumi stori long kirap bilong stadi, Marta i mekim dispela tok: “Mi save em bai kirap bek.” Em i no tok, ‘Mi laik bai em i kirap bek.’ Marta i bilip olsem Lasarus bai kirap bek, long wanem, em i harim pinis stori bilong ol mirakel Jisas i wokim paslain long em i kirapim wok autim tok. Taim Marta i yangpela yet, em i kisim save long ol dispela samting taim em i stap long haus na long taim em i go long sinagog. Yumi ken skelim 3-pela stori bilong kirap bek i stap long Baibel.

6. (a) Elaija i wokim wanem mirakel? (b) Olsem wanem stori bilong Elaija i helpim Marta?

6 Namba 1 taim Baibel i stori long kirap bek em long taim bilong profet Elaija. God i givim strong long Elaija long wokim ol mirakel. Long taun Sarefat, em wanpela taun long kantri Fonisia, wanpela wido meri i mekim gut long profet Elaija. Olsem na God i wokim mirakel na plaua na oil bilong dispela meri i no sot. Em na pikinini man bilong em i gat inap kaikai bilong lukautim ol yet. (1 Kin. 17:8-16) Bihain, pikinini man bilong dispela wido meri i sik na em i dai. Olsem na Elaija i helpim dispela wido meri. Elaija i putim han antap long bodi bilong pikinini i dai na em i beten olsem: “God, Bikpela bilong mi, yu ken givim laip long dispela pikinini gen.” God i harim beten bilong Elaija na i givim laip long pikinini. Dispela em namba 1 taim Baibel i stori long kirap bek. (Ritim 1 King 17:17-24.) Yumi bilip olsem Marta i kisim save long dispela narakain samting i bin kamap, na dispela i strongim bilip bilong em long kirap bek.

7, 8. (a) Elisa i mekim wanem bilong mekim isi bel bilong mama i krai sori? (b) Elisa i wokim mirakel na dispela i kamapim klia wanem samting?

7 Namba 2 taim Baibel i stori long kirap bek em long taim bilong profet Elisa, em man i kisim ples bilong profet Elaija. Wanpela meri long Sunem husat i gat planti mani kago i mekim gutpela pasin long Elisa. Long rot bilong profet Elisa, God i truim tok promis bilong em na em i blesim dispela meri na man bilong em na i givim wanpela pikinini man long ol. Sampela yia bihain, dispela pikinini  i dai. Tingim hau dispela mama i pilim taim pikinini bilong em i dai. Man bilong em i tok orait, na em i wokabaut inap 30 kilomita bilong i go lukim Elisa long maunten Karmel. Profet Elisa i salim wokman bilong em, Gehasi, i go pas long Sunem. Tasol Gehasi i no inap kirapim bek dispela pikinini. Bihain, mama bilong dispela pikinini na Elisa i kam kamap long Sunem.—2 Kin. 4:8-31.

8 Elisa i stap klostu long bodi bilong pikinini na em i beten. Long rot bilong mirakel, dispela pikinini i kirap bek na bungim mama bilong em! (Ritim 2 King 4:32-37.) Ating dispela meri i tingim stori bilong Hana. Pastaim Hana i no inap karim pikinini, tasol bihain em i karim Samuel. Taim Hana i laik kisim em i go long haus lotu sel, em i beten olsem: “Bikpela . . . i save kisim ol man i dai pinis, na bringim ol i kam bek gen na ol i gat laip.” (1 Sml. 2:6) God i kirapim bek dispela pikinini long Sunem, na dispela i soim klia olsem Em i gat strong long kirapim bek ol man i dai pinis.

9. Olsem wanem Elisa i insait long namba 3 stori bilong kirap bek? Stori long dispela.

9 Sampela yia bihain, narakain samting i painim Elisa. Em i mekim wok profet winim 50 yia, na bihain em “i kisim bikpela sik tru. Klostu em i laik i dai.” Bihain em i dai, na ol i putim bodi bilong em long matmat. Taim bodi bilong Elisa i sting na ol bun tasol i stap, ol birua i kam na mekim nogut long lain Israel. Sampela Israel i laik planim bodi bilong daiman. Tasol taim ol i lukim ol birua, ol i tromoi bodi bilong dispela man long matmat em ol bun bilong Elisa i stap long en. Baibel i tok: “Taim bodi bilong dispela man i go pas long ol bun bilong Elisa, orait laip i kam bek gen long bodi bilong dispela man, na em i kirap.” (2 Kin. 13:14, 20, 21) Tru tumas, ol stori bilong kirap bek i bin strongim bilip bilong Marta olsem God i gat strong long pinisim dai. Tingim olsem wanem ol dispela stori inap strongim yu. Ol kain stori olsem long Baibel inap kirapim yu long bilip olsem God i gat bikpela strong tru.

OL SAMTING I KAMAP LONG TAIM BILONG OL APOSEL

10. Pita i mekim wanem taim Tabita i dai?

10 Long Ol Skripsa Grik, Baibel i stori long ol wokman bilong God i bin kirapim bek sampela man. Jisas i kirapim bek wanpela man taim em i stap ausait long taun Nain na long haus bilong Jairus. Aposel Pita i bin kirapim bek wanpela meri Kristen, em Dorkas, narapela nem bilong en Tabita. Taim Pita i kam kamap long ples em ol bai planim bodi bilong Dorkas, em i sanap klostu long bodi na em i beten. Bihain em i tok: “Tabita, yu kirap!” Tabita i kirap bek, na Pita i “soim ol olsem Tabita i stap laip.” Dispela i mekim na “planti ol i bilip long Bikpela.” Ol i tokaut olsem ol i bilip long Bikpela na ol i luksave olsem Jehova inap kirapim bek ol daiman.—Apo. 9:36-42.

11. (a) Luk i luksave long wanem samting taim em i sekim Yutikus? (b) Taim Yutikus i kirap bek, dispela i mekim wanem long ol narapela?

11 Long narapela taim, sampela manmeri i lukim aposel Pol i kirapim bek daiman. Wanpela taim em i autim tok long Troas, em nau ol i kolim not-wes Teki. Pol i stap long wanpela rum i stap antap na em i stori i go inap long biknait. Wanpela yangpela man, nem bilong em Yutikus, em i sindaun long windo na i wok long putim yau. Tasol em i slip na em i pundaun long namba 3 plua bilong haus i go daun long graun. Luk em wanpela dokta, olsem na ating em i fes man long ran i go sekim Yutikus. Em i luksave olsem Yutikus i no hap indai, nogat. Em i pundaun na dai stret! Pol i kam daun na i holim bodi bilong Yutikus, na em i tokaut olsem: “Laip i stap gen long em.” Ol manmeri i lukim dispela samting na ol i kirap nogut tru! Taim ol i luksave olsem dispela man i dai pinis i kirap bek, ol i “amamas tru.”—Apo. 20:7-12.

STRONGPELA BILIP

12, 13. Yumi bai skelim wanem ol askim long bilip bilong kirap bek?

12 Ol stori yumi skelim pinis inap strongim bilip bilong yu wankain  olsem Marta. Yumi bilip olsem God bilong yumi, em Man i givim laip long yumi, em i gat strong long kirapim bek ol daiman. Yumi amamas long save olsem ol gutpela wokman bilong God olsem, Elaija, Jisas, na Pita i bin stap long taim Jehova i wokim ol dispela mirakel. Tasol olsem wanem long ol lain i dai paslain o bihain long ol dispela lain i wokim ol mirakel? Yu ting ol bai kirap bek? Sapos God i no kirapim bek ol man long taim bilong yumi, orait yu ting ol manmeri i ken bilip olsem God bai kirapim bek ol daiman long bihain? Yu ting ol bai gat wankain bilip olsem bilong Marta, em i tok: “Mi save [brata bilong mi] bai kirap bek long las de”? Bilong wanem Marta i bilip olsem bai i gat kirap bek? Bilong wanem yumi tu i mas bilip olsem?

13 Ol tok bilong Baibel i soim klia olsem ol wokman bilong Jehova i bilip olsem bai i gat kirap bek long bihain. Yumi ken skelim sampela bilong ol dispela bilip manmeri.

14. Taim yumi skelim stori bilong Abraham, yumi kisim wanem skul?

14 Tingim tok God i bin mekim long Abraham long samting em i mas mekim long Aisak. Jehova i tok: “Yu gat wanpela pikinini tasol, Aisak, na yu laikim em tumas. . . . Yu mas givim Aisak long mi olsem ofa bilong paia i kukim olgeta.” (Stt. 22:2) Tingim, Abraham i pilim olsem wanem taim em i harim dispela tok. Jehova i tok promis olsem long rot bilong pikinini bilong Abraham, olgeta lain manmeri bai kisim blesing. (Stt. 13:14-16; 18:18; Rom 4:17, 18) Na tu, Jehova i tok olsem “long Aisak tasol,” ol lain tumbuna bilong Abraham bai kisim blesing. (Stt. 21:12) Tasol olsem wanem bai dispela samting i kamap sapos Abraham i kilim Aisak na givim em olsem ofa? Holi spirit i kirapim Pol long stori olsem Abraham i bilip olsem God inap kirapim bek Aisak. (Ritim Hibru 11:17-19.) Baibel i no tokaut olsem Abraham i ting olsem, sapos em i bihainim tok bilong God, orait God bai kirapim bek Aisak insait long sampela aua, wanpela de, o wanpela wik, nogat. Abraham i no save long wanem taim God bai kirapim bek pikinini bilong em. Tasol em i bilip olsem Jehova bai kirapim bek Aisak.

15. Jop i bilip long wanem samting?

15 Jop i bilip tru olsem ol daiman bai kirap bek long bihain. Em i luksave olsem sapos ol  man i katim wanpela diwai, kru bai gro gen na kamap nupela diwai. Tasol yumi ol man i no olsem. (Jop 14:7-12; 19:25-27) Sapos man i dai, em yet i no inap kirap bek na stap laip. (2 Sml. 12:23; Sng. 89:48) Tasol dispela i no makim olsem God i no inap kirapim bek ol daiman. Jop i bilip olsem Jehova bai makim wanpela taim long tingim em gen. (Ritim Jop 14:13-15.) Jop i no save wanem taim stret bai God i kirapim em bek, tasol em i bilip olsem Em bai tingim em na kirapim em bek long bihain.

16. Ensel i mekim wanem tok bilong strongim Daniel?

16 Ol Skripsa Hibru i stori long narapela bilipman, em Daniel. Inap planti yia em i mekim wok bilong Jehova, na God i lukautim em. Wanpela taim ensel i strongim Daniel na i tok: “God i laikim yu tumas, olsem na yu mas i stap bel isi na yu no ken pret.”—Dan. 9:22, 23; 10:11, 18, 19.

17, 18. Ensel i mekim wanem tok promis long samting bai painim Daniel long bihain?

17 Daniel i gat klostu 100 krismas long dispela taim na klostu nau bai em i dai. Olsem na ating em i tingting planti long wanem samting bai painim em taim em i dai. Yu ting Daniel inap stap laip gen? Yes! Long laspela hap bilong Buk Daniel, God i tokim Daniel: “Nau yu mas i stap strong i go inap long las de. Bai yu dai.” (Dan. 12:13) Daniel i save olsem ol man i dai pinis ol i “no inap mekim wok o tingting o kisim gutpela tingting na save long ples bilong ol man i dai pinis.” (Sav. 9:10) Tasol God i tok promis olsem em bai kirapim bek Daniel long bihain.

18 Ensel i tok moa long profet Daniel olsem: “Bihain bai yu kirap bek na long las de bai yu kisim ol samting God i bin makim bilong yu.” Ensel i no tokaut long wanem taim stret o hamas de Daniel i mas wet i stap bilong kisim ol dispela samting. Daniel bai i dai na malolo. Dispela tok olsem em bai ‘kisim ol samting God i bin makim bilong em’ long bihain, i kamapim klia tok promis bilong kirap bek—truim bilong en bai kamap planti handret yia bihain long em i dai. Dispela samting bai kamap “long las de.” Wanpela Baibel (Jerusalem Bible) i tanim dispela tok promis ensel i mekim long Daniel olsem: “Yu bai kirap bek long las de na kisim ol samting God i bin makim bilong yu.”

Wankain olsem Marta, yu inap bilip tru long kirap bek (Lukim paragraf 19 na 20)

19, 20. (a) Olsem wanem tok Marta i mekim i soim olsem brata bilong em bai kirap bek? (b) Yumi bai skelim wanem ol askim long neks stadi?

19 Marta i save long ol stori bilong Baibel long ol daiman i kirap bek, olsem na em i bilip olsem brata bilong em Lasarus “bai kirap bek long las de.” Tok promis God i mekim long Daniel, na tok Marta i mekim long Jisas inap strongim bilip bilong ol Kristen long nau. Ol man i dai pinis bai kirap bek.

20 Stori bilong ol man i bin kirap bek long bipo i strongim bilip bilong yumi olsem ol daiman bai kirap bek long bihain. Ol manmeri husat i mekim wok bilong God, ol i wet long lukim ol daiman bai kirap bek. Olsem wanem? Yumi mas wet longpela taim long lukim truim bilong dispela tok promis? Wankain olsem Marta i bin mekim, yumi mas bilip na wet long lukim ol daiman i kirap bek. Tasol wanem taim bai dispela samting i kamap? Yumi bai skelim ol dispela askim long neks stadi.