Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Wastaua—Stadi Edisen  |  Disemba 2016

Putim Olgeta Hevi Bilong Yu Long Han Bilong Jehova

Putim Olgeta Hevi Bilong Yu Long Han Bilong Jehova

“God i save wari long yupela, olsem na yupela i mas putim olgeta hevi bilong yupela long han bilong em.”—1 PITA 5:7.

OL SINGSING: 38, 7

1, 2. (a) Bilong wanem yumi no ken kirap nogut taim sampela hevi i painim yumi? (Lukim piksa long kirap bilong stadi.) (b) Yumi bai skelim wanem samting long dispela stadi?

YUMI stap long taim nogut bilong planti hevi. Satan i belhat nogut tru na “em i raun olsem wanpela laion i singaut strong na i painim ol man bilong kaikai.” (1 Pita 5:8; Rev. 12:17) Olsem na sampela taim, yumi ol wokman bilong God i save karim hevi. Long bipo tu, ol gutpela wokman bilong Jehova i bin karim hevi. Kain olsem, King Devit i karim ol hevi we i givim “pen” long em. (Sng. 13:2) Aposel Pol i “wari long ol kongrigesen” na dispela “i putim hevi” long em. (2 Kor. 11:28) Orait yumi ken mekim wanem taim hevi i daunim yumi?

2 Papa bilong yumi long heven i bin helpim ol wokman bilong em long bipo, na long nau em i opim rot long yumi inap kisim helpim taim hevi i daunim yumi. Baibel i tok: “God i save wari long yupela, olsem na yupela i mas putim olgeta hevi bilong yupela long han bilong em.” (1 Pita 5:7) Olsem wanem yu inap putim ol hevi bilong yu long han bilong God? I gat 4-pela rot—pasin bilong beten, ritim Baibel na tingim tingim ol tok bilong en, larim holi spirit bilong Jehova i stiaim yu, na toktok wantaim  wanpela pren yu trastim na stori long em long hevi bilong yu. Taim yumi skelim ol dispela 4-pela rot, traim long luksave long ol samting yu inap mekim.

PUTIM HEVI BILONG YU LONG HAN BILONG JEHOVA

3. Olsem wanem yu inap putim olgeta hevi bilong yu long han bilong Jehova?

3 Namba 1 samting yumi inap mekim em olsem, yumi mas givim bel olgeta long beten long Jehova. Taim sampela samting i kamap na bel bilong yu i no stap isi, o yu pret o tingting planti, orait yu ken beten long Papa long heven na tokim em long olgeta samting i putim hevi long yu. Devit i askim Jehova olsem: “God, yu mas harim beten bilong mi.” Bihain em i tok: “Olgeta hevi yu karim, em yu mas putim long han bilong Bikpela, bai em i karim na bai em i strongim yu.” (Sng. 55:1, 22) Taim yu mekim pinis olgeta samting yu inap mekim bilong stretim hevi, yu ken beten long God, na dispela bai daunim bel hevi bilong yu. Orait olsem wanem beten inap helpim yu na bel hevi i no ken daunim yu?—Sng. 94:18, 19.

4. Taim hevi i painim yumi na yumi tingting planti, bilong wanem yumi mas beten?

4 Ritim Filipai 4:6, 7. Sapos oltaim yumi givim bel tru long beten strong long Jehova, em inap helpim yumi. Em bai mekim tingting na bel bilong yumi i stap isi tru. Planti manmeri i kisim helpim long dispela rot. Hevi i painim ol na ol i tingting planti, tasol God i givim bel isi we i winim tru tingting bilong ol manmeri. Yu tu inap kisim dispela bel isi. “Bel isi bilong God” inap daunim olgeta hevi bilong yu. Yu mas trastim tok promis bilong Jehova, em i tok: “Yupela i no ken pret, long wanem, mi God bilong yupela na mi stap wantaim yupela. Bai mi mekim yupela i kamap strong na bai mi helpim yupela.”—Ais. 41:10.

BEL ISI I KAM LONG BAIBEL

5. Olsem wanem Tok Bilong God inap givim bel isi long yumi?

5 Namba 2 rot bilong kisim bel isi em olsem, yumi mas ritim Baibel na tingim tingim ol tok bilong en. Bilong wanem yumi mas mekim olsem? Baibel i kamapim ol gutpela stiatok bilong helpim yu long abrusim na daunim hevi, o strongim yu long karim hevi. Oltaim yu mas tingim olsem Baibel i kamapim ol gutpela tok bilong helpim yu na givim nupela strong long yu bikos em i kamapim ol savetok bilong Krieta bilong yumi. Taim yu tingim tingim tok bilong God long san na long nait, na yu skelim hau yu inap bihainim ol dispela tok, dispela bai givim bikpela strong long yu. Jehova i kamapim klia olsem sapos yumi ritim Tok Bilong Em, dispela bai helpim yumi long ‘sanap strong na no ken pret,’ na yumi no inap “surik long wanpela samting.”—Jos. 1:7-9.

6. Tok bilong Jisas inap helpim yu olsem wanem?

6 Long Baibel, yumi inap lukim ol tok bilong Jisas we i givim bel isi long yumi. Ol tok bilong em i givim nupela strong long ol manmeri i putim yau long em. Planti manmeri i bihainim em bikos em i mekim isi bel bilong ol man i bel hevi, na strongim ol man i no gat strong. (Ritim Matyu 11:28-30.) Em i helpim gut ol manmeri long sait bilong bilip, strongim bel bilong ol, na givim kaikai long ol. (Mak 6:30-32) Jisas i tok promis olsem em bai sambai long yumi. Em bai helpim yumi long wankain pasin olsem em i bin helpim ol aposel. I no olsem yu mas lukim Jisas long ai tru bilong yu na bai yu inap kisim helpim long em, nogat. Jisas i stap King long heven na em i wok yet long pilim hevi bilong yumi. Olsem na taim yumi gat hevi, em inap soim pasin marimari na “mekim bikpela pasin helpim long yumi long taim stret.” Yes, ol skultok bilong Jisas inap helpim yu long karim hevi, daunim pasin  bilong pret, na bilip na wet long gutpela samting bai kamap bihain.—Hib. 2:17, 18; 4:16.

OL PASIN EM HOLI SPIRIT I KAMAPIM

7. Taim yu askim God long holi spirit na em i givim long yu, olsem wanem dispela bai helpim yu?

7 Jisas i tok promis olsem Papa long heven bai givim holi spirit long ol man i askim Em long holi spirit. (Luk 11:10-13) Namba 3 rot bilong helpim yumi long daunim hevi em olsem, yumi mas kisim ol pasin em holi spirit i save kamapim. Holi spirit i kamapim ol pasin tru bilong God, em Man i gat olgeta strong. (Ritim Galesia 5:22, 23; Kol. 3:10) Taim yu kamapim ol pasin bilong holi spirit, dispela bai helpim yu long pas gut moa wantaim ol narapela, na hevi i no inap kamap namel long yupela. Orait yumi ken stori long olsem wanem ol pasin bilong holi spirit bai helpim yu.

8-12. Olsem wanem ol pasin bilong holi spirit inap helpim yu long daunim o karim ol hevi?

8 “Pasin laikim, amamas, bel isi.” Sapos yu wok strong long soim rispek long ol narapela, dispela bai helpim yu long daunim bel hevi bilong yu. Taim yu sori long ol wanbilip, tingim gut ol, na givim ona long ol, yu no inap mekim ol samting bilong kamapim hevi.—Rom 12:10.

9 “I no les kwik, pasin helpim, gutpela pasin.” Yu bai strongim pasin bilong i stap bel isi wantaim ol narapela taim yu bihainim dispela tok: “Mekim pasin helpim long narapela narapela, na sori tru long ol, na redi long fogivim narapela narapela.” (Efe. 4:32) Yu no inap larim wanpela samting i kamapim hevi namel long yu na ol narapela. Na tu, yu inap daunim ol hevi i kamap long pasin kranki bilong yumi.

10 “Bilip.” Long nau, mani kago i save putim hevi long yumi. (Snd. 18:11) Sapos yu bilip strong olsem Jehova bai lukautim yu, dispela inap helpim yu long karim hevi, o abrusim ol samting we inap putim hevi long yu. Yu inap abrusim planti hevi sapos yu bihainim tok bilong aposel Pol. Em i tok: “Yupela i mas ting olsem ol samting yupela i gat pinis em inap long yupela.” Pol i tok moa olsem: “God i tok: ‘Mi no inap tru long lusim yu o givim baksait long yu long wanpela samting.’ Olsem na yumi gat strongpela bel na tok: ‘Jehova em i helpim bilong mi. Mi no inap pret. Ol man bai mekim wanem long mi?’”—Hib. 13:5, 6.

11 “Pasin isi, na bosim bel.” Yu bai stap gut sapos yu bihainim ol dispela pasin. Yu bai abrusim ol pasin we inap putim hevi long yu, na yu no inap “bel nogut na kros na belhat na bikmaus na tok nogut.”—Efe. 4:31.

12 Pasin daun bai kirapim yu long “stap aninit long strongpela han bilong God” na “putim olgeta hevi bilong [yu] long han bilong em.” (1 Pita 5:6, 7) Taim yu kisim pasin daun, God bai sambai long yu. (Mai. 6:8, NW) Sapos yu luksave olsem yu no gat bikpela strong, na yu sot long gutpela tingting na save, hevi i no inap daunim yu bikos yu bai askim God long helpim yu.

“NO KEN TINGTING PLANTI”

13. Jisas i laik skulim ol disaipel long wanem samting taim em i tok: “No ken tingting planti”?

13 Long Matyu 6:34 (ritim), Jisas i tok: “No ken tingting planti.” Ating yumi inap pilim olsem i hatwok long bihainim dispela tok. Jisas i laik skulim ol disaipel long wanem samting taim em i tok: “No ken tingting planti”? Yumi save olsem olgeta wokman bilong God i save karim hevi. Devit na Pol i luksave long dispela samting. Jisas i laik helpim ol disaipel long luksave olsem sapos ol i tingting planti tumas, dispela i no inap pinisim ol hevi. Olgeta de i gat ol hevi bilong en, olsem na ol Kristen i no ken  tingting planti long ol samting i kamap long bipo na ol samting bai kamap long bihain. Orait, taim yu bihainim skultok bilong Jisas, olsem wanem dispela bai helpim yu long daunim pasin bilong tingting planti?

14. Yu ken mekim wanem bambai yu no ken tingting planti long popaia yu mekim long bipo?

14 Sampela taim hevi inap kamap sapos man i tingim ol samting o popaia em i mekim long bipo. Ating em i bel hevi long wanpela rong em i bin mekim, maski em planti yia i go pinis. King Devit i pilim olsem ol “rong bilong [em] i karamapim [em].” Em i tok: “Bel bilong mi i pilim nogut tru, na mi singaut long bikpela pen.” (Sng. 38:3, 4, 8, 18) Taim dispela hevi i painim Devit, em i mekim wanem? Em i bilip olsem Jehova bai marimari long em na fogivim em. Olsem na em i tok: “Sapos God i lusim pinis rong bilong wanpela man, . . . dispela man i ken amamas.”—Ritim Song 32:1-3, 5.

15. (a) Bilong wanem yu no ken tingting planti long ol samting i kamap long nau? (b) Yu inap mekim wanem bilong daunim hevi? (Lukim blok “Sampela Rot Bilong Daunim Hevi.”)

15 Sampela taim yu inap tingting planti long ol samting i kamap long nau. Kain olsem, ol tok i stap long Song sapta 55 i soim olsem Devit i pret long ol birua husat i laik kilim em. (Sng. 55:2-5) Tasol em i no tingting planti na larim dispela pret i pasim em long bilip long Jehova. Devit i beten oltaim na askim God long helpim em long karim ol hevi, na tu, em i luksave olsem em yet i mas mekim sampela samting bilong daunim hevi i painim em. (2 Sml. 15:30-34) Yu inap kisim skul long samting Devit i mekim. Yu no ken larim pasin bilong tingting planti i daunim yu. Mobeta yu mekim sampela samting bilong daunim hevi, na beten na putim hevi bilong yu long han bilong Jehova.

16. Taim yu tingim mining i stap long nem bilong God, olsem wanem dispela inap strongim bilip bilong yu?

16 Sampela taim, Kristen inap tingting planti sapos em i wari long ol hevi inap kamap bihain. Tasol i no gat wok long tingting planti tumas o wari long ol samting yu no save yet long en. Bilong wanem? Planti taim ol hevi i no bikpela tumas olsem yumi bin ting. Na tu, God i gat bikpela strong i winim tru olgeta kain hevi i painim yu. Nem bilong em i gat dispela mining: “Mi Bai Kamap Wanem Wanem Kain Mi Laikim.” (Kis. 3:14, NW) Mining i stap long nem bilong God i strongim yumi long bilip olsem God bai kamapim ol samting em i laik mekim bilong helpim ol wokman bilong em. Yu ken bilip tru olsem God bai givim gutpela presen long ol manmeri i stap gut long em, na em bai strongim ol long karim hevi bilong ol samting i kamap long bipo, long nau, na long bihain.

TOKTOK GUT WANTAIM NARAPELA

17, 18. Taim yu toktok gut wantaim narapela, olsem wanem dispela inap strongim yu long karim hevi?

17 Namba 4 rot bilong helpim yu long karim hevi em olsem, yu ken toktok gut wantaim wanpela pren yu trastim na stori long  em long hevi bilong yu. Poroman marit, gutpela pren, o wanpela elda long kongrigesen inap helpim yu long daunim pasin bilong tingting planti. “Sapos man i save wari oltaim, em bai i bel hevi tru na tingting bilong en bai i bagarap. Tasol sapos man i mekim gutpela tok long wantok bilong en, orait wantok bai i belgut tru.” (Snd. 12:25) Sapos yu stori gut long hevi i painim yu, dispela inap helpim yu yet long kliagut long hevi bilong yu na yu inap karim dispela hevi. Baibel i tok: “Sapos yu laik mekim sampela wok, orait pastaim yu mas kisim tingting long planti arapela man, na bai wok bilong yu i ken kamap gutpela. Sapos yu no mekim olsem, bai yu hatwok nating.”—Snd. 15:22.

18 Jehova i yusim ol miting bilong olgeta wik long strongim ol Kristen long karim ol hevi. Yu inap bung wantaim ol wanbilip em ol i tingim yu na ol i laik strongim yu. (Hib. 10:24, 25) Long ol miting, yu inap strongim ol narapela na ol inap strongim yu, na dispela bai redim yu long karim hevi.—Rom 1:12.

STAP PREN BILONG GOD—EM BAI STRONGIM YU

19. Bilong wanem yu ken bilip tru olsem God bai strongim yu sapos yu stap pren bilong em?

19 Wanpela elda long Kanada i bin kisim helpim taim em i putim hevi bilong em long han bilong Jehova. Em i mekim wok mani olsem tisa long skul na man bilong givim edvais, na tu, em i gat hevi long pasin bilong tingting planti. Olsem wanem dispela brata i karim hevi bilong em? Em i tok: “Taim mi mekim ol samting bilong strongim pasin bilong mi long i stap pren bilong Jehova, dispela i save strongim mi long karim hevi. Long taim bilong hevi, yumi nidim helpim bilong ol pren na ol wanbilip. Mi save toktok wantaim meri bilong mi na stori gut long ol samting i stap long tingting bilong mi. Ol elda na wasman sekit i helpim mi long holim stretpela tingting long hevi bilong mi. Na tu, mi kisim helpim long ol dokta, na senisim sampela samting mi save mekim, na mi makim sampela haptaim bilong malolo na mekim eksasais bilong helpim bodi. Isi isi mi pilim olsem mi inap karim hevi bilong mi. Taim mi pilim olsem mi no gat strong long karim hevi, mi save putim hevi bilong mi long han bilong Jehova.”

20. (a) Olsem wanem yumi inap putim hevi bilong yumi long han bilong God? (b) Yumi bai stori long wanem samting long neks stadi?

20 Yumi kisim save olsem yumi inap karim hevi taim yumi putim hevi bilong yumi long han bilong God long rot bilong beten, na ritim Baibel na tingim tingim ol tok bilong en. Na tu, yumi inap karim hevi taim yumi kisim ol pasin bilong holi spirit, toktok wantaim wanpela pren yumi trastim na stori long em long hevi bilong yumi, na bung wantaim ol bratasista em ol inap strongim yumi. Neks stadi bai stori long olsem wanem Jehova i stretim rot na yumi inap bilip na wet long kisim blesing long bihain, na dispela i strongim yumi.—Hib. 11:6.