Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Wastaua—Stadi Edisen  |  Disemba 2016

 LAIP STORI

“Kisim Pasin Bilong Olgeta Kain Man”

“Kisim Pasin Bilong Olgeta Kain Man”

“Sapos yu kisim baptais, mi bai lusim yu!” Long 1941, papa bilong mi i mekim dispela tok bilong pretim mama bilong mi. Maski Papa i mekim dispela tok, Mama i mekim disisen long kisim baptais na soim olsem em i dediket pinis long God Jehova. Olsem na Papa i lusim Mama. Long dispela taim mi gat 8 krismas.

MI LAIKIM tru ol tok bilong Baibel. Mama i kisim ol nius bilong Baibel, na mi laikim tru ol stori bilong en, na mi laikim moa yet ol piksa. Papa i no laik bai Mama i stori long mi long ol samting em i kisim save long en. Tasol mi laik save long ol dispela samting, olsem na mi givim ol askim long Mama. Mama i save stadi wantaim mi taim Papa i no stap long haus. Dispela i helpim mi na mi tu mi mekim disisen long dediketim laip bilong mi long Jehova. Taim mi gat 10 krismas, mi kisim baptais long taun Blackpool, Inglan, long 1943.

KIRAP LONG MEKIM WOK BILONG JEHOVA

Kirap long dispela taim, mitupela Mama i autim tok long olgeta taim. Mipela i yusim masin pikap long autim tok bilong Baibel long ol manmeri. Dispela masin em i bikpela na hevi bilong en inap olsem 4.5 kilogram. Tingim! Mi liklik mangi na mi save karim dispela masin!

Taim mi gat 14 krismas, mi laik mekim wok painia. Mama i tok mi mas toktok wantaim wasman sekit. Wasman sekit i tok mi mas kisim sampela kain trening bambai mi inap lukautim mi yet taim mi mekim wok painia. Mi mekim olsem, na mi mekim wok mani inap 2-pela yia. Bihain, mi toktok wantaim narapela wasman sekit na tokim em olsem mi laik mekim wok painia. Em i tok: “Yes, yu ken mekim olsem!”

Long Epril 1949, mitupela Mama i rausim ol  samting long haus mipela i rentim—mipela i salim sampela na givim sampela long ol narapela. Mitupela i go stap long taun Middleton, klostu long biktaun Manchester, na mitupela i kirap long mekim wok painia. Bihain long 4-pela mun, mi makim wanpela brata long poromanim mi long mekim wok painia. Brens ofis i makim mitupela long i go long wanpela nupela kongrigesen long Irlam. Mama i mekim wok painia wantaim wanpela sista long narapela kongrigesen.

Maski mi gat 17 krismas, mi na poroman bilong mi i kisim wok bilong lukautim ol miting bikos i no gat planti brata i winim mak bilong mekim wok long dispela nupela kongrigesen. Bihain, brens ofis i makim mi long i go long Buxton kongrigesen bikos ol i no gat planti pablisa na ol i nidim helpim. Mi pilim olsem ol dispela wok i opim rot bilong mi long kisim trening bilong mekim ol narapela wok.

Wok wantaim ol narapela long edvetaisim pablik tok long Rochester, New York, 1953

Long 1951, mi putim aplikesen bilong i go long Wastaua Baibel Skul Bilong Gileat. Tasol long Disemba 1952, gavman i singautim mi long joinim ami. Mi sanap long kot na tokaut olsem mi mekim wok bilong God, tasol kot i makim mi long kalabus inap 6-pela mun. Taim mi stap long kalabus, mi kisim invatesen bilong i go long namba 22 klas long Skul Gileat. Long Julai 1953, mi kalap long sip ol i kolim Georgic, na mi seil i go long New York.

Taim mi go kamap, mi go long kibung, “New World Society,” long 1953. Bihain mi  kalap long tren na go long Saut Lansing, New York, em hap we skul i stap long en. Taim mi lusim kalabus na kam, mi holim liklik mani tasol. Taim mi go daun long tren, wanpela bas i kam bilong kisim mi i go long Saut Lansing, olsem na mi mas kisim dinau bilong 25-sen long wanpela pasindia na baim bas fea bilong mi.

GO LONG NARAPELA KANTRI

Skul Gileat i trenim ol sumatin long “kisim pasin bilong olgeta kain man” taim ol i mekim wok misineri. (1 Kor. 9:22) Ol i makim mi, Paul Bruun, na Raymond Leach long i go long Filipins. Mipela i wet inap sampela mun long kisim ol visa. Bihain, mipela i kalap long sip na seil i go olsem long Rotterdam, solwara Mediterenian, Suez Canal, solwara India, Malesia, na Hong Kong. Mipela i raun long solwara inap 47 de olgeta! Mipela i kamap long Manila long Novemba 19, 1954.

Mi na Raymond Leach i kalap long sip na seil inap 47 de na go kamap long Filipins

Mipela i mas lain long ol nupela manmeri, nupela ples, na nupela tokples. Tasol ol i salim mipela i go long kongrigesen long taun Quezon, we planti manmeri i mekim tok Inglis. Olsem na bihain long 6-pela mun, mipela i no save gut yet long tokples Tagalog—mipela i save long wan wan tok tasol. Bihain, mipela i kisim narapela asainmen, na dispela i opim rot bilong mipela long lainim gut tokples Tagalog.

Long Me 1955, mitupela Brata Leach i autim tok pinis na kam bek long haus, na mipela i lukim sampela pas i stap insait long rum. Mitupela i painimaut olsem ol i makim mitupela long kamap wasman sekit. Mi gat 22 krismas, tasol dispela wok i opim rot long mi inap mekim ol samting we mi no bin mekim long bipo, na mi inap tok olsem “mi kisim pasin bilong olgeta kain man.”

Mekim pablik tok long sekit kibung long tokples Bicol

Taim mi kirap mekim wok olsem wasman sekit, mi mekim namba 1 pablik tok bilong mi long fran bilong wanpela stua long ples. Bihain mi luksave olsem long dispela taim bipo, ol brata long Filipins i save mekim pablik tok long pablik ples! Taim mi go visitim ol kongrigesen long sekit, mi save mekim ol pablik tok long haus win, long maket, haus bung, ples bilong pilai basket bal, ol pak, na long ol strit bilong taun. Wanpela taim mi stap long taun San Pablo, na bikpela ren i pundaun na i pasim mi long mekim pablik tok long maket, olsem na mi tokim ol brata olsem mi laik mekim pablik tok long Haus Kingdom. Bihain, ol brata i askim sapos i stret long kolim dispela tok olsem pablik tok. Ol i pilim olsem dispela em i no pablik tok bikos mi no mekim dispela tok long pablik ples!

Mipela i save stap wantaim ol bratasista long haus bilong ol. Maski ol i no gat bikpela haus, ol i save lukautim na klinim gut haus. Mi save slip long bet ol i wokim long diwai na ol i putim mat long en. I no gat wanpela samting i haitim ples bilong waswas, olsem na mi save pasim klos na waswas. Mi save kalap long jipni na bas na go autim tok, na sampela taim mi save kalap long bot taim mi laik i go long narapela ailan. Long laip olgeta bilong mi long wok misineri, mi no bin baim wanpela kar.

Taim mi go autim tok na visitim ol kongrigesen, dispela i helpim mi long lainim tokples Tagalog. Brens ofis i no stretim rot bilong mi long kisim skul long dispela tokples, nogat; mi save putim yau long hau ol bratasista i toktok taim ol i autim tok na bekim tok long ol miting. Ol bratasista i laik helpim mi long lainim tokples, na mi amamas long pasin bilong ol long i no les kwik na ol i save tok stret taim mi popaia long kolim ol tok.

Bihain, mi kisim ol nupela asainmen na dispela i kirapim mi long mekim sampela moa senis. Long 1956, Brata Nathan Knorr  i kam visitim mipela, na ol i makim mi long lukautim wanpela wok long nesenel kibung. Mi no save long hau mi inap mekim dispela wok, olsem na ol narapela i helpim mi. Sampela mun bihain, mipela i stretim rot bilong mekim narapela nesenel kibung na hetkota i salim Brata Frederick Franz i kam visitim mipela. Taim mi mekim wok olsem ovasia bilong dispela kibung, mi kisim skul long pasin bilong Brata Franz long redi long helpim ol manmeri. Ol asples brata i amamas long lukim Brata Franz i werim barong Tagalog taim em i mekim pablik tok—barong Tagalog em siot bilong ol Filipino.

Mi mas mekim sampela moa senis taim ol i makim mi long kamap wasman distrik. Long planti hap mipela i go long en, mipela i mekim bung long ol pablik ples na soim piksa, The Happiness of the New World Society. Sampela taim ol liklik binatang i distebim mipela. Lait bilong projekta i pulim ol dispela binatang, na ol i save go insait long projekta na pas insait long en. Mipela i save hatwok tru long klinim projekta! I hatwok long stretim rot bilong soim dispela piksa, tasol mipela i amamas long lukim olsem ol manmeri i luksave olsem oganaisesen bilong Jehova i pulap long ol manmeri bilong kain kain kantri.

Ol pris bilong lotu Katolik i stopim sampela bikman bilong gavman long givim tok orait long mipela long mekim ol kibung. Na tu, taim mipela i mekim ol kibung klostu long haus lotu bilong ol, ol i save paitim  belo bilong haus lotu long stopim kibung bilong mipela. Tasol dispela i no pasim wok bilong mipela, olsem na long nau planti manmeri long dispela hap i lotuim Jehova.

OL ASAINMEN WE I NIDIM SAMPELA MOA SENIS

Long 1959, mi kisim pas i singautim mi long i go wok long brens ofis. Dispela i opim rot bilong mi long kisim sampela save moa. Bihain, ol i askim mi long i go visitim ol narapela kantri olsem wasman son. Long wanpela raun, mi bungim sista Janet Dumond—em i mekim wok misineri long Tailan. Mipela i raitim pas i go i kam, na bihain mitupela i marit. Mitupela i marit inap 51 yia nau na mitupela i amamas long mekim wok bilong God.

Mi na Janet long wanpela ailan long Filipins

Mi bin visitim ol manmeri bilong Jehova long 33 kantri. Mi amamas tru olsem ol asainmen mi kisim long pastaim i redim mi long wok bung wantaim ol manmeri bilong kain kain kantri! Ol dispela visit i helpim mi long holim stretpela tingting na luksave olsem Jehova i laikim tru ol manmeri bilong kain kain lain.—Apo. 10:34, 35.

Mipela i autim tok long olgeta taim

MEKIM YET OL SENIS

Mi amamas tru long wok wantaim ol bratasista long Filipins! Long nau, namba bilong ol pablisa i dabol inap 10-pela taim na i winim tru namba bilong ol pablisa long taim mi kam nupela long Filipins. Mitupela Janet i stap yet na mekim wok long brens ofis long Filipins, long biktaun Quezon. Maski mi mekim wok long narapela kantri winim 60 yia pinis, mi pilim olsem mi mas redi long mekim ol senis long sindaun bilong mi bambai mi inap mekim ol wok em Jehova i askim mi long mekim. Ol senis i kamap insait long oganaisesen bilong God long nau i makim olsem yumi mas redi long mekim wok bilong God na helpim ol bratasista.

Mipela i amamas olsem namba bilong ol Witnes i go antap

Mipela i bin wok strong long bihainim laik bilong Jehova, na dispela i givim bikpela amamas long mipela. Na tu, mipela i mekim ol senis bambai mipela inap mekim gut wok bilong helpim ol bratasista. Mipela i tingting strong long bihainim laik bilong Jehova na “kisim pasin bilong olgeta kain man.”

Mipela i stap yet na mekim wok long brens ofis long biktaun Quezon