Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Wastaua—Stadi Edisen  |  Disemba 2016

Bikpela Pasin Helpim i Opim Rot Bilong Kamap Fri

Bikpela Pasin Helpim i Opim Rot Bilong Kamap Fri

“Sin i no ken stap olsem bos bilong yupela, long wanem, . . . yupela i stap aninit long bikpela pasin helpim bilong God.”—ROM 6:14.

OL SINGSING: 46, 127 [13]

1, 2. Wai na ol Witnes Bilong Jehova i save stori planti long tok bilong Rom 5:12?

TINGIM olsem yu laik raitim lista bilong ol ves bilong Baibel em ol Witnes Bilong Jehova i save gut long en na ol i save yusim planti taim. Yu ting Rom 5:12 bai stap namba 1 long lista bilong yu? Ating planti taim yu kolim dispela tok: “Long rot bilong wanpela man tasol sin i kamap long graun. Na sin i bringim dai i kam. Na long dispela rot dai i painim olgeta manmeri, long wanem, olgeta i bin mekim sin.”

2 Dispela ves i stap planti taim long buk Tru Tru Baibel i Tok Wanem? Taim yu yusim dispela buk long stadi wantaim ol pikinini bilong yu na ol narapela, ating yu bai ritim Rom 5:12 taim yu stori long as na God i wokim dispela graun, pe bilong baim bek ol man, na samting i painim ol man i dai pinis—ol dispela tok i stap long sapta 3, 5, na 6. Tasol hamas taim yu save tingim tok bilong Rom 5:12 taim yu skelim i stap bilong yu long ai bilong Jehova, ol samting yu mekim, na laip bilong yu long bihain?

3. Yumi mas holim wanem stretpela tingting long sin?

3 Yumi olgeta i mas luksave olsem yumi sinman. Oltaim yumi save popaia. Tasol God i save olsem em i kisim graun na wokim yumi, olsem na em i redi long marimari long yumi. (Sng. 103:13, 14) Taim Jisas i skulim ol disaipel long pasin bilong beten, em i tokim ol long beten askim God olsem: “Fogivim ol sin bilong mipela.” (Luk 11: 2-4) Yumi no ken tingim yet ol popaia em God i fogivim pinis. Tasol yumi ken tingim tingim pasin bilong God long fogivim yumi, na dispela bai helpim yumi.

GOD I SOIM BIKPELA PASIN HELPIM NA FOGIVIM YUMI

4, 5. (a) Olsem wanem yumi inap kliagut long mining bilong tok i stap long Rom 5:12? (b) Long Rom 3:24, “bikpela pasin helpim” i makim wanem samting?

4 Yumi inap kisim save long sampela bikpela samting taim yumi skelim ol tok i stap long ol sapta klostu long tok bilong aposel Pol long Rom 5:12, na moa yet long sapta 6. Ol dispela tok bai helpim yumi long kliagut long pasin bilong Jehova long fogivim yumi. Long sapta 3, yumi ritim dispela tok: “Olgeta man i bin mekim sin . . . . God i kamapim bikpela pasin helpim long ol, na long wok bilong Krais Jisas long givim pe bilong baim bek man, God i kolim ol stretpela manmeri, na dispela i wanpela presen God i givim ol.” (Rom 3:23, 24) Pol i yusim tok Grik em ol i tanim olsem “bikpela pasin helpim.” Wanpela dikseneri i tok, dispela tok Grik i makim olsem wanpela man i “mekim wok bilong helpim narapela, na em i no tok o tingting olsem narapela i mas bekim gutpela pasin bilong em.” Yumi kisim nating bikpela helpim i kam long God, na tu, yumi no gutpela inap long kisim dispela helpim.

5 Saveman John Parkhurst i tok: “Taim ol i kolim [dispela tok Grik] bilong stori long God o Krais, planti taim ol i yusim dispela tok taim ol i stori long pasin bilong tupela long helpim ol narapela o mekim ol samting bilong helpim na kisim bek ol man.” Olsem na i stret long Nupela Taim Baibel i tanim dispela tok olsem “bikpela pasin helpim.” Orait, God i mekim wanem bilong kamapim klia dispela bikpela pasin helpim? Olsem wanem dispela pasin i helpim yu long bilip na wet long gutpela samting bai kamap bihain, na yu inap pas gut wantaim God? Yumi ken stori long ol dispela samting.

6. Olsem wanem bikpela pasin helpim bilong God inap helpim ol manmeri?

6 Adam em dispela “wanpela man” husat i mekim sin, na long rot bilong em “dai i painim olgeta manmeri.” Olsem na “rong bilong wanpela man i mekim na dai i stap olsem king.” Pol i tok moa olsem God i soim “bikpela pasin helpim . . . long rot bilong wanpela man, em Jisas Krais.” (Rom 5:12, 15, 17) Long dispela rot, olgeta lain manmeri inap kisim helpim. “Wanpela man [Jisas] i bin bihainim tok, na long dispela pasin planti manmeri i kamap stretpela manmeri.” Bikpela pasin helpim bilong God inap “kamapim laip oltaim long rot bilong Jisas Krais.”—Rom 5:19, 21.

7. Taim God i stretim rot bilong baim bek yumi, wai na yumi inap tok olsem God i soim bikpela pasin helpim long yumi?

7 Jehova i no gat wok long salim Pikinini bilong em i kam long graun long givim pe bilong baim bek yumi. Na tu, yumi ol sinman long graun i no mekim wanpela gutpela samting na bai i stret long God na Jisas i redim pe bilong baim bek yumi na lusim rong bilong yumi. Olsem na taim God i fogivim yumi na opim rot bilong yumi long kisim laip oltaim, dispela em pasin helpim we yumi no gutpela inap long kisim. Bikpela pasin helpim bilong God i olsem presen em i givim long yumi, olsem na yumi mas tingim tru dispela pasin na larim dispela i stiaim wokabaut bilong yumi long olgeta wan wan de.

PILIM TRU BIKPELA PASIN HELPIM BILONG GOD

8. Taim sampela manmeri i mekim rong, ol inap holim wanem tingting kranki?

8 Yumi ol tumbuna pikinini bilong Adam, olsem na yumi tu i gat sin na yumi save popaia na mekim ol pasin i no stret. Maski i olsem, i no stret long yumi holim tingting kranki long bikpela pasin helpim bilong God na ting olsem: ‘Mi no ken wari sapos mi mekim wanpela rong, o mi mekim pasin i stap olsem sin long ai bilong God. Jehova bai fogivim mi.’ Sori tru olsem sampela Kristen i holim dispela tingting kranki  long haptaim we sampela aposel i stap laip yet. (Ritim Jut 4.) Ating yumi yet i no inap mekim dispela kain tok, tasol yumi inap holim dispela tingting o sampela inap kirapim yumi long kisim dispela tingting, na dispela tingting inap stap long yumi na kamap bikpela.

9, 10. Olsem wanem Pol na ol narapela Kristen i kamap fri long kalabus bilong sin na dai?

9 Pol i tok yumi no ken tingting olsem: ‘Em orait, God bai pilim tingting bilong mi. Em bai fogivim mi.’ Pol i tok olsem bikos “long pasin bilong mekim sin [ol Kristen i] stap olsem man i dai pinis.” (Ritim Rom 6:1, 2.) Taim ol dispela Kristen i stap laip yet long graun, wai na Pol i tok “long pasin bilong mekim sin [ol i] stap olsem man i dai pinis”?

10 God i yusim pe bilong baim bek man long helpim Pol na ol narapela Kristen long taim bilong Pol. Olsem na Jehova i fogivim sin bilong ol, anointim ol long holi spirit, na kolim ol olsem ol pikinini bilong em. Ol inap bilip long kisim laip long heven. Sapos ol i stap gut long God, ol bai kisim laip long heven na mekim wok king wantaim Krais. Tasol taim ol i stap laip yet long graun na mekim wok bilong God, Pol i tok “long pasin bilong mekim sin [ol i] stap olsem man i dai pinis.” Pol i stori long eksampel bilong Jisas—em i kam i stap olsem man long graun na em i dai, na em i kirap bek na kisim laip olsem spirit long heven na em i no inap i dai gen. Dai i no gat strong long daunim Jisas. Wankain samting i kamap long ol Kristen em God i anointim. “Long pasin bilong mekim sin [ol] i stap olsem man i dai pinis, tasol [ol] i stap laip bai [ol] i ken mekim laik bilong God long rot bilong Krais Jisas.” (Rom 6:9, 11) Ol i no bihainim wankain pasin olsem ol i mekim long bipo. Ol i no bihainim moa ol laik nogut bilong sin. I olsem ol i dai pinis long olpela pasin bilong ol.

11. Yumi ol lain i bilip long kisim laip oltaim long Paradais, olsem wanem na “long pasin bilong mekim sin yumi stap olsem man i dai pinis”?

11 Olsem wanem long yumi? Paslain long yumi kamap Kristen, yumi mekim ol rong na ating yumi no luksave olsem ol dispela pasin i no stret long ai bilong God. Yumi stap “olsem wokboi bilong ol pasin i no klin na pasin bilong sakim lo.” Yumi “stap wokboi bilong sin.” (Rom 6:19, 20) Bihain, yumi kisim save long tok i tru bilong Baibel, senisim ol pasin bilong yumi, dediketim laip bilong yumi long God, na yumi kisim baptais. Kirap long dispela taim, “long bel” yumi “bihainim” ol tok na ol lo bilong God. Yumi “no stap kalabus moa long sin, nogat,” yumi “kamap wokboi bilong stretpela pasin.” (Rom 6:17, 18) Olsem na “long pasin bilong mekim sin yumi stap olsem man i dai pinis.”

12. Yumi olgeta wan wan inap mekim wanem disisen?

12 Tingim tok bilong Pol na skelim yu yet. Em i tok: “Yupela i no ken larim sin i stap olsem king na bosim bodi bilong yupela, em bodi i save dai. Yupela i no ken bihainim ol laik bilong bodi bilong yupela.” (Rom 6:12) Sapos yumi bihainim olgeta kain laik nogut bilong bodi, i olsem yumi “larim sin i stap olsem king na bosim” yumi. Yumi inap “larim” sin i bosim yumi o yumi inap sakim sin, olsem na yumi laik save, Wanem laik tru bilong yumi? Askim yu yet: ‘Sampela taim mi save larim laik bilong mi i stiaim mi long mekim pasin i no stret na mi go het long mekim dispela pasin? O mi stap olsem man i dai pinis long pasin bilong mekim sin? Mi bihainim pasin bilong God olsem Krais Jisas i bin mekim?’ Yumi inap mekim olsem sapos yumi pilim tru bikpela pasin helpim em God i soim long yumi taim em i fogivim yumi.

YU INAP WINIM PAIT

13. Wai na yumi ken bilip tru olsem yumi inap lusim pasin bilong mekim rong?

13 Ol manmeri bilong Jehova i givim baksait long ol samting ol i mekim paslain long ol i kisim save long God, laikim em, na mekim wok bilong em. Ating ol i mekim “ol samting nau [ol] i save sem long en,” em ol rong we i stret long man i dai long en. (Rom 6:21) Tasol ol i  senisim pasin bilong ol. Dispela samting i kamap long planti Kristen long Korin em Pol i raitim pas i go long ol. Sampela bilong ol i lotuim imis, mekim pasin adaltri, stil, dring spak, na bihainim pasin bilong man i maritim man na meri i maritim meri. Tasol God i mekim ol i kamap “klin” na “holi.” (1 Kor. 6:9-11) Dispela samting i kamap long sampela Kristen long kongrigesen long Rom. Pol i raitim pas i go long ol na em i tok: “Yupela i no ken givim ol hap bodi bilong yupela long sin olsem ol tul bilong mekim ol pasin i no stret. Yupela i olsem ol manmeri i dai pinis na nau yupela i stap laip, olsem na yupela i mas givim yupela yet long God. Na tu, givim ol hap bodi bilong yupela long God olsem tul bilong mekim ol stretpela pasin.” (Rom 6:13) Pol i save olsem ol dispela Kristen inap i stap klin long sait bilong bilip na wok yet long kisim blesing long bikpela pasin helpim bilong God.

14, 15. Olsem wanem yumi inap soim olsem yumi givim bel olgeta long “bihainim” tok bilong God?

14 Wankain samting i kamap long nau. Ating sampela bratasista i gat wankain ekspiriens olsem ol Kristen long Korin. Tasol ol tu i senisim pasin bilong ol. Ol i lusim ol rong ol i mekim long pastaim na God i mekim ol i “kamap klin.” Ating wankain samting olsem i bin painim yu. Maski i olsem o nogat, tingim olsem, ‘Long nau yu stap olsem wanem long ai bilong God?’ God inap soim bikpela pasin helpim na fogivim ol sin bilong yu, olsem na dispela i kirapim yu long holim wanem tingting? Yu tingting strong olsem yu no inap moa long “givim ol hap bodi bilong [yu] long sin”? Yu laik stap olsem man ‘i dai pinis na nau yu stap laip,’ na yu laik ‘givim yu yet long God’?

15 Yumi mas abrusim ol bikpela pasin nogut em ol Kristen long Korin i bin mekim. Dispela bai soim klia olsem yumi bilip long bikpela pasin helpim bilong God na ‘sin i no stap olsem bos bilong yumi.’ Tasol olsem wanem? Yumi tu i tingting strong long givim bel olgeta long “bihainim” tok bilong God? Yumi inap mekim olsem taim yumi wok strong long abrusim ol pasin nogut em sampela i tingim olsem ol i no bikpela rong.—Rom 6:14, 17.

16. Hau na yumi save olsem ol Kristen i mas abrusim ol bikpela rong, na tu, ol i mas mekim sampela samting moa?

16 Tingim aposel Pol. Yumi save olsem em i no bin mekim ol bikpela rong em 1 Korin 6:9-11 i stori long en. Tasol em i pilim olsem em i mekim rong. Em i tok: “Mi man bilong graun tasol, na mi stap wokboi bilong sin. Mi no kliagut long as tru bilong ol pasin mi mekim. Ol pasin mi gat laik long mekim, em mi no save mekim. Tasol ol pasin mi no laik tru long mekim, em mi save mekim.” (Rom 7:14, 15) Long tingting bilong Pol, sampela narapela samting tu i stap olsem sin, na Pol i wok strong long sakim ol dispela pasin. (Ritim Rom 7:21-23.) Yumi tu i ken holim wankain tingting olsem Pol na wok strong long “bihainim” tok bilong God.

17. Wai na yu mas bihainim onest pasin?

17 Tingim onest pasin bilong yumi. Ol Kristen i mas bihainim onest pasin. (Ritim Sindaun 14:5; Efesus 4:25.) Satan em “papa bilong pasin giaman.” Ananaias na meri bilong em i lusim laip bilong ol bikos ol i mekim tok giaman. Yumi no ken bihainim pasin bilong ol—yumi no ken mekim tok giaman. (Jon 8:44; Apo. 5:1-11) Wanem samting moa i mas kirapim yumi long mekim tok tru long olgeta taim? Taim yumi bihainim onest pasin, dispela i soim olsem yumi pilim tru bikpela pasin helpim bilong God.

18, 19. Yumi mas abrusim tru wanem ol pasin?

18 Pasin giaman i makim olsem man i mekim tok i no tru. Tasol i gat sampela samting moa em Jehova i no laik bai ol manmeri bilong em i mekim. God i tokim lain Israel bilong bipo olsem: “Yupela i mas i stap holi . . . . Long wanem, mi God, Bikpela bilong yupela, mi holi.” Em i kolim ol samting ol i mas mekim bilong i stap holi. God i tok: “Yupela i no ken stilim ol samting bilong narapela man, na yupela i no ken giamanim narapela man, bilong pulim  ol samting bilong en. Na yupela i no ken tok giaman long narapela man.” (Wkp. 19:2, 11) Wanpela man inap tok olsem em bai mekim tok tru long olgeta taim, tasol sapos em i no was gut, em inap mekim pasin giaman na trikim ol narapela.

Olsem wanem? Yumi tingting strong long abrusim pasin bilong mekim tok i no tru na pasin giaman? (Lukim paragraf 19)

19 Kain olsem: Wanpela man inap tokim bos o ol wanwok bilong em olsem long neks de em i no inap kam long wok o em bai lusim wok paslain long taim bilong pinis long wok bikos em i gat apoinmen long lukim dokta. Tasol em i laik go long famasi o go lukim dokta na bekim dinau bilong em. Tingting tru bilong em i olsem, em i laik bai em i gat ekstra taim long kisim famili bilong em i go long nambis. Em tru olsem em i go lukim dokta, tasol yu ting tok bilong em i tru olgeta? Yu ting em i mekim pasin giaman na trikim ol narapela? Ating yu save long sampela em ol i bin mekim pasin giaman. Ating ol i mekim olsem bikos ol i laik bai ol i gat gutnem, na ol i no laik kisim hevi. Maski sapos sampela tok bilong ol i tru, God i tok: “Yupela i no ken giamanim narapela man.” Tingim tu tok bilong Rom 6:19, em i tok: “Yupela i mas givim ol hap bodi bilong yupela olsem wokboi bilong stretpela pasin. Yupela i mekim olsem bai yupela i ken mekim pasin holi.”

20, 21. Bikpela pasin helpim bilong God i mas kirapim yumi long mekim wanem?

20 Sapos yumi pilim tru bikpela pasin helpim bilong God, yumi bai abrusim pasin adaltri, pasin bilong dring spak, na ol narapela pasin nogut em sampela long Korin i bin mekim. Yumi bai abrusim pasin pamuk, na sakim laik bilong insait long ol amamas bilong pasin doti, olsem lukim ol muvi nogut o harim ol singsing i gat tok nogut long en. Sapos yumi stap olsem wokboi bilong stretpela pasin, yumi bai abrusim pasin bilong dring spak, na tu, yumi no inap dring liklik liklik i go inap long mak bilong spak. Yumi mas pait strong long sakim ol dispela pasin, na yumi inap winim dispela pait.

21 Yumi mas abrusim olgeta kain rong—em ol pasin i nogut tru na ol pasin em ol man i tingim olsem liklik rong. Sampela taim yumi bai popaia. Maski i olsem, yumi mas wok strong long abrusim ol dispela pasin, olsem Pol i bin mekim. Em i tokim ol wanbilip: “Yupela i no ken larim sin i stap olsem king na bosim bodi bilong yupela, em bodi i save dai. Yupela i no ken bihainim ol laik bilong bodi bilong yupela.” (Rom 6:12; 7:18-20) Taim yumi wok strong long sakim olgeta kain pasin i no stret, yumi soim olsem yumi pilim tru bikpela pasin helpim em God i soim long yumi long rot bilong Krais.

22. Ol man husat i pilim tru bikpela pasin helpim bilong God, ol bai kisim wanem blesing long bihain?

22 Bikpela pasin helpim bilong God i opim rot long God i fogivim ol sin bilong yumi, na em inap wok yet long fogivim yumi. Olsem na sapos yumi laik soim tenkyu bilong yumi, orait yumi mas wok strong long daunim laik bilong mekim ol pasin em ol narapela i tingim olsem liklik rong. Pol i kolim blesing yumi bai kisim long bihain. Em i tok: “Nau yupela i no kalabus moa long sin, nogat. Yupela i wokboi bilong God. Kaikai yupela i kamapim em pasin holi, na pe bilong en em laip oltaim.”—Rom 6:22.