Skip to content

Skip to table of contents

Ol Witnes Bilong Jehova

Makim tokples Tok Pisin

Mi na Tabitha long taim bilong autim tok

 BAIBEL I SAVE SENISIM I STAP BILONG MAN

Mi Bilip Olsem i No Gat God

Mi Bilip Olsem i No Gat God
  • YIA MI BON: 1974

  • KANTRI: RIPABLIK DEMOKRATIK BILONG JEMANI

  • BIPO: MAN I NO BILIP LONG GOD

LAIP BILONG MI LONG BIPO

Mi bon long wanpela viles bilong Saxony, pastaim ol i kolim olsem Ripablik Demokratik Bilong Jemani. Mi kamap bikpela long famili i gat pasin laikim, na papamama i skulim mi long mekim ol gutpela pasin. Gavman Komiunis i bosim dispela kantri, olsem na planti man long Saxony i no tingim lotu olsem bikpela samting. Mi bilip olsem i no gat God. Kirap long taim mi liklik i go inap long taim mi gat 18 krismas, tingting bilong ol Komiunis na bilip bilong mi olsem i no gat God i stiaim ol samting mi mekim.

Mi laikim gavman Komiunis bikos mi wanbel long lo ol i putim olsem olgeta manmeri i wankain. Na tu, mi bilip olsem olgeta man bai kisim ol samting ol i nidim inap long wankain mak, na dispela bai pinisim pasin bilong i stap maniman o rabisman. Olsem na mi joinim wanpela oganaisesen bilong ol yangpela husat i sapotim wok Komiunis. Taim mi gat 14 krismas, mi lusim bikpela haptaim long wanpela projek bilong kolektim na wokim gen ol pepa. Mi mekim gut dispela wok, olsem na ol bikman bilong taun Aue i givim wanpela setifiket na presen bilong tok tenkyu long mi. Mi yangpela yet, tasol mi save long sampela bikman bilong gavman Komiunis bilong Ripablik Demokratik Bilong Jemani. Mi pilim olsem mi putim ol gutpela mak long winim na sindaun bilong mi bai kamap gutpela long bihain.

Wantu bikpela senis i kamap. Long 1989, Banis Berlin na ol ples em gavman Komiunis i bosim long Isten Yurop, ol i pundaun. Nau mi luksave olsem gavman Komiunis i mekim pasin i no stret. Olsem, ol i luk daun long ol man i no laik sapotim ol. Mipela ol lain i sapotim gavman Komiunis i bilip olsem olgeta manmeri i wankain, olsem na bilong wanem gavman i mekim olsem? Ating bilip bilong mipela em wanpela driman nating. Mi tingting planti long ol dispela samting.

Olsem na mi putim mak long pilaim musik na penim piksa. Mi go long skul bilong lainim musik bikos mi laik winim mak bilong kamap man bilong penim piksa na pilaim musik, na tu, mi gat laik long i go long yunivesiti. Dispela i mekim na mi lusim tingting long ol gutpela pasin em papamama i skulim mi long en. Mi tingting tasol long kisim amamas, olsem na mi prenim planti meri. Tasol mi tingting planti yet long ol samting i kamap. Sampela piksa mi penim inap pretim man. Mi tingting planti olsem, wanem samting bai kamap long bihain? Yumi stap bilong mekim wanem?

 Mi kirap nogut tru taim mi painim bekim bilong ol askim bilong mi. Wanpela apinun long skul, mi sindaun wantaim sampela sumatin na mipela i stori long wanem samting bai kamap long bihain. Mandy * em wanpela sumatin na em i wanpela Witnes Bilong Jehova. Em i givim sampela gutpela tok bilong helpim mi. Mandy i tok: “Andreas, sapos yu laik painim bekim bilong ol askim bilong yu long laip na long ol samting bai kamap bihain, skelim gut tok Baibel i mekim.”

Pastaim mi gat 2-pela tingting, tasol mi laik tru long kisim save long Baibel. Mandy i tokim mi long lukim Daniel sapta 2, na mi kirap nogut long tok Baibel i mekim. Tok profet bilong Daniel i stori long ol strongpela gavman bai mekim wok, na tu, wanem gavman bai mekim wok i kam inap long taim bilong yumi. Mandy i stori tu long ol narapela tok profet bilong Baibel long ol gutpela samting bai kamap long bihain. Mi amamas long painim ol bekim bilong ol askim bilong mi! Tasol mi gat ol dispela askim: Husat i as bilong ol dispela tok profet? Husat inap tokaut stret long ol samting bai kamap bihain? God i stap tru?

BAIBEL I SENISIM I STAP BILONG MI

Mandy i stretim rot na bai mi ken stadi wantaim tupela marit, Horst na Angelika, em ol Witnes Bilong Jehova na ol i helpim mi long save gut long Tok Bilong God. Mi luksave olsem ol Witnes Bilong Jehova i no wankain long ol narapela lotu. Ol i save yusim nem bilong God, na tu, ol i kirapim ol narapela man long kisim save long dispela nem, Jehova. (Song 83:18; Matyu 6:9) Mi kisim save olsem God Jehova i laik bai ol man i stap laip oltaim long Paradais long graun. Buk Song 37:9 i tok: “Ol manmeri i bilip na wetim Bikpela i helpim ol, bai ol i stap gut long graun bilong ol.” Mi amamas tru taim mi kisim save long tok Baibel i mekim, olsem olgeta manmeri husat i redi long bihainim laik bilong God, ol bai stap laip oltaim long graun.

Mi traim bes long senisim tingting na pasin bilong mi bambai mi ken bihainim ol tok bilong Baibel. Mi kisim biknem taim mi pilaim musik na penim piksa, olsem na mi mas lain long i gat pasin daun. Na tu, mi pilim hatwok long lusim ol olpela pasin bilong mi. Mi amamas tru olsem Jehova i no save les kwik, em i soim pasin marimari, na tingim tru ol man husat i wok strong long bihainim ol tok bilong Baibel!

Tingting na bilip bilong lain Komiunis na pasin bilong i no bilip long God i stiaim ol samting mi mekim insait long 18 yia olgeta; tasol nau Baibel i senisim laip bilong mi. Ol samting mi lainim i helpim mi long daunim pasin bilong tingting planti long wanem samting bai kamap long bihain, na nau laip bilong mi i gat as bilong en. Long 1993, mi kisim baptais na kamap wanpela Witnes Bilong Jehova. Long yia 2000, mi maritim Tabitha, em wanpela meri i givim bel long lotuim God. Mipela i lusim bikpela haptaim bilong helpim ol narapela long kisim save long Baibel. Planti man mipela i bungim i gat wankain stori olsem bilong mi. Mi amamas tru na bel isi taim mi stiaim ol long kisim save long Jehova.

GUTPELA SAMTING I PAINIM MI

Taim mi kirap long bung wantaim ol Witnes Bilong Jehova, papamama i no amamas. Tasol ol i lukim ol gutpela senis i kamap long laip bilong mi. Mi amamas tru taim papamama i kirap ritim Baibel na go long ol miting Kristen bilong ol Witnes Bilong Jehova.

Marit bilong mi na Tabitha i kamap gutpela bikos mitupela i bihainim ol stiatok bilong Baibel long sait bilong marit. Mitupela i stap gut long narapela narapela na dispela i strongim marit bilong mipela.—Hibru 13:4.

Nau mi no wari long ol samting i kamap long laip, na tingting planti long ol samting bai kamap long bihain. Mi gat bikpela lain famili i stap long graun olgeta, na mipela i stap bel isi na wanbel wantaim. Mipela i save mekim wankain pasin long narapela narapela. Em samting mi bilip long en na mi tingting long inapim long laip bilong mi.

^ par. 12 Mipela i senisim nem.