Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Wastaua  |  No. 5 2016

 BAIBEL I SAVE SENISIM I STAP BILONG MAN

Mi Save Bel Nogut na Pait

Mi Save Bel Nogut na Pait
  • YIA MI BON: 1974

  • KANTRI: MEKSIKO

  • BIPO: TINEJA I SAVE PAIT LONG STRIT

LAIP BILONG MI LONG BIPO:

Mi bon long Ciudad Mante, em wanpela naispela ples long Tamaulipas. Ol manmeri long dispela ples i gat gutpela pasin na ol i save amamas long helpim ol narapela. Tasol sori tru, lain raskol i mekim na pasin nogut i go bikpela.

Mi namba 2 bilong fopela pikinini man. Papamama bilong mi i bin bringim mi i go long haus lotu bilong ol Katolik na mi kisim baptais, na bihain mi insait long grup bilong singsing kwaia long haus lotu. Mi laik bai God i orait long mi, long wanem, mi pret olsem em bai kotim mi na tromoi mi i go long helpaia.

Taim mi gat 5-pela krismas, Papa i lusim mipela. Mi tingting planti na bel hevi tru. Mi no save wai na em i lusim mipela, long wanem, mipela i laikim em tru. Mama bilong mi i save wok planti aua bambai em i ken lukautim mi na ol brata bilong mi long kaikai samting.

Dispela i mekim na mi save lusim skul na bung wantaim ol pikinini i gat bikpela krismas long mi. Ol i lainim mi long tok swea, smok, stil, na pait long han. Mi laik bosim ol narapela, olsem na mi lain long pait boksen na resling, pait long han na lek, na yusim ol samting bilong pait olsem gan. Mi kamap tineja bilong pait. Planti taim mi pait long gan wantaim ol narapela. Sampela taim, mi save kisim bikpela bagarap long bodi na mi lusim planti blut, tasol ol i larim mi i stap long strit na bai mi ken i dai. Mama bilong mi i save bel hevi tru taim em i lukim mi i stap olsem, na em i hariap long kisim mi i go long haus sik.

Taim mi gat 16 krismas, Jorge em pren bilong mi long taim mipela i liklik yet i kam visitim mipela. Em i tokim mipela olsem em i wanpela Witnes Bilong Jehova, na em i kam bilong tokim mipela long wanpela bikpela tok. Em i kamapim bilip bilong em long mipela, na em i mekim olsem long rot bilong Baibel. Mi no bin ritim Baibel, tasol mi amamas long kisim save long nem bilong God na ol samting God i tingting pinis long mekim. Jorge i tok em i laik stadi long Baibel wantaim mipela, na mipela i orait long mekim olsem.

BAIBEL I SENISIM I STAP BILONG MI:

Mi amamas tru long kisim save olsem Baibel i no as bilong bilip bilong helpaia. (Song 146:4; Saveman 9:4, 5) Taim mi kisim stretpela save long helpaia, mi no pret moa long God. Mi tingim em olsem wanpela gutpela Papa husat i gat pasin laikim, na em i laik bai ol pikinini bilong em i stap gut.

 Taim mi wok long stadi long Baibel, mi luksave olsem mi mas senisim ol pasin bilong mi. Mi mas kisim pasin daun na lusim pasin bilong pait. Wanpela samting i bin helpim mi, em tok bilong Baibel long 1 Korin 15:33, em i tok ol poroman nogut i save “bagarapim ol gutpela pasin” bilong man. Mi luksave olsem sapos mi laik senisim ol pasin bilong mi, orait mi no ken bung moa wantaim ol man husat inap stiaim mi long mekim ol pasin nogut. Olsem na mi lusim ol pren bilong mi, na kisim ol nupela pren insait long kongrigesen Kristen tru. Em ol lain husat i save bihainim ol stiatok bilong Baibel long taim ol i stretim ol hevi, na ol i no mekim olsem long rot bilong pait.

Narapela tok bilong Baibel i bin helpim mi, em Rom 12:17-19. Ol dispela ves i tok: “No ken bekim pasin nogut long man i mekim pasin nogut long yupela. . . . Yupela i mas mekim olgeta samting yupela inap mekim bilong i stap wanbel wantaim olgeta man. Ol pren tru, yupela i no ken bekim rong man i mekim long yupela, nogat. . . . ‘Jehova i tok, bekim rong, em wok bilong mi. Bai mi bekim.’” Mi luksave olsem long taim stret Jehova i makim, em bai pinisim ol pasin nogut. Dispela i strongim mi, na isi isi mi daunim pasin bilong pait.

Mi no inap lusim tingting long samting i kamap long wanpela apinun taim mi laik go bek long haus. Sampela yangpela bilong wanpela geng em bipo mipela i save birua long ol i bungim mi, na ol i laik pait long mi. Lida bilong ol i paitim mi long baksait na bikmaus olsem, “Bekim pait!” Long dispela taim stret, mi mekim sotpela beten long Jehova na askim em long helpim mi long karim dispela hevi. Maski mi gat strongpela tingting long bekim pait, mi lusim ol na mi go. Long neks de mi bungim lida bilong dispela geng, em wanpela tasol i stap. Mi belhat na mi laik bekim pait, tasol mi mekim gen sotpela beten long Jehova na askim em long helpim mi long bosim gut bel. Mi kirap nogut taim dispela mangi i kam long mi na tok: “Fogivim mi long samting mi mekim long asde nait. Mi mas tokaut olsem, mi laik kamap wankain olsem yu. Mi laik stadi long Baibel.” Mi amamas olsem mi bin bosim belhat bilong mi! Na gutpela samting i kamap, mitupela wantaim i stadi long Baibel.

Tasol sori tru, olgeta long famili bilong mi i no stadi moa long Baibel. Maski i olsem, mi wokim disisen olsem mi bai stadi long Baibel na mi no laik larim wanpela samting i pasim mi. Mi save olsem pasin bilong bung oltaim wantaim lain bilong God inap helpim mi long kisim bel isi, na mi ken stap insait long wanpela lain famili. Mi kamap strong long bilip, na long 1991 mi kisim baptais olsem wanpela Witnes Bilong Jehova.

GUTPELA SAMTING I PAINIM MI:

Pastaim mi save bel nogut, pait, na mi laik bosim ol narapela. Tasol Tok Bilong God i helpim mi long senisim ol pasin bilong mi. Long nau, mi save autim gutpela tok bilong Baibel long ol man husat i laik harim. Inap 23 yia nau mi autim tok fultaim, em wanpela gutpela blesing tru mi kisim.

Inap sampela haptaim, mi wok volantia long brens ofis bilong ol Witnes Bilong Jehova long Meksiko. Long dispela hap, mi bungim Claudia, em wanpela meri Kristen husat i save givim bel long mekim wok, mipela i marit long 1999. Mi amamas tru long Jehova i givim mi wanpela gutpela poroman!

Mipela i sapotim kongrigesen bilong tokples Sain Bilong Meksiko, na helpim ol yaupas long kisim save long Jehova. Bihain, ol i singautim mipela i go long kantri Belis bilong skulim ol man long tok bilong Baibel. Maski mipela i no gat planti kago samting, mipela i gat ol samting mipela i nidim bilong i stap amamas. Na mipela i no inap larim wanpela samting i tekewe amamas mipela i kisim.

Bihain, mama bilong mi i kirap gen long stadi long Baibel na em i kisim baptais. Na tu, bikpela brata bilong mi na meri na ol pikinini bilong em i kamap ol Witnes Bilong Jehova. Sampela pren bilong mi long bipo, em mi bin autim tok bilong Kingdom long ol, ol tu i lotuim Jehova long nau.

Tasol sori tru, sampela long famili bilong mi i lusim laip bilong ol, long wanem, ol i no senisim pasin bilong ol long belhat na pait. Sapos mi bin bihainim pasin bilong ol, ating mi no inap stap laip long nau. Mi tenkyu long Jehova i helpim mi long kisim save long em na ol lain i lotuim em. God i no les kwik long mi, na long gutpela pasin em i skulim mi long bihainim ol stiatok bilong Baibel long i stap bilong mi.