Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Wastaua  |  No. 3 2017

Mi amamas long bung wantaim ol yangpela long kongrigesen

 BAIBEL I SAVE SENISIM I STAP BILONG MAN

Mi Laik Tru Long Pilai Beisbal!

Mi Laik Tru Long Pilai Beisbal!
  • YIA Mi BON: 1928

  • KANTRI: KOSTA RIKA

  • BIPO: GIVIM BEL TRU LONG SPOTS NA PILAI LAKI

BIPO

Mi kamap bikpela long Puerto Limón, em wanpela taun long nambis bilong hap is bilong Kosta Rika we ol sip i save kam sua. Mipela 8-pela long famili, na mi namba 7 pikinini. Papa i dai taim mi gat 8-pela krismas. Kirap long dispela taim, mama tasol i lukautim mipela.

Beisbal gem em namba wan samting long laip bilong mi. Kirap long taim mi liklik yet mi laikim dispela gem. Taim mi gat 18 krismas samting, mi joinim wanpela tim. Long taim mi gat 20 krismas samting, wanpela trena i tokim mi long joinim wanpela biknem tim long Nikaragua. Tasol mama bilong mi i sik na mi lukautim em, na mi no laik i go stap long Nikaragua. Olsem na mi no joinim dispela tim. Bihain, narapela trena i tokim mi long pilai long nesenel beisbal tim bilong Kosta Rika. Dispela tim i gat ol pleia em ol i kisim long ol narapela tim. Mi orait long pilai long dispela tim. Mi stap long nesenel tim long yia 1949 i go inap 1952, na mi pilai planti gem long Kuba, Meksiko, na Nikaragua. Mi save sanap long beis, na inap 17 gem olgeta mi no mekim wanpela popaia. Mi save amamas taim ol sapota i singaut na kolim nem bilong mi!

Sori tru olsem long dispela taim mi save mekim pasin pamuk. Mi gat wanpela gelpren, tasol mi stap tu wantaim ol narapela meri. Na tu, mi save dring planti. Wanpela taim mi spak nogut tru na taim mi kirap long bet long neks de, mi no inap tingim olsem wanem mi bin go long haus! Na tu, mi pilai laki long rot bilong ol kain gem olsem domino na loto.

Mi bihainim yet ol dispela pasin kranki taim mama bilong mi kamap wanpela Witnes Bilong Jehova. Em i toktok wantaim mi long bilip bilong em, tasol pastaim mi no pilim tok bilong em, long wanem, mi tingim tru spot. Maski em taim bilong kaikai, mi no save pilim hangre taim mi mekim trening! Tingting bilong mi i stap tasol long dispela gem. Mi laik tru long pilai beisbal!

Taim mi gat 29 krismas, mi kisim bikpela eksiden taim mi traim long kalap na ketsim bal. Bihain long mi kamap orait,  mi no pilai moa long ol nesenel gem. Tasol mi trenim ol narapela long pilai beisbal long taun mipela i stap long en.

BAIBEL I SENISIM I STAP BILONG MI

Long 1957, mi go long wanpela kibung bilong ol Witnes Bilong Jehova long wanpela stediam we mi bin pilai beisbal long en. Mi sindaun namel long bikpela lain manmeri na mi lukim olsem ol i gat pasin rispek, na dispela i narapela kain tru long pasin bikhet bilong ol manmeri i save bung long lukim beisbal gem. Ol samting mi lukim long dispela kibung i kirapim mi long stadi long Baibel wantaim ol Witnes na go long ol miting.

Mi amamas tru long ol tok bilong Baibel mi kisim save long en. Jisas i tok profet olsem long taim bilong las de, ol disaipel bilong em bai autim gutnius long Kingdom Bilong God long olgeta hap bilong graun. (Matyu 24:14) Na tu, mi kisim save olsem ol Kristen tru i no save kisim mani long skulim ol man long Baibel. Jisas i tok: “Yupela i kisim fri, olsem na yupela i mas givim fri.”—Matyu 10:8.

Taim mi kisim save long Baibel, mi skelim pasin bilong ol Witnes wantaim tok Baibel i mekim. Mi laikim pasin bilong ol long givim bel tru long autim gutnius bilong Kingdom Bilong God long olgeta hap bilong graun. Mi lukim olsem ol i bihainim tok bilong Jisas na ol i gat pasin bilong givim ol samting. Taim mi lukim tok bilong Jisas long Mak 10:21 olsem, “Kam bihainim mi,” dispela i kirapim laik bilong mi long kamap wanpela Witnes.

Sampela haptaim i lus paslain long mi mekim ol senis. Inap planti yia, mi save makim wanpela namba bilong pilai loto long olgeta wik. Tasol mi kisim save long Baibel olsem God i heitim ol man i gat pasin gridi na ol man i lotuim “ol giaman god,” em ol god bilong mekim man i kamap laki. (Aisaia 65:11; Kolosi 3:5) Olsem na mi lusim pasin bilong pilai laki. Long fes Sande bihain long mi stop long pilai loto, dispela namba mi save makim i win! Ol man i tok bilas long mi na ol i strong long mi mas pilai gen, tasol mi no bihainim tingting bilong ol. Mi lusim tru pasin bilong pilai loto.

Long de mi baptais long kibung bilong ol Witnes Bilong Jehova, wanpela samting i kamap bilong traim “nupela pasin” bilong mi. (Efesus 4:24) Long apinun, mi go bek long hotel mi slip long en na mi lukim olpela gelpren bilong mi i sanap ausait long rum bilong mi. Em i tok: “Kamon Sammy. Yumi amamas wantaim!” Tasol kwiktaim mi tok: “Nogat!” Mi tokim em olsem nau mi bihainim ol stretpela lo bilong Baibel. (1 Korin 6:18) Em i singaut na tok, “Yu tok wanem?” Em i daunim lo bilong Baibel long pasin pamuk, na em i strong long mipela i pren gen. Mi larim em i sanap ausait na mi yet i go insait long rum na lokim dua. Mi amamas olsem kirap long taim mi kamap wanpela Witnes long 1958, mi bihainim yet ol senis mi bin mekim long i stap bilong mi.

GUTPELA SAMTING I PAINIM MI

Mi pilim olsem mi inap raitim wanpela buk long olsem wanem ol tok bilong Baibel i bin helpim mi! Nau mi stap amamas, na mi gat ol pren husat i laikim na tingim mi, na tu, laip bilong mi i gat as bilong en.

Mi amamas yet long pilai beisbal, tasol em i no bikpela samting moa olsem long bipo. Taim mi pilai beisbal, mi kisim biknem na mani, na ol dispela samting i no stap longpela taim. Tasol pasin pren bilong mi wantaim God na lain brata mi insait long en bai i stap oltaim. Baibel i tok: “Ol manmeri i stap longwe long God, ol bai pinis na laik bilong ol tu bai pinis, tasol man i bihainim laik bilong God em bai stap oltaim oltaim.” (1 Jon 2:17) Pasin bilong mi long laikim God Jehova na lain bilong em i winim pasin bilong mi long laikim olgeta narapela samting!