Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Wastaua  |  No. 1 2018

3 Rot Bilong Karim Hevi

3 Rot Bilong Karim Hevi

Long nau, i gat sampela hevi we yumi no inap long abrusim o stretim. Sapos wanfamili o pren bilong yu i dai o yu gat sik we i no inap pinis, i gutpela moa sapos yu painim rot bilong karim dispela hevi. Yu ting Baibel inap helpim yu?

SIK I NO INAP PINIS

Rose i tok: “Mi kisim sik long papamama, na oltaim mi save pilim bikpela pen. Helt bilong mi i bagarap.” Sampela taim Rose i hatwok long putim tingting long ol samting em i stadi long en long Baibel o harim long miting. Tasol em i kisim bikpela helpim long tok bilong Jisas long Matyu 19:26: “God inap mekim olgeta samting.” Rose i kisim save olsem i gat kain kain rot bilong stadi. Taim em i pilim pen, em i save hatwok tru long rit, olsem na em i save harim ol rekoding bilong Baibel na ol nius bilong Baibel. * Em i tok: “Ol dispela tul i helpim mi long i stap strong yet long bilip.”

Sampela taim Rose i bel hevi bikos em i no inap moa long mekim ol samting em i save mekim long bipo, tasol em i kisim bel isi long tok bilong 2 Korin 8:12: “Pasin bilong givim samting em i gutpela moa yet sapos man i gat laik long givim. Man i ken givim samting em i gat, na em i no gat wok long givim samting em i no gat.” Dispela tok i kirapim Rose long tingim olsem God i amamas long ol wok em i mekim bikos em i givim bel olgeta long mekim wok inap long skel bilong em.

 BEL SORI

Delphine, em yumi stori long em long atikol paslain i tok: “Pikinini meri bilong mi i gat 18 krismas na em i dai, na long dispela taim mi bel hevi tru na pilim olsem mi no inap stap laip. Laip bilong mi bai i no wankain olsem long pastaim.” Tasol Delphine i stap bel isi tru taim em i ritim tok bilong Song 94:19. Man bilong raitim song i tokim God olsem: “Taim mi bel hevi na mi gat planti tingting long ol samting, yu save mekim bel bilong mi i stap isi na yu mekim mi i amamas.” Em i tok: “Mi beten askim Jehova long helpim mi long mekim ol samting we inap daunim bel hevi bilong mi.”

Delphine i kirap long mekim wok volantia na em i pilim olsem laip i gat as bilong en. Em i tok em i kain olsem kreyon bilong pikinini—maski kreyon i bruk hap hap, ol pikinini inap yusim yet long kalarim ol piksa. Maski em i pilim olsem em i no gat strong, em i luksave olsem em inap helpim ol narapela. Em i tok: “Mi luksave olsem taim mi yusim ol stiatok bilong Baibel long mekim gut bel bilong ol sumatin, dispela i olsem rot bilong Jehova long mekim gut bel bilong mi.” Em i raitim lista bilong ol manmeri em Baibel i stori long ol, olsem sampela hevi i kamap na i mekim ol i bel sori tru. Em i tok: “Olgeta bilong ol i gat pasin bilong beten.” Em i luksave olsem yumi “no inap kisim bekim bilong wanpela askim sapos yumi no opim Baibel.”

Delphine i luksave tu long narapela samting taim em i stadi long Baibel—yumi mas putim tingting i go long ol samting bai kamap bihain, na no ken tingting tumas long ol samting i kamap long bipo. Tok promis bilong Aposel 24:15 i mekim gut bel bilong em: “Bai i gat kirap bek bilong ol man i dai pinis, em ol stretpela man na ol man nogut wantaim.” Delphine i bilip tru olsem Jehova bai kirapim bek pikinini meri bilong em. Long ai bilong tingting, i olsem em inap lukim pikinini bilong em. Em i tok: “Mi lukim pikinini meri bilong mi. ‘Det’ bilong mitupela long bung i stap pinis long kalenda bilong Papa bilong mi. Mi lukim mitupela wantaim i stap long plaua gaden; mi inap lukim em klia tru na laikim em wankain olsem long de em i bon.”

^ par. 4 Planti bilong ol dispela rekoding i stap long websait jw.org/tpi.

Baibel inap mekim gut bel bilong yu maski yu bungim bikpela hevi tru