Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Wastaua  |  No. 1 2016

 FRAN PES STORI | WAI NA YUMI MAS BIHAINIM ONEST PASIN?

Yu Ting Ol Man i Bihainim Yet Onest Pasin?

Yu Ting Ol Man i Bihainim Yet Onest Pasin?

Hitoshi i wok akaunten long wanpela kampani long Japan we ol i save helpim ol man long kisim wok mani. Taim em i raitim wanpela ripot bilong akaun, bosman i tokim em long mekim wanpela giaman ripot. Hitoshi i tokim bosman olsem maus bilong bel bilong en i kotim em long mekim pasin giaman. Olsem na bosman i pretim Hitoshi olsem em bai pinisim em long wok, na bihain em i rausim em long wok.

Sampela mun bihain Hitoshi i bel hevi, long wanem, em i no inap long kisim wanpela wok mani. Olsem, long wanpela intaviu bilong kisim wok, em i tokim man i intaviuim em olsem em bai no inap wok wantaim kampani em ol i save mekim pasin giaman. Man bilong intaviuim em i tok, “Tingting bilong yu i narapela kain!” Famili na ol pren bilong Hitoshi i strongim em long bihainim yet onest pasin, tasol em i tingting planti long dispela samting. Em i ting, “I gutpela mi bihainim bilip bilong mi na mekim onest pasin o nogat.”

Stori bilong Hitoshi i soim olsem planti man i no ting em bikpela samting long mekim onest pasin. Sampela i ting dispela bai givim hevi long ol, moa yet long taim ol i mekim wok bisnis. Wanpela wokmeri long Saut Afrika i tok: “Sampela taim i hatwok tru long mi bihainim onest pasin, long wanem, ol wanwok i no mekim olsem.”

Planti man long nau i no save bihainim onest pasin, ol i save tok giaman long ol arapela. Sampela yia i go pinis, Robert S. Feldman, em wanpela saveman long University of Massachusetts Amherst i tok, 60 pesen bilong ol man i bikpela pinis i save mekim tok giaman long olgeta 10-pela minit long taim ol i toktok long ol narapela. Em i tok moa: “Mipela i kirap nogut long dispela wok painimaut. Mipela i no ting planti man i save tok giaman long olgeta de.” Planti man i no amamas taim ol arapela i tok giaman long ol, tasol ol yet i save mekim tok giaman.

Wai na planti man long nau i save stil, tok giaman, na mekim ol narapela pasin giaman? Taim ol man i no bihainim onest pasin, dispela i save kamapim wanem hevi long komiuniti? Na bikpela samting moa, hau bai yumi abrusim ol dispela pasin?