Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Wastaua  |  No. 1 2016

Daunim Pasin Bilong Tingting Planti na Bel Hevi

Daunim Pasin Bilong Tingting Planti na Bel Hevi

TAIM ol bebi i bon, ol i no inap lukautim ol yet, olsem na papamama i lukautim ol long olgeta samting. Taim ol i lain long wokabaut, ol i lukim ol man i bikpela pinis na ol i pret long ol. Tasol taim papamama i stap klostu, ol pikinini i holim han bilong ol na ol i no pret moa.

Taim yumi stap pikinini, papamama i laikim yumi na givim ol gutpela tok bilong helpim yumi. Na taim yumi save olsem papamama i laikim yumi, dispela i mekim gut bel bilong yumi. Na tu, taim ol i tok ol wok yumi mekim i gutpela, yumi bilip long yumi yet olsem yumi inap long mekim ol narapela wok tu.

Taim yumi wok long i go bikpela, yumi gat ol gutpela pren na dispela i mekim isi bel bilong yumi. Na long skul sapos ol pren bilong yumi i stap, yumi no pret na tingting planti.

Ol dispela tok i kamapim tingting bilong wanpela pikinini. Sampela yangpela i no gat planti pren, na planti i kisim liklik helpim long papamama. Melissa * i tok: “Taim mi lukim piksa bilong ol famili i bung na stap amamas wantaim, mi save ting olsem, ‘Mi no laik gat kain famili olsem long taim mi pikinini yet.’” Ating yu tu i gat wankain tingting.

GO BIKPELA LONG FAMILI I NOGAT BEL ISI

Ating taim yu go bikpela yu holim tingting olsem yu no inap mekim wanpela gutpela wok. Na ating wan wan taim tasol papamama i soim olsem ol i laikim yu na ol i givim tok bilong strongim yu. Na tu, yu tingim olsem planti taim papamama i kros pait na bihain ol i divos. Dispela i mekim na yu pilim olsem em asua bilong yu na dispela hevi i kamap. O ating papa o mama i tok nogut long yu na paitim yu.

Ol pikinini i go bikpela long kain famili olsem i save mekim wanem? Sampela i save kisim drak o dring planti alkohol long taim ol i stap tineja. Na sampela i save bung wantaim ol geng na bai ol i pilim olsem ol man i tingim ol. Na tu, ol tineja husat i pilim olsem ol man i no tingim ol i save hariap long painim boipren o gelpren na bai i gat wanpela i laikim na tingim ol. Tasol pasin pren bilong ol i no save stap longpela taim, dispela i mekim na ol i bel hevi na tingting planti.

Ol tineja i bungim ol kain hevi i ting olsem ol i no inap mekim wanpela gutpela wok. Ana i tok: “Mi pilim olsem mi no fit long mekim wanpela wok, long wanem, mama i save mekim kain tok olsem long mi. I nogat wanpela taim em i tok  amamas long mi na soim olsem em i laikim mi.”

I gat ol narapela samting i mekim na yumi tingting planti na bel hevi. Ating yu divos, bungim ol hevi bilong i go lapun, o yu tingting planti long lukluk bilong yu. Ol dispela hevi inap pinisim amamas bilong yu na bagarapim pasin pren bilong yu wantaim ol narapela. Yumi inap mekim wanem bilong daunim pasin bilong tingting planti na bel hevi?

YU TING GOD I SAVE TINGIM YUMI?

Em i bikpela samting long save olsem i gat rot bilong kisim helpim. I gat wanpela Man i laik tru long helpim yumi na em inap long mekim olsem, em God tasol.

Long rot bilong profet Aisaia, God i tok: “Yupela i no ken pret, long wanem, mi God bilong yupela . . . Bai mi mekim yupela i kamap strong na bai mi helpim yupela. Bai mi was gut long yupela na long bikpela strong bilong mi bai mi daunim ol birua bilong yupela.” (Aisaia 41:10, 13) Yumi stap bel isi taim yumi save olsem God bai was long yumi na helpim yumi! Olsem na i nogat risen long yumi tingting planti na pret long wanpela samting!

Baibel i stori olsem sampela man husat i lotuim God i bin tingting planti, tasol God i lukautim ol. Hana em mama bilong Samuel i bel hevi, long wanem, em i no inap karim pikinini. Na ol arapela i tok bilas long em, olsem na planti taim em i save krai na em i no kaikai. (1 Samuel 1:6, 8) Tasol bihain long em i kamapim hevi bilong em long Jehova, em i no bel hevi moa.—1 Samuel 1:18.

Sampela taim Devit em man bilong raitim Song i bin tingting planti na bel hevi. Inap planti yia, King Sol i painim em bilong kilim em i dai. Na sampela taim em i pilim olsem bel hevi i daunim em tru. Tasol Devit i bin abrusim bagarap. (Song 55:3-5; 69:1) Olsem na em i tok: “Bikpela, yu tasol yu save lukautim mi na mi stap gut. Mi no save pret long wanpela samting. Taim mi go long bet, wantu mi save slip i dai.”—Song 4:8.

Hana na Devit i putim olgeta hevi bilong ol long han bilong Jehova, na ol i luksave olsem Em i strongim ol. (Song 55:22) Olsem wanem yumi inap bihainim pasin bilong ol?

 TRIPELA ROT BILONG STAP BEL ISI

1. Trastim Jehova Olsem Papa Bilong Yu.

Jisas i laik bai yumi save long Papa bilong en, em ‘wanpela tasol i God tru.’ (Jon 17:3) Aposel Pol i tok: “[God] i no stap longwe long yumi olgeta wan wan.” (Aposel 17:27) Na Jems i tok: “Yupela i mas i go klostu long God, na em bai kam klostu long yupela.”—Jems 4:8.

Yumi save olsem yumi gat Papa long heven husat i laikim na tingim yumi, na dispela i helpim yumi long daunim pasin bilong tingting planti na bel hevi. Sampela haptaim i mas lus na bai yu inap trastim God, tasol planti i luksave olsem taim ol i mekim olsem ol i kisim gutpela helpim. Caroline i tok: “Taim Jehova i stap Papa bilong mi, mi inap long kamapim tingting bilong mi long em. Na dispela i mekim mi stap bel isi!”

Rachel i tok: “Taim papamama i lusim mi, Jehova i givim bel isi long mi. Mi inap toktok long em na askim em long helpim mi long ol hevi bilong mi. Na em i bin helpim mi.” *

2. Bung wantaim ol wanbilip.

Jisas i skulim ol disaipel bilong en long tingim ol wanbilip olsem ol brata na susa bilong ol. Em i tok: “Yupela olgeta i stap brata brata.” (Matyu 23:8) Em i laik bai ol disaipel tru bilong en i laikim narapela narapela na pas gut wantaim olsem famili.—Matyu 12:48-50; Jon 13:35.

Ol kongrigesen bilong ol Witnes Bilong Jehova i wok strong long mekim gut long ol narapela na stap olsem wanpela famili i pas gut wantaim. (Hibru 10:24, 25) Planti i luksave olsem ol miting bilong kongrigesen i olsem gutpela marasin bilong helpim ol long daunim pasin bilong bel hevi na tingting planti.

Eva i tok: “Mi gat wanpela gutpela pren long kongrigesen husat i kliagut long ol hevi bilong mi. Em i save putim gut yau, ritim ol buk na nius long mi, na beten wantaim mi. Oltaim em i stap wantaim mi. Na em i save toktok gut wantaim mi long ol hevi bilong mi na mi inap karim ol dispela hevi. Mi tenkyu olsem em i strongim mi na nau mi stap amamas.” Na Rachel i tok: “Nau mi gat papa na mama insait long kongrigesen. Ol i soim olsem ol i laikim mi na mi stap bel isi.”

 3. Laikim na mekim gut long ol narapela.

Taim yu laikim ol narapela na mekim gut long ol, bai yu strongim pasin pren bilong yupela. Jisas i tok: “Amamas bilong givim samting i winim amamas bilong kisim samting.” (Aposel 20:35) Olsem na sapos yumi soim pasin laikim long ol narapela, ol tu bai mekim wankain pasin long yumi. Jisas i tokim ol disaipel bilong em olsem: “Bihainim pasin bilong givim ol samting long ol man, na ol bai givim ol samting long yupela.”—Luk 6:38.

Taim yumi soim pasin laikim na ol narapela i laikim yumi, bai yumi stap amamas. Olsem Baibel i tok: “Pasin laikim i no inap pinis.” (1 Korin 13:8) María i tok: “Sampela taim mi gat tingting kranki long mi yet. Olsem na mi save helpim ol narapela na bai mi no tingim tumas hevi bilong mi. Mi amamas taim mi helpim ol narapela.”

OLGETA MAN BAI STAP BEL ISI NA AMAMAS

Ol samting yumi bin stori long en i no inap pinisim pasin bilong tingting planti na bel hevi. Tasol ol inap helpim yumi long stap bel isi long nau. Caroline i tok: “Sampela taim mi save tingting planti na bel hevi. Tasol nau mi pilim olsem mi inap mekim gut ol wok samting. Mi save olsem God i tingim mi na mi gat planti gutpela pren, olsem na mi stap bel isi.” Rachel tu i pilim olsem. Em i tok: “Sampela taim bel hevi i save daunim mi. Tasol ol wanbilip i save mekim ol gutpela tok na bai mi ken holim stretpela tingting. Na bikpela samting moa, long olgeta de mi inap toktok long Papa bilong mi long heven. Taim mi mekim olsem, dispela i helpim mi long stap amamas.”

Baibel i stori long nupela taim bai kamap, na long dispela taim yumi olgeta bai stap amamas na bel isi

Baibel i stori long nupela taim bai kamap, na long dispela taim yumi olgeta bai stap amamas na bel isi. Baibel i tok promis olsem: “Na olgeta man wan wan bai i sindaun gut klostu long gaden wain na diwai fik bilong ol, na i no gat wanpela man bai i mekim ol i pret.” (Maika 4:4) Long dispela taim, bai yumi no pret olsem ol man bai mekim nogut long yumi na bagarapim yumi. Na tu, yumi “no inap tingim moa” ol hevi bilong bipo. (Aisaia 65:17, 25) God na Pikinini bilong em, Krais Jisas bai kamapim “stretpela pasin,” na “ol manmeri bai i no pret moa na bai ol i sanap strong oltaim.”—Aisaia 32:17.

^ par. 5 Mipela i senisim ol nem.

^ par. 21 Ol Witnes Bilong Jehova i save mekim fri Baibel stadi kos wantaim ol man husat i laik go klostu long God.