Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Wastaua—Stadi Edisen  |  Oktoba 2015

 LAIP STORI

No Gat Rigret Long Disisen Em i Mekim Taim Em i Yangpela

No Gat Rigret Long Disisen Em i Mekim Taim Em i Yangpela

NIKOLAI DUBOVINSKY em bikpela brata bilong bubu meri bilong mi. Sampela yia paslain long em i dai, em i redim stori bilong ol ekspiriens bilong em. Em i stori long ol gutpela samting na ol hevi i painim em taim em i mekim wok bilong Jehova long Soviet Yunion, em hap i gat tambu long wok bilong yumi. Maski ol hevi i painim em, oltaim em i stap gut long God na em i amamas tru long laip bilong em. Bubu Nikolai i save tok olsem em i laik bai ol yangpela i mas harim stori bilong em, olsem na mi laik kamapim stori bilong em. Bubu Nikolai i bon long 1926 long ples Podvirivka, long taun Chernivtsi Oblast, long Yukren.

NIKOLAI I KISIM SAVE LONG TOK I TRU

Bubu Nikolai i stori olsem: “Long 1941, bikpela brata bilong mi, Ivan, i bringim buk The Harp of God na The Divine Plan of the Ages, na sampela Wastaua na sampela buklet. Mi ritim olgeta dispela nius. Mi kirap nogut long kisim save olsem Satan em i as bilong olgeta hevi i kamap long graun, na i no God. Mi skelim ol tok bilong ol dispela pablikesen wantaim ol tok bilong Baibel, na mi luksave olsem mi painim pinis tok i tru. Mi kirap autim gutnius bilong Kingdom long ol narapela. Taim mi stadi long ol dispela pablikesen, save bilong mi long tok i tru i kamap klia moa, na mi laik tru long kamap wokman bilong Jehova.

“Mi save olsem hevi bai painim mi, long wanem, bilip bilong mi bai pasim mi long mekim sampela samting. Em taim bilong woa, na mi no laik kilim man. Mi redim mi yet long bungim ol hevi bai kamap, olsem na mi putim ol kain skripsa olsem long tingting, Matyu 10:28 na 26:52. Mi strongim tingting olsem oltaim mi bai stap gut long Jehova, maski ol birua bai kilim mi!

“Long 1944, mi gat 18 krismas, olsem na gavman i singautim mi long joinim long ami. Dispela em namba 1 taim bilong mi long bungim ol wanbilip. Sampela em ol yangpela brata, na mipela olgeta i bung long ples we ol i kisim nem bilong ol lain bai insait long ami. Mipela i tokim ol bikman bilong ami olsem mipela i no inap insait long woa. Wanpela bikman i pretim mipela na em i tok ol i no inap givim kaikai long mipela, na ol bai fosim mipela long digim ol baret, na ol bai sutim mipela long gan. Mipela i no pret, olsem na mipela i tokim em: ‘Laip bilong mipela i stap long han bilong yu. Maski yu mekim wanem long mipela, mipela i no inap tru long brukim lo bilong God. God i tok: “Yupela i no ken kilim i dai ol arapela manmeri.”’—Kis. 20:13.

“Ol i salim mi na 2-pela narapela brata i go long Belarus, na mipela i wok long gaden na stretim ol haus i bagarap. Mi tingim yet ol bagarap em woa i kamapim long boda bilong biktaun Minsk. Arere long rot i gat ol diwai em paia i kukim pinis. Bodi bilong ol daiman, na  ol hos em ol i dai na bel i solap, ol i stap nabaut long ol baret na insait long bikbus. Mi lukim ol karis na ol samting bilong pait, na tu, mi lukim ol pipia bilong balus i stap nabaut. Ol samting mi lukim i soim klia olsem ol manmeri i brukim lo bilong God.

“Woa i pinis long 1945, tasol mipela i kalabus yet inap 10-pela yia, long wanem, mipela i no laik insait long pait. Inap 3-pela yia, mipela i no bung wantaim ol wanbilip o kisim ol pablikesen bilong strongim bilip. Mipela i salim pas long sampela sista, tasol gavman i arestim ol na putim ol long i stap kalabus inap 25 yia long kem bilong mekim wok leba.

“Long 1950, ol i larim mipela i go fri paslain long yia ol i makim. Taim mi stap long kalabus, mama bilong mi na liklik susa bilong mi, Maria, ol i kamap Witnes Bilong Jehova! Mi gat 3-pela bikpela brata na ol i stadi long Baibel. Mi givim bel tru long autim tok, olsem na lain sekiuriti bilong Soviet i laik salim mi i go bek long kalabus. Ol brata husat i go pas long lukautim wok, ol i askim mi long helpim wok bilong redim ol litresa aninit long graun. Long dispela taim, mi gat 24 krismas.

REDIM OL LITRESA

“Ol Witnes i save tok: ‘Sapos ol birua i pasim wok bilong Kingdom antap long graun, orait dispela wok bai ron yet aninit long graun.’ (Snd. 28:28) Long dispela taim, mipela i bihainim pasin hait na prinim ol litresa aninit long graun. Namba 1 ples wok bilong mi aninit long graun em long hap bilong bikbrata bilong mi, Dmitry. Sampela taim mi save stap tasol long dispela hap inap 2-pela wik. Sapos oksijen i pinis na kerosin lam i laik i dai, mi save slip tasol na wet inap oksijen i pulap gen long rum.

Piksa bilong hap aninit long graun we Nikolai i redim ol litresa

 “Wanpela taim, brata i wok wantaim mi i askim mi olsem: ‘Nikolai, yu bin kisim baptais tu?’ Maski mi mekim wok bilong Jehova inap 11-pela yia pinis, mi no bin kisim baptais. Olsem na em i toktok wantaim mi long dispela samting, na long nait em i baptaisim mi long raunwara. Long dispela taim, mi gat 26 krismas. Tripela yia bihain, mi kisim narapela asainmen—ol i makim mi long kamap memba bilong Kantri Komiti. Long dispela taim, ol i makim ol brata i stap fri long kisim ples bilong ol brata em polis i arestim ol, olsem na wok bilong Kingdom i wok yet long i go het.

HEVI BILONG WOK ANINIT LONG GRAUN

“Taim mi stap long kalabus, i no gat planti hatwok olsem ol hatwok i stap long wok bilong prinim ol litresa aninit long graun! Inap 7-pela yia, mi lukautim mi yet long sait bilong bilip, long wanem, mi hait long lain KGB na mi no i go long ol miting bilong kongrigesen. Wan wan taim tasol mi save go lukim famili bilong mi. Maski i olsem, ol i pilim hevi bilong mi na dispela i strongim mi. Oltaim sampela samting i putim presa long mi na mi mas hait long ol birua, na dispela i pinisim strong bilong mi. Mipela i mas redi long bungim ol hevi bai kamap. Long wanpela apinun, 2-pela polis ofisa i kam long haus mi stap long en. Mi kalap long windo long narapela sait bilong haus na ranawe i go insait long bikbus. Taim mi ran i go ausait long hap i no gat planti diwai long en, mi harim narakain wisil. Taim mi harim gan i pairap, mi luksave olsem dispela wisil em saun bilong ol bulet! Wanpela polisman i ron long hos na em i sut long mi inap long ol bulet i pinis. Wanpela bulet i kisim mi long han. Polisman i ronim mi inap 5 kilomita olgeta. Mi hait long bikbus, na em i no inap lukim mi. Bihain, mi go long kot na ol i tokim mi olsem ol i bin sut long mi inap 32 taim!

“Mi bin i stap longpela taim aninit long graun, olsem na mi lusim skin olgeta. Dispela bai mekim na ol birua bai luksave long samting mi wok long mekim. Olsem na mi lusim bikpela haptaim long stap long san. Mi bin i stap aninit long graun, olsem na dispela i bagarapim tu helt bilong mi. Wanpela taim, mi no bung wantaim ol narapela brata, long wanem, blut i kamaut long nus na maus bilong mi.

OL I ARESTIM NIKOLAI

Banis kalabus long Mordvinia long 1963

“Long Janueri 26, 1957, ol i arestim mi. Inap 6-pela mun bihain, Suprim Kot Bilong Yukren i tokaut long disisen bilong kot. Kot i mekim disisen long ami bai sutim mi na kilim  mi i dai, tasol ol i bin rausim lo bilong kilim man, olsem na ol i makim mi long i stap kalabus inap 25 yia. Mipela 8-pela brata i stap, na ol i tok mipela bai i stap kalabus inap olsem 16 yia. Ol i salim mipela i go long banis kalabus long Mordvinia, na inap olsem 500 Witnes i stap long hap. Mipela i hait na stadi long Wastaua long ol liklik grup. Wanpela gad i skelim sampela magasin ol i bin painim na kisim long mipela, na em i tok strong olsem: ‘Sapos yupela i ritim yet ol dispela magasin, dispela bai strongim bilip bilong yupela na i no gat wanpela samting bai daunim yupela!’ Oltaim mipela i mekim stret wok ol i tokim mipela long mekim, na mipela i mekim ekstra wok. Tasol komanda bilong banis kalabus i tok: ‘Wok yupela i mekim long hia em i no bikpela samting long mipela. Mipela i laik bai yupela i stap gut long mipela na bihainim olgeta tok bilong mipela.’”

“Oltaim mipela i mekim stret wok ol i tokim mipela long mekim, na mipela i mekim ekstra wok”

EM I STAP GUT YET LONG GOD

Haus Kingdom long Velikiye Luki

Long 1967, bubu Nikolai i lusim kalabus, na em i helpim wok bilong oganaisim ol kongrigesen long Estonia na St. Petersburg long Rasia. Long kirap bilong yia 1991, kot i tok disisen em ol narapela kot i mekim long 1957 i no stret, long wanem, i no gat evidens bilong soim olsem bubu i mekim wanpela rong. Long bipo, polis na ami i mekim nogut tru long planti Witnes, tasol nau kot i tokaut olsem ol dispela Witnes i no mekim wanpela rong. Long 1996, Nikolai i go stap long biktaun bilong Velikiye Luki long Pskov Oblast, em taun i stap 500 kilomita longwe long St. Petersburg. Em i baim wanpela liklik haus, na long 2003 ol i sanapim Haus Kingdom long hap bilong em. Long nau, 2-pela kongrigesen i bung long en.

Mi na man bilong mi i wok long brens ofis bilong ol Witnes Bilong Jehova long Rasia. Long Mas 2011, Bubu Nikolai i visitim mipela, na sampela mun bihain em i dai. Taim em i toktok, ai bilong em i lait na mipela i pilim tru tok em i mekim. Em i tok: “Taim mi skelim olgeta samting i kamap, i olsem nau em namba 7 de bilong mats raunim Jeriko, na yumi kirap pinis long mats.” (Jos. 6:15) Em i gat 85 krismas. Maski em i bin bungim planti hevi, em i tok: “Mi amamas tru olsem taim mi yangpela yet, mi bin mekim wok bilong Jehova! Mi no gat rigret!”