Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Wastaua—Stadi Edisen  |  Oktoba 2015

Mi Go Klostu Long God na Dispela i Helpim Mi

Mi Go Klostu Long God na Dispela i Helpim Mi

TAIM mi gat 9 krismas, mi no gro moa. Dispela samting i kamap 34 yia i go pinis long Kot Diwa, olsem na mi longpela inap 1 mita tasol. Papamama i tokim mi long wok hat bambai mi no ken tingim lukluk bilong mi. Mi sanapim wanpela tebol long fran bilong haus bambai mi inap maketim ol prut. Planti manmeri i baim ol prut bilong mi.

Maski mi wok hat, mi stap sot yet, na mi hatwok long mekim sampela samting. Taim mi go long stua, mi hatwok long kisim ol samting antap long self. I luk olsem ol i tingim ol longpela manmeri tasol taim ol i wokim ol samting. Mi sori long mi yet, tasol dispela tingting i senis taim mi gat 14 krismas.

Wanpela taim, 2-pela meri em ol i Witnes Bilong Jehova, ol i kam baim prut bilong mi, na ol i kirapim Baibel stadi wantaim mi. Mi luksave olsem em i bikpela samting moa long kisim save long Jehova na samting em i tingting pinis long mekim, na mi no ken tingim tumas hevi mi gat long bodi. Song 73:28 em feiveret skripsa bilong mi. Fes hap bilong en i tok: “Mi stap klostu long yu na dispela i gutpela tru.”

Sotpela taim bihain, famili bilong mipela i go i stap long Bekina Faso, na bikpela senis i kamap long laip bilong mi. Long Kot Diwa, mi save sanap long hap bilong salim prut, olsem na planti manmeri i save long mi. Tasol long nupela hap mipela i stap long en, planti manmeri i no save long mi, na tu, em fes taim bilong ol long lukim kain meri olsem mi. Ol manmeri i lukluk strong long mi. Olsem na sampela taim mi stap insait tasol long haus inap sampela wik. Bihain, mi tingim bek olsem taim mi go klostu long Jehova, dispela i bin helpim mi. Mi raitim pas i go long brens ofis bilong ol Witnes Bilong Jehova na ol i salim wanpela meri i kam lukim mi. Nem bilong em Nani, na em i mekim wok misineri. Em i sindaun long liklik motobaik na em i kam.

Long hap mipela i stap long en, ol rot em wesan tasol. Olsem na ol rot i save wel wel, na long taim bilong ren, rot i save kamap tais. Planti taim Nani i pundaun long motobaik taim em i kam long stadi wantaim mi, tasol dispela i no pasim em. Bihain, em i tok em i laik kisim mi i go long ol miting. Mi save olsem planti manmeri bai lukluk strong long mi. Na tu, sapos mi tu i kalap long motobaik, hevi bilong mitupela wantaim bai mekim na i hatwok long stiaim motobaik. Maski i olsem, mi wanbel tasol, long wanem, mi tingim namba 2 hap bilong feiveret skripsa bilong mi, na em i tok long Jehova olsem: “Yu banis tru bilong mi.”

 Sampela taim mitupela Nani i pundaun long tais, tasol dispela i no pasim mitupela long i go long miting. Mi kirap nogut olsem ol lain long Haus Kingdom i smail na ol i no lukluk strong long mi olsem ol narapela lain i mekim! Inap 9-pela mun bihain, mi kisim baptais.

Namba 3 hap bilong feiveret skripsa bilong mi i tok: “Mi laik tokaut long olgeta samting yu bin mekim.” Mi save olsem wok autim tok bai i gat bikpela hatwok bilong en. Mi tingim yet namba 1 taim mi kirap long autim tok long ol haus. Ol pikinini na ol bikpela manmeri wantaim i save lukluk strong na bihainim mi, na wokabaut long wankain wei bilong mi long wokabaut. Pasin ol i mekim i bagarapim tru bel bilong mi, tasol oltaim mi tokim mi yet olsem ol dispela lain i mas kisim stretpela save olsem ol inap stap long Paradais, wankain olsem mi tu i laik i stap long Paradais; na dispela tingting i strongim mi.

Mi kisim baisikol i gat 3-pela wil na mi inap yusim han long kontrolim. Taim mipela i autim tok na go antap long maunten, poroman bilong mi i save pusim mi long baisikol i go antap, na em i save kalap gen long baisikol na mitupela wantaim i go daun long maunten. Pastaim, mi pilim hatwok long autim tok, tasol bihain mi kisim amamas long mekim dispela wok. Olsem na long 1998, mi putim aplikesen long kamap painia oltaim.

Mi kirapim planti Baibel stadi na 4-pela i kisim baptais. Na tu, susa bilong mi i kisim tok i tru! Taim mi harim olsem ol narapela i kamap strong long tok i tru, dispela i save strongim mi. Wanpela taim, sik malaria i daunim mi na mi kisim pas i kam long Kot Diwa. Mi bin kirapim Baibel stadi wantaim wanpela sumatin bilong yunivesiti long Bekina Faso, na mi askim wanpela brata long stadi wantaim em. Bihain, dispela sumatin i go long Kot Diwa. Mi amamas tru long harim olsem dispela sumatin i kamap pablisa i no baptais!

Mi mekim wanem ol samting bilong lukautim mi yet? Wanpela oganaisesen bilong helpim ol lain i gat hevi long bodi i skulim mi long wok bilong samapim ol samting. Wanpela tisa meri i lukim wok bilong mi, na em i tok: “Mipela i mas skulim yu long wei bilong wokim sop.” Olsem na ol i skulim mi. Mi stap long haus na wokim ol sop bilong wasim klos na ol narapela samting. Ol manmeri i laikim sop bilong mi, na ol i kirapim ol narapela tu long baim sop bilong mi. Mi yet i save yusim motobaik bilong mi long bringim sop i go long ol.

Sori tru olsem long 2004, bun baksait bilong mi i krungut na dispela i givim bikpela pen long mi, olsem na mi lusim wok painia. Maski i olsem, mi givim bel yet long wok autim tok.

Ol manmeri i tok, ol i tingim mi olsem meri bilong smail. Mi amamas tru bikos mi go klostu long God, na dispela i helpim mi.—Stori bilong Sarah Maiga.