Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Wastaua—Stadi Edisen  |  Septemba 2015

Olsem Wanem Jehova i Soim Olsem Em i Laikim Yumi?

Olsem Wanem Jehova i Soim Olsem Em i Laikim Yumi?

“Olaman! Pasin laikim Papa i mekim long yumi i bikpela tru”!—1 JON 3:1.

OL SINGSING: 91, 13

1. Aposel Jon i kirapim ol Kristen long tingim wanem samting? Bilong wanem?

YUMI mas tingim tingim na pilim tru tok bilong aposel Jon long 1 Jon 3:1. Em i tok: “Olaman! Pasin laikim Papa i mekim long yumi i bikpela tru.” Jon i laik kirapim ol Kristen long tingim pasin laikim bilong God na ol samting God i mekim bilong soim olsem em i laikim ol. Taim yumi tingim pasin laikim bilong Jehova, dispela bai kirapim yumi long laikim em moa yet, na tu, dispela bai strongim pasin bilong yumi long pas gut wantaim em.

2. Bilong wanem sampela manmeri i pilim olsem God i no laikim ol?

2 Sampela man i pilim olsem God i no laikim yumi. Ol i pilim olsem yumi mas pret na bihainim tok bilong God. O, ating sampela bilip giaman i mekim na ol i pilim olsem God i no gat pasin laikim, na ol man i no laikim em. Tasol sampela manmeri i pilim olsem i no gat lo i bosim pasin laikim bilong God, na em i save laikim ol manmeri maski ol i bihainim stretpela pasin o pasin nogut. Yu kisim skul long Baibel olsem pasin laikim em nambawan bikpela pasin bilong Jehova, na dispela i kirapim em long salim Pikinini bilong em i kam i dai na givim laip bilong em olsem ofa bilong baim bek yumi. (Jon 3:16; 1 Jon 4:8) Tasol ating ples na famili yu kamap bikpela long en inap stiaim tingting yu holim long pasin laikim bilong God.

3. Hau bai yumi inap kliagut long pasin bilong God long laikim yumi?

 3 Olsem wanem Jehova i soim olsem em i laikim yumi? Yumi bai kisim bekim bilong dispela askim taim yumi kisim save long pasin bilong God Jehova long pas gut wantaim yumi. Jehova i wokim olgeta manmeri. (Ritim Song 100:3-5.) Olsem na Baibel i kolim Adam olsem “pikinini bilong God,” na Jisas i skulim ol disaipel long kolim God olsem “Papa bilong mipela long heven.” (Luk 3:38; Mat. 6:9) Jehova i givim laip long yumi, olsem na em i stap Papa bilong yumi. Em i pas gut wantaim yumi, wankain olsem papa i pas gut wantaim ol pikinini. Jehova i laikim yumi wankain olsem gutpela papa i laikim ol pikinini bilong em.

4. (a) Olsem wanem Jehova i no wankain long ol papa long graun? (b) Long dispela stadi na long neks stadi, yumi bai stori long wanem samting?

4 Ol papa long graun em ol sinman. Ol i laik bihainim pasin laikim bilong Jehova olsem Papa, tasol ol i no inap mekim olgeta samting. Sampela manmeri i kamap bikpela long famili i gat planti hevi, olsem na ol i bel hevi yet long sampela samting i bin painim ol. Dispela hevi i daunim ol na bagarapim tru bel bilong ol. Jehova em i no dispela kain papa. (Sng. 27:10) Taim yumi kisim save long pasin laikim bilong Jehova na pasin bilong em long tingim tru yumi, dispela bai kirapim yumi long i go klostu moa long em. (Jems 4:8) Long dispela stadi, yumi bai stori long 4-pela rot we Jehova i soim olsem em i laikim yumi. Long neks stadi, yumi bai stori long 4-pela rot bilong soim klia olsem yumi laikim em.

JEHOVA I GIVIM OL SAMTING YUMI NIDIM

5. Aposel Pol i tok wanem long ol manmeri bilong Atens?

5 Taim aposel Pol i stap long taun Atens long Grik, em i lukim olsem taun i pulap long ol imis bilong ol god giaman. Ol manmeri i bilip olsem ol dispela god i givim laip na ol narapela samting. Olsem na Pol i tok: “Dispela God husat i bin wokim graun na olgeta samting i stap long en, . . . em yet i givim laip na win na olgeta samting long olgeta manmeri. . . . Long rot bilong em yumi gat laip na yumi inap wokabaut na stap.” (Apo. 17:24, 25, 28) Jehova i laikim yumi, olsem na em i givim “olgeta samting” bilong helpim yumi long i stap laip. Orait, dispela hap tok i givim wanem skul long yumi?

6. Olsem wanem ol samting long graun i soim klia olsem God i laikim yumi? (Lukim piksa long kirap bilong stadi.)

6 Tingim graun yumi stap long en. Jehova i “givim graun long yumi manmeri.” (Sng. 115:15, 16) Ol saientis i tromoi bikpela mani long salim ol roket i go long ples antap long painim ol planet i wankain olsem graun yumi stap long en. Maski ol saientis i kisim save long planti handret planet, ol i no amamas bikos olgeta planet i no gat ol wankain samting olsem i stap long graun na i helpim yumi long i stap laip. Graun i narapela kain tru. Tingim: Planti planet tru i stap long ples antap na long Milkiwe galaksi, tasol Jehova i wokim graun bambai ol manmeri inap sindaun long en, na tu, em i mekim graun i luk nais tru, na em i redim ol samting bilong helpim sindaun bilong yumi, na i no gat hevi inap painim yumi! (Ais. 45:18) Olgeta dispela samting i soim klia olsem Jehova i laikim yumi!—Ritim Jop 38:4, 7; Song 8:3-5.

7. Taim God i wokim yumi, wanem ol samting i soim klia olsem em i laikim tru yumi?

7 Maski Jehova i redim naispela ples wantaim ol samting yumi nidim, olsem wara na kaikai, yumi mas mekim sampela samting moa. Pikinini i save stap bel isi taim em i pilim olsem papamama i laikim em na tingim em. Jehova i wokim ol man i kamap olsem em yet, olsem na ol inap pilim olsem em i laikim ol na tingim ol, na ol inap soim tenkyu bilong ol. (Stt. 1:27) Jisas i tok moa olsem: “Ol man i hangre long kisim save long God, ol i ken amamas.” (Mat. 5:3) Jehova i laikim yumi, olsem na em “i save givim yumi planti gutpela samting bilong mekim yumi  amamas,” em ol samting olsem klos na kaikai, na ol samting bilong strongim bilip.—1 Tim. 6:17; Sng. 145:16.

JEHOVA I SKULIM YUMI LONG TOK I TRU

8. Bilong wanem yumi ken bilip olsem “God bilong mekim pasin tru” bai laikim yumi?

8 Ol papa i save laikim ol pikinini bilong ol na lukautim ol bambai ol narapela i no ken giamanim ol. Tasol planti papamama i givim baksait long ol stretpela lo bilong God long Baibel, olsem na ol i no save givim skultok bilong stiaim ol pikinini. Dispela i mekim na ol papamama na ol pikinini i save toktok planti na kros. (Snd. 14:12) Tasol Jehova em i “God bilong mekim pasin tru tasol.” (Sng. 31:5) God i laikim ol pikinini bilong em na em i amamas long larim lait bilong tok i tru i stap ples klia na stiaim olgeta samting ol i mekim, na stiaim ol moa yet long sait bilong wok lotu. (Ritim Song 43:3.) Jehova i kamapim klia wanem ol tok i tru? Olsem wanem dispela i soim klia olsem em i laikim yumi?

Ol papa i bihainim pasin bilong Jehova na skulim ol pikinini long tok i tru na helpim ol long i stap pren bilong Papa long heven (Lukim paragraf 8-10)

9, 10. Olsem wanem Jehova i soim olsem em i laikim yumi taim em i helpim yumi long kisim stretpela save long (a) em i husat? (b) wok yumi mas mekim?

9 Jehova i helpim yumi long kisim stretpela save long em i wanem kain God. Em i tokaut long nem bilong em, na dispela nem i stap planti taim moa long Baibel winim ol narapela nem. Long dispela rot, Jehova i kam klostu long yumi na yumi inap kisim save long em. (Jems 4:8) Na tu, Jehova i kamapim klia ol pasin bilong em. Ol samting long ples antap i kamapim klia bikpela strong na savetingting bilong Jehova, na tu, long rot bilong Baibel, em i kamapim klia stretpela pasin na bikpela pasin laikim bilong em. (Rom 1:20) Em i olsem wanpela papa husat i gat strong na savetingting, na tu, em i gat pasin laikim na em i save mekim wankain pasin long olgeta kain man. Dispela i mekim na ol pikinini bilong em i amamas long pas gut wantaim em.

10 Jehova i laik helpim yumi, olsem na em i tokim yumi long wok yumi mas mekim. Dispela i mekim na pasin wanbel i stap namel long lain bilong em long heven na graun, na ol i mekim gut wok bilong ol. Baibel i tok, God i no wokim yumi bilong bihainim tingting bilong yumi yet na bosim wokabaut bilong yumi, long wanem, hevi bai kamap sapos yumi mekim olsem. (Jer. 10:23) Sapos yumi stap daun long wok bos bilong God, dispela tasol bai helpim yumi long i stap bel isi na amamas. Jehova i laikim tru yumi, olsem na em i toksave long yumi long dispela samting!

11. Jehova i mekim wanem tok promis na dispela i soim olsem em i laikim na tingim tru yumi?

11 Sapos papa i gat pasin laikim, em bai tingim tru sindaun bilong ol pikinini bilong em long bihain—em i laik bai ol i gat gutpela sindaun. Sori tru olsem planti manmeri i no gat stretpela save long ol samting bai kamap bihain, na ol i lusim bikpela haptaim long mekim ol samting we i no inap helpim ol long bihain. (Sng. 90:10) Yumi stap olsem ol pikinini bilong God, olsem na yumi pilim olsem Jehova i laikim tru yumi, long wanem, em i tok promis long givim yumi gutpela laip tru long bihain. Dispela i mekim na laip bilong yumi i gat mining long en.

JEHOVA I KAUNSELIM NA STRETIM OL PIKININI

12. Olsem wanem tok kaunsel em Jehova i givim long Kein na Baruk i soim klia olsem em i laikim ol na tingim ol?

12 “Watpo yu kros? Na watpo pes bilong yu i senis olgeta? Sapos yu mekim gutpela pasin, orait bai yu amamas. . . . Tasol yu mas strong na winim [sin].” (Stt. 4:6, 7) Dispela gutpela tok kaunsel i kamap long taim stret bilong en. Jehova i givim tok lukaut long Kein taim em i lukim olsem Kein i laik mekim pasin we bai kamapim bikpela hevi tru. Sori tru olsem Kein i sakim dispela tok lukaut, olsem na bikpela hevi i painim em. (Stt. 4:11-13) Baruk em kuskus bilong Jeremaia. Wanpela taim, Baruk i bel hevi, olsem na Jehova i givim tok kaunsel bilong helpim em long luksave long hevi inap painim em. Baruk i bihainim tok  kaunsel Jehova i givim long em, olsem na em i abrusim bagarap.—Jer. 45:2-5.

13. Bilong wanem Jehova i larim ol wokman bilong em i karim hevi?

13 Pol i tok: “Jehova i save stretim man em i laikim, em i save givim kanda long olgeta man em i kisim olsem pikinini bilong en.” (Hib. 12:6) Taim man i kisim panismen, dispela bai helpim em long stretim pasin bilong em. Tasol i gat kain kain rot bilong stretim man. Baibel i kamapim stori bilong planti gutpela wokman bilong God, em ol i bin karim ol bikpela hevi we i trenim ol na kirapim ol long stretim pasin bilong ol. Tingim stori bilong Josep, Moses, na Devit. Baibel i stori gut long planti liklik samting ol i mekim, na dispela i narapela kain long stori bilong ol narapela bilipman. Taim yumi ritim stori bilong ol long olsem wanem Jehova i sambai long ol long taim bilong hevi, na Jehova i yusim ol long mekim ol bikpela wok, dispela i helpim yumi long pilim tru pasin bilong Jehova long laikim na tingim tru ol wokman bilong em.—Ritim Sindaun 3:11, 12.

14. Taim Jehova i stretim yumi, olsem wanem dispela i soim olsem em i laikim yumi?

14 Taim Jehova i stretim yumi, dispela i helpim yumi long luksave long narapela pasin bilong em. Taim ol man i mekim rong na Jehova i stretim ol na ol i tanim bel, “em i save lusim sin” bilong ol. (Ais. 55:7) Wanem mining bilong dispela tok? Devit i stori gut long pasin bilong Jehova long fogivim rong na em i tok: “Em i save lusim olgeta sin bilong mi, na em i save mekim orait olgeta sik bilong mi. Bikpela i kisim bek mi na mi no i dai. Em i save marimari na sori moa yet long mi. Hap bilong sankamap em i no klostu long hap bilong san i go daun. Em i longwe tru. Olsem tasol God i save rausim sin bilong yumi na sin i stap  longwe tumas.” (Sng. 103:3, 4, 12) Taim Jehova i givim skultok na tok bilong stretim yumi, oltaim yumi mas redi long kisim ol dispela tok. Yumi mas luksave olsem em i givim ol dispela tok, long wanem, em i laikim tru yumi.—Sng. 30:5.

JEHOVA I LUKAUTIM YUMI

15. Wanem samting i soim olsem Jehova i tingim tru ol manmeri bilong em?

15 Gutpela papa i save tingim tru wok bilong lukautim famili bilong em bambai hevi i no ken painim ol. Jehova, em Papa bilong yumi long heven, em i save lukautim yumi gut tru. Man bilong raitim song i tok long Jehova olsem: “Em i save lukautim gut ol manmeri bilong en na kisim bek ol long han bilong ol man nogut.” (Sng. 97:10) Tingim: Yu tingim tru ai bilong yu, olsem na yu save lukautim gut! Olsem tasol, yumi stap olsem ai bilong Jehova, olsem na em i save tingim tru yumi na lukautim yumi. (Ritim Sekaraia 2:8. *) God i save laikim tru ol manmeri bilong em!

16, 17. Stori long ol samting Jehova i mekim bilong lukautim lain bilong em long bipo na long nau tu.

16 Wanpela rot bilong Jehova long lukautim ol manmeri bilong em i olsem, em i yusim ol ensel. (Sng. 91:11) Wanpela ensel i helpim lain manmeri bilong Jerusalem, na long wanpela nait tasol em i kilim i dai 185 tausen soldia bilong Asiria. (2 Kin. 19:35) Ensel i bin helpim tu aposel Pita na aposel Pol wantaim ol narapela long lusim kalabus. (Apo. 5:18-20; 12:6-11) Long taim bilong yumi tu, Jehova i save helpim yumi. Wanpela brata long hetkota i visitim wanpela brens ofis long Afrika na em i tok, pait namel long lain politik na ol lotu i bagarapim kantri. Ol man i mekim kain kain pasin bikhet—ol i pait, stil, reip, na kilim man i dai, olsem na ol dispela hevi i bagarapim tru sindaun bilong ol manmeri. Ol birua i bagarapim sindaun bilong planti bratasista na kisim olgeta kago bilong ol, tasol i no gat wanpela brata o sista i lusim laip bilong em. Taim ol brata i askim ol long sindaun bilong ol i olsem wanem, olgeta i smail na i tok: “Mipela i tenkyu tru long Jehova olsem mipela olgeta i stap orait!” Ol i pilim tru olsem God i laikim ol.

17 Sampela taim Jehova i larim ol birua i kilim i dai ol wokman bilong em, na kain samting olsem i bin kamap long Stiven. Tasol oltaim God i save givim ol tok lukaut bilong lukautim lain bilong em bambai ol i no ken pundaun long ol pasin trik bilong Satan. (Efe. 6:10-12) Tok bilong Baibel na tok i stap long ol buk na nius bilong Baibel em oganaisesen bilong God i redim, i helpim yumi long kisim stretpela save. Yumi kisim save olsem yumi inap pundaun long bilip sapos yumi laikim tumas ol kain samting olsem mani kago, ol amamas i sapotim pasin pamuk na pasin pait, na ol program nogut long Intenet. Jehova i stap olsem gutpela Papa na em i laik bai ol manmeri bilong em i stap gut na hevi i no ken painim ol.

GUTPELA BLESING TRU

18. Yu yet i pilim olsem wanem long pasin bilong Jehova long laikim yu?

18 Yumi stori pinis long sampela gutpela samting em Jehova i mekim bilong soim olsem em i laikim yumi, olsem na yumi inap pilim wankain olsem Moses i bin pilim. Taim Moses i tingim bek olgeta yia em i bin lusim long mekim wok bilong Jehova, em i tok: “Yu save laikim mipela oltaim, na dispela i ken pulapim mipela long olgeta moningtaim. Olsem na long olgeta taim mipela i stap laip mipela i ken amamas na belgut.” (Sng. 90:14) Nambawan gutpela blesing yumi inap kisim long nau em olsem, yumi inap kisim save olsem Jehova i laikim yumi, na em i givim planti blesing long yumi. Wankain olsem aposel Jon, yumi tu inap tok: “Olaman! Pasin laikim Papa i mekim long yumi i bikpela tru”!—1 Jon 3:1.

[Futnot]

^ par. 15 Sekaraia 2:8 (NW): “Jehova bilong ol bikpela lain ami i kisim pinis glori na em i salim mi i go long ol lain man husat i wok long bagarapim sindaun bilong yupela, na em i tok: ‘Man i tatsim yupela, em i tatsim kiau long ai bilong mi.’”