Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Wastau—Stadi Edisen  |  Julai 2015

Haus Bilong Mekim Lotu

Haus Bilong Mekim Lotu

“Pasin bilong laikim tumas haus bilong yu bai i pulap tru long mi.”—JON 2:17.

OL SINGSING: 127, 118

1, 2. (a) Long bipo, ol wokman bilong Jehova i save bung long wanem hap taim ol i laik mekim lotu? (b) Jisas i holim wanem tingting long tempel bilong God long Jerusalem? (c) Bai yumi skelim wanem samting long dispela stadi?

KIRAP long bipo yet, ol wokman bilong God i gat ples we ol i save go bung long en bilong mekim lotu i tru. Taim Abel i laik givim ofa long God, ating em i bin mekim ofa antap long wanpela alta. (Stt. 4:3, 4) Ol bilipman olsem Noa, Abraham, Aisak, Jekop, na Moses, ol i bin sanapim ol alta. (Stt. 8:20; 12:7; 26:25; 35:1; Kis. 17:15) Jehova i tokim lain Israel long wokim haus lotu sel. (Kis. 25:8) Bihain, ol i wokim tempel bilong bung long en na lotuim Jehova. (1 Kin. 8:27, 29) Taim ol Juda i lusim kalabus long Babilon na i go bek long asples bilong ol, olgeta taim ol i save bung long ol sinagog long mekim lotu. (Mak 6:2; Jon 18:20; Apo. 15:21) Long taim bilong ol aposel, ol Kristen i save bung long haus bilong narapela narapela insait long kongrigesen. (Apo. 12:12; 1 Kor. 16:19) Long nau, ol manmeri bilong Jehova i save bung long kisim skul na mekim lotu, na ol i bung long planti tausen Haus Kingdom long olgeta hap bilong graun.

2 Jisas i laikim tru tempel bilong Jehova long Jerusalem. Olsem na man bilong raitim Gutnius i tok, pasin bilong Jisas i stret wantaim wanpela tok profet: “Mi laikim tru haus bilong yu.” (Sng. 69:9; Jon 2:17) Long bipo, tempel long Jerusalem i gat nem olsem “haus bilong Bikpela,” tasol dispela nem i no stap long ol  Haus Kingdom long nau. (2 Sto. 5:11-13; 33:4) Maski i olsem, Baibel i gat ol tok bilong stiaim yumi long rispektim ol Haus Kingdom na bihainim stretpela pasin. Long dispela atikol, yumi bai skelim sampela stiatok we inap helpim yumi long holim stretpela tingting, givim kontribiusen, na lukautim gut Haus Kingdom. *

SOIM RISPEK LONG LOTU I TRU

3-5. (a) Wanem ol samting i save kamap long Haus Kingdom? (b) Yumi mas holim wanem tingting long ol miting i save kamap long Haus Kingdom?

3 Haus Kingdom em ples we ol manmeri i save go bung long en bilong mekim lotu i tru. Jehova i redim ol samting bilong strongim bilip bilong yumi, na wanpela bilong ol dispela samting em ol miting i save kamap long Haus Kingdom long olgeta wik. Oganaisesen bilong em i givim ol tok bilong stiaim yumi na strongim bilip bilong yumi. Taim ol manmeri i go long miting, i olsem ol i bihainim singaut bilong Jehova na Pikinini bilong em. Baibel i kirapim yumi long kisim kaikai long “tebol bilong Jehova,” olsem na yumi mas givim bel tru long bihainim dispela singaut.—1 Kor. 10:21.

4 Taim yumi bung long mekim lotu na strongim narapela narapela, dispela i bikpela samting long ai bilong Jehova, olsem na em i kirapim aposel Pol long tokim yumi olsem yumi no ken lusim pasin bilong bung wantaim. (Ritim Hibru 10:24, 25.) Sapos i no gat gutpela risen na yumi lusim ol miting, yu ting yumi soim rispek long Jehova? Taim yumi givim bel tru long redim ol miting na bekim ol tok, dispela i soim olsem yumi laikim Jehova na yumi amamas long ol samting em i givim.—Sng. 22:22.

5 Taim yumi stap long Haus Kingdom na insait long ol wok i kamap long hap, oltaim yumi mas soim pasin rispek. Haus Kingdom i gat sain em nem bilong God i stap long en. Yumi tingim tru nem bilong God, olsem na yumi mas soim pasin rispek.—Skelim 1 King 8:15-17.

6. Sampela man i mekim wanem ol tok taim ol i lukim ol Haus Kingdom na ol manmeri i bung long ol miting? (Lukim piksa long kirap bilong stadi.)

6 Ol manmeri em ol i no Witnes Bilong Jehova, ol i luksave olsem yumi soim rispek long Haus Kingdom. Wanpela man long Teki i tok: “Mi pilim tru samting mi lukim long Haus Kingdom. Ples i stap klin tru na olgeta samting i stap stret. Olgeta manmeri i bilas gut, ol i smail, na ol i toktok gut long mi. Mi pilim tru pasin ol i mekim.” Dispela man i kirap long i go oltaim long miting, na i no longtaim em i kisim baptais. Long wanpela taun long Indonesia, paslain long ol bratasista long wanpela kongrigesen i dediketim Haus Kingdom bilong ol, ol i invaitim sampela bikman bilong gavman na ol neiba long kam raun na lukim Haus Kingdom. Gavana bilong taun tu i go lukim Haus Kingdom. Taim em i kisim save long ol samting bai kamap long Haus Kingdom, na em i lukim disain bilong en na ol naispela plaua gaden, em i amamas tru. Em i tok: “Dispela Haus Kingdom i stap klin tru, na dispela i soim klia olsem yupela i gat strongpela bilip.”

Pasin bilong yumi inap soim olsem yumi no rispektim God (Lukim paragraf 7 na 8)

7, 8. Taim ol manmeri i go long ol miting Kristen, ol i mas bihainim wanem ol pasin na abrusim wanem ol pasin?

7 God yet i singautim yumi long i go long ol miting Kristen, olsem na yumi laik soim rispek long em taim yumi putim ol bilas i stret na i soim olsem yumi gat pasin daun. Yumi no ken bilas olsem ol man bilong graun. Sampela i strong tumas long bihainim stretpela pasin taim ol i stap long ol miting bilong kongrigesen, tasol sampela i no strong tumas long bihainim stretpela pasin.  Jehova i laik bai ol wokman bilong em na ol narapela husat i go long miting i amamas taim ol i stap long Haus Kingdom. Olsem na ol manmeri i go long ol miting, ol i mas pasim klos i stret. Long taim bilong miting, ol i no ken stori, salim teks mesis long fon, na ol i no ken kaikai na dring, na ol i no ken mekim ol narapela samting. Ol papamama i mas skulim ol pikinini na bai ol i save olsem ol i no ken ron o pilai insait long Haus Kingdom.—Sav. 3:1.

8 Jisas i kros nogut tru na em i rausim ol man i mekim wok bisnis insait long tempel bilong God. (Jon 2:13-17) Haus Kingdom em ples we yumi bung long en bilong mekim lotu i tru na kisim skul long Tok Bilong God. Olsem na yumi no ken stori long ol samting bilong wok bisnis taim yumi stap insait long banis bilong Haus Kingdom.—Skelim Nehemia 13:7, 8.

MANI BILONG WOKIM OL HAUS KINGDOM

9, 10. (a) Olsem wanem yumi save kisim mani bilong sanapim ol Haus Kingdom? (b) Wanem ol gutpela samting i kamap? (c) Oganaisesen bilong God i bin kirapim wanem program bilong helpim ol kongrigesen i sot long mani?

9 Oganaisesen bilong Jehova i save redim bikpela mani bilong sanapim ol Haus Kingdom. Ol lain husat i volantia long wokim disain, na sanapim na stretim ol samting i bagarap long Haus Kingdom, ol i no kisim pe long wok ol i mekim. Wanem ol gutpela samting i kamap? Long Novemba 1, 1999, ol i kirapim program bilong sanapim ol Haus Kingdom long ol ples i sot long mani. Olsem na kirap long dispela taim na i kam inap long nau, ol i wokim moa long 28 tausen Haus Kingdom long ol kongrigesen long olgeta hap. Insait long 15 yia i go pinis, long olgeta de ol i save wokim 5-pela nupela Haus Kingdom.

10 Ol brata i wok strong long sanapim ol Haus Kingdom long ol hap i no gat Haus Kingdom. Ol i bihainim stiatok bilong Baibel—ol bratasista i gat planti mani i givim helpim long ol narapela husat i sot, na long dispela rot “i no gat wanpela bilong [ol] i sot long ol samting.” (Ritim 2 Korin 8:13-15.) Olsem na kirap long dispela taim na i kam inap long nau, ol i wokim ol naispela Haus Kingdom bilong ol kongrigesen i sot long mani.

11. (a) Sampela bratasista i tok wanem taim ol i kisim nupela Haus Kingdom? (b) Yu pilim olsem wanem long tok ol i mekim?

11 Ol brata i wokim Haus Kingdom bilong wanpela kongrigesen long Kosta Rika, na ol bratasista long dispela kongrigesen i tok: “Taim mipela i sanap long fran bilong dispela Haus Kingdom, mipela i amamas tru! Mipela i no bin ting olsem mipela bai i gat wanpela Haus Kingdom. Haus Kingdom bilong mipela i naispela tru, na ol i bin wokim insait long 8-pela de tasol! Jehova i blesim dispela wok, na oganaisesen bilong em i stretim rot bilong mekim wok, na ol bratasista i givim  helpim. Dispela Haus Kingdom i olsem naispela presen tru Jehova i givim long mipela. Mipela i amamas tru long Haus Kingdom bilong mipela.” Taim ol bratasista i kisim nupela Haus Kingdom na ol i mekim kain gutpela tok olsem, ating dispela i save mekim yu amamas, a? Ating yu amamas tu long save olsem ol bratasista long planti tausen ples long olgeta hap bilong graun i kisim wankain amamas. Dispela em wok bilong Jehova, olsem na taim wanpela Haus Kingdom i pinis, planti manmeri i save kam bilong kisim save long God.—Sng. 127:1.

12. Olsem wanem yu inap helpim wok bilong sanapim ol Haus Kingdom?

12 Planti bratasista i kisim bikpela amamas taim ol i insait long wok bilong sanapim ol Haus Kingdom. Maski yumi inap insait long dispela wok o yumi no gat rot long insait long dispela wok, yumi olgeta inap sapotim dispela wok long rot bilong givim ol kontribiusen. Long taim bilong ol man i bin raitim Baibel, ol manmeri i bin givim ol samting olsem gol na silva bilong helpim wok bilong sanapim haus lotu sel. Long nau tu, ol Kristen i bihainim wankain pasin, na dispela i givim glori long Jehova.—Kis. 25:2; 2 Kor. 9:7.

KLINIM HAUS KINGDOM

13, 14. Wanem ol skultok bilong Baibel inap stiaim yumi long mekim Haus Kingdom i stap klin na ol samting long en i stap stret?

13 Taim wanpela kongrigesen i kisim nupela Haus Kingdom, ol i mas lukautim gut dispela Haus Kingdom na bai ol samting i stap stret. Dispela bai i stret wantaim ol pasin bilong God yumi lotuim, “em i no save mekim ol samting i paul nabaut.” (Ritim 1 Korin 14:33, 40.) Baibel i tok, pasin bilong i stap klin i stret wantaim pasin holi na pasin bilong i stap klin long sait bilong bilip. (Rev. 19:8) Sapos ol man i laik bai Jehova i  amamas long ol, orait ol i mas i stap klin long olgeta samting.

14 Oltaim yumi mas tingim ol dispela stiatok na singautim ol man i kam long ol miting, na yumi ken bilip olsem sapos Haus Kingdom i stap klin, dispela bai i stret wantaim gutnius yumi autim long ol. Ol bai luksave olsem yumi lotuim God i holi, na klostu nau em bai mekim dispela graun i kamap ples paradais we i klin olgeta.—Ais. 6:1-3; Rev. 11:18.

15, 16. (a) Wanem ol samting i putim hevi long wok bilong klinim Haus Kingdom? (b) Bilong wanem em i bikpela samting long klinim Haus Kingdom? (c) Long kongrigesen bilong yupela, yupela i bihainim wanem kain sediul bilong klinim Haus Kingdom? (d) Yumi olgeta wan wan i gat wanem gutpela wok long mekim?

15 Ating sampela manmeri i tingting oltaim long mekim ol samting i stap klin. Ol i tingim ol samting i stap long ples ol i kamap bikpela long en, olsem graun malumalum, das, rot nogut, na ol i gat planti wara na marasin bilong klinim ol samting. Maski ol manmeri long hap yumi stap long en i gat wanem kain tingting na sindaun, Haus Kingdom i mas i stap klin na ol samting i mas i stap stret, long wanem, nem bilong Jehova i stap long dispela haus na em ples bilong mekim lotu i tru.—Lo 23:14.

16 Yumi mas klinim Haus Kingdom long olgeta taim. Olgeta wan wan lain elda i mas wokim sediul, na kongrigesen i mas i gat sop na marasin bilong klinim Haus Kingdom. Ol elda i mas wok bung wantaim kongrigesen, long wanem, sampela wok i bilong mekim bihain long ol miting, na sampela wok i bilong mekim wan wan taim tasol. Olgeta long kongrigesen inap amamas long wok bung wantaim.

LUKAUTIM PLES BILONG MEKIM LOTU

17, 18. (a) Wanem ol stori long Baibel inap stiaim yumi long lukautim gut ol ples bilong mekim lotu i tru? (b) Bilong wanem em i bikpela samting long yumi mas lukautim gut ol Haus Kingdom?

17 Ol wokman bilong Jehova i wok strong long lukautim Haus Kingdom na bai ol samting i no ken bagarap kwik. King Joas bilong Juda i tokim ol pris long yusim kontribiusen ol manmeri i bin givim long haus bilong Jehova na ol i ken “stretim [ol] hap i bagarap.” (2 Kin. 12:4, 5) Winim 200 yia bihain, King Josaia tu i yusim kontribiusen long stretim ol samting long tempel.—Ritim 2 Stori 34:8-11.

18 Ol brens ofis long sampela kantri i tok, ol manmeri i no save tingim wok bilong lukautim gut haus na ol masin samting. Ating planti bilong ol i no save gut long wok bilong klinim haus, na ol i no gat ol stretpela tul na ol masin bilong mekim wok. Sapos yumi no lukautim gut Haus Kingdom, ol samting long Haus Kingdom bai bagarap na dispela bai nogutim gutnem bilong yumi. Tasol sapos olgeta long kongrigesen i lukautim gut ol samting i stap long Haus Kingdom, dispela bai givim biknem long Jehova na kongrigesen i no inap westim kontribiusen bilong ol wanbilip.

Oltaim yumi mas klinim na lukautim gut Haus Kingdom (Lukim paragraf 16 na 18)

19. Yu ken mekim wanem bilong lukautim haus yumi bung long en long mekim lotu i tru?

19 Haus Kingdom em haus we yumi dediketim long Jehova. Olsem na i no stret long yumi tok olsem em haus bilong wanpela man o wanpela kongrigesen tasol. Ol stiatok bilong Baibel i helpim yumi long wok bung wantaim bambai Haus Kingdom i holim yet nem olsem ples bilong mekim lotu i tru. Olgeta long kongrigesen i ken soim rispek long ples bilong mekim lotu. Ol i ken givim kontribiusen bilong sanapim ol nupela Haus Kingdom, volantia long givim taim na strong bilong ol long klinim na stretim ol samting long Haus Kingdom. Taim yumi mekim ol dispela samting, yumi soim klia olsem yumi bihainim pasin bilong Jisas na yumi laikim tru haus bilong Jehova, em haus bilong bung na mekim lotu i tru.—Jon 2:17.

^ par. 2 Ol stiatok bilong dispela stadi i stret long ol Haus Kingdom, tasol ol i stret tu long ol Haus Kibung na ol narapela hap em yumi yusim long mekim lotu i tru.