Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Wastaua—Stadi Edisen  |  Julai 2015

“Taim Bilong God Long Kisim Bek Yupela i Kam Klostu”!

“Taim Bilong God Long Kisim Bek Yupela i Kam Klostu”!

“Yupela i mas sanap na litimapim het bilong yupela, long wanem, taim bilong God long kisim bek yupela i kam klostu.”—LUK 21:28.

OL SINGSING: 133, 43

1. Wanem ol samting i kamap long 66 C.E.? (Lukim piksa long kirap bilong stadi.)

PIKSAIM long tingting olsem yu wanpela Kristen na yu stap long Jerusalem long bipo, long yia 66 C.E. Planti samting i kamap. Florus, em gavana bilong Rom, em i kisim 17 mani talen long bokis mani bilong tempel holi. Dispela i mekim na kwiktaim ol Juda i kirap birua long gavman bilong Rom na ol i kilim i dai ol soldia bilong Rom. Ol Juda i strong long kisim indipendens na bai Rom i no ken bosim ol moa. Tasol gavman Rom i hariap long mekim ol samting bilong bekim pait. Gavman Rom i makim Sestius Galus long stap olsem gavana bilong Siria. Insait long 3-pela mun, Sestius Galus i kam wantaim 30 tausen soldia. Kwiktaim ol dispela soldia i go insait long banis bilong Jerusalem, na ol bikhetman bilong Juda i ranawe i go na hait insait long strongpela banis bilong tempel. Ol soldia bilong Rom i stat long brukim namba 1 banis i raunim tempel! Olgeta manmeri long Jerusalem i pret. Yu pilim olsem wanem taim yu lukim ol dispela samting i kamap?

2. (a) Long 66 C.E., ol Kristen i mas mekim wanem? (b) Wanem samting i kamap na i opim rot bilong ol?

2 Ating yu tingim ol tok bilong Jisas i stap long Gutnius Bilong  Luk, em i tok: “Taim yupela i lukim ol ami i kam banisim Jerusalem, orait yupela i ken save olsem taim bilong em long bagarap i kam klostu.” (Luk 21:20) Tasol ating yu tingting planti olsem, ‘Hau bai mi bihainim ol tok Jisas i givim taim em i mekim dispela tok lukaut?’ Jisas i tok moa olsem: “Long dispela taim ol manmeri long Judia i mas ranawe i go long ol maunten, na ol manmeri i stap long Jerusalem i mas lusim dispela hap. Na ol man i stap ausait long dispela taun ol i no ken i go insait long en.” (Luk 21:21) Olsem wanem yu bai ranawe lusim Jerusalem taim planti ami i banisim taun? Orait narapela kain samting i kamap. Ol ami bilong Rom i lusim Jerusalem na i go bek! Jisas i bin tok profet olsem God bai “sotim” taim bilong ol long mekim pait. (Mat. 24:22) Rot i op nau long yu inap bihainim tok bilong Jisas. Kwiktaim yu ranawe i go long ol maunten long hapsait bilong wara Jordan—yu ranawe wantaim ol narapela Kristen long Jerusalem na ol taun i stap klostu. * Long 70 C.E., narapela lain ami bilong Rom i go bagarapim taun Jerusalem. Tasol yu abrusim bagarap, long wanem, yu bihainim tok bilong Jisas.

3. (a) Klostu nau, wanem hevi bai painim ol Kristen? (b) Yumi bai skelim wanem samting long dispela stadi?

3 Klostu tru nau, wankain hevi bai painim yumi olgeta wan wan. Jisas i tok lukaut long bagarap bai painim Jerusalem, na tu, em i tok wankain samting bai kamap taim “traipela hevi tru” i kirap. (Mat. 24:3, 21, 29) Yumi amamas olsem “bikpela lain manmeri” bai abrusim bagarap i kamap long olgeta hap bilong graun. (Ritim Revelesen 7:9, 13, 14.) Baibel i stori olsem wanem long ol dispela hevi bai kamap bihain? Yumi mas save long bekim bilong dispela askim, long wanem, dispela bai helpim yumi long abrusim bagarap. Orait nau yumi ken skelim gut ol samting bai kamap.

KIRAP BILONG TRAIPELA HEVI TRU

4. (a) Wanem samting bai kamap na kirapim traipela hevi tru? (b) Hau bai dispela samting i kamap?

4 Traipela hevi tru bai kirap olsem wanem? Buk Revelesen i stori olsem “Bikpela Babilon” bai bagarap. (Rev. 17:5-7) I stret tru long Baibel i kolim olgeta lotu giaman olsem wanpela pamukmeri! Ol pris pasto i wok bung wantaim ol bikman bilong dispela graun bilong Satan. Ol i sakim ol stiatok bilong Baibel na ol i no stap gut long Jisas na sapotim Kingdom bilong em, nogat. Ol i sapotim ol king bilong dispela graun, long wanem, ol i laik kisim strong na namba insait long wok politik, olsem na ol i kamap doti olgeta. Tasol ol Kristen God i bin makim, ol i stap klin tru. (2 Kor. 11:2; Jems 1:27; Rev. 14:4) Tasol husat bai bagarapim “Bikpela Babilon”? God Jehova bai “givim tingting” long “10-pela kom” bilong “retpela wel animal.” Ol dispela kom i makim olgeta gavman husat i sapotim Yunaitet Nesen. “Retpela wel animal” i stap olsem piksa bilong Yunaitet Nesen.—Ritim Revelesen 17:3, 16-18.

5, 6. Bilong wanem yumi inap tok olsem taim Bikpela Babilon i bagarap, sampela manmeri bilong lotu giaman bai abrusim bagarap?

5 Taim olgeta lotu bilong Bikpela Babilon i bagarap, yu ting olgeta memba bilong en bai bagarap wantaim em? Ating nogat. God i kirapim profet Sekaraia long stori long ol samting bai kamap. Em i stori long wanpela man husat i bin i stap olsem memba bilong lotu giaman: “Bai em i tok olsem, ‘Mi no profet. Mi man bilong wokim gaden tasol. Mi stap wokboi nating bilong wanpela man.’ Sapos wanpela man i askim em olsem, ‘Yu mekim wanem na yu kisim dispela mak bilong naip long bros bilong yu?’, orait em bai i giaman na i tok, ‘Mi kisim long haus bilong wanpela pren bilong mi.’” (Sek. 13:4-6) Wankain olsem dispela man, ating sampela pris pasto bai lusim wok bilong ol na tok olsem ol i no bin i stap insait long ol dispela lotu giaman.

6 Ol manmeri bilong God bai stap olsem wanem long dispela taim? Jisas i tok: “Sapos God i no sotim dispela taim, bai i no gat wanpela man i abrusim bagarap. Tasol em i tingim ol man em i bin makim, olsem na em bai sotim dispela taim.” (Mat. 24:22) Olsem yumi stori pinis, long yia  66 C.E., God i “sotim dispela taim.” Dispela i opim rot na “ol [Kristen] em i bin makim” inap ranawe lusim Jerusalem na ol taun i stap klostu. Olsem tasol, taim traipela hevi tru i kirap, God bai “sotim dispela taim” bikos em i tingim “ol [Kristen] em i bin makim.” Ol gavman em “10-pela kom” i makim, ol i no inap bagarapim na pinisim ol manmeri bilong God. Bihain long olgeta lotu giaman i bagarap, pasin birua bai i stop inap sotpela haptaim.

TAIM BILONG TRAIM NA KOT

7, 8. (a) Bihain long olgeta lotu giaman i bagarap, rot bai op long ol Kristen tru inap mekim wanem? (b) Hau bai ol manmeri bilong God i stap narapela kain long olgeta narapela manmeri?

7 Wanem samting bai kamap bihain long ol lotu giaman i bagarap? Long dispela taim, yumi bai kamapim ples klia tingting i stap long bel bilong yumi. Planti manmeri bai traim long kisim helpim long ol oganaisesen bilong ol man em ol i stap olsem “ol bikpela ston bilong ol maunten.” (Rev. 6:15-17) Tasol ol manmeri bilong God bai ranawe i go long ples hait em Jehova yet i redim. Long taim bilong ol aposel, taim ami bilong Rom i lusim Jerusalem na i go bek, em i no haptaim bilong ol Juda long kamap Kristen, nogat. Em taim bilong ol Kristen long bihainim tok na mekim ol samting em Jisas i bin tokim ol long mekim. Olsem tasol, taim traipela hevi tru i stop inap liklik haptaim, dispela i no makim olsem planti man moa bai kam insait long tok i tru, nogat. Long dispela taim, rot bai op long olgeta Kristen tru inap soim olsem ol i laikim tru Jehova na ol i sambai long ol brata bilong Krais.—Mat. 25:34-40.

8 Maski yumi no kliagut long olgeta samting bai kamap long dispela haptaim bilong hevi, yumi save olsem yumi bai lusim sampela samting bilong yumi yet. Long taim bilong ol aposel, ol Kristen i bin lusim haus na kago bilong ol na ol i karim hevi bambai ol inap abrusim bagarap na i stap laip. (Mak 13:15-18) Olsem wanem? Bai yumi redi long lusim haus na ol kago bilong yumi na bai yumi inap i stap gut long God? Bai yumi redi long mekim ol samting bilong soim olsem yumi stap gut long Jehova? Tingim! Maski wanem kain hevi i painim yumi long dispela taim, yumi tasol bai givim bel yet long lotuim God wankain olsem profet Daniel i bin mekim.—Dan. 6:10, 11.

9, 10. (a) Ol manmeri bilong God bai autim wanem kain tok? (b) Ol birua bilong yumi bai mekim wanem?

9 Dispela taim em i no taim bilong autim “gutnius bilong Kingdom.” Long dispela taim, “pinis” bai kamap! (Mat. 24:14) Ol manmeri bilong God bai autim strongpela tok long strafe bai painim ol man nogut. Ating ol bai tokaut tu olsem klostu nau ol manmeri bilong Satan bai bagarap na pinis olgeta. Baibel i kolim dispela tokaut olsem ren ais, na i tok: “Bikpela ren ais i lusim skai na i pundaun antap long ol man, hevi bilong olgeta wan wan hap ais i olsem hevi bilong wanpela talen. Na ol man i tok nogut long God long dispela bikpela ren ais i pundaun, long wanem, dispela ren ais i kamapim bikpela bagarap tru.”—Rev. 16:21.

10 Ol birua bai luksave long olgeta dispela samting. Gok Bilong Magok i makim ol kantri husat i wok bung wantaim. Holi spirit i kirapim Esekiel long tok profet olsem: “Mi God, Bikpela, mi tok olsem. Long taim yu go pait long ol, . . . bel bilong yu [bai] kirap na bai yu mangalim ol samting bilong ol. Bai yu ting ol dispela lain i no man bilong pait na ol samting nogut i no save kamap long ol. Na ol taun bilong ol i no gat banis i raunim ol. Olsem na yu ting bai yu go pait long ol na kisim ol gutpela samting bilong ol. Ol dispela manmeri i bin lusim ol arapela kantri na i kam bek na wokim gen ol taun bilong ol, na ol i gat planti bulmakau na sipsip na ol kain kain  samting. Na kantri bilong ol i stap namel tru long olgeta kantri bilong graun.” (Ese. 38:10-12) Long sait bilong bilip, ol manmeri bilong God bai i stap narapela kain tru, na i olsem “ol i stap namel tru long olgeta kantri bilong graun.” Ol kantri bai belhat nogut tru. Ol bai i laik tru long bagarapim ol Kristen God i bin makim na ol manmeri i stap olsem ol poroman bilong ol.

11. (a) Yumi mas holim wanem tingting long ol samting bai kamap long taim bilong traipela hevi tru? (b) Ol manmeri bai pilim olsem wanem taim ol i lukim ol sain i kamap long skai?

11 Narapela samting bai kamap bihain long dispela. Yumi mas tingim olsem Baibel i no tokaut stret long wanem samting bai kamap paslain na wanem samting bai kamap bihain. Ating wanpela samting bai i no pinis yet na narapela samting i kamap. Jisas i tok profet long ol samting bai kamap long pinis bilong dispela haptaim bilong nau, na em i tok: “Bai i gat ol sain long san, mun, na ol sta, na long graun ol lain man bai tingting planti tru. Ol bai paul long ol samting ol i mas mekim, long wanem, solwara i no stap isi na i pairap strong. Pasin bilong pret na ol samting ol man i ting bai kamap long graun bai mekim ol i airaun, na ol strongpela samting i stap long skai bai guria. Na ol bai lukim Pikinini bilong man i stap insait long klaut na kam wantaim pawa na bikpela glori.” (Luk 21:25-27; ritim Mak 13:24-26.) Taim truim i kamap long dispela tok profet, yu ting bai i gat ol sain i kamap long skai na i pretim yumi? Yumi ken wet na lukim ol samting bai kamap. Maski wanem ol sain i kamap, dispela bai pretim tru ol birua bilong God.

Yumi bai holim stretpela tingting na bilip tru olsem God bai kisim bek yumi! (Lukim paragraf 12 na 13)

12, 13. (a) Wanem samting bai kamap taim Jisas i “kam wantaim pawa na bikpela glori”? (b) Ol wokman bilong God bai mekim wanem long dispela taim?

12 Wanem samting bai kamap taim Jisas i “kam wantaim pawa na bikpela glori”? Long dispela taim, Jisas bai givim blesing long ol manmeri i stap gut long em, na em bai givim strafe long ol manmeri i no stap gut long em. (Mat. 24:46, 47, 50, 51; 25:19, 28-30) Olsem Buk Matyu i stori long en, Jisas i kolim ol sain bai kamap bilong makim haptaim bilong las de, na bihain em i mekim tok piksa bilong ol sipsip na ol meme, na em i tok: “Taim Pikinini bilong man i kam wantaim glori bilong en, na olgeta ensel i kam wantaim em, long dispela taim em bai sindaun long gutpela sia king bilong en. Na olgeta lain man bai kam bung long ai bilong em na em bai tilim ol manmeri long tupela lain, kain olsem wasman bilong sipsip i save tilim ol sipsip i go long wanpela sait na ol meme i go long narapela sait. Em bai putim ol sipsip i go long han sut bilong en na ol meme i go long han kais bilong en.” (Mat. 25:31-33) Wanem samting bai kamap long ol sipsip na ol meme? Jisas i pinisim dispela tok piksa olsem: “Ol dispela man [ol meme] bai i dai na stap olsem inap oltaim oltaim, tasol ol stretpela man bai kisim laip inap oltaim oltaim.”—Mat. 25:46.

13 Ol lain i stap olsem ol meme, ol bai mekim wanem taim ol i luksave olsem ol “bai i dai na stap olsem inap oltaim oltaim”? Ol “bai paitim bros bilong ol na krai sori.” (Mat. 25:46) Long dispela taim, ol brata bilong Krais na ol poroman bilong ol bai mekim wanem? Ol bai bilip tru long God Jehova na Pikinini bilong em, Jisas Krais. Ol bai bihainim tok bilong Jisas, em i tok: “Taim ol dispela samting i stat long kamap, yupela i mas sanap na litimapim het bilong yupela, long wanem, taim bilong God long kisim bek yupela i kam klostu.” (Luk 21:28) Yes, yumi bai holim stretpela tingting na bilip tru olsem God bai kisim bek yumi.

STAP OLSEM LAIT LONG KINGDOM

14, 15. Wanem wok bai kamap taim Gok Bilong Magok i kirapim pait long lain bilong God?

14 Taim Gok Bilong Magok i kirapim pait long lain bilong God, wanem samting bai  kamap? Matyu na Mak i stori long wankain samting: “[Pikinini bilong man] bai salim ol ensel i go na em bai bungim ol lain bilong en. Em lain God i bin makim na ol bai i kam long 4-pela hap bilong graun, long arere tru bilong graun i go inap long arere tru bilong skai.” (Mat. 24:31; Mak 13:27) Dispela skripsa i tok olsem Jisas bai bungim lain bilong em. Dispela tok i no makim namba 1 taim bilong bungim ol Kristen God i bin makim—em kirap long Pentikos 33 C.E., na tu, em i no makim taim we ol bai kisim laspela mak, nogat. (Mat. 13:37, 38) Ol dispela Kristen bai kisim laspela mak paslain long traipela hevi tru i kirap. (Rev. 7:1-4) Taim Jisas i stori long wok bilong bungim ol manmeri, em i toktok long wanem samting? Em i toktok long haptaim we hap lain bilong lain 144,000 bai kisim laip long heven. (1 Tes. 4:15-17; Rev. 14:1) Dispela samting bai kamap bihain liklik long Gok Bilong Magok i kirapim pait long ol manmeri bilong God. (Ese. 38:11) Tok bilong Jisas bai kamap tru, em i tok: “Long dispela taim ol stretpela man bai lait bikpela olsem san long Kingdom bilong Papa bilong ol.”Mat. 13:43. *

15 Yu ting dispela i makim olsem ol Kristen God i bin makim bai i go long heven wantaim bodi bilong graun? Planti manmeri long ol lotu i gat nem Kristen i holim dispela tingting olsem ol Kristen bai i go antap long heven wantaim bodi bilong graun. Ol i bilip olsem ol bai lukim Jisas long ai tru bilong ol taim em i kam bek long bosim graun. Tasol Baibel i kamapim klia olsem “sain bilong Pikinini bilong man” bai kamap long skai na em bai “i stap antap long ol klaut na kam.” (Mat. 24:30) Dispela 2-pela tok wantaim i makim olsem yumi no inap lukim Jisas long ai tru bilong yumi. Na tu, “bodi bilong graun i no inap insait long kingdom bilong God.” Olsem na paslain long ol Kristen God i bin makim  i go long heven, ol i mas “senis long taim laspela trampet i krai, [na] dispela bai kamap wantu tasol olsem man i pasim ai na opim kwiktaim.” * (Ritim 1 Korin 15:50-53.) Dispela i makim olsem God bai kisim olgeta bilong ol i go kwiktaim.

16, 17. Paslain long marit bilong Pikinini Sipsip i kamap long heven, wanem samting i mas kamap?

16 Taim olgeta bilong lain 144,000 i stap long heven, ol bai kirap long redim ol laspela samting na bai Pikinini Sipsip i marit. (Rev. 19:9) Tasol narapela samting bai kamap paslain long Pikinini Sipsip i marit. Tingim, paslain stret long hap lain bilong 144,000 i go long heven, Gok bai kirapim pait long ol manmeri bilong God. (Ese. 38:16) Ol manmeri bilong God long graun bai mekim wanem? I luk olsem ol i no gat rot bilong kisim helpim. Ol bai bihainim tok em God i mekim long taim bilong King Jehosafat: “Yupela yet i no inap pait. Nogat tru. Taim yupela i go kamap long ples bilong pait, bai yupela i mas sanap na lukluk tasol, na bai yupela i lukim Bikpela i helpim yupela na winim pait. Yupela ol manmeri bilong Jerusalem na bilong olgeta hap bilong Juda, yupela i no ken bel hevi na pret.” (2 Sto. 20:17) Ol lain long heven bai amamas tru. Revelesen 17:14 i stori long haptaim bai kamap na olgeta Kristen God i bin makim bai stap pinis long heven, na dispela skripsa i tok: “Ol [birua] bai pait wantaim Pikinini Sipsip. Tasol Pikinini Sipsip em i Bikpela bilong olgeta bikman na King bilong olgeta king, olsem na em bai daunim ol. Na tu, ol manmeri em God i bin singautim na makim ol na ol i stap gut long em, ol tu bai daunim ol [birua].” Lain 144,000 bai wok bung wantaim Jisas long heven, na ol bai kam bilong mekim pait na kisim bek ol manmeri bilong God hia long graun.

17 Pait bilong Armagedon bai kirap, na dispela bai givim glori long nem holi bilong Jehova. (Rev. 16:16) Long dispela taim, ol lain i stap olsem ol meme “bai i dai na stap olsem inap oltaim oltaim.” God bai pinisim olgeta pasin nogut bilong dispela graun, na bikpela lain manmeri bai abrusim bagarap long laspela hap bilong traipela hevi tru. Taim olgeta dispela samting i kamap pinis, bikpela hap tok long Buk Revelesen bai kamap tru, em marit bilong Pikinini Sipsip. (Rev. 21:1-4) * God bai amamas long olgeta manmeri husat i abrusim bagarap na kisim laip long graun, olsem na em bai givim planti blesing long ol. Bikpela amamas tru bai kamap long dispela bung bilong marit! Yumi olgeta i laik tru long lukim dispela de i kamap.—Ritim 2 Pita 3:13.

18. Klostu tru nau ol bikpela samting bai kamap, olsem na yumi mas tingting strong long mekim wanem?

18 Klostu nau ol dispela bikpela samting bai kamap, olsem na yumi olgeta wan wan i mas mekim wanem long nau? Holi spirit i kirapim aposel Pita na em i tok: “Olgeta dispela samting bai pinis long dispela kain pasin. Olsem na yupela i mas tingting long pasin yupela i mas bihainim. Yupela i mas wokabaut long pasin i holi na bihainim pasin bilong givim bel tru long God. Yupela i mas mekim olsem na tingim na wetim de bilong Jehova i kamap. . . . Ol pren tru, yupela i wetim ol dispela samting, olsem na long ai bilong God yupela i mas wok strong tru long stap klin olgeta, na i stap olsem man i no gat rong, na stap bel isi.” (2 Pita 3:11, 12, 14) Yumi mas tingting strong long i stap klin long sait bilong bilip na sapotim King Bilong Kamapim Bel Isi.

^ par. 2 Lukim Wastaua bilong Epril 15, 2012, pes 25-26.

^ par. 14 Lukim Wastaua bilong Julai 15, 2013, pes 13-14.

^ par. 15 Hap lain bilong ol Kristen God i bin makim i no inap kisim bodi bilong graun i go long heven. (1 Kor. 15:48, 49) Ol bai lusim bodi bilong graun wankain olsem Jisas i bin mekim.

^ par. 17 Buk Song sapta 45 i stori long ol samting bai kamap paslain na ol samting bai kamap bihain. King bai mekim pait, na bihain marit bilong em bai kamap.