Skip to content

Skip to secondary menu

Skip to table of contents

Ol Witnes Bilong Jehova

Tok Pisin

Wastaua—Stadi Edisen  |  Julai 2015

Ol i Amamas Long Givim Ol Yet—Long Rasia

Ol i Amamas Long Givim Ol Yet—Long Rasia

LONG 1991, ol Witnes Bilong Jehova long Rasia i amamas tru, long wanem, gavman i pinisim tambu long wok lotu bilong ol. Gavman i bin tambuim wok bilong ol inap planti yia. Sampela manmeri i no ting olsem namba bilong ol Witnes bai i go bikpela tru inap olsem 170,000! Sampela pablisa bilong ol narapela kantri i go long Rasia long helpim wok bilong autim tok na kamapim ol disaipel. (Mat. 9:37, 38) Yumi ken stori long sampela bilong ol.

OL BRATA I HELPIM WOK BILONG STRONGIM OL KONGRIGESEN

Matthew em wanpela brata long Briten. Long 1991, em i gat 28 krismas taim ol i pinisim tambu long wok bilong autim tok long Rasia. Long wankain yia, wanpela tok i kamap long kibung na i kamapim klia olsem ol kongrigesen long Isten Yurop i nidim helpim. Brata bilong mekim tok i stori olsem wanpela kongrigesen long St. Petersburg long Rasia i gat 1-pela kongrigesen sevan tasol na i no gat elda. Maski i olsem, ol pablisa i mekim sampela handret Baibel stadi! Matthew i tok: “Bihain long dispela tok, mi tingting oltaim long i go long Rasia, olsem na mi beten long Jehova na kamapim laik bilong mi long i go long Rasia.” Em i bungim sampela mani, na em i salim planti kago bilong em, na em i go long Rasia long 1992. Em i kisim wanem ol ekspiriens long Rasia?

Matthew

Matthew i tok: “Mi hatwok long lainim tokples. Olsem na mi hatwok long toktok gut wantaim ol brata long ol samting bilong lotu.” Na tu, em i hatwok long painim ples slip. Em i tok: “Planti taim mi kisim toksave long lusim wanpela flet na i go painim narapela flet, na ol i no givim bikpela haptaim long mi long mekim olsem.” Maski i gat ol dispela hevi, Matthew i tok: “Mi amamas tru olsem mi bin wokim disisen long kam long Rasia.” Em i tok moa olsem: “Taim mi helpim wok autim tok long dispela hap, mi lain long bilip moa yet long Jehova na mi lukim olsem em i stiaim mi long planti samting.” Bihain, ol i makim Matthew long kamap elda na painia salim, na nau em i mekim wok long brens ofis klostu long St. Petersburg.

Long 1999, Hiroo i gat 25 krismas taim em i grediuet long Ministerial Trening Skul long Japan. Wanpela brata husat i stap tisa long dispela skul i kirapim em long i go mekim wok bilong God long narapela kantri. Hiroo i bin harim olsem ol i sot tru long ol pablisa long Rasia, olsem na em i kirap lainim tokples Rasia. Em i mekim narapela samting tu. Em i tok: “Mi go stap 6-pela mun  long Rasia. Bikpela kol tru i save kamap long Rasia, olsem na long Novemba mi go bek long skelim sapos bodi bilong mi inap lain long dispela kol.” Bihain, em i go bek long Japan. Em i rausim planti kago bilong em bambai em inap bungim mani bilong i go bek long Rasia—em i laik stap olgeta long Rasia.

Hiroo na Svetlana

Hiroo i stap 12-pela yia nau long Rasia, na em i bin helpim wok long sampela kongrigesen. Sampela taim em wanpela tasol i mekim wok elda long kongrigesen i gat moa long 100 pablisa. Long wanpela kongrigesen, long olgeta wik em i lukautim klostu olgeta hap long Miting Bilong Wok Autim Tok, na em i lukautim tu Skul Tiokratik Bilong Autim Tok, Wastaua Stadi, na 5-pela narapela narapela Buk Stadi Bilong Kongrigesen. Na tu, em i mekim sepeding visit long planti bratasista. Hiroo i tingim bek ol dispela yia, na em i tok: “Mi amamas tru olsem mi inap helpim ol bratasista long kamap strong moa long sait bilong bilip.” Hiroo i go helpim wok long ol hap i sot tru long ol pablisa, na dispela i bin helpim em. Em i tok: “Taim mi no go yet long Rasia, mi mekim wok elda na wok painia. Tasol taim mi kam i stap long Rasia, mi pilim olsem mi pas gut moa wantaim Jehova. Mi lain long bilip moa yet long Jehova long olgeta samting mi mekim long laip bilong mi.” Long 2005, Hiroo i maritim Svetlana, na tupela wantaim i mekim yet wok painia.

Michael na Olga wantaim Marina na Matthew

Matthew i gat 34 krismas, na brata bilong em Michael i gat 28 krismas, na ol i bilong Kanada. Tupela i go raun long Rasia na ol i kirap nogut long lukim planti nupela man i go long ol miting, tasol i no gat planti brata bilong lukautim ol miting. Matthew i tok: “Kongrigesen mi go long en i gat 200 manmeri i kam long miting, tasol 1-pela lapun elda na 1-pela yangpela kongrigesen sevan tasol i lukautim ol miting. Dispela i kirapim tru laik bilong mi long i go long Rasia na helpim ol dispela brata.” Long 2002, em i lusim Kanada na i go long Rasia.

Fopela yia bihain, Michael i go long Rasia, na em i luksave olsem ol i sot yet long ol brata. Em i stap kongrigesen sevan, olsem na ol i makim em long lukautim akaun, litresa, na teritori bilong autim tok. Na tu, ol i askim em long mekim wok olsem seketeri bilong kongrigesen. Olsem na em i mekim ol pablik tok, oganaisim ol wok bilong kibung, na wokim ol Haus Kingdom. Long nau tu, ol kongrigesen i nidim yet ol brata long mekim wok insait long kongrigesen. I hatwok long holim planti asainmen, tasol Michael i mekim wok nau olsem elda, na em i tok: “Mi amamas tru taim mi helpim ol brata. Dispela wok i winim tru olgeta narapela wok!”

Bihain, Matthew i maritim Marina, na Michael i maritim Olga. Ol dispela fopela marit na planti arapela volantia i wok yet long helpim ol kongrigesen, na ol kongrigesen i wok long kamap bikpela.

OL SISTA I HELPIM WOK BILONG BUNGIM KAIKAI

Tatyana

Long 1994, taim Tatyana i gat 16 krismas, 6-pela painia salim i go mekim wok painia long kongrigesen bilong em long Yukren. Ol dispela painia i kam long Sek Ripablik, Polan, na Slovakia. Em i tingim yet ol dispela painia, na em i tok: “Ol i save givim bel tru long mekim wok, na ol i save redi long toktok gut wantaim olgeta kain man, na ol i save mekim gutpela pasin, na ol i save gut long ol tok bilong Baibel.” Em i lukim olsem Jehova i blesing wok bilong ol, olsem na em i kisim tingting olsem, ‘Mi laik mekim wankain wok olsem ol i mekim.’

Pasin bilong ol painia i kirapim Tatyana, olsem na long taim bilong holide em i save go wantaim ol narapela long autim tok long ol teritori i stap longwe long Yukren na Belarus, em ol hap ol Witnes i no autim tok yet long en. Em i amamas tru long autim tok long ol dispela hap, olsem na em i stretim rot long i go i stap long Rasia na mekim bikpela wok moa long autim tok. Pastaim em i go stap sotpela taim long Rasia. Em i visitim wanpela sista husat i bin lusim ples na i go i stap long Rasia, na tu, em i laik painim wok mani bilong sapotim em yet long mekim wok painia. Long yia 2000, em i lusim  ples na em i go long Rasia. Yu ting i hatwok long mekim dispela senis?

Tatyana i tok: “Mi no gat mani long baim rent bilong flet, olsem na mi rentim rum long haus bilong sampela lain. Dispela i putim hevi long mi. Sampela taim mi pilim olsem mi laik i go bek long ples. Tasol oltaim Jehova i helpim mi long luksave olsem wok painia bai helpim mi.” Long nau, Tatyana i mekim wok misineri long Rasia. Em i tok: “Insait long ol yia mi bin i stap long narapela kantri, mi bin kisim planti gutpela ekspiriens na planti gutpela pren. Ol samting i kamap insait long ol dispela yia i bin strongim tru bilip bilong mi.”

Masako

Masako em wanpela sista long Japan, na em i gat 52 krismas samting. Em i gat bikpela laik tru long mekim wok olsem misineri, tasol sik i mekim na i luk olsem em i no inap long mekim dispela wok. Tasol taim em i kamap orait, em i go i stap long Rasia na helpim wok autim tok long dispela hap. Maski i hatwok long painim ples slip na wok mani, em i mekim wok bilong skulim ol man long tokples Japan, na tu, em i klinim ol haus bambai em inap lukautim em yet taim em i mekim wok painia. Wanem samting i helpim em long mekim yet wok painia?

Masako i tingim bek 14 yia samting em i mekim wok autim tok long Rasia, na em i tok: “Mi kisim bikpela amamas long mekim wok autim tok, na dispela amamas i winim tru olgeta hevi i bin painim mi. Mi autim tok long ol ples i sot tru long ol pablisa, na mi kisim planti gutpela ekspiriens.” Em i tok moa: “Inap planti yia, mi lukim olsem Jehova i lukautim mi long sait bilong klos, kaikai, na ples slip.” Na tu, Masako i helpim wok autim tok long Kirgistan. Em i helpim tu ol grup i mekim tok Inglis, tok Saina, na tok Uighur. Long nau, em i mekim wok painia long St. Petersburg.

OL FAMILI I HELPIM WOK NA KISIM BLESING

Inga na Mikhail

Sampela kantri i gat hevi bilong mani, olsem na planti famili i lusim ples na i go long ol narapela kantri long kisim gutpela sindaun. Tasol olsem Abraham na Sara i bin mekim long bipo, sampela famili i go long ol narapela kantri long mekim wok bilong Kingdom. (Stt. 12:1-9) Mikhail na Inga em tupela marit bilong Yukren, na  tupela i go stap long Rasia long 2003. Ol i bungim sampela manmeri husat i laik kisim save long tok bilong Baibel.

Mikhail i stori olsem: “Wanpela taim mipela i autim tok long hap em ol Witnes i no bin autim tok long en. Wanpela lapun man i opim dua na askim olsem, ‘Yupela ol lain bilong autim tok, a?’ Mipela i tok yes, na em i tok: ‘Mi save olsem yupela bai kam. Tok bilong Jisas i no inap lus nating.’ Dispela man i kolim tok bilong Matyu 24:14.” Mikhail i tok moa: “Mipela i bungim tu 10-pela meri bilong lotu Baptis, na ol i gat bikpela laik long kisim save long tok i tru. Ol i gat buk Stap Oltaim na long olgeta wiken ol i yusim dispela buk long stadi long Baibel. Inap planti aua, mipela i bekim ol askim bilong ol na singim ol song bilong Kingdom, na mipela i kaikai wantaim. Dispela em wanpela gutpela ekspiriens we mi no inap lusim tingting long en.” Mikhail na Inga i tok, ol i go helpim wok autim tok long ol hap i sot long ol pablisa, na dispela i helpim ol long pas gut moa wantaim Jehova, na laikim tru ol manmeri, na ol i amamas tru long laip bilong ol. Long nau, tupela i mekim wok sekit.

Oksana, Aleksey, na Yury

Yury na Oksana em tupela marit bilong Yukren, na ol i gat 35 krismas samting. Long nau, pikinini man bilong ol Aleksey, i gat 13 krismas. Long 2007, ol i go visitim brens ofis long Rasia, na ol i lukim wanpela mep bilong Rasia i gat ol bikpela teritori i stap longwe long taun. Oksana i tok: “Taim mipela i lukim dispela mep, mipela i luksave olsem ol i sot tru long ol pablisa bilong autim tok bilong Kingdom. Dispela i kirapim mipela long mekim disisen long i go long Rasia.” Wanem samting moa i kirapim ol long mekim dispela disisen? Yury i tok: “Mipela i ritim sampela atikol long ol magasin bilong yumi, olsem ‘Yu Inap Go Mekim Wok Bilong God Long Narapela Kantri?’ * Mipela i go lukim wanpela hap bilong Rasia em Brens Ofis i tokim mipela long i go long en, na mipela i go long dispela hap na painim haus na wok mani.” Long 2008, ol i lusim ples na i go long Rasia.

Pastaim, i hatwok long painim wok mani, na sampela taim ol i lusim wanpela flet na i go long narapela flet. Yury i tok: “Planti taim mipela i beten askim God long helpim mipela bambai mipela i no ken bel hevi, na mipela i mekim yet wok autim tok na bilip olsem Jehova bai sambai long mipela. Mipela i lukim stret olsem Jehova i lukautim mipela taim mipela i putim wok bilong Kingdom i stap namba 1 samting long laip bilong mipela. Dispela wok i strongim famili bilong mipela.” (Mat. 6:22, 33) Aleksey em tineja, na em tu i helpim wok autim tok long ol hap i sot tru long ol pablisa. Oksana i tok: “Dispela i bin helpim em gut tru. Em i dediket long Jehova na em i kisim baptais taim em i gat 9-pela krismas. Em i lukim olsem ol i sot tru long ol pablisa, na dispela i kirapim em long mekim wok painia haptaim long taim bilong skul holide. Mipela i amamas tru taim mipela i lukim olsem em i laikim tru wok autim tok na em i givim bel long mekim dispela wok.” Long nau, Yury na Oksana i mekim wok painia salim.

“MI BEL HEVI LONG WANPELA SAMTING TASOL”

Stori bilong ol dispela pablisa i soim klia olsem yu mas bilip tru long Jehova taim yu lusim ples na yu go long helpim wok autim tok long narapela hap. Taim ol bratasista i go helpim wok autim tok long ol hap i sot long ol pablisa, ol i save bungim sampela hevi long nupela teritori bilong ol. Tasol ol i save kisim bikpela amamas tu long autim gutnius long ol manmeri husat i laik harim tok bilong Kingdom. Olsem wanem long yu? Yu inap helpim wok autim tok na kamapim ol disaipel long ol hap i sot yet long ol pablisa? Sapos yu tingting pinis long mekim olsem, ating i no longtaim yu bai kisim wankain tingting olsem Yury. Em i tok: “Mi bel hevi long wanpela samting tasol—mi no bin kirap kwik long mekim dispela wok.”

^ par. 20 Lukim Wastaua, Oktoba 15, 1999, pes 23-27.